ফেব্রুৱারি ২৬,২০২৪গী অয়ুক পুং ১০:৩০ তাবদা নিউ দিল্লিগী ভারত মন্দপামদা, প্রধান মন্ত্রী শ্রী নরেন্দ্র মোদীনা লৈবাক অসিদা পাংথোকপা খ্বাইদগী চাউবা মালেমগী তেক্সতাইলগী থৌরম অমা ওইরিবা ভারত তেক্স ২০২৪ হৌদোক্লগনি।

ভারত তেক্স ২০২৪ ফেব্রুৱারি ২৬-২৯ ফাওবা পাংথোক্কনি। প্রধান মন্ত্রীগী ফাইব এফ ভিজন্দগী ইথিল ফংদুনা, ভারত তেক্স ২০২৪ অসি ফার্ম, ফোরেন, ফাইবর, ফেব্রিক, ফেসন অমসুং তেক্সতাইলগী ভেলু চেনশিং কোনশিনবা অপুনবা থৌরম অমনি। মসিদা তেক্সতাইল সেক্তরদা ভারতকী থৌনা উৎকনি অমসুং মালেমগী তেক্সতাইলগী পৱারহাওস অমা ওইনা ভারতকী ফিবম অমুক হন্না চেৎশিনহনগনি।

তেক্সতাইল এক্সপোর্ত প্রোমোসন কাউন্সিলগী অপুনবা কাংবু অমনা শীনবা অমসুং সরকারনা শৌগৎলিবা প্রধান মন্ত্রীগী ফাইব এফ ভিজন্দগী ইথিল ফংদুনা, ভারত তেক্স ২০২৪ অসি ললোন-ইতিক অমসুং শেন থাদবগী য়ুম্বী অনিদা শেমগৎপনি। নুমিৎ মরিনিগী থৌরম অসিদা নোলেজ সেসন ৬৫ দা মালেমগী পেনেলিস্ত ১০০ হেনবনা সেক্তর অসিগা মরী লৈনবা তোঙান-তোঙানবা হিরমশিং খন্নগনি। মসিদা ইন্দি হত  অমা হাংদোক্তুনা ভারতনা তেক্সতাইল হেরিতেচগী থিমশিংগী ফেসনশিং, মালেমগী দিজাইনশিং অমসুং ফেব্রিক তেস্তিং জোনশিং অমসুং পোৎথোক উৎফমশিং লৈগনি।

ভারত তেক্স ২০২৪ তা থৌশিল শেম্বশিং অমসুং মালেমগী সি.ই.ওশিং, একজিবিতর ৩,৫০০ হেনবা, লৈবাক ১০০ হেনবগী বয়র ৩০০০ হেনবা অমসুং বিজিনেস ভিজিতর ৪০,০০০ হেনবা, তেক্সতাইলগী মহৈরোয়শিং, ফিশাবীশিং, খুৎহৈবশিং অমসুং তেক্সতাইলগী শিন্মীশিং শরুক য়ারবা য়াই। থৌরম মনুংদা লাউথোকপা ৫০ অমসুং এম.ও.য়ুশিং খুৎয়েক পীনরবা য়াই। মসি প্রধান মন্ত্রীগী অত্মানির্ভর ভারত অমসুং বিকসিত ভারতকী পান্দম ফংনবা মাইকৈদা থাংজিনবা অতোপ্পা মরুওইবা খোঙথাং অমা ওইগনি।

****