U Myntri Sorkar Pdeng ba dei khmih ia ka tnat Youth Affairs & Sports, Anurag Singh Thakur u la plié paidbah ia ka lympung ialehkai Khelo India University games mynta ka sngi ha Guwahati.

U Myntri Rangbah Duh, Narendra Modi, mynta ka sngi u la ai jingkren lyngba ka video ia ka lympung ialehkai Khelo India University Games ka ba dang pynlong ha ki hynniew tylli ki jylla ka thain shatei lammihngi. U Myntri Rangbah Duh u la kdew sha u mascot jong ka Khelo India University Games, ‘Ashtalakshmi’ ha ka dur jong ka thapbalieh. U Myntri Rangbah Duh uba ju khot Ashtalakshi na ka por sha ka por ia ki jylla ka thain shatei lammihngi u la ong, “ka jingpynlong ia ka thapbalieh ia u mascot jong kane ka lympung ialehkai ka dei ka dak kumno ki jingthrang jong ka thain shatei lammihngi ki la ioh ia ki thapniang ba thymmai.”

Ha ka jingkitbok kitrwiang ia baroh ki nongialehkai, u Myntri Rangbah Duh u la iaroh ia ki na ka bynta ka jingwanrah ia ka dak jong ka ‘Ek Bharat Shreshtha Bharat’ ha Guwahati. "Lehkai kylluid mynsiem, lehkai khlem ka jingtieng, jop na ka bynta lajong bad na ka bynta ka kynhun jong phi, bad wat lada phi shah rem, wat khuslai. Man ka jingjynthut ka dei ka lad ban ioh jinghikai,” la ong u Myntri Rangbah Duh.

Ha ka jingkdew sha ki sienjam ha kylleng ka ri na ka bynta ki kam ialehkai, u Myntri Rangbah Duh u la ong ba ha ryngkat ka Khelo India University Games ba dang long mynta ha ka thain shatei lammihngi, ki  Khelo India Winter Games ha Ladakh, Khelo India Youth Games ha Tamil Nadu, bad Beach Games ha Diu ki dang iaid shaphrang bad u la ong, “Nga sngew kmen ban iohi ia ka jingpynlong ia ki lympung ialehkai ha man ki bynta jong ka India na ka thain North sha ka South bad na ka Sepngi sha ka Mihngi.” U la iaroh ia ki jingpyrshang jong ki Sorkar jylla, ba kynthup ia ka Sorkar Assam kiba la noh synniang ban kyntiew ia ki kam ialehkai bad ka jingai rynsan ia ki samla ba kin pyni ia la ki sap.

Ha kaba iadei bad ka jingkylla ka jingsngew shaphang ki kam ialehkai, u Myntri Rangbah Duh u la ban jur halor ka jingkylla ka jingsngew jong ki kmie ki kpa da kaba ong ba ha ki por mynshuwa, ki kmie ki kpa ki artatien ban shah ia ki khun jong ki ba kin iashim bynta ha ki kam ialehkai namar ba ki khuslai ba ki khun jong ki kin phaikhmat noh na ki jingpule sha ki jingialehkai. U la kdew sha ki jingkylla mynta ha kaba ki kmie ki kpa ki sngew sarong na ka bynta ki jingjop jong ki khun jong ki ha ki kam ialehkai, la ka dei ha ka kyrdan jong ka jylla, ka ri ne shabar ri ruh.

U Myntri Rangbah Duh u la ban jur halor ka jingdonkam ban rakhe bad ai burom ia ki jingjop jong ki nongialehkai da kaba ong, “Ki dei tang ki jingjop ha ki kam pule ba ngi rakhe, ngi dei ban wanrah ia ka jinglong jingman ha kaba ngi ai burom ia kito kiba kiew shaphrang ha ki kam ialehkai.” Da kaba ban jur halor ka jingdonkam ban ioh jinghikai na ki kam ialehkai ba khlain ha ka thain shatei lammihngi, ha kaba ki briew ki rakhe bha ia ki kam ialehkai kaba ai mynsiem ia ki nongialehkai football, athletics, badminton, boxing, weightlifting bad chess. U Myntri Rangbah Duh u la ong ba u ngeit skhem ba ka jingskhem jingmut jong ki nongialehkai kiba iashim bynta ha ka lympung Khelo India University Games kin ioh ia ki jingshem ba kyrpang bad kin don bynta ruh ha ka jingkyntiew ia ki kam ialehkai ha kylleng ka India.

U Myntri Rangbah u la kdew sha ki lad ki lynti kiba don na ka bynta ki samla da kaba ong, “La ka dei ka Khelo India, Tops, lane kiwei kiwei ki sienjam, ka la don ka jinglong jingman kaba plié lad ia ki samla jong ngi.” U la ban jur halor ki jingpyrshang jong ka Sorkar ban wanrah ia ka jinglong jingman kaba iarap ia ki nongialehkai, naduh ki jaka ai jinghikai bad ki scholarship, ka jingmang tyngka kaba heh tam kaba haduh T 3500 klur na ka bynta ki kam ialehkai mynta u snem.

U Myntri Rangbah Duh u la iathuh shaphang ki jingjop jong ka India ha ki lympung ialehkai ha kylleng ka pyrthei. U la iaroh ia ka bor jong ka India ban iashim bynta ha kine ki lympung da kaba kdew sha ki jingjop ha ki lympung bapher bapher kum ka World University Games ha kaba ki nongialehkai jong ka India ki la ioh ia ki jingjop bym pat ju ioh mynshuwa ha kaba ki la jop 26 tylli ki medal ha u 2023 na tang 4 tylli ha u snem 2019. U la kren ruh shaphang ka jingjop bun tam ki medal ha ka lympung Asian Games. “Kane kam dei tang ka jingbun ki medal, kane ka dei ka jingpynshisha ia ka bor jong ki nongialehkai jong ngi kiba lah ban ioh ia kum kine ki jingjop haba ki ioh jingiarap na ki rukom treikam ba don nongrim ha ka science,” u la bynrap.

Haba kren shaphang ki jingngeit ba ioh mynsiem lyngba ki kam ialehkai, u Myntri Rangbah duh u la ban jur, “Ka jingjop ha ki kam ialehkai kam dei tang ka jingdon ia ka sap, ka donkam ia ka jinglong kaba jai jai, ka jinglong nongialam, ka jingiatreilang bad ka jinglong kaba iaineh.” U la pynshlur ia ki samla ialehkai ban shim ia ki kam ialehkai ym tang na ka bynta ka jingkoit jingkhiah jong ka met hynrei ban ioh ia ki sap ba donkam na ka bynta ka jingim, da kaba ong, “Kito kiba ialehkai, ki kiew shaphrang.”

U Myntri Rangbah duh Modi u la kyntu ia ki nongialehkai ban peit ia ka jingitynnad jong ka thain shatei lammihngi ym tang ha ki kam ialehkai. U la pynshlur ia ki ba kin leit sha ki bynta jong ka thain hadien jong kane ka lympung ialehkai ban ioh ia ki jingsah jingkynmaw bad iasam ia ki jingshem jong ngi ha ka social media da kaba pyndonkam ia ka hashtag #NorthEastMemories. Shuh shuh, u la ai jingmut ruh ban hikai katto katne ki ktien jong ka thain ban iakren bad ki briew ba ki iakynduh. U Myntri Rangbah duh Modi u la bthah ia ki ban pyrshang ruh ia ka Bhashini App.

Ha ka jingialang u Myntri Sorkar Pdeng ba dei khmih ia ka Tnat Kam ialehkai, Anurag Singh Thakur u la ong ba hadien ka jingjop jong ka Khelo India University Games ba la long ha u snem ba ladep ha Lucknow, Uttar Pradesh bad ka Khelo India Winter Games ba nyngkong ha Ladakh, mynta ka la dei ka por ia ngi ban tyngshain ha ka University Games ba mynta u snem hangne ha nongbah Guwahati.

U la ong ruh ba ka 4^th Khelo India University Games 2023 ka pynkhreh ban pyni ia 4544 ngut ki nongialehkai na kylleng ka ri, ki ban iakhun ha 18 tylli ki jaka bapher bapher jong ki jylla ka thain shatei lammihngi jong ka Assam, Arunachal Pradesh, Meghalaya, Mizoram, Sikkim, Nagaland, bad Tripura – ki Ashtalakshmi jong ngi.

U Anurag Singh Thakur u la bynrap ba ha kane ka lympung ialehkai yn don 20 tylli ki jingialehkai, kynthup ia ka athletics, rugby, swimming, badminton, hockey, bad football, lem bad kiwei kiwei.

U la pyntip ruh ba kum shi bynta ka thong jong ngi ban kyntiew ia ka Fit India, ngi la kynthup ruh ia ka yoga bad ki jingialehkai tynrai kum ka Mallakhamb ha kane ka lympung ialehkai.

U la ong ruh ba to ai ba kine ki jingialehkai kin wanrah ka mynsiem shitrhem bad ka jingiatylli ha kylleng ka ri bakhraw jong ngi. To ai ba yn kynmaw ia ka 4^th Khelo India University Games ym tang ka jingpynkhein rekod lane ka jingjop ia ki takma, hynrei na ka bynta ka jingiadei paralok, bad ka jingangnud jong baroh ia ka Viksit Bharat.

****