ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଶକ୍ତି ଦକ୍ଷତା ଏବଂ ଶକ୍ତି ସଂରକ୍ଷଣ ପଦକ୍ଷେପ କ୍ଷେତ୍ରରେ ସହଯୋଗ ବୃଦ୍ଧି ପାଇଁ ଭାରତ ଏବଂ ଭୁଟାନ ମଧ୍ୟରେ ବୁଝାମଣାପତ୍ର ସ୍ୱାକ୍ଷରକୁ ଅନୁମୋଦନ ମିଳିଛି । 

ଭାରତ ସରକାରଙ୍କ ଶକ୍ତି ମନ୍ତ୍ରଣାଳୟର ଶକ୍ତି ଦକ୍ଷତା ବ୍ୟୁରୋ ଏବଂ ଭୁଟାନ ସରକାରଙ୍କ ଶକ୍ତି ଓ ପ୍ରାକୃତିକ ସମ୍ପଦ ମନ୍ତ୍ରଣାଳୟର ଶକ୍ତି ବିଭାଗ ମଧ୍ୟରେ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଛି ।

ଏହି ବୁଝାମଣାପତ୍ରର ଏକ ଅଂଶ ଭାବରେ, ଭାରତ ଶକ୍ତି ଦକ୍ଷତା ବ୍ୟୁରୋ ଦ୍ୱାରା ବିକଶିତ ଷ୍ଟାର ଲେବଲିଂ କାର୍ଯ୍ୟକ୍ରମକୁ ପ୍ରୋତ୍ସାହିତ କରି ଘରୋଇ କ୍ଷେତ୍ରରେ ଶକ୍ତି ଦକ୍ଷତା ବୃଦ୍ଧି ପାଇଁ ଭୁଟାନକୁ ସାହାଯ୍ୟ କରିବାକୁ ଲକ୍ଷ୍ୟ ରଖିଛି । ଭାରତର ଅଭିଜ୍ଞତା ଆଧାରରେ ଭୁଟାନର ଜଳବାୟୁ ସ୍ଥିତିକୁ ଖାପଖୁଆଇବା ଭଳି ବିଲ୍ଡିଂ କୋଡ୍ ପ୍ରଣୟନକୁ ସହଜ କରାଯିବ । ଶକ୍ତି ଅଡିଟରମାନଙ୍କୁ ପ୍ରଶିକ୍ଷଣ ପ୍ରଦାନ କରି ଭୁଟାନରେ ଶକ୍ତି ପେସାଦାରଙ୍କ ଏକ ସମୂହ ସୃଷ୍ଟି କରିବା ନିମନ୍ତେ ପରିକଳ୍ପନା କରାଯାଇଛି ।

ଖୁଚୁରା ବ୍ୟବସାୟୀଙ୍କୁ ପ୍ରଶିକ୍ଷଣ ପ୍ରଦାନ କରାଯିବା ଦ୍ୱାରା ଷ୍ଟାର ରେଟେଡ୍ ଉପକରଣ ମାଧ୍ୟମରେ ଶକ୍ତି ସଞ୍ଚୟ ସମ୍ପର୍କରେ ଉପଭୋକ୍ତା ଅବଗତ ହେବେ, ଯାହା ଶକ୍ତି ଦକ୍ଷ ଉତ୍ପାଦଗୁଡ଼ିକୁ ପ୍ରସାରିତ କରିବାରେ ସାହାଯ୍ୟ କରିବ । ମାନକ ଏବଂ ଲେବଲିଂ ଯୋଜନାର ବିକାଶ ନିମନ୍ତେ ଏବଂ କାର୍ଯ୍ୟକାରୀ କରିବା ପାଇଁ ଭୁଟାନର ପ୍ରୟାସରେ ସହଯୋଗ କରିବାକୁ ଭାରତ ଲକ୍ଷ୍ୟ ରଖିଛି ।

ଅଧିକ ବିଦ୍ୟୁତ୍ ବ୍ୟବହାର କରୁଥିବା ଉପକରଣ ହେଉଛି ମୁଖ୍ୟ ଉତ୍ପାଦ, ଯାହା ଘରୋଇ କିମ୍ବା ବାଣିଜ୍ୟିକ ପ୍ରତିଷ୍ଠାନରେ ଅଧିକ ବ୍ୟବହାର କରିଥାଏ । ବିଦ୍ୟୁତ୍‌ଚାଳିତ ଉପଭୋକ୍ତା ସାମଗ୍ରୀ ବ୍ୟବହାରର ଦ୍ରୁତ ଅଭିବୃଦ୍ଧିକୁ ଦୃଷ୍ଟିରେ ରଖି ପ୍ରତିବର୍ଷ ବୈଦ୍ୟୁତିକ ଶକ୍ତିର ଚାହିଦା ବୃଦ୍ଧି ପାଉଛି । ଯଦି ଉପଭୋକ୍ତାମାନେ ଉଚ୍ଚ ଦକ୍ଷତା ଉପକରଣକୁ ପସନ୍ଦ କରନ୍ତି, ତେବେ ଏହି ବଢୁଥିବା ଚାହିଦାକୁ ଅନୁକୂଳିତ କରାଯାଇପାରିବ । ବିଇଇ ଦେଶର ଷ୍ଟାର - ଲେବଲିଂ କାର୍ଯ୍ୟକ୍ରମର ନେତୃତ୍ୱ ନେଉଛି ଯାହା ବର୍ତ୍ତମାନ ଦୈନନ୍ଦିନ ଜୀବନରେ ବ୍ୟବହୃତ ୩୭ଟି ଉପକରଣକୁ ଅନ୍ତର୍ଭୁକ୍ତ କରିଛି ।

ବୈଦେଶିକ ବ୍ୟାପାର ମନ୍ତ୍ରଣାଳୟ (ଏମ୍‌ଇଏ) ଏବଂ ଶିଳ୍ପ ଓ ଆଭ୍ୟନ୍ତରୀଣ ବାଣିଜ୍ୟ ପ୍ରୋତ୍ସାହନ ବିଭାଗ (ଡିପିଆଇଆଇଟି) ସହ ଆଲୋଚନା କରି ଶକ୍ତି ମନ୍ତ୍ରଣାଳୟ ଏହି ବୁଝାମଣାପତ୍ର ପ୍ରସ୍ତୁତ କରିଛି । ଏହି ବୁଝାମଣା ପତ୍ର ଦ୍ୱାରା ଭାରତ ଓ ଭୁଟାନ ମଧ୍ୟରେ ଶକ୍ତି ଦକ୍ଷତା ଏବଂ ଶକ୍ତି ସଂରକ୍ଷଣ ସମ୍ବନ୍ଧୀୟ ସୂଚନା, ତଥ୍ୟ ଏବଂ ବୈଷୟିକ ବିଶେଷଜ୍ଞଙ୍କ ଆଦାନପ୍ରଦାନ ସମ୍ଭବ ହେବ । ଏହା ଭୂଟାନକୁ ବଜାରରେ ଶକ୍ତି ଦକ୍ଷ ଉତ୍ପାଦର ଉପଲବ୍ଧତା ସୁନିଶ୍ଚିତ କରିବାରେ ସାହାଯ୍ୟ କରିବ । ଏହି ବୁଝାମଣାପତ୍ର ଶକ୍ତି ଦକ୍ଷତା ନୀତି ଏବଂ ଶକ୍ତି ଦକ୍ଷତା ଗବେଷଣା ଏବଂ ପ୍ରଯୁକ୍ତି ବିଦ୍ୟା ନିୟୋଜନ କ୍ଷେତ୍ରରେ ସହଯୋଗର ବିଶ୍ଳେଷଣ କରିବ ।

**********

SSP