প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ' কনফাৰেন্সৰ জৰিয়তে বিকশিত ভাৰত সংকল্প যাত্ৰাৰ হিতাধিকাৰীসকলৰ সৈতে বাৰ্তালাপ কৰে। কেন্দ্ৰীয় মন্ত্ৰী, সাংসদ, বিধায়ক আৰু স্থানীয় পৰ্যায়ৰ প্ৰতিনিধিসকলৰ সৈতে সমগ্ৰ দেশৰ পৰা হাজাৰ হাজাৰ বিকশিত ভাৰত সংকল্প যাত্ৰাৰ হিতাধিকাৰীয়ে অনুষ্ঠানটোত অংশদান কৰে।

উত্তৰ প্ৰদেশৰ গোৰখপুৰৰ টেৰাকোটা ৰেচমৰ ব্যৱসায়ত নিয়োজিত হৈ থকা শ্ৰী লক্ষ্মী প্ৰজাপতিয়ে প্ৰধানমন্ত্ৰীক লক্ষ্মী আত্ম-সহায়ক গোট গঠনৰ বিষয়ে অৱগত কৰে, য'ত ১২ জন সদস্য আৰু প্ৰায় ৭৫ জন সহযোগী অন্তৰ্ভুক্ত আছে। এই গোটটোৰ সামূহিক বাৰ্ষিক উপাৰ্জন প্ৰায় ১ কোটি টকা। এক জিলা এক সামগ্ৰীৰ উদ্যোগৰ সুবিধা লাভ কৰাৰ সন্দৰ্ভত প্ৰধানমন্ত্ৰীয়ে জানিব বিচৰাত শ্ৰী প্ৰজাপতিয়ে এই আঁচনিখনৰ প্ৰতি দৃষ্টিভংগীৰ বাবে ৰাজ্যখনৰ মুখ্যমন্ত্ৰীক ধন্যবাদ জ্ঞাপন কৰে আৰু জনায় যে প্ৰতিজন কাৰিকৰে কোনো ব্যয় নোহোৱাকৈ মাটি উৎপাদনৰ বাবে এটা টুলকিট, বিদ্যুত্ আৰু যন্ত্ৰ-পাতি লাভ কৰিছে। আনহাতে তেওঁলোকে ৰাষ্ট্ৰীয় পৰ্যায়ত আয়োজিত বিভিন্ন প্ৰদৰ্শনীত অংশগ্ৰহণ কৰাৰ সুযোগো লাভ কৰিছে।

বিভিন্ন আঁচনি ৰূপায়ণৰ বিষয়ে পূৰ্বৰ চৰকাৰসমূহৰ তুলনা কৰি শ্ৰী প্ৰজাপতিয়ে শৌচালয়, প্ৰধানমন্ত্ৰী কিষাণ সম্মাননিধি, অ'ডিঅ'পিৰ সুবিধা লাভৰ কথা উল্লেখ কৰে আৰু বাতৰি কাকতৰ বিজ্ঞাপন আৰু তৃণমূল পৰ্যায়ত চৰকাৰী বিষয়াৰ জৰিয়তে এনে আঁচনিৰ বিষয়ে সৃষ্টি কৰা সজাগতাৰ ওপৰতো আলোকপাত কৰে। শ্ৰী প্ৰজাপতিয়ে জনায় যে কেৱল মোদী কি গেৰাণ্টি বাহনখনে গাওঁ ভ্ৰমণ কৰাৰ সময়তে যে মানুহৰ যথেষ্ট ভিৰ দেখা পোৱা যায় তেনে নহয়, প্ৰধানমন্ত্ৰীৰ ভাষণ শুনিবলৈয়ো ব্যাপক জনসমাগম হয়।

তেওঁ জনায় যে তেওঁৰ টেৰাকোটা ৰেচম সামগ্ৰী বেংগালুৰু, হায়দৰাবাদ, লক্ষ্ণৌ, দিল্লীৰ লগতে মহাৰাষ্ট্ৰ, গুজৰাট, তামিলনাডু আদি ৰাজ্যকে ধৰি প্ৰতিখন মহানগৰত বিক্ৰী কৰা হয়।

প্ৰধানমন্ত্ৰী বিশ্বকৰ্মা যোজনাৰ আঁৰৰ ধাৰণাটো ব্যাখ্যা কৰি প্ৰধানমন্ত্ৰী মোদীয়ে কয় যে ই এক জীৱন পৰিৱৰ্তনকাৰী আঁচনি যিয়ে হাতেৰে কাম কৰা সকলো শিল্পী আৰু কাৰিকৰসকলক আধুনিক সঁজুলি আৰু প্ৰযুক্তি প্ৰদান কৰে। তেওঁ শ্ৰী প্ৰজাপতিক তেওঁৰ অঞ্চলত প্ৰধানমন্ত্ৰী বিশ্বকৰ্মা যোজনাৰ বিষয়ে সজাগতা সৃষ্টি কৰিবলৈ আহ্বান জনায়। প্ৰধানমন্ত্ৰীয়ে ভোকেল ফৰ লোকেল আৰু এক জিলা এক সামগ্ৰী উদ্যোগক লৈ চৰকাৰৰ দৃষ্টিভংগীৰ ওপৰত বিশেষ গুৰুত্ব আৰোপ কৰে আৰু আঁচনিসমূহ সফল কৰাৰ ক্ষেত্ৰত জনসাধাৰণে যিদৰে অংশগ্ৰহণ কৰিছে, তাক লৈ সন্তুষ্টি ব্যক্ত কৰে।

************** 

DS/TS/KG