উত্তৰ-পূৰ্বাঞ্চলৰ উন্নয়ন মন্ত্ৰালয়ে ইয়াৰ চিপিএছই, উত্তৰ-পূব হস্তশিল্প আৰু হস্ততাঁত উন্নয়ন নিগম লিমিটেডৰ (এনইএইচএইচডিচি) জৰিয়তে নতুন দিল্লীৰ ভাৰত মণ্ডপাম, প্ৰগতি ময়দানত ১৩ ৰ পৰা ১৭ জানুৱাৰী, ২০২৪ লৈ উত্তৰ-পূব ভাৰতৰ সমৃদ্ধি প্ৰদৰ্শন কৰা পাঁচ দিনীয়া সাংস্কৃতিক উৎসৱ “উত্তৰ-পূব মহোৎসৱ ২০২৪” আয়োজন কৰিছে।

উত্তৰ-পূৰ্বাঞ্চলৰ উন্নয়ন মন্ত্ৰালয়ৰ সচিব শ্ৰী চঞ্চল কুমাৰে আজি উত্তৰ-পূব মহোৎসৱৰ প্ৰথম সংস্কৰণৰ বিষয়ে সংবাদ মাধ্যমক অৱগত কৰে। শ্ৰী কুমাৰে জনায় যে উত্তৰ-পূব ভাৰতৰ সমৃদ্ধ বৈচিত্ৰ্যক পৰম্পৰাগত কলা, কাৰুশিল্প আৰু সংস্কৃতিৰ মিশ্ৰণৰে একে স্থানত প্ৰদৰ্শন কৰাৰ বাবে এই মহোৎসৱটো সতৰ্কতাৰে প্ৰস্তুত কৰা হৈছে। সাংস্কৃতিক মোজাইক হিচাপে ধাৰণা কৰা, উত্তৰ-পূব মহোৎসৱ কেৱল এক উদযাপনেই নহয়, বৰঞ্চ তাতোকৈ বহুত বেছি।

সংবাদ মাধ্যমক সম্বোধন কৰি শ্ৰী কুমাৰে কয় যে এই মহোৎসৱ অৰ্থনৈতিক সুযোগৰ এক মঞ্চ। এই উৎসৱৰ উদ্দেশ্য হৈছে পৰম্পৰাগত হস্তশিল্প, হস্ততাঁত, কৃষিজাত সামগ্ৰী আৰু পৰ্যটন সুযোগৰ বিনিময়ত উদগনি দিয়া, যি অঞ্চলটোৰ বিকাশ আৰু উন্নয়নৰ বাবে অনুঘটক হ'ব পাৰে।

ড’নাৰ মন্ত্ৰালয়ৰ সচিবে জানিবলৈ দিয়ে যে ২৫০ গৰাকী শিপিনী, কৃষক আৰু উদ্যোগীয়ে এই মহোৎসৱত অংশগ্ৰহণ কৰিব। তেওঁ কয় যে মহোৎসৱৰ সময়ত পেনেল আলোচনা আৰু ক্ৰেতা-বিক্ৰেতাৰ বৈঠক অনুষ্ঠিত হ'ব। তেওঁ কয় যে পৰম্পৰাগত নৃত্য, মন্ত্ৰমুগ্ধ কৰা প্ৰদৰ্শন আৰু অঞ্চলটোৰ সমৃদ্ধ সাংস্কৃতিক ঐতিহ্যৰ প্ৰদৰ্শন মহোৎসৱৰ মুখ্য আকৰ্ষণ হ'ব। এই উপলক্ষে এখন ভিডিঅ' চলচ্চিত্ৰও মুক্তি দিয়া হয়।

মহোৎসৱৰ মুখ্য বৈশিষ্ট্যবোৰৰ ভিতৰত আছে-

(i) হস্তশিল্প, হস্ততাঁত আৰু কৃষি-উদ্যানশস্য সামগ্ৰী: এই মহোৎসৱত ২৫০ গৰাকী শিপিনী, কৃষক আৰু উদ্যোগীৰ অংশগ্ৰহণৰ ওপৰত আলোকপাত কৰা হ'ব। উত্তৰ-পূব অঞ্চলক এক সাংস্কৃতিক স্বকীয়তা প্ৰদান কৰা অনন্য দিশবোৰ প্ৰদৰ্শন কৰাৰ বাবে এই মহোৎসৱটোৱে এক মঞ্চ হিচাপেও কাম কৰিব। এই মহোৎসৱৰ উদ্দেশ্য হৈছে উত্তৰ-পূব ভাৰতৰ সৰ্বশ্ৰেষ্ঠ আৰু উৎকৃষ্ট হস্তনিৰ্মিত সামগ্ৰী, হস্ততাঁত আৰু বস্ত্ৰ, বহনক্ষম হস্তশিল্প, বিভিন্ন জিআই সামগ্ৰী – উত্তৰ-পূব ভাৰতৰ থলুৱা ফল আৰু জৈৱিক সামগ্ৰী একে ঠাইতে উপস্থাপন কৰা।

(ii) পেনেল আলোচনা: "সমৃদ্ধিৰ দিশত: বিকশিত ভাৰতৰ দিশত উত্তৰ-পূবৰ প্ৰগতিক উৎসাহিত কৰা" বিষয়বস্তুৰ ওপৰত আকৰ্ষণীয় পেনেল আলোচনাৰ উদ্দেশ্য হৈছে দেশখনক উজ্জীৱতা আৰু প্ৰগতিৰ দিশে আগুৱাই নিয়াত অঞ্চলটোৰ গুৰুত্বপূৰ্ণ ভূমিকাৰ ওপৰত আলোকপাত কৰা। সমৃদ্ধিৰ ওপৰত গুৰুত্ব আৰোপ কৰি এই আলোচনাৰ লক্ষ্য হৈছে উত্তৰ-পূবৰ অব্যৱহৃত সম্ভাৱনাক দাঙি ধৰা, ইয়াক এক উজ্জীৱিত আৰু প্ৰগতিশীল ভাৰতৰ বাবে এক গুৰুত্বপূৰ্ণ চালক হিচাপে স্থান দিয়া।

"উত্তৰ-পূবত মহিলা নেতৃত্ব" সন্দৰ্ভত পেনেল আলোচনাত মহিলা নেতৃত্বৰ বিভিন্ন অৱদানৰ ওপৰত আলোকপাত কৰিছে, অঞ্চলটোত সহজ আৰু বহনক্ষম সম্প্ৰদায়ৰ ভেটি গঢ়ি তোলাত তেওঁলোকৰ গুৰুত্বপূৰ্ণ ভূমিকাক স্বীকৃতি দিছে। এই আলোচনাৰ উদ্দেশ্য হৈছে উত্তৰ-পূব অঞ্চলৰ উন্নয়নত মহিলাসকলে পালন কৰা বহুমুখী ভূমিকা প্ৰদৰ্শন কৰি শক্তিশালী আৰু বহনক্ষম সম্প্ৰদায় গঢ়ি তোলাৰ বাবে সামগ্ৰিক ৰণনীতিক অনুপ্ৰাণিত কৰা।

"নৰ্থইষ্ট ইন একচন" বিষয়বস্তুৰ অধীনত, "যুৱ, কৰ্মশক্তি আৰু ভাৰতৰ অৰ্থনৈতিক টেপেষ্ট্ৰী" সন্দৰ্ভত পেনেল আলোচনাৰ উদ্দেশ্য হৈছে উত্তৰ-পূবৰ যুৱ আৰু কৰ্মশক্তিৰ দ্বাৰা মেজলৈ অনা আকৰ্ষণীয় মাত্ৰাবোৰক দাঙি ধৰা। তেওঁলোকৰ অৱদান, আকাংক্ষা আৰু প্ৰত্যাহ্বানসমূহ অন্বেষণ কৰি, পেনেল আলোচনাই এই গতিশীল জনগাঁথনিয়ে কেনেদৰে ভাৰতৰ অৰ্থনৈতিক প্ৰতিচ্ছবিক গুৰুত্বপূৰ্ণভাৱে গঢ় দিব পাৰে তাৰ ধাৰণা প্ৰকাশ কৰিব।

(iii) ক্ৰেতা-বিক্ৰেতা সংযোগ: উৎসৱটোৱে গুৰুত্বপূৰ্ণ ক্ৰেতা-বিক্ৰেতা সংযোগৰ বাবে এক অনুকূল মঞ্চ প্ৰদান কৰিব, বিভিন্ন খণ্ডত মূল্যৱান বাৰ্তালাপক উৎসাহিত কৰিব। এই অধিৱেশনসমূহত বিশেষকৈ হস্ততাঁত আৰু হস্তশিল্প, কৃষি আৰু আনুষঙ্গিক সামগ্ৰীৰ লগতে পৰ্যটনৰ ওপৰত গুৰুত্ব দিয়া হ'ব। অংশগ্ৰহণকাৰীসকলে ব্যৱসায়ৰ সুযোগ অন্বেষণ কৰিব আৰু এই মুখ্য খণ্ডবোৰৰ সৈতে অৰ্থপূৰ্ণ সম্পৰ্ক স্থাপন কৰিব, যাৰ ফলত অৰ্থনৈতিক সহযোগিতা আৰু বিকাশ বৃদ্ধি হ'ব। এক গুৰুত্বপূৰ্ণ পদক্ষেপে শিল্পী, শিপিনী আৰু উদ্যোগীসকলক বছৰি ৫,০০০ ৰ পৰা ১০,০০০ শিল্পীক লগ কৰাৰ লক্ষ্যৰে সংযোগ কৰিব। লগতে, ডিজিটেল বাণিজ্যৰ বাবে মুক্ত নেটৱৰ্ক (অ'এনডিচি) অংশীদাৰীত্বই ক্ষুদ্ৰ ব্যৱসায়ীসকলক ডিজিটেল বাণিজ্যৰ শক্তি ব্যৱহাৰ কৰাত সহায় কৰিব।

(iv) সাংস্কৃতিক প্ৰদৰ্শন: উৎসৱটোৱে পৰম্পৰাগত নৃত্য, মনোমোহা প্ৰদৰ্শন আৰু অঞ্চলটোৰ সমৃদ্ধ সাংস্কৃতিক ঐতিহ্য প্ৰদৰ্শনৰ জৰিয়তে এক আকৰ্ষণীয় যাত্ৰাৰ প্ৰতিশ্ৰুতি দিয়ে। ১৪ জানুৱাৰী ২০২৪ ত সন্ধিয়া ৫:০০ বজাৰ পৰা দৰ্শকে অসমৰ সত্ৰীয়া নৃত্য আৰু ত্ৰিপুৰাৰ হোজাগিৰি নৃত্যৰ সৌন্দৰ্য উপভোগ কৰিব পাৰে। সাংস্কৃতিক উৎসৱবোৰ শৈলী, সৃজনশীলতা আৰু উত্তৰ-পূবৰ সোৱাদ উপস্থাপন কৰি সন্ধিয়া ৫:৩০ বজাৰ পৰা সন্ধিয়া ৭:০০ বজালৈ এক ফেশ্বন শ্ব'ৰ সৈতে অব্যাহত থাকিব।

১৫ জানুৱাৰী ২০২৪ ত এই উৎসৱত মণিপুৰৰ টাংগাথা যুঁজ আৰু ছিকিমৰ দৰ্শনীয় সিংহ নৃত্য প্ৰদৰ্শন কৰা হ'ব। ১৬ জানুৱাৰী, ২০২৪ ত উৎসৱটো সন্ধিয়া ৫:০০ বজাত আৰম্ভ হ'ব, মিজোৰামৰ এটা বেণ্ডে এক ঘণ্টাৰ এক মনোমোহা প্ৰদৰ্শন আগবঢ়াব, তাৰ পিছত মণিপুৰ সংগীতৰ প্ৰাণৱন্ত সুৰ আগবঢ়োৱা হ'ব। ৰক বেণ্ড বটল ৰকেটছ ইণ্ডিয়াৰ তাৰকা প্ৰদৰ্শক সকলে ১৭ জানুৱাৰী, ২০২৪ তাৰিখে গ্ৰেণ্ড ফিনালেত তেওঁলোকৰ সংগীত পৰিৱেশনৰ দ্বাৰা দৰ্শকসকলক প্ৰায় এঘণ্টাৰ বাবে মনোৰঞ্জন দিব। সামৰণি অনুষ্ঠানত গায়িকা আৰু ভায়োলিনবাদক সুনীতা ভূঞাই তেওঁৰ সংগীত প্ৰতিভা প্ৰদৰ্শন কৰিব।

এই প্ৰদৰ্শনসমূহৰ ভিতৰত এই উৎসৱত অন্যান্য পৰম্পৰাগত নৃত্য, যেনে মেঘালয়ৰ ৱাংলা নৃত্য, নাগালেণ্ডৰ মুংৱন্ত নৃত্য, মিজোৰামৰ বাঁহনৃত্য, অসমৰ বিহু নৃত্য আৰু বিখ্যাত টেটচিঅ' ছিচটাৰ্ছ আৰু শংকুৰাজ কোঁৱৰৰ প্ৰদৰ্শনো অনুষ্ঠিত কৰা হ'ব।

উত্তৰ-পূব মহোৎসৱৰ এই প্ৰথম সংস্কৰণটো এতিয়া কেৱল এক নৈমিত্তিক অনুষ্ঠান নহয়, ই লগতে উত্তৰ-পূব ভাৰতৰ সমৃদ্ধ সাংস্কৃতিক গাঁথনিৰ এক আনন্দময় উদযাপনক প্ৰতিনিধিত্ব কৰে আৰু ইয়াৰ অৰ্থনৈতিক সম্ভাৱনাত ডুব দিয়ে। অনুষ্ঠানটোৱে এক অনন্য যাত্ৰাৰ প্ৰতিশ্ৰুতি দিয়ে য'ত পৰম্পৰা উদ্ভাৱনৰ সৈতে মিহলি হয়, আৰু এনে এক পৰিৱেশ গঢ়ি তোলে য'ত বৈচিত্ৰ্যই স্থিতি লয় আৰু বিকশিত হয়।

উদ্বোধন আৰু আধাৰশিলা স্থাপন:

জৱাহৰলাল নেহৰু বিশ্ববিদ্যালয়ৰ বৰাক হোষ্টেল "উত্তৰ-পূব মহোৎসৱ ২০২৪"ৰ সময়ত উদ্বোধন কৰা হ'ব। এই হোষ্টেলত জেএনইউত পঢ়িবলৈ ইচ্ছুক উত্তৰ-পূব অঞ্চলৰ ৪০০ গৰাকী শিক্ষাৰ্থী থাকিব পাৰিব। ইয়াৰ উপৰিও, নতুন দিল্লীৰ দ্বাৰকাত এটা উত্তৰ-পূব সন্মিলন কেন্দ্ৰৰ আধাৰশিলাও স্থাপন কৰা হ'ব। এই সন্মিলন কেন্দ্ৰটো আন্তঃৰাষ্ট্ৰীয় মানদণ্ড অনুসৰি নিৰ্মাণ কৰা হ'ব আৰু দিল্লীত উত্তৰ-পূব ভাৰতৰ সাংস্কৃতিক আৰু তথ্য কেন্দ্ৰ হিচাপে কাম কৰিব।

ৱেবছাইট:

উত্তৰ-পূব মহোৎসৱৰ সৈতে সম্পৰ্কিত তথ্য নিম্নলিখিত লিংকত লাভ কৰিব পাৰিব:

ৱেবছাইট: http://uttarpurvi.com/

ফেচবুক: https://www.facebook.com/profile.php?id=61554920154046&mibextid=hIlR13

ইনষ্টাগ্ৰাম: https://www.instagram.com/uttarpurvi_mahotsav?igsh=Z3E2YnQ3YjBuNDhj’

*****

MG/MS/VL/AA