ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদীনা বিকসিত ভারত সংকল্প যাত্রাগী বেনিফিসরিশিংগা ৱারি শানখ্রে। য়ুনিয়ন মিনিস্তরশিং, এম.পিশিং, এম.এল.এশিং অমসুং লোকেল থাক্কী মীয়ামগী মীহুৎশিংগা লোয়ননা লৈবাক শীনবা থুংনা লৈরিবা বিকসিত ভারত সংকল্প যাত্রা বেনিফিসরিশিং থৌরম অদুদা শরুক য়াখি।

ছতিসগরগী কানকেরদগী লৌউ-শিংউগী থবক তৌবা ইমুং অমগী শ্রীমতি ভুমিকা বুয়ারায়ানা প্রধান মন্ত্রীগা ৱারি শানবদা হায়খি মদুদি মহাক্কী খুঙ্গংদা লৈবা বন ধন গ্রুপ ২৯গী মনুংদা গ্রুপ অমগী সেক্রেতরি ওইনা মহাক থবক তৌরি অমসুং বন ধন য়োজনা, উজৱালা  গ্যাস কন্নেক্সন, জল জিবন মিসন, মেনরেগা কার্দ, রেসন কার্দ অমসুং পি.এম কিষান সম্মান নিধি য়াওনা সরকারগী তোঙান-তোঙানবা স্কিমশিংগী কান্নবশিং ফংলে।

শ্রীমতি ভুমিকানা সরকারগী স্কিম পুম্নমক্কী মমিং নিংশিংবদা অপেনবা পোক্লদুনা, প্রধান মন্ত্রীনা হায়খি মীয়ামগীদমক খর হেন্না থবক তৌনবা মসিনা সরকারগী মপাঙ্গল কনখৎহল্লে। মতম চানা চেঙ ফংবগী মতাংদশু প্রধান মন্ত্রী মোদীনা হংখি। মহাক্কী ইমুং-মনুং অমসুং মমা-মপা ওইরিবা সরকারগী স্কিমশিংগী মরমদা মহাক্না মমুৎ তানা খঙবগী মতাংদা প্রধান মন্ত্রীনা শ্রীমতি ভুমিকাদা হংখি। হৌজিক কলেজ তম্লিবা মহাক্কী মৌপৱা নুপা য়াওনা অঙাং অনিমক লাইরিক তমহনবগীদমক শ্রী মোদীনা মহাক্কী মমা-মপা থাগৎপা ফোঙদোকখি অমসুং মখোয়গী মচাশিং লাইরিক তম্নবা শেন থাদনবা খুঙ্গং অদুগী অতোপ্পা খুঞ্জাশিংদা মহাক্না তকশিনখি।

শ্রীমতি ভুমিকানা হায়খি মহাক্কী সেল্ফ-হেল্প বন ধন গ্রুপনা কৈথেলদা মাহৱা লদু অমসুং হৈক্রুগী অচার কেজি অমদা লুপা ৭০০ তা য়োল্লি। কান্নবা খুদিংমক বেনিফিসরশিংদা অৱাবা অমতা লৈহন্দনা ফংহনবগীদমক প্রধান মন্ত্রীনা অপেনবা ফোঙদোকখি অমসুং মহৌশাদা ময়াই কাবা চীঞ্জাক ওইনা শীজিন্নবা মাহৱা অসি মফম চানা শীজিন্নবগীদমক মহাক্কী থবকশিং থাগৎখি। প্রধান মন্ত্রীনা হায়খি ত্রাইবেলগী লমদমশিংদা লৈরিবা মীয়াম চাউখৎনবা সরকারনা থবক পায়খৎলে। শ্রীমতি ভুমিকানা বন ধন কেন্দ্রশিংগী লোয়ননা অফবা থবক কয়া পাংথোক্লে। ভাগবান বিরসা মুন্দাগী মপোক নুমিত্তা হৌদোকখিবা পি.এম জন মন য়োজনা অসিনা ত্রাইবেল মীয়ামদা চাউনা মতেং পাংগনি। 

***