প্রধানমন্ত্রীগী লোইশঙ

প্রধান মন্ত্রীনা লক্ষদ্বিপকী অগাত্তি এয়রপোর্ততা পাংথোকপা মীয়ামগী মীতিন অমদা ৱা ঙাংখ্রে “লক্ষদ্বিপ চাউখৎনবা ভারত সরকারনা থবক পায়খৎলে”

Posted On: 02 JAN 2024 5:25PM by PIB Imphal

প্রধান মন্ত্রী শ্রী নরেন্দ্র মোদীনা লক্ষদ্বিপকী অগাত্তি এয়রপোর্ততা থুংলবা মতুংদা মহাক্না মীয়ামগী মীতিন অমদা ৱা ঙাংখ্রে। প্রধান মন্ত্রী লক্ষদ্বিপতা অহিং লেক্কনি।

থৌরম অদুদা ৱা ঙাংবদা প্রধান মন্ত্রীনা হায়খি নিংতম্বা ফংলবা মতুংদা মতম শাংনা মীরাইদুনা লাক্লবা লক্ষদ্বিপতা কেন্দ্র সরকারনা খুদোংচাবা কয়া পীরে। জহাজ চৎথোক-চৎশিন অসি লমদম অসিগী থৱায় ওইরবসু হিথাংফমগী ইনফ্রাস্ত্রকচর য়াম্না শোৎথরি। লাইরিক-লাইশু, হকশেল, পেত্রোল অমসুং দিজলগী খুদোংচাবা নিংথিনা ফংদ্রি। হৌজিক কেন্দ্র সরকারনা রাজ্য অসিগী চাউখৎ-থৌরাংগী থবক পায়খৎপা হৌরে। হায়রিবা খুদোংচাদবা খুদিংমক ঐখোয়গী সরকারনা কোকহনগনি।

প্রধান মন্ত্রীনা হায়খি হৌখিবা চহি ১০দা অগাত্তিদা চাউখৎ-থৌরাংগী প্রোজেক কয়া লোইশিল্লে অমসুং মরুওইনা ঙামীশিংগী মতমগা চুনবা খুদোংচাবা কয়া শেমগৎলে। হৌজিক অগাত্তিদা এয়রপোর্ত অমা অমসুং আইস প্লান্ত অমা লৈরে। মসিনা মরম ওইদুনা, সিফুদ মপান্দা থাদোকপা অমসুং   সিফুদ শেম-শাবগা মরী লৈনবা হিরমদা খুদোংচাবা কয়া ফংলে। লক্ষদ্বিপতগী তুনা মপান্দা থাদোকপা হৌরকপা অসিনা রাজ্য অসিগী ঙামীশিংগী শেন্থোক হেনগৎহন্নবা লম্বী শেম্লে।

ঙসি হৌদোক্লিবা চাউখৎ-থৌরাংগী প্রোজেকশিং পল্লদুনা , প্রধান মন্ত্রীনা হায়খি লক্ষদ্বিপ দরকার ওইবা ইলেক্ত্রিসিতি অমসুং অতোপ্পা ইনর্জি ফংবা ঙম্নবা সোলার প্লান্ত অমা অমসুং এভিএসন ফুয়েল দিপো অমা শঙ্গারে। অগাত্তি ইথৎ শীনবা থুংনা চাদা ১০০ তোতি ঈশিং ফংলে অমসুং লায়রবশিংদা য়ুম, তোইলেত, মৈ অমসুং চাক থোংনা গ্যাস ফংহন্নবা সরকারনা থবক পায়খৎলে। অগাত্তি য়াওনা লক্ষদ্বিপ শীনবা থুংনা চাউখৎনবা ভারত সরকারনা থবক পায়খৎলে। লক্ষদ্বিপকী মীয়ামগীদমক হয়েং কাবারাত্তিদা চাউখৎ-থৌরাংগী প্রোজেকশিং হৌদোক্কদৌরিবা অদু পল্লদুনা প্রধান মন্ত্রীনা মহাক্কী ৱা ঙাংবা লোইশিনখি।

নুঙগীৱারোল

মহাক্কী লক্ষদ্বিপ খোঙচত্তা, প্রধান মন্ত্রীনা লুপা করোর ১১৫০ হেনবগী তোঙান-তোঙানবা চাউখৎ-থৌরাংগী প্রোজেকশিং শঙ্গাগনি, মীয়ামদা কৎথোক্কন অমসুং উরেপ-উয়ুং তমগনি।

অওনবা খোঙথাং অমদা, কোচি-লক্ষদ্বিপ আইলেন্দস সবমেরিন ওপ্তিকেল ফাইবর কন্নেক্সন(কে এল আই-এস ও এফ সি) প্রোজেক পায়খৎতুনা লক্ষদ্বিপ ইথৎশিংনা ইন্তরনেত য়াম্না শোন্না ফংলিবা অসি কোকহন্নবা প্রধান মন্ত্রীনা থাজবা পীখি অমসুং প্রোজেক অসি ওগস্ত ২০২০ দা লাল কিলাদা নিংতম্বা নুমিৎকী ৱারোলদা প্রধান মন্ত্রীনা লাউথোকখিবনি।

হৌজিক প্রোজেক অসি লোইশিল্লে অমসুং প্রধান মন্ত্রীনা শঙ্গারগনি। মসিনা ইন্তরনেতকী খোঙজেল শরুক ১০০( ১.৭ জি বি পি এসতগী ২০০ জি বি পি এসতা) হেনগৎলগনি। নিংতম্বদগী অহানবা ওইনা, সবমেরিন ওপ্তিক ফাইবর কেবলগী খুৎথাংদা লক্ষদ্বিপগা শম্নরগনি। সবমেরিন ও.এফ.সি অসিনা লক্ষদ্বিপ ইথৎশিংগী কম্মুনিকেসন ইনফ্রাস্ত্রকচরদা অচৌবা অহোংবা অমা পুরক্লগনি অমসুং হেন্না য়াংবা অমসুং মতিক চাবা ইন্তরনেতকী খুদোংচাবশিং, তেলিমেদিসিন, ই-গভর্নান্স, লাইরিক-লাইশুগী থবকশিং দিজিতেল বেঙ্কিং, দিজিতেল করেন্সি অমসুং দিজিতেল লাইব্রেরিগী খুদোংচাবশিং ফংহল্লগনি।

প্রধান মন্ত্রীনা কাদমাত্তা লো তেম্পেরেচর থর্মেল দিসেলিনেসন(এল তি তি দি) প্লান্ত মীয়ামদা কৎথোক্কনি। মসিনা নোংমদা থক্নবা ঈশিং লিতর লাখ ১.৫ পুথোক্কনি। প্রধান মন্ত্রীনা অগাত্তি অমসুং মিনিকোই ইথৎশিংগী য়ুমথোঙশিংদা ফঙ্কসনেল হাওসহোল্দ তেপ কন্নেক্সনস( এফ ঐচ তি সি) মীয়ামদা কৎথোক্কনি। কোরেল ইথৎ অমা ওইবনা, লক্ষদ্বিপ ইথৎশিংদা অফবা থক্নবা ঈশিং ফংবা হায়বসি অচৌবা শিংনবা অমা ওইরি, লমদম অসিদা লৈনুংগী ঈশিং মরাং কাইনা ফংদে। থক্নবা ঈশিং পীনবা প্রোজেকশিং অসিনা ইথৎশিংগী তুরিজমগী খুদোংচাবশিং হেনগৎহনবদা মতেং পাংগনি অমসুং মসিনা লমদম অসিগী মীয়াম থবক ফংবা হেনগৎহনগনি।

মীয়ামদা কৎথোক্কদবা অতোপ্পা প্রোজেকশিংগী মনুংদা কবারাত্তিদা সোলার পৱার প্লান্ত য়াওরি, মসি লক্ষদ্বিপী অহানবা বেত্তরি বেক সোলার পৱার প্রোজেক্নি। মসিনা দিজলদা য়ুম্ফম ওইবা পৱার জেনেরেসন প্লান্তগী মখা পোনবা হন্থহনগনি অমসুং প্রোজেকশিংগী মনুংদা অনৌবা এদমিনিস্ত্রেতিপ ব্লোক অমসুং কবারাত্তিদা ইন্দিয়ান রিজার্ব বত্তালিয়ন কমপ্লেক্সতা মীওই ৮০গী বেরেক য়াওরি।

প্রধান মন্ত্রীনা কালপেনিদা প্রাইমারি হেল্থ কিয়ার নৌনা শেমগৎনবা উরেপ-উয়ুং তমগনি অমসুং  অন্দ্রোথ, চেতলাত, কাদমাত, অগাত্তি অমসুং মিনিকোই ইথৎ মঙাদা মোদেল অঙ্গানৱাদি সেন্তর(নান্দ ঘরশিং) শানবা উরেপ-উয়ুং তমগনি।

​*****



(Release ID: 1992495) Visitor Counter : 82


Read this release in: English , Urdu , Hindi , Marathi , Assamese , Punjabi , Gujarati , Odia , Tamil , Telugu , Kannada , Malayalam