প্রধানমন্ত্রীগী লোইশঙ
প্রধান মন্ত্রী অরুনাচল প্রদেসকী ইতানগরদা ‘বিকসিত ভারত বিকসিত নোর্থ ইস্ত’ থৌরমদা ৱা ঙাংখ্রে
প্রধান মন্ত্রীনা মনিপুর, মেঘালয়, নাগালেন্দ, সিক্কিম, ত্রিপুরা অমসুং অরুনাচল প্রদেসতা লুপা করোর ৫৫,৬০০ রোমগী তোঙান-তোঙানবা চাউখৎ-থৌরাংগী প্রোজেকশিং শঙ্গাখ্রে, মীয়ামদা কৎথোকখ্রে অমসুং উরেপ-উয়ুং তমখ্রে
অরুনাচল প্রদেসতা দিবাং মল্তিপর্পজ হায়দ্রোপৱার প্রোজেক্কী উরেপ-উয়ুং তমখ্রে
তৱাংদা নোংজু-নুংশা খাক্তনা চৎথোক-চৎশিন য়াবা লম্বী ফংহন্নবা মীয়ামদা সেলা তন্নেল কৎথোকখ্রে
লুপা করোর ১০,০০০ রোমগী উন্নাতি স্কিম হৌদোকখ্রে
ভারত অমসুং বাংলাদেসকী মরক্তা মী চৎথোক-চৎশিন অমসুং পোৎ-চৈ পুথোক-পুশিন য়াহনগদবা সাব্রুম লেন্দ পোর্ত শঙ্গাখ্রে
কোফি তেবল বুক- বিল্দিং বিকসিত অরুনাচল ফোঙখ্রে
“অৱাং-নোংপোক অসি ভারতকী অস্তালক্ষমী’ নি”
“ঐখোয়গী সরকারনা অৱাং-নোংপোক চাউখৎনবা থবক পায়খৎলে”
“নুমিৎকী অহানবা মঙালগুম চাউখৎ-থৌরাংগী থবকশিং অরুনাচল অমসুং অৱাং-নোংপোক য়ৌরক্লে”
“উন্নাতি য়োজননা অৱাং-নোংপোক্তা উদোগশিং চাউখৎহনগনি”
Posted On:
09 MAR 2024 12:08PM by PIB Imphal
ঙসি প্রধান মন্ত্রী শ্রী নরেন্দ্র মোদীনা অরুনাচল প্রদেসকী ইতানগরদা ‘বিকসিত ভারত বিকসিত নোর্থ ইস্ত’ থৌরমদা ৱা ঙাংখ্রে। শ্রী মোদীনা মনিপুর, মেঘালয়, নাগালেন্দ, সিক্কিম, ত্রিপুরা অমসুং অরুনাচল প্রদেসতা লুপা করোর ৫৫,৬০০ রোমগী তোঙান-তোঙানবা চাউখৎ-থৌরাংগী প্রোজেকশিং শঙ্গাখ্রে, মীয়ামদা কৎথোকখ্রে অমসুং উরেপ-উয়ুং তমখ্রে। মহাক্না মীয়ামদা সেলা তন্নেল কৎথোকখ্রে অমসুং লুপা করোর ১০,০০০গী উন্নাতি স্কিম হৌদোকখ্রে। ঙসিগী চাউখৎ-থৌরাংগী প্রোজেকশিংগী মনুংদা রেল, লম্বী, হকশেল, য়ুম, লাইরিক-লাইশু, ঙমখৈগী ইনফ্রাস্ত্রকচর, আই.তি, মৈ, থাউ অমসুং গ্যাসগুম্বা হিরমশিং য়াওরি।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি হৌজিক চৎথরিবা কুহ্মৈ অসি বিকসিত রাজ্যদগী বিকসিত ভারত ওইহন্নবা কুহ্মৈনি। বিকসিত অৱাং-নোংপোক্কীদমক অৱাং-নোংপোক্কী মীয়ামদা অনৌবা হরাওবা উবা ফংলে। থবক অসিগীদমক নারী শক্তিগী মতেং ফংবদা মহাক্না তৌবীমল খঙবা উৎখি।
প্রধান মন্ত্রীনা হায়খি “অৱাং-নোংপোক অসি ভারতকী অস্তালক্ষমী’ নি। লমদম অসি খা অমসুং খা-নোংপোক এসিয়াগা শম্নদুন তুরিজম, ললোন-ইতিক অমসুং নাৎকী মরীশিংগী অকনবা মরী অমা লৈনরি। ঙসি লুপা করোর ৫৫,০০০ রোমগী প্রোজেকশিং হৌদোক্লে। অরুনাচল প্রদেসতা ইমুং লিশিং কয়া মখোয়গী পাক্কাগী য়ুমশিং ফংলে, অরুনাচল অমসুং ত্রিপুরাদা ইমুং লিশিং কয়া তোতি ঈশিং ফংলে অমসুং লমদম অসিগী রাজ্য কয়াদা লম্বী-থোংগা মরী লৈনবা প্রোজেকশিং পায়খৎলে। বিকসিত নোর্থইস্ত অমগী গরেন্তিগা লোয়ননা লাইরিক-লাইশু, লম্বী, রেলৱেজ, ইনফ্রাস্ত্রকচর, হোস্পিতালশিং অমসুং তুরিজমগী প্রোজেকশিং পায়খৎলে। হৌখিবা চহি ৫দা কাইথোকখিবা ফন্দশিং অসি মমাঙগী মতমদগী শরুক মরি হেল্লে।
প্রধান মন্ত্রীনা হায়খি অৱাং-নোংপোক্কী য়েংলগা কেন্দ্র সরকারনা মিসন প্লাম ওইল পায়খৎলে অমসুং মিসন অসিগী মখাদা অহানবা থাউগী মিল ঙসি শঙ্গারে। মিসন প্লাম ওইলনা ভারতনা অচাথাউগী লমদা অত্মানির্ভর ওইহল্লগনি অমসুং লৌমীশিংগী শেন্থোক হেনগৎহল্লগনি। লৌমীশিংগী প্লাম থাবগীদমক থাগৎপা ফোঙদোকচরি।
প্রধান মন্ত্রীনা হায়খি লমদম অসিদা চাউখৎ-থৌরাংগী থবকশিং পায়খৎতুনা অৱাং-নোংপোক শীনবা থুংনা মোদী কি গরেন্তিগী ৱাহন্থোক খঙলে। মহাক্না ২০১৯দা উরেপ-উয়ুং তমখিবা সেলা তন্নেল অমসুং দোনি পোলো এয়রপোর্ত শঙ্গারে। ওইনিংবা মতম, থা নত্ত্রগা চহি ওইগেরা, লৈবাক্কীদমক অমসুং লৈবাক্কী মীয়ামগী য়াইফনবা মোদীনা থবক পাংথোক্লি।
অনৌবা মওং অমদা অৱাং-নোংপোক্তা উদোগ চাউখৎনবা উন্নাতি স্কিম হন্দক মন্ত্রীমন্দলনা অয়াবা পীখিবা অদু নিংশিংলদুনা প্রধান মন্ত্রীনা হায়খি সরকারগী থবক খুতৌ অমা ওইনা স্কিম নোংমদা লাউথোক্লে অমসুং চৎন-কাংলোনশিং পীরে। হৌখিবা চহি ১০দা অনৌবা ইনফ্রাস্ত্রকচরশিং পায়খৎলে, ঙমখৈগী য়ানদবশিং ৱারোইশিন পুরক্নবা শান্তিগী একোর্দ কয়া পুরক্লে অমসুং য়ানবা কয়া লৈরে। মথংগী খোঙথাংদি, লমদম অসিদা উদোগ পাকথোক-চাউথোকহনবনি। লুপা করোর ১০,০০০গী উন্নাতি স্কিমনা শেন থাদবা অমসুং থবক ফংবদা অনৌবা খুদোংচাবা কয়া পীরগনি। লমদম অসিগী নহারোলশিংগীদমক স্তার্দঅপশিং, অনৌবা তেক্নোলোজিশিং, হোমস্তেশিং অমসুং তুরিজমগা মরী লৈনবা খুদোংচাবশিং শেমগৎনবা মহাক্না মীৎয়েং চঙলে।
প্রধান মন্ত্রীনা হায়খি অৱাং-নোংপোক্কী নুপীশিংগী হিংবদা লাইহন্নবা সরকারনা থবক কয়া পায়খৎলে। ঙরাং মালেমগী নুপীশিংগী নুমিৎ থৌরমদা গ্যাস সিলিন্দরগী মমল লুপা ১০০ হন্থরে। মীয়ামদা তোতি ঈশিং ফংহন্নবা শিংথানিঙাই ওইবা থবকশিং পায়খৎপগীদমক অরুনাচল প্রদেসকী চীফ মিনিস্তরগী অপুনবা কাংবু থাগৎপা ফোঙদোকচরি। চাউখৎপগী তোঙান-তোঙানবা পেরামিতরশিংদা অরুনাচল অমসুং অৱাং-নোংপোক মাংজিল থাবদা অপেনবা ফাওই। নুমিৎকী অহানবা মঙালগুম চাউখৎ-থৌরাংগী থবকশিং অরুনাচল অমসুং অৱাং-নোংপোক য়ৌরক্লে। রাজ্য অসিগী য়ুমথোং ৪৫,০০০দা থক্নবা ঈশিং ফংহন্নবা প্রোজেক শঙ্গারে। অমৃত সরোভর কেম্পেনগী মখাদা সরোভর কয়া শেমগৎলে, সেল্ফ হেল্প গ্রুপশিংগী মতেংগা লোয়ননা খুঙ্গংশিংদা লাখপতি দিদি কয়া শেমগৎলে। লৈবাক অসিদা লাখপতি দিদি করোর ৩ শেমগৎনবা ঐখোয়না পান্দম থম্লি অমসুং মসিদগী অৱাং-নোংপোক্কী নুপীশিংশু কান্নবা ফংগনি।
প্রধান মন্ত্রীনা হায়খি মমাঙদা ঙমখৈদা লৈবা খুঙ্গংগী চাউখৎ-থৌরাং মীরাইখি। মহাক্না পাংথোক্লিবা থবকশিং অসি লৈবাক্কী দরকার ওইবগী মতুংইন্না পায়খৎপনি অমসুং মীখলগী য়েংলগা পায়খৎপা নত্তে। মহাক্কী মথংগী তামর্দা ইঞ্জিনিয়ারিংগী অঙকপা অমা ওইরিবা সেলা তন্নেলদা দিফেন্সকী মীওইশিং উন্নবা মহাক লাক্কনি। তন্নেল অসি কুম্বী-কালেন নাইদনা চৎপা য়াবা লম্বী ফংহনগনি অমসুং তৱাংগী মীয়াম চৎথোক-চৎশিন হেন্না নুংঙাইহল্লগনি। লমদম অসিদা তন্নেল কয়া শেমগৎপগী থবকশিং পায়খৎলি।
প্রধান মন্ত্রীনা হায়খি ঙমখৈদা লৈবা খুঙ্গংশিং অহানবা খুঙ্গংশিংনি হায়না মহাক্না মতম চুপ্পদা খল্লি অমসুং ভাইব্রেন্ত ভিল্লেজ প্রোগ্রাম অসি ৱাখল্লোন অসিগী খুদমনি। ঙসি খুঙ্গং ১২৫ রোমগী লম্বীগী প্রোজেকশিং হৌদোক্লে অমসুং খুঙ্গং ১৫০দা তুরিজমগা মরী লৈনবা প্রোজেকশিংগী উরেপ-উয়ুংশিং তম্লে। পি.এম-জনমান স্কিমগী মখাদা খ্বাইদগী খুদোংথিনিঙাই ওইরবা অমসুং চাউখৎত্রিবা ত্রাইবশিংগী খুদোংচাদবশিং কোকহন্নবা থবকশিং পায়খৎলে। ঙসি মনিপুরদা অসিগুম্বা ত্রাইবশিংগী অঙ্গনৱাদি সেন্তরশিং শানবা উরেপ-উয়ুং তমখ্রে।
প্রধান মন্ত্রীনা হায়খি হিংবদা লাইহন্নবা অমসুং ললোন-ইতিক পাংথোকপা লাইহন্নবা লম্বী-থোং অমসুং ইলেক্ত্রিসিতিগা মরী লৈনবা চাউখৎ-থৌরাংগী থবকশিং হৌদোক্লে। হৌখিবা চহি ১০দা কিমি ৬০০০গী হায়ৱেশিং শেমগৎলে অমসুং কিমি ২০০০গী রেল লাইনশিং শেমগৎলে। পৱার সেক্তরদা ঙসি অরুনাচল প্রদেসতা দিবাং মল্তিপর্পজ হায়দ্রো পৱার প্রোজেক অমসুং ত্রিপুরাদা সোলার পৱার প্রোজেক থবক হৌরে। দিবাং দাম ভারতকী খ্বাইদগী ৱাংবা দাম ওইরে। মহাক্না অৱাং-নোংপোক্তা খ্বাইদগী ৱাংবা থোং অমসুং খ্বাইদগী ৱাংবা দাম লৈবাক মীয়ামদা কৎথোক্লে।
প্রধান মন্ত্রীনা হায়খি ঙসিগী মহাক্কী খোঙচৎশিংগী মনুংদা অরুনাচল প্রদেস, অসাম, নোংচুপ বেঙ্গল অমসুং উত্তর প্রদেস য়াওরি। ভারতমচা খুদিংমক মহাক্কী ইমু-মনুংনি। মীয়ামদা পাক্কাগী য়ুম, লেম্না চেঙ, অফবা থক্নবা ঈশিং, মৈ, তোইলেত,গ্যাস কন্নেক্সন, লেম্না লায়য়েংবা অমসুং ইন্তরনেত কন্নেক্সন য়াওনা তঙাইফদবশিং ফংহন্দ্রিবা ফাওবা মহাক পোথারোই।
লোইশিল্লকপদা, প্রধান মন্ত্রীনা হায়খি অদোমগী মঙলানশিং ঐগী ৱাশকশিংনি। ঙসিগী চাউখৎ-থৌরাংগী প্রোজেকশিংগীদমক অৱাং-নোংপোক শীনবা থুংনা হরাওবা ফোঙদোকচরি। প্রধান মন্ত্রীনা হায়বদগী, মীয়াম মখোয়গী মোবাইল ফোনশিংগী ফ্লাসলাইতশিং ঙালহলখি আমসুং চাউখৎপগী কুহ্মৈগী হরাওবা ফোঙদোকখি। মহাক্না হায়খি মসিগী শক্তম অসিনা লৈবাক অসিদা থৌনা হাপকনি।
থৌরম অদুদা শরুক য়াখিবশিংগী মনুংদা অরুনাচল প্রদেসকী রাজ্যপাল লেপ্তনেন্ত জেনেরেল (পোথারবা) কাইৱাল্যা ত্রিবিক্রম পারনাইক অমসুং অরুনাচল প্রদেসকী চীফ মিনিস্তর শ্রী পেমা খান্দু য়াওখি।
নুঙগীৱারোল
ইতানগরদা পাংথোকপা ‘বিকসিত ভারত বিকসিত নোর্থ ইস্ত’ থৌরমদা মনিপুর, মেঘালয়, নাগালেন্দ, সিক্কিম, ত্রিপুরা অমসুং অরুনাচল প্রদেসতা রেল, লম্বী, হকশেল, য়ুম, লাইরিক-লাইশু, ঙমখৈগী ইনফ্রাস্ত্রকচর, আই.তি, মৈ, থাউ অমসুং গ্যাসগুম্বা হিরমশিংগা মরী লৈনবা তোঙান-তোঙানবা চাউখৎ-থৌরাংগী থবকশিং হৌদোক্তুনা প্রধান মন্ত্রীগী চাউখৎপা অৱাং-নোংপোক্কী পান্দম হেন্না মপাঙ্গল কনখৎহল্লে।
থৌরম মনুংদা, প্রধান মন্ত্রীনা অৱাং-নোংপোক্কী অনৌবা উদোগ চাউখৎহন্নবা স্কিম উন্নাতি( উত্তর পুর্বা ত্রান্সফোর্মেতিপ ইন্দস্ত্রিলাইজেসন স্কিম) হৌদোকখি। স্কিম অসিনা অৱাং-নোংপোক্তা উদোগকী থবকশিং মপাঙ্গল কনখৎহনগনি,অনৌবা শেন থাদরক্কনি, অনৌবা মেনুফেকচরিং অমসুং সর্বিস য়ুনিতশিং লিংখৎপদা মতেং পাংগনি অমসুং অৱাং-নোংপোক রাজ্যশিংদা থবক ফংবা হেনগৎহনগনি। লুপা করোর ১০,০০০ রোমগী স্কিম অসি ভারতনা মপুংফানা শেন পুথোকপনি অমসুং অৱাং-নোংপোক্কী রাজ্য ৮ কোনশিল্লি। স্কিম অসিনা কেপিতেল ইনভেস্তমেন্ত, ইন্তরেস্ত সবভেন্সনগী খুদোংচাবশিং অমসুং য়াবা ফংলবা য়ুনিতশিংদা মেনুফেকচরিং অমসুং সর্বিস লিঙ্ক ইন্সেন্তিপ অমা পীরি। খুদোংচাবা ফংবা য়ারবা য়ুনিতশিং লাইনা অমসুং মনুং-মপান নাইদনা রেজিস্তার তৌনবা পোর্তেল অমসু হাংদোক্লে। উন্নাতিনা উদোগ চাউখৎহনবদা মতেং পাংগনি অমসুং অৱাং-নোংপোক লমদমগী শেন-থুম চাউখৎহনবদা মতেং পাংগনি।
লুপা করোর ৮২৫ রোম চঙনা শেমগৎপা সেলা তন্নেল প্রোজেক অসি ইঞ্জিনিয়ারিংগী অঙকপা অমনি। মসিনা অরুনাচল প্রদেসতা বালিপারা-চারিদুয়ার-তৱাং লম্বী ফাওরগা তৱাং ফাওবা কুম্বী-কালেন নাইদনা চৎপা য়াবগী খুদোংচাবা পীগনি। মসি অনৌবা অস্ত্রেলিয়ান তেন্নেল্লিং মেথোদ শীজিন্নদুনা হুৎপনি অমসুং খ্বাইদগী ফবা অশোই-অঙাম থোক্তনবা খুদোংচাবশিং য়াওরে। প্রোজেক অসিনা লমদম অসিদা অয়াংবা অমসুং হেন্না নুংঙাইবা চৎথোক-চৎশিনগী লম্বী অমা পীবতা নত্তনা লৈবাক অসিগী লাল্লোংগী মরুওইবা অমসুনি। প্রধান মন্ত্রীনা ফেব্রুৱারি ২০১৯দা সেলা তেন্নেলগী উরেপ-উয়ুং তমখিবনি।
প্রধান মন্ত্রীনা অরুনাচল প্রদেসতা লুপা করোর ৪১,০০০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাখ্রে অমসুং উরেপ-উয়ুং তমখ্রে।
প্রধান মন্ত্রীনা অরুনাচল প্রদেসকী লৱার দিবাং ভেল্লি জিলাদা দিবাং মল্তিপর্পজ হায়দ্রোপৱার প্রোজেককী উরেপ-উয়ুং তমখি। লুপা করোর ৩১,৮৭৫ হেন্না চঙনা শাগদৌরিবা দাম অসি লৈবাক অসিদা খ্বাইদগী ৱাংবা দাম ওইরগনি। মসিনা মৈ পুথোক্কনি, ঈশিং ইচাউ হন্থহনবদা মতেং পাংগনি অমসুং থবক ফংনবগী খুদোংচাবশিং পীগনি অমসুং লমদম অসিগী শেন-থুম অমসুং খুন্নাই চাউখৎহনগনি।
উরেপ-উয়ুং তমখিবা অতোপ্পা মরুওইবা প্রোজেকশিংগী মনুংদা ‘ভাইব্রেন্ত ভিলেজ প্রোগ্রাম’গী মখাদা তোঙান-তোঙানবা লম্বী, ইনভাইরোনমেন্ত অমসুং তুরিজমগী প্রোজেকশিং; খ্বাইদগী নৌবা ইনফ্রাস্ত্রকচরগী খুদোংচাবশিংগী খুৎথাংদা মগুন লৈবা তাকপী-তম্বীবগী খুদোংচাবা পীনবা স্কুলশিংগী মরক্তগী স্কুল ৫০ গোল্দন জুব্লি স্কুলশিং ওনখৎপা; দোনয়ি-পোলো এয়রপোর্ত-নাহারলাগুন রেলৱে স্তেসন লম্বী লেন অনি ওইহনবা য়াওরি।
প্রধান মন্ত্রীনা অরুনাচল প্রদেসতা মীয়ামদা কৎথোকখিবা মরুওইবা প্রোজেকশিংগী মনুংদা তোঙান-তোঙানবা লম্বীগী প্রোজেকশিং; জল জিবন মিসনগী প্রোজেক ১১০০ রোম, খুঙ্গং ৩০০ রোম কান্নবা পীনবা য়ুনিভর্সেল সর্বিস ওব্লিকেসন ফন্দ(য়ু এস ও এফ)কী মখাদা তেলিকোম তৱার ১৭০ য়াওরি। প্রধান মন্ত্রীনা লুপা করোর ৪৫০ রোম চঙনা প্রধান মন্ত্রী অৱাস য়োজনা(সহর অমসুং খুঙ্গং অনিমক)গী মখাদা শাবা য়ুম ৩৫,০০০ বেনিফিসরিশিংদা খুৎশীন্নখি।
প্রধান মন্ত্রীনা মনিপুরদা লুপা করোর ৩৪০০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাখি অমসুং উরেপ-উয়ুং তমখি। উরেপ-উয়ুং তমখিবা মরুওইবা প্রোজেকশিংগী মনুংদা নিলাকুথিদা য়ুনিতি মোল শানবা; মন্ত্রীপুখ্রিদা মনিপুর আই.তি এস.ই.জেৎকী প্রোসেসিং জোনগী ইনফ্রাস্ত্রকচর চাউখৎহনবা; অখন্নবা সাইকিয়াত্রিক কিয়ারগী খুদোংচাবা পীনবা লম্ফেলপাত্তা ফমুং ৬০গী স্তেৎ হোস্পিতাল শাবা; অমসুং ইম্ফাল ৱেস্ত জিলাদা মনিপুর তেক্নিকেল য়ুনিভর্সিতিগী ইনফ্রাস্ত্রকচর চাউখৎহনবা য়াওরি। প্রধান মন্ত্রীনা মনিপুরদা শঙ্গাগখিবা প্রোজেকশিংগী মনুংদা তোঙান-তোঙানবা লম্বীগী প্রোজেকশিং অমসুং থক্নবা ঈশিং পীনবা প্রোজেকশিং য়াওরি।
প্রধান মন্ত্রীনা নাগালেন্দদা লুপা করোর ১৭,০০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাখি অমসুং উরেপ-উয়ুং তমখি। উরেপ-উয়ুং তমখিবা মরুওইবা প্রোজেকশিংগী মনুংদা চুমৌকেদিমা জিলাদা য়ুনিতি মোল শাবা অমসুং দিমাপুরগী নগরজানদা কেভি ১৩২ সব-স্তেসনতা কেপাসিতি ত্রান্সফোর্মেসন ফগৎহনবা য়াওরি প্রধান মন্ত্রীনা চেন্দাং সেদ্দল-নোকলাক(ফেজ-১) লম্বী ফগৎহন্নবা প্রোজে অমসুং কোহিমা-জেসামি লম্বী য়াওনা অতোপ্পা লম্বীগী প্রোজেক কয়াসু শঙ্গাখি।
প্রধান মন্ত্রীনা মেঘালয়দা লুপা করোর ২৯০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাখি অমসুং উরেপ-উয়ুং তমখি। উরেপ-উয়ুং তমখিবা মরুওইবা প্রোজেকশিংগী মনুংদা তুরাদা আই.তি পার্ক শাবা; অমসুং নিউ শিল্লোং তাউন্সিপতা অনৌবা লেন মরিগী লম্বী শেমগৎপা অমসুং হৌজিক লৈরিবা লেন অনিগী লম্বী লেন মরি ওনখৎপা য়াওরি। প্রধান মন্ত্রীনা অপ্পা শিল্লোংদা ফার্মরস হোস্তেল-কম-ত্রেনিং সেন্তরশু শঙ্গাখি।
প্রধান মন্ত্রীনা সিক্কিমদা লুপা করোর ৪৫০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাখি অমসুং উরেপ-উয়ুং তমখি। প্রধান মন্ত্রীনা উরেপ-উয়ুং তমখিবা প্রোজেকশিংগী মনুংদা রঙপো রেলৱে স্তেসন অমুক হন্না শেমগৎপা অমসুং অতোপ্পা লম্বীগী প্রোজেকশিং য়াওরি। প্রধান মন্ত্রীনা সিক্কিমদা থারপু-দারামদিন শম্নবা অনৌবা লম্বী শঙ্গাখি।
প্রধান মন্ত্রীনা ত্রিপুরাদা লুপা করোর ৮৫০০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাখি অমসুং উরেপ-উয়ুং তমখি। উরেপ-উয়ুং তমখিবা মরুওইবা প্রোজেকশিংগী মনুংদা অগরতালা ৱেস্তর্ন বিপাস শাবা অমসুং রাজ্য শীনবা থুংনা তোঙান-তোঙানবা লম্বীগী প্রোজেকশিং; সেকেরকোতেদা ইন্দিয়ান ওইলগী অনৌবা দিপো শাবা; অমসুং নিশাদা লাইচুরবশিংগী খুন্দা-লৈতাহন্নবা ইন্তিগ্রেতেদ রিহেবিলিতেসন সেন্তর শাবা য়াওরি। প্রধান মন্ত্রীনা রাজ্য অসিদা শঙ্গাখিবা তোঙান-তোঙানবা প্রোজেকশিংগী মনুংদা খুঙ্গংগী য়ুমথোং লাখ ১.৪৬ তা তোতি ঈশিং ফংহন্নবা প্রোজেক অমসুং সাউথ ত্রিপুরা জিলাগী সাব্রুমদা লুপা করোর ২৩০ রোম চঙনা শাবা লেন্দ পোর্ত য়াওরি।
নৌনা শাবা সাব্রুম লেন্দ পোর্ত অসি ভারত অমসুং বাংলদেসকী মালেমগী ঙমখৈ পরিংদা শাবনি। লেন্দ পোর্ত অসিদা পেসেঞ্জর তর্মিনেল বিল্দিং, কার্গো এদমিনিস্ত্রেতিপ বিল্দিং, ৱায়ারহাওস, ফাইয়ার স্তেসন বিল্দিং, ইলেক্ত্রিকেল সবস্তেসন, পম্প হাওস য়াওরি। কনাগুম্বা মীওই অমনা কিমি ১৭০০ লাপ্না লৈরিবা নোংচুপ বেঙ্গলগী কলকাতা/হালদিয়া পোর্ত ফাওবা চৎপগী মহুত্তা কিমি ৭৫ লাপ্না লৈরিবা বাংলাদেসকী চিত্তাগোং পোর্ততা হকথেংননা মসিনা ভারত অমসুং বাংলাদেসকী মরক্তা পেসেঞ্জর চৎথোক-চৎশিন তৌবা অমসুং কার্গো পুথোক-পুশিনগী খুদোংচাবা পীগনি। সাব্রুম লেন্দ পোর্ত শানবা মার্চ ২০২১দা প্রধান মন্ত্রীনা উরেপ-উয়ুং তমখিবনি।
***
(Release ID: 2013039)
Visitor Counter : 83
Read this release in:
Telugu
,
Khasi
,
English
,
Urdu
,
Marathi
,
Hindi
,
Bengali-TR
,
Bengali
,
Assamese
,
Punjabi
,
Gujarati
,
Odia
,
Tamil
,
Kannada
,
Malayalam