பெருநிறுவனங்களின் சமூகப் பொறுப்பு (சிஎஸ்ஆர்) என்பது தொண்டு அல்ல, நாம் பெற்றவற்றின் ஒரு பகுதியை சமூகத்திற்குத் திருப்பித்தர முயற்சிக்கும் உயர்ந்த மதிப்புகளால் ஈர்க்கப்பட்ட சமூகத்திற்கான கடமை மற்றும் பொறுப்பு என்று மத்திய அறிவியல் மற்றும் தொழில்நுட்பத்துறை இணையமைச்சர் (தனிப்பொறுப்பு), பிரதமர் அலுவலகம், பணியாளர் நலன், பொதுமக்கள் குறைதீர்ப்பு, ஓய்வூதியம், அணுசக்தி மற்றும் விண்வெளித் துறை இணையமைச்சர் டாக்டர் ஜிதேந்திர சிங்  கூறியுள்ளார்.

மகாராஷ்டிர மாநிலம் தானேவில் ராம்பாவ் மால்கி பிரபோதினி (ஆர்.எம்.பி) இன்று ஏற்பாடு செய்திருந்த சி.எஸ்.ஆர் உரையாடலின் தொடக்க அமர்வில் சிறப்பு விருந்தினராக டாக்டர் ஜிதேந்திர சிங் உரையாற்றினார்.

சமூகப் பொறுப்பு என்பது, பண்டைய இந்தியப் பாரம்பரியத்தின் ஒரு பகுதியாகும். சமூகத்தின் நலனுக்காக பங்களிக்கும் மனப்பான்மை இந்தியாவின் ஒவ்வொரு  தனிநபருக்கும் உள்ளார்ந்ததாக உள்ளது. ஆனால் சில நேரங்களில் அதற்கு ஓர் உத்வேகம் தேவைப்படுகிறது என்று அவர் தமது உரையில் குறிப்பிட்டார். 

ஏழைகளின் நலனுக்காகத் தங்கள் மானியத்தை தாமாக முன்வந்து ஒப்படைக்குமாறு எரிவாயு இணைப்பு வாங்கக்கூடிய வசதி படைத்த குடிமக்களுக்குப் பிரதமர் மோடி வேண்டுகோள் விடுத்தார். இந்த அழைப்பு ஊக்கமளிக்கும் விளைவைக் கொண்டிருந்ததால்  குறுகிய காலத்தில் 20 கோடி மக்கள் உஜ்வாலா திட்டப் பயனாளிகளை ஆதரிப்பதற்காக மானியங்களை விட்டுக்கொடுத்தனர் என்று அவர் கூறினார்.

இதேபோல், சுவாமி விவேகானந்தர் ஜாம்ஷெட்ஜி டாடாவை சுகாதாரத்திற்காக செலவிட ஊக்குவித்தார், அவர் டாடா அடிப்படை ஆராய்ச்சி நிறுவனம் (டி.ஐ.எஃப்.ஆர்), தேசிய செயல்பாட்டு கலை மையம் (என்.சி.பி.ஏ),  டாடா நினைவு மருத்துவமனை போன்ற முன்னோடி நிறுவனங்களை நிறுவினார் என்பதை டாக்டர் ஜிதேந்திர சிங் சுட்டிக்காட்டினார். சமூகத்திற்கான பங்களிப்பு பணக்காரர்களுக்கும் வசதி படைத்தவர்களுக்கும் மட்டுமல்ல என்பதைக் கருத்தில் கொண்டு, ஒவ்வொரு குடிமகனும் தன்னால் முடிந்த அனைத்து வழிகளிலும் சமூகத்தின் மேம்பாட்டிற்காக பணியாற்றுவது கடமையாகும் என்று அவர் கூறினார்.

அறிவியல் சமூகப் பொறுப்பு குறித்து டாக்டர் ஜிதேந்திர சிங் கூறுகையில், ஆசிரியர்கள் மற்றும் அறிவியல் வல்லுநர்கள் தங்கள் அனுபவத்தை ஆராய்ச்சியாளர்களாக மாறுவதற்கும் ஸ்டார்ட்அப்களை அமைப்பதற்கும் பயன்படுத்தலாம் என்றார். சி.எஸ்.ஆர் சட்டத்தின் கீழ் இந்தியா ரூ.25,000 கோடி பட்ஜெட் ஒதுக்கீட்டைக் கொண்டுள்ளது என்பதைச் சுட்டிக்காட்டிய அவர்,  இந்தியா பத்தாவது பெரிய பொருளாதாரத்திலிருந்து ஐந்தாவது பெரிய பொருளாதாரமாக உயர்ந்துள்ளது, இன்று நாம் நான்காவது பெரிய பொருளாதாரமாக இருக்கிறோம், 2030 ஆம் ஆண்டில் நாம் உலகின் மூன்றாவது பெரிய பொருளாதாரமாக இருப்போம் என்றார். இத்தகைய சூழ்நிலையில், சி.எஸ்.ஆர் பங்களிப்பும் பன்மடங்கு அதிகரிக்கும் என்று எதிர்பார்க்கப்படுகிறது.

2014, ஏப்ரல் 1 அன்று, பெருநிறுவனங்களின் சமூகப் பொறுப்பை சட்டப்பூர்வமாக கட்டாயப்படுத்திய உலகின் முதல் நாடாக இந்தியா மாறியது. நிறுவனங்கள் சட்டம் 2013-ன் பிரிவு 135-ல் உள்ள விதிகள் ஒரு குறிப்பிட்ட விற்றுமுதல் மற்றும் லாபம் கொண்ட நிறுவனங்கள்  மூன்று ஆண்டுகளின் சராசரி நிகர லாபத்தில் 2% -ஐ பெருநிறுவனங்களின் சமூகப் பொறுப்பு நடவடிக்கைகளுக்காக செலவிடுவதைக் கட்டாயமாக்குகின்றன.  

*****

ANU/AD/SMB/DL

(Release ID: 1995907) Visitor Counter : 141