یوم جمہوریہ کے موقع پر، امور داخلہ اور امداد باہمی کے مرکزی وزیر جناب امت شاہ نے آج نئی دہلی میں درخشاں گاؤوں  کے خصوصی مہمانوں کے ساتھ بات چیت کی۔ اس موقع پر ارضیاتی سائنسز کے وزیر جناب کرن رجیجو، اطلاعات و نشریات اور نوجوانوں کے امور اور کھیل کے وزیر جناب انوراگ سنگھ ٹھاکر اور امور داخلہ اور نوجوانوں کے امور اور کھیل کے وزیر مملکت جناب نشیتھ پرمانک سمیت معزز شخصیات موجود تھیں۔

خصوصی مہمانوں کے ساتھ بات چیت کرتے ہوئے جناب امت شاہ نے کہا کہ ہندوستان کے سرحدی گاؤوں اور دہلی کے درمیان بڑا فاصلہ ہوسکتا ہے، لیکن وزیر اعظم جناب نریندر مودی نے درخشاں گاؤں  پروگرام کے ذریعے دلوں کو جوڑا ہے اور وہ ایک دوسرے کو قریب لانے میں کامیاب ہوئے ہیں۔ انہوں نے کہا کہ جب تک ملک کے پہلے گاؤں کی ترقی نہیں ہوتی، اس وقت ہندوستان ترقی یافتہ نہیں بن سکتا۔ جناب شاہ نے کہا کہ اس لیے وزیر اعظم مودی کا ماننا ہے کہ سرحدی گاؤں آخری نہیں بلکہ ملک کا پہلا گاؤں ہے۔ انہوں نے کہا کہ پہلے بنیادی سہولیات کی کمی کی وجہ سے ان سرحدی گاؤوں سے نقل مکانی ہوا کرتی تھی لیکن وزیراعظم  مودی نے مقامی لوگوں کو بنیادی سہولیات فراہم کرکے درخشاں گاؤوں پروگرام کے ذریعے نقل مکانی کو کم کرنے کی کوشش کی ہے۔

مرکزی وزیر داخلہ نے کہا کہ اروناچل پردیش، سکم، ہماچل پردیش، اتراکھنڈ اور لداخ کے 19 سرحدی علاقوں کے 3000 گاؤں کو درخشاں گاؤں پروگرام کے تحت لایا جا رہا ہے، اور یہ پروگرام 10 سال میں مکمل ہو جائے گا۔ انہوں نے کہا کہ اس اسکیم کے پہلے مرحلے میں، 662 گاؤں کا احاطہ کیا جا رہا ہے، جن کی کل آبادی 1,42,000 ہے اور حکومت اس پر 4800 کروڑ روپے خرچ کر رہی ہے۔

جناب امت شاہ نے کہا کہ درخشاں گاؤں پروگرام کے 3 مقاصد ہیں -  مرحلہ وار طریقے سے ملک کے پہلے گاؤں کی مجموعی ترقی، سرحدی گاؤوں سے نقل مکانی کو روکنا اور مقامی ثقافت کا تحفظ کرنا  اور گاؤوں میں ہر طرح کے رابطے، بنیادی سہولیات اور بنیادی ڈھانچے کی ترقی کو بہتر بنانا ہے۔  انہوں نے کہا کہ ان علاقوں میں 2500 کروڑ روپے کی لاگت سے سڑکیں تعمیر کی جا رہی ہیں، جس سے لوگوں کے رابطے میں اضافہ ہوگا۔ جناب شاہ نے کہا کہ آزادی کے 70 سالوں میں ان گاؤں کے بنیادی ڈھانچے کی ترقی پر خرچ کی گئی رقم کے مقابلے نریندر مودی حکومت نے صرف پچھلے 5 سالوں میں ان گاؤں کی ترقی پر دوگنی سے زیادہ رقم خرچ کی ہے۔ انہوں نے کہا کہ وزیر اعظم جناب نریندر مودی کی قیادت میں ان دیہی ترقی کے لیے 220 سے زیادہ سرکاری اسکیموں کی 100 فیصد تکمیل کو یقینی بنایا جا رہا ہے،  جن کا  درخشاں گاؤں پروگرام کے تحت احاطہ کیا گیا ہے ۔

داخلی امور اور امداد باہمی کے مرکزی وزیر نے کہا کہ یوم جمہوریہ کے موقع پر نئی دہلی کا دورہ کرنے والے درخشاں گاؤوں کے پنچ، سرپنچ اور ان کے ساتھ آنے والے لوگ وزیر اعظم جناب نریندر مودی کے مہمان ہیں اور انہوں نے ان کا پورا پورا خیال رکھا ہے۔ جناب شاہ نے کہا کہ یوم جمہوریہ کی پریڈ ہندوستان کی ثقافت، فوجی اور افرادی قوت کی نمائش ہے، جسے پوری دنیا حیرت انگیز طور پر دیکھتی ہے۔

درخشاں گاؤوں کے پنچ اور سرپنچ اپنے خاندانوں کے ساتھ حکومت ہند کے "خصوصی مہمان" کے طور پر کرتویہ پتھ پر اس سال یوم جمہوریہ پریڈ کا نظارہ کریں گے۔ وزارت داخلہ، وزارت دفاع کے ساتھ مل کر، خصوصی مہمانوں کی میزبانی کر رہی ہے۔ وزیر اعظم جناب نریندر مودی کے "کسی بھی شہری کو پیچھے نہ چھوڑنے" اور سرحدی گاؤں کو ملک کے "پہلے گاؤں" کے طور پر پورا کرنے کے لیے، مرکزی وزیر داخلہ اور امدادی باہمی کے وزیر جناب امت شاہ کی قیادت میں وزارت داخلہ نے درخشاں گاؤں پروگرام شروع کرکے اہم اقدامات کئے۔ اس کا مقصد اروناچل پردیش، سکم، اترا کھنڈ، ہماچل پردیش اور لداخ کے سرحدی بلاکس میں واقع منتخب گاؤں کی جامع ترقی کرنا ہے۔

درخشاں گاؤوں کے خصوصی مہمانوں نے وزیراعظم کے میوزیم کا بھی دورہ کیا۔  27 جنوری کو وہ ’’بھارت پرو‘‘ میں حصہ لیں گے۔ اس کے ساتھ 27 جنوری کو ہونے والی این سی سی کیڈٹس کی ’پی ایم ریلی‘ دیکھنے کے لیے خصوصی مہمانوں کو بھی مدعو کیا گیا ہے۔

۔۔۔۔۔۔۔۔۔۔۔۔۔۔۔۔۔۔

(ش ح- ح ا - ق ر)

U-4159