ਭਾਰਤ ਸਰਕਾਰ ਨੇ 4 ਗੀਗਾਵਾਟ ਦੀ ਕੁੱਲ ਸਮਰੱਥਾ ਵਾਲੀ ਆਫ-ਸ਼ੋਰ ਪੌਣ ਊਰਜਾ ਦੇ ਵਿਕਾਸ ਲਈ ਬੋਲੀਆਂ ਦੀ ਮੰਗ ਕੀਤੀ ਹੈ। ਅੰਤਰਰਾਸ਼ਟਰੀ ਪ੍ਰਤੀਯੋਗੀ ਬੋਲੀ ਰਾਹੀਂ, ਤਮਿਲਨਾਡੂ ਦੇ ਤੱਟ 'ਤੇ ਆਫਸ਼ੋਰ ਵਿੰਡ ਪਾਵਰ ਪ੍ਰੋਜੈਕਟਾਂ ਦੇ ਵਿਕਾਸ ਲਈ, ਖੁੱਲ੍ਹੀ ਪਹੁੰਚ ਦੇ ਆਧਾਰ 'ਤੇ 1 ਗੀਗਾਵਾਟ ਦੇ ਚਾਰ ਬਲਾਕਾਂ ਲਈ ਬੋਲੀਆਂ ਮੰਗੀਆਂ ਗਈਆਂ ਹਨ। ਇਸ ਵਿਵਸਥਾ ਦੇ ਤਹਿਤ, ਹਰ ਇੱਕ ਬਲਾਕ ਲਈ ਬੋਲੀ ਜਿੱਤਣ ਵਾਲੇ ਡਿਵੈਲਪਰ 1 ਗੀਗਾਵਾਟ ਆਫ-ਸ਼ੋਰ ਵਿੰਡ ਐਨਰਜੀ ਸਮਰੱਥਾ ਸਥਾਪਤ ਕਰਨਗੇ ਅਤੇ ਓਪਨ ਐਕਸੈਸ ਪ੍ਰਣਾਲੀ ਦੇ ਤਹਿਤ ਖਪਤਕਾਰਾਂ ਨੂੰ ਸਿੱਧੀ ਬਿਜਲੀ ਵੇਚਣਗੇ। ਓਪਨ ਐਕਸੈਸ ਬੋਲੀਆਂ ਦੇ ਤਹਿਤ ਕੋਈ ਵਿਹਾਰਕਤਾ ਗੈਪ ਫੰਡਿੰਗ (ਵੀਜੀਐੱਫ) ਨਹੀਂ ਦਿੱਤੀ ਜਾਂਦੀ ਹੈ ਅਤੇ ਤਿਆਰ ਕੀਤੀ ਗਈ ਅਖੁੱਟ ਊਰਜਾ ਨੂੰ ਉਦਯੋਗਾਂ ਵਰਗੀਆਂ ਸੰਸਥਾਵਾਂ ਨੂੰ ਵੇਚਿਆ ਜਾਵੇਗਾ, ਜੋ ਮੌਜੂਦਾ ਸਮੇਂ ਵਿੱਚ ਉੱਚ-ਟੈਰਿਫ ਬੈਂਡ ਵਿੱਚ ਸ਼ਾਮਲ ਹਨ।

ਆਫ-ਸ਼ੋਰ ਪੌਣ ਦੇ ਬਹੁਤ ਸਾਰੇ ਫਾਇਦੇ ਹਨ। ਇਹ ਜ਼ਮੀਨੀ ਰੁਕਾਵਟਾਂ ਨੂੰ ਦੂਰ ਕਰਦਾ ਹੈ; ਇਸ ਵਿੱਚ ਉੱਚ ਸਮਰੱਥਾ ਉਪਯੋਗਤਾ ਫੰਕਸ਼ਨ ਹੈ - ਜੋ ਲਗਭਗ 50% ਤੱਕ ਪਹੁੰਚਦੀ ਹੈ। ਇਸ ਤੋਂ ਇਲਾਵਾ, ਆਫ-ਸ਼ੋਰ ਵਿੰਡ ਟਰਬਾਈਨਾਂ ਦੀ ਕੁਸ਼ਲਤਾ ਆਨ-ਸ਼ੋਰ ਵਿੰਡ ਟਰਬਾਈਨਾਂ ਨਾਲੋਂ ਵੱਧ ਹੈ; ਹਰ ਇੱਕ ਟਰਬਾਈਨ 15 ਮੈਗਾਵਾਟ ਦੀ ਹੈ।

ਨਵੀਂ ਅਤੇ ਅਖੁੱਟ ਊਰਜਾ ਮੰਤਰਾਲੇ ਦੇ ਪ੍ਰਸ਼ਾਸਕੀ ਕੰਟਰੋਲ ਅਧੀਨ ਭਾਰਤ ਸਰਕਾਰ ਦੇ ਇੱਕ ਉੱਦਮ ਸੋਲਰ ਐਨਰਜੀ ਕਾਰਪੋਰੇਸ਼ਨ ਆਫ਼ ਇੰਡੀਆ (ਐੱਸਈਸੀਆਈ) ਦੁਆਰਾ ਆਫ-ਸ਼ੋਰ ਵਿੰਡ ਐਨਰਜੀ ਬੋਲੀ ਮੰਗਵਾਈ ਗਈ ਹੈ। ਸਾਰੀਆਂ ਲੋੜੀਂਦੀਆਂ ਵਾਤਾਵਰਣ ਪ੍ਰਵਾਨਗੀਆਂ ਪ੍ਰਾਪਤ ਕਰਨ ਤੋਂ ਬਾਅਦ ਬੋਲੀ ਲਗਾਈ ਜਾ ਰਹੀ ਹੈ। ਟੈਂਡਰ ਨੂੰ ਸੱਦਾ ਦੇਣ ਵਾਲਾ ਨੋਟਿਸ ਇੱਥੇ ਦੇਖਿਆ ਜਾ ਸਕਦਾ ਹੈ- https://www.seci.co.in/Upload/New/638424078343649435.pdf ।

ਭਾਰਤ ਪਹਿਲਾਂ ਹੀ ਅਖੁੱਟ ਊਰਜਾ ਦੇ ਖੇਤਰ ਵਿੱਚ ਇੱਕ ਆਲਮੀ ਆਗੂ ਵਜੋਂ ਉਭਰਿਆ ਹੈ। ਇਹ ਕਦਮ ਭਾਰਤ ਦੀ ਅਖੁੱਟ ਊਰਜਾ ਯਾਤਰਾ ਨੂੰ ਇੱਕ ਹੋਰ ਅੱਗੇ ਲੈ ਕੇ ਜਾਵੇਗਾ।

ਆਫਸ਼ੋਰ ਵਿੰਡ ਊਰਜਾ ਬਾਰੇ ਹੋਰ ਜਾਣਕਾਰੀ: https://mnre.gov.in/off-shore-wind/

***

ਪੀਆਈਬੀ ਦਿੱਲੀ | ਆਲੋਕ ਮਿਸ਼ਰਾ/ਧੀਪ ਜੋਏ ਮੈਮਪਿਲੀ