ভারতকী রাস্ত্রপতী, শ্রীমতী দ্রৌপদী মুর্মুনা ঙসি (দিসেম্বর ১৯,২০২৩) হৈদরাবাদ পব্লিক স্কুলগী সেন্তিনীএল সেলেব্রেসন্দা শরুক য়াখ্রে।

থৌরম অদুদা ৱা ঙাংলদুনা, রাস্ত্রপতীনা হৈদরাবাদ পব্লিক স্কুলগী তীম খুদিংমকপু চহি ১০০ গী খোঙচত অসিদা মহৈরোইশিংদা অফবা মহৈ মশিং পীবগীদমক্তা থাগৎপা ফোংদোকখি। মহাক্না স্কুল অসিদা মহৈ মশিংদা মাই পাকপা খক্তা নত্তনা লমচৎ শাজত্তসু অহেনবা মীৎয়েং থম্লি হায়বা খঙবদা হরাওখি। মহাক্না হায়খি মদুদি ইন্সতিত্যুসন অসিনা মহৈরোইশিংবু মখল কয়াগী লমশিংদা হৈথোই শিংথোইনবগীদমক পুক্নিং থৌগৎলি, মসিনা লৈবাক অসিদা ইকাই খুম্নবা অমসুং মিংচৎসু পুরক্লি। স্কুল অসিনা শান্না খোৎনবা অমসুং মহৈরোইশিংগী লাইরিক লাইশুগী থবকশিংগা লোয়না লোয়ননা মহৈরোইশিংগী পুন্সিগী য়ুম্বী মপাঙ্গল কনখৎহনলিবা ইন্নোভেসন অমসুং ক্রিতিকেল থিংকিং লৈহনবদসু মীৎয়েং থম্লি হায়বসি মহাক্না খঙবা ঙমখি।

তুংগীদমক্তা করিকুলম শেম্লিঙৈদা স্তেকহোলদরশিংনা মহৈরোইশিংবু হিরম খুদিংমক্তা চাউখৎনবগী খনগদবনি হায়না রাস্ত্রপতীনা হায়খি। মহৈরোইশিংদা লাইরিক লাইশুগী মঙাল খক্তা নত্তনা পুন্সিগী স্কিলশিংসু তমহনগদবনি। লাক্কদৌরিবা মতমশিংদা, তেক্নিকেল ওইনা স্কিল লৈবা খক্তা নত্তনা ইমোসনেল্লী স্তেবল ওইবা অমসুং হিরম খুদিংমক অমসুং অয়েৎ অকাই খুদিংমক মায়োক্নবা ঙমগদবা মীওইশিংবু লম খুদিংমক্তা পাম্নরক্লগনি হায়নসু মহাক্না ফোংদোকখি।

রাস্ত্রপতীনা অঙাংশিংবু পুন্সিদা পান্দম লৈনবগীদমক পাউতাক পীখি। মহাক্না মখোয়দা নুংঙাইবা অমসুং অপেনবা পোকহনবা থবকশিং তৌনবগী মতম লৌজনবা হায়খি। থবক অদু তৌবদগী ফংলক্লিবা পোজিতিব এনর্জী অদুনা মখোয়বু অতোপ্পা থবকশিং তৌবা ঙম্বগী চাংসু হেনগৎহনগনি।      

রাস্ত্রপতীগী ৱারোল অদু য়েংবীননবা মসিদা নম্বীয়ু -  

***