প্রধান মন্ত্রী, শ্রী নরেন্দ্র মোদীনা ঙসি লক্সদ্বীপকী কবরাত্তীদা তেক্নোলোজী, ইনর্জী, ৱাতর রিসোর্স, হেল্থকেয়র অমদি মহৈ মশিং য়াওনা সেক্তর কয়া পাক শন্না কোনশিনবা লুপা করোর ১,১৫০ হেনবগী চাওখৎ থৌরাংগী প্রোজেক্তশিং কয়াগা লোয়ননা কোচী-লক্সদ্বীপ আইলেন্দ্স সবমেরিন ওপ্তিকেল ফাইবর কন্নেক্সন (কে.এল.আই.-এস.ও.এফ.সি.) শঙ্গাখ্রে‍।

কেওএল.আই.-এস.ও.এফ.সি. প্রোজেক্ত অসিনা ইন্তরনেতকী খোঙজেল য়াঙ্খৎহন্দুনা অনৌবা ওইথোকপা য়াবশিং অমদি খুদোংচাবশিং হাংদোক্লগনি‍। নিংতম্বদগী অহানবা ওইনা, সবমেরিন ওপ্তিক ফাইবর কেবলগী খুৎথাংদা লক্ষদ্বিপগা শম্নরগনি। সবমেরিন ও.এফ.সি অসিনা লক্ষদ্বিপ ইথৎশিংগী কম্মুনিকেসন ইনফ্রাস্ত্রকচরদা অচৌবা অহোংবা অমা পুরক্লগনি অমসুং হেন্না য়াংবা অমসুং মতিক চাবা ইন্তরনেতকী খুদোংচাবশিং, তেলিমেদিসিন, ই-গভর্নান্স, লাইরিক-লাইশুগী থবকশিং দিজিতেল বেঙ্কিং, দিজিতেল করেন্সি অমসুং দিজিতেল লাইব্রেরিগী খুদোংচাবশিং ফংহল্লগনি।

তিল্লিবা মীয়ামগী মফমদা ৱা ঙাংলদুনা, প্রধান মন্ত্রীনা নুমিৎ ১০০০গী মনুংদা খোঙজেল য়াঙবা ইন্তরনেৎ ফংহনগনি হায়না মহাক্না ২০২০দা থাজবা পীখিববু নীংশিংখি‍। “কোচী-লক্সদ্বীপ আইলেন্দ সবমেরিন ওপ্তিকেল ফাইবর কন্নেক্সন (কে.এল.আই. – এস.ও.এফ.সি.) প্রোজেক্ত ঙসি মীয়ামগী মফমদা কত্থোক্লি অমদি মসিনা লক্সদ্বীপ মীয়ামদা শরুক ১০০ হেন্না খোঙজেল য়াঙবা ইন্তরনেৎ ফংহনগনি‍”, হায়না মহাক্না হায়খি‍। “মসিনা লৈঙাক্কী সর্ভিসশিং, অনা লায়েং, মহৈ মশিং অমদি দিজিতেল বেঙ্কিংনচিংবা ফেসিলিতীশিংগী ফীভম ফগৎহল্লগনি‍। লক্সদ্বীপ্পু লোজিস্তিক্স হব অমা ওইনা শেমগৎপগী ওইথোকপা য়াববু মসিনা মথৌনা হাপ্লগনি”, হায়না মহাক্না মখা তাখি‍।

প্রধান মন্ত্রীনা লক্সদ্বীপকী মীয়ামগী মফমদা কেন্দ্র লৈঙাক্না মখোয়না হিংবদা কোমহন্নবা, চত্থোক চৎশিন্দা কোমহন্নবা অমদি লল্লোন ইতিক তৌবদা কোমহন্নবা পায়খৎপা য়াবা খোঙথাঙ খুদিংমক মখা তানা পায়খৎখিগনি হায়না থাজবা পীখি‍। “চাওখৎপা ভারত অমা শেমগৎপদা লক্সদ্বীপ্না অচৌবা শক্লোন লৌগনি”, হায়না প্রধান মন্ত্রীনা লোইশিল্লকপদা ফোঙদোকখি‍।

লক্সদ্বীপ য়ু.তি.গী এদমিনিস্ত্রেতর, শ্রী প্রফুল পতেল অতৈ মীথুংশিংগা লোয়ননা থৌরমদুদা শরুক য়াখি‍।

বেকগ্রাউন্দ - কোচী-লক্সদ্বীপ সবমেরিন এস.ও.এফ.সি. (কে.এল.আই.) প্রোজেক্ত

• মতম কয়াগী মমাঙদগী লক্সদ্বীপ ঈথৎশিংবু মেন লেন্দগা হায় কেপাসিতী সবমেরিন কেবল লিঙ্কনা দিজিতেল ওইনা শম্নহনবগী মথৌ তাদুনা লাক্লি‍। মমাঙদা, ঈথৎশিং অসিগী অমত্তা ঙায়রবা ঈ-পাউ ফাওনবগী পাম্বৈ অসি বেন্দৱিথ চাং অকক্ননা লৈবা সেতলাইত মেদিয়মগী খুত্থাঙদখক ওইরম্মি অমদি হেনগৎলক্লিবা বেন্দৱিথ দিমান্দ পীবা ঙম্লমদে‍।
• দিপার্তমেন্ত ওফ তেলিকম্ম্যুনিকেসন্স (দি.ও.তি.)না খুদক্তা থবক পায়খৎখি অমদি কোচী-লক্সদ্বীপ সবমেরিন এস.ও.এফ.সি. প্রোজেক্ত (কে.এল.আই.) প্রোজেক্ত পুথোকখি‍। কে.এল.আই. প্রোজেক্ত অসি থাখিবা মতমগী মনুংদা লায়না লোইশিনখি‍।
• কোচী-লক্সদ্বীপ আইলেন্দ্স সবমেরিন কেবল (কে.এল.আই.) প্রোজেক্তকী সবমেরিন কেবল কন্নেক্তিবিতী অসিনা মেনলেন্দ (কোচী)দগী লক্সদ্বীপগী ঈথৎ তরামাথোই মমিং ওইনা কবরাত্তী, অগত্তী, অমিনি, কদমত, চেতলেত, কালপেনী, মিনিকোই, অন্দ্রোথ, কিলতন, বঙ্গরাম অমদি বিত্রাদা শন্দোক্লি‍।
• প্রোজেক্ত অসি দিপার্তমেন্ত ওফ তেলিকম্ম্যুনিকেসন্সকী য়ুনিভর্সেল সর্ভিসেস ওব্লিগেসন ফন্দ (য়ু.এস.ও.এফ.)না শেল থাদবনি‍।
• ভারত সঞ্চার নিগম লিমিতেদ (বি.এস.এন.এল.)না প্রোজেক্ত একজেক্যুতিং এজেন্সীনি অমদি থবক অসি গ্লোবেল ওপন তেন্দরিং প্রোসেসকী খুত্থাঙদা এম/এস এন.ই.সি. কোর্পোরেসন ইন্দিয়া প্রাইভেত লিমিতেদতা শিন্নখি‍। প্রোজেক্ত অসিগা মরী লৈনবা অচৌবা থবক থৌরমশিংগী মনুংদা মরিন রুত সর্ভে, সবমেরিন কেপল তিংবা, সি.এল.এস. স্তেসনশিংগী সিভিল কন্সত্রক্সন, পানখৎপা, চাংয়েং তৌবা অমদি এন্দ তর্মিনেলশিং (এস.এল.তি.ই.) কম্মিসন তৌবা য়াওরি‍।

কে.এল.আই. প্রোজেক্ত অসিগী মচং ওইবা ৱাফমশিং:

• অপুনবা লিঙ্ক দিস্তেন্স: কিলোমিতর ১,৮৬৮‍।
• অপুনবা প্রোজেক্তকী শেঞ্জং: লুপা করোর ১০৭২ অমদি খাজনাশিং‍।

কে.এল.আই. প্রোজেক্ত অসিগী কান্নবশিং:

• ‘দিজিতেল ইন্দিয়া’ অমদি ‘নেস্নেল ব্রোদবেন্দ মিসন’গী পান্দমশিং ফংবদা অমদি লক্সদ্বী ঈথৎশিংদা ভারত লৈঙাক্কী তোঙান তোঙানবা ই-গভর্নেন্স প্রোজেক্তশিং হৌদোকপদা প্রোজেক্ত অসিনা মরুওইবা থৌদাং য়াগনি‍।
• ই-গভর্নেন্স, তুরিজম, মহৈ মশিং, হকশেল, কম্মর্স অমদি ইন্দস্ত্রীদা চাউনা ইনোৎ হাপকনি‍। মসিনা ঈথৎ অসিগী মীয়ামগী পুন্সি মহিং মখা তানা ফগৎহনবদা মতেঙ ওইগনি অমদি লমদম অসিগী মপুং ওইবা খুন্নাই অমদি শেন্মিৎলোন চাওখৎহনবগী খোঙজেল য়াঙ্খৎহনগনি‍।
• লক্সদ্বীপ ঈথৎশিংগী মীয়ামদা খোঙজেল য়াঙবা ৱাইয়রলাইন ব্রোদবেন্দ কন্নেক্তিবিতী ফংহনগনি‍।
• খোঙজেল য়াঙবা ব্রোদবেন্দ এফ.তি.তি.ঐচ. অমদি ৫জি/৪জি মোবাইল নেতৱর্ক্কী খুত্থাঙদা ফংহনগনি‍।
• প্রোজেক্ত অসিগী মখাদা শেমগৎলিবা বেন্দৱিথ অসি তেলিকোম সর্ভিস প্রোভাইদর (তি.এস.পি.) পুম্নমক্তা লক্সদ্বীপ ঈথত্তা মখোয়গী তেলিকোম সর্ভিসশিং মপাঙ্গল কনখৎহন্নবগীদমক ফংহনগনি‍।

*****