ছত্রপতি বীর শিবাজী মহারাজনা য়াইফরে!

ছত্রপতি বীর শিবাজী মহারাজনা য়াইফরে!

মহারাস্ত্রগী রাজ্যপাল শ্রীমান রমেশজী, মুখ্য মন্ত্রী একনাথজী, কেন্দ্র মন্ত্রী মন্দলগী শরুক ওইরিবা ঐহাক্কী মরুপ রাজনাথ সিংহজী, নরায়ন রানেজী, উপ-মুখ্য মন্ত্রী দেবেন্দ্র ফদনাবিসজী, অজীত পাৱারজী, সিদিএস জেনেরেল অনিল চৌহানজী, নেভীগী চীফ এদমিরেল আর. হরি কুমার, নেভীগী মরুপ খুদিংমক অমসুং ঐহাক্কী ইমুংগী মীওইশিং!

ঙসিগী দিসেম্বর 4গী পুৱারি ওইরবা নুমিৎ অসিদা সিন্ধুদুর্গকী পুৱারি ওইরবা লানবন, মালৱন-তারকর্লীগী নীংথিরবা তোর্বান, মাইকৈ মরিদা পাকতক্ননা শন্দোক্লিবা ছত্রপতি বীর শিবাজী মহারাজকী মতিক মগুন, রাজকোত লানবনদা লৈরিবা মহাক্কী চাউরবা মীতমগী মায়খুম হাংদোকপদা নিল্লিবা অদোমগী হরাও-নুংঙাইবগী খোঞ্জেলনা ঐখোয়গী ইফমদা থৌজানবীরি। অদোমগীদমক্তা হায়নখ্রবনি –

চলো নই মিসাল হো, বরো নয়া কমাল হো,

ঝুকো নহি, রুকো নহি, বরে চলো, বরে চলো।।

ঐহাক্না নেভীগী ইমুংগী মীপুম খুদিংগী মফমদা নেভীগী নুমিৎ অসিগীদমক্তা অখন্ননা থাগৎচরি। ঙসিগী নুমিৎ অসিদা ঐখোয়না লৈবাক্কীদমক্তা খ্বাইদগী অথোইবা কত্থোকপা ওইনা মশাগী পুন্সি কত্থোকখ্রবা অথৌবশিংগী মফমদা ইকায় খুম্নজরি।

মরুপশিং,

ঙসি, থৌনা লৈরবা মীওইশিংগী লমদম, সিন্ধুদুর্গকী লমদমদগী নেভীগী নুমিৎকীদমক্তা য়াইফ পাউজেল পীবসি মশানা অচৌবা থৌদোক অমা ওইহল্লে। সিন্ধুদুর্গকী পুৱারি ওইরবা লানবন অসিবু উরুবদা ভারত মচা খুদিংনা মশাদা চাউথোকচবা ফাওনরি। লৈবাক অমা হেক্তদা মখোয়গী সমুদ্রগী পাঙ্গল অসি কয়া য়াম্না মরু ওইবগে হায়বা ছত্রপতি বীর শিবাজী মহারাজনা খঙলম্মি। মহাক্না হায়রম্মি – জলমেব য়স্য, বলমেব তস্য! মসিনা হায়বদি “সমুদ্রবু খুদুম চনবা ঙম্বা মীওইদুদি খ্বাইদগী মপাঙ্গল লৈবনি”। মহাক্না মপাঙ্গল লৈরবা নেভীগী তেঙ্গোল অমা শেমখি। কানহাজী আঙ্গরে ওইরো, মায়াজী নায়ক ভাতকর ওইরো, হীরোজী ইন্দালকর ওইরো, মখোয়গুম্বা অথোইবা লান্মী কয়ানা ঐখোয়গী চাউরবা ইথিল ওইরি। ঐহাক্না ঙসি, নেভীগী নুমিৎ অসিদা লৈবাক্কী মখোয়গুম্লবা থৌনা লৈরবা লান্মীশিংগী মফমদা কোক নোঞ্জরি।

মরুপশিং,

ছত্রপতি বীর শিবাজী মহারাজতগী ইথিল লৌরদুনা ঙসি ভারতনা মীখা পোনবগী ৱাখল্লোনবু তুংদা থনমদুনা তুংলমচত্তা খোঙদারি। ঐখোয়গী নেভীগী ওফিসরশিংনা শেৎলিবা ‘এপো-লেৎস’ অসিদা ছত্রপতি বীর শিবাজী মহারাজকী পুৱারিগী মমি তাবসিদা ঐহাক্না নুংঙাইবা ফাওই। অনৌবা ‘এপো-লেৎস’ অসি হৌজিক নেভীগী ইনসিগনিয়াগা মান্নরগনি।

ঐহাক্না মমাংগী চহিদা নেভীগী ফিরালগা ছত্রপতি বীর শিবাজী মহারাজগী পুৱারিগা মরী লৈনহনবগী খুদোংচাবা ফংখিবদা নুংঙাইবা ফাওই। হৌজিক্তি, ‘এপো-লেৎস’ অসিদসু ছত্রপতি বীর শিবাজী মহারাজগী মথৌনা উবা ফংলগনি। ইশাগী হেরিতেজকীদমক্তা চাউথোকচবা ফাওবগা লোয়ননা, ঐহাক্না ঙসি অতোপ্পা ৱাফম অমা লাউথোকপসিদা নুংঙাইবা ফাওজরি। ইন্দিয়ন নেভীনা মশাগী রেঙ্কশিংবু হৌজিক ভারতকী চৎনবীগী মখা পোন্না মিংথোল্লগনি। ঐখোয়গী আর্ম্দ ফোর্সশিংদা নুপীশিংগী পাঙ্গল হেনগৎলক্লিবা অসিদসু ঐখোয়না মিৎয়েং চঙলি। লৈবাক্কী খ্বাইদগী অহানবা নুপী কম্মান্দিং ওফিসর অমবু নেভেল জহাজ অমদা খল্লিবা অসিগীদমক্তা ঐহাক্না নেভীবু থাগৎপা পামজরি।

মরুপশিং,

ঙসিগী ভারতনা মশাগী পান্দম লেপচরি, অমসুং, মদু ফংনবা মশাগী অঙম্বা পাঙ্গল থাদগনি। পান্দমশিং অসি ফংহনবা ঙমগদবা অচৌবা পাঙ্গল ভারত্তা লৈ। পাঙ্গল অসিদি ভারত মচা করোর 140গী থাজবনি। মসিগী পাঙ্গল অসি মালেমগী খ্বাইদগী চাউবা গনতন্ত্রগী পাঙ্গলসু ওইরিবনি। ঙরাং লৈবাক্কী রাজ্য 4দা পাঙ্গল অসিগী শক্তম উবা ফংখ্রে। মীয়ামগী অপাম্বনা অমত্তা ওইরকপা মতমদা, মীয়ামগী ৱাখল্লোন্না অমগা অমগা মরী লৈনরকপা মতমদা, পুক্নিং থৌগৎনীংঙাই ওইবা মহৈ উবা ফংই হায়বসি লৈবাক্না উরে।

তোঙান-তোঙানবা রাজ্যশিংগী প্রাইওরিতী তোঙাল্লি, মখোয়গী তঙাই ফদবশিংসু তোঙাল্লি। অদুবু, রাজ্য খুদিংগী মীয়াম্না লৈবাক্না খ্বাইদগী হানবা হায়বা ইথিলদি মান্ননা লৈ। লৈবাক লৈবগী ঐখোয় লৈরিবনি, লৈবাক্না মাংজিল থাবা মতমদা ঐখোয়সু মাংজিল থাগদৌরিবনি, ৱাখল্লোন অসি ঙসিদি মীপুম খুদিংগী মফমদা চেল্লে। ঙসিদি লৈবাক অসিনা পুৱারিদগী ইথিল লৌদুনা নুংঙাই য়াইফবা ভারত অমগী রোদমেপ শেম-শাবগী থবক্তা লুপ্নখ্রে। নেগেতিবিতী শন্দোকপা রাজনীতিবু মীয়াম্না মায়থীবা পীদুনা সেক্তর খুদিংদা মাংজিল থাবগী ৱাশক শক্নখ্রে। ৱাশক অসিনা ঐখোয়বু বিকশিৎ ভারতকী মাইকৈদা পুগনি। ৱাশক অসিনা ঐখোয়গী মাঙখ্রবা মিংচৎ অমুক হন্না পুরক্কনি, মিংচৎ অসি ঐখোয়গী লৈবাক্না শোইদনা ফংফম থোকপনি।

মরুপশিং,

ভারতকী পুৱারি অসি চহি লিশিং অমা মীখা পোনবগী পুৱারিখক নত্তে, মায়থীবা নংবা অমসুং নীংবা থুংদবগী পুৱারি নত্তে। ভারতকী পুৱারিদি মায় পাকপগী পুৱারিনি। ভারতকী পুৱারিদি থৌনা ফবগী পুৱারিনি। জ্ঞান অমসুং বিজ্ঞান, সমুদ্রগী পাঙ্গলগী পুৱারিনি। মসিগুম্বা তেক্নোলোজী, খুদোংচাবা লৈত্রিবা য়াম্লবা চহি কয়াগী মমাংদগী ঐখোয়না সমুদ্র থত্তুনা সিন্ধুদুর্গকুম্বা লানবন কয়া অমা শাখ্রবনি।

ভারতকী সমুদ্রগী পাঙ্গল অসিদি চহি লিশিং কয়া শুরবনি। গুজরাতকী লোথলদা ফংলিবা সিন্ধু ঘাতী সিভিলাইজেসনগী হিথাংফম অসি ঙসিদি ঐখোয়গী অচৌবা হেরিতেজ অমা ওইরি। মতম অমদা, সুরতকী বন্দর্গরদা লৈবাক 80 হেনবগী জহাজশিংনা এঙ্কর থাদদুনা লৈনরম্লিবনি। চোলা নিংথৌ শাগৈনা ভারতকী মসিগুম্বা পাঙ্গলদা য়ুম্ফম ওইদুনা খা-নোংপোক এসিয়াগী লৈবাক কয়াদা কারবার শন্দোকখি।

মরম অদুনা, মীরম লৈবাক্না ভারত্তা লান্দারকখিবা মতমদা, মখোয়না খ্বাইদগী অহানবদা লান্দাখিবা অদুদি ঐখোয়গী পাঙ্গল অসিদনি। হি অমসুং জহাজ শাবদা মমিং চৎলম্বা ভারতকী মসিগুম্বা হৈ-শিংবা অসি নম্থদুনা থম্বীখ্রে। অদুগা ঐখোয়না সমুদ্রবু খুদুম চনবগী পাঙ্গল মাঙখিবা মতমদা, ঐখোয়গী সোসিও-ইকোনোমিক পাঙ্গলসু মাঙখি।

মরম অদুনা, হৌজিক ঐখোয়না বিকশিৎ ভারতকী পান্দম ফংনবা চঙশিল্লিবা অসিদা, ঐখোয়না মাঙখ্রবা ইশাগী মিংচৎ অমুক হন্না ফংবা তাবনি। অদুনা, মসিগা মরী লৈনবা সেক্তর খুদিংদা মিৎয়েং চঙদুনা ঐখোয়গী সরকারনা থবক পায়খৎলি। ঙসিদি, ভারতনা ব্লু ইকোনোমীবু খুমাং চাউশিনহল্লি। ঙসিদি, ভারতনা সাগরমালাগী মখাদা পোর্ত-লেদ দিভেলপমেন্তকীদমক্তা খোঙফম চেৎলি। ঙসিদি, ভারতনা মেরিতাইম ভিজনগী মখাদা ইশাগী সমুদ্রগী পাঙ্গল শিজিন্নবগী মাইকৈদা খোঙজেল য়াঙনা চঙশিল্লি। মর্চেন্ত শিপমেন্তপু হেন্না চাউখৎহন্নবা সরকারনা অনৌবা কাঙলোন কয়া শেমখ্রে। সরকারগী হোৎনজমন্না মরম ওইরগা, হৌখিবা চহি 9দা ভারতনা সীফেররগী মশিংদা চাদা 140গী চাংদগী হেনগৎহনখি।

ঐহাক্কী মরুপশিং,

ভারতকী পুৱারিগী হৌজিক্কী মতম অসিনা লাক্কদৌরিবা চহি 5-10 খক্তা নত্তনা চহি চা কয়াগী তুংগী মতম লেপকদৌরিবনি। চহি 10দগী হেন্না তাথবা মতমদা, মালেমগী শেন্মিৎলোনগী 10শুবা থাক্তা লৈরম্বদগী 5শুবা থাক্তা য়ৌখ্রে। 3শুবা থাক্তা লাক্নবা খোঙজেল য়াঙনা চঙশিল্লি।

ঙসিদি লৈবাক অসিদা মশাদা থাজবগী মতৌনা থল্লে। ভারত অসি মালেমগী মরুপ ওইবগী মতৌ অমা উবা ফংলক্লি। ঙসিদি, স্পেস নত্ত্রগা সমুদ্র ওইরো, হীরম খুদিংদা ভারতকী মপাঙ্গল উবা ফংলি। ঙসিদি, ভারত-মিদ্দল ইস্ত-য়ুরোপ কোরিদোরগী মতাংদা মালেম পুম্বনা ৱারি শান্নরি। ঐখোয়না থাইনগী মতমদা স্পাইস রুত অমা উখিবদো, মদুনা ভারতকী পাঙ্গলগী মপাঙ্গল লৈবা ফম্বাক অমা অমুক ওইগদৌরে। মালেম পুম্বনা ঙসিদি মেদ-ইন-ইন্দিয়াগী ৱারি শারি। তেজাস ফাইতর প্লেন নত্ত্রগা কিসান দ্রোন ওইরো, UPI সীস্তেম নত্ত্রগা চন্দ্রয়ান-3 ওইরো, হীরম খুদিং, সেক্তর খুদিংদা ভারতনা মীথোই মীহেল্লি। ঙসিদি, ভারত লান্মীশিংগী অয়াম্বা তঙাই ফদবশিং ভারত্তা শাবা খুৎলায়না মনিং থুংহনবা ঙম্লে। লৈবাক অসিদা ত্রান্সপোর্ত এয়রক্রাফ শাবগী থবক অহানবা ওইনা হৌরে। মমাংগী চহিমক্তদা, ঐহাক্না কোচীদা INS Vikrant, লৈবাক অসিদা শাজবা এয়রক্রাফ কেরিয়রবু নেভীগী মফমদা খুৎশিন্নখি, কম্মিসন তৌখি। INS Vikrant অসিনা আত্মানির্ভর ভারতকী চাউরবা খুদম অমা ওইরি। ঙসিদি, ভারত অসি মসিগুম্বা পাঙ্গল লৈবা খনগৎলবা লৈবাক খরগী মনুং চল্লবনি।

মরুপশিং,

হৌখিবা চহিশিংদা ঐখোয়না মমাংগী সরকারগী অরিবা ৱাখল্লোন অমবুসু হোংদোকখি। মমাংগী সরকারশিংনা ঐখোয়গী ঙমখৈ অমসুং সমুদ্র তোর্বান্দা তাবা খুঙ্গং, মফমশিংবু খ্বাইদগী অরোইবা মফম্নি হায়না খল্লম্মি। ঐখোয়গী ঙাক-শেল মন্ত্রীনা মসিগী মতাংদসু শন্দোক্না পাউদমখ্রে। মসিগুম্বা ৱাখল্লোন অসিনা মরম ওইরগা, হায়রিবা মফমশিংনা চাউখৎপদা থিন্থদুনা অমসুং খুদোংচাবা কয়া ৱাৎনা লৈরকখি। ঙসিদি, সমুদ্র তোর্বান্দা খুন্দাবা ইমুং খুদিংগী পুন্সি মহিং নুংঙাইহন্নবা কেন্দ্র সরকারনা অহেনবা মিৎয়েং চঙলি।

ফিশরী সেক্তরগীদমক্তা তোঙানবা মন্ত্রালয়া অমা ইং 2019দা শেমখিবা অসিদি ঐখোয়গী সরকারনি। ঐখোয়না সেক্তর অসিদা চাউরাক্না করোর লিশিং 40মুক থাদখ্রে। মসিনা মরম ওইদুনা, ইং 2014গী মতুংদগী, ভারতকী ঙা পুথোকপগী চাংদা চাদা 80 হেনগৎখ্রিবনি। ভারতকী ঙা এক্সপোর্তসু চাদা 110 হেন্না হেনগৎলে। ঐখোয়গী সরকারনা ঙামীশিংগী ইন্স্যুরেন্স কবরবু লাক্ষ 2দগী লাক্ষ 5তা হেনগৎখ্রবনি।

লৈবাক অসিদা খ্বাইদগী অহানবা ওইনা, ঙামীশিংনা কিসান ক্রেদিত কার্দসু ফংনখ্রে। সরকারনা ফিশরী সেক্তরগী ভেল্যু চেন শেমগৎপদসু অহেনবা মিৎয়েং চঙলি। ঙসিদি, সাগরমালা প্রোজেক্তকী মতেংদগী সমুদ্র তোর্বানশিংদা মতমগা চুনবা কন্নেক্তিবিতীদা অহেনবা মিৎয়েং চঙলি। মসিদা লুপা করোর লাক্ষ কয়াসু থাদরি, মসিগী পান্দমদি, সমুদ্র তোর্বান্দা অনৌবা ইন্দস্ত্রী, অনৌবা কারবার লাকহনবনি।

ঙা ওইরো, অনিশুবদা, সী ফুদ ওইরো, মালেমদা মসিগী দিমান্দ য়াম্না চাউনা লৈরি। মরম অদুনা, ঐখোয়না সী ফুদ প্রোসেসিংগা মরী লৈনবা ইন্দস্ত্রীশিংদা প্রাইওরিতী পীরি, ঙামীশিংগী শেন্থোক হেনগৎহন্নবা থৌরাং য়াৎলি। ঙামীশিংনা অরুবা সমুদ্রদা ঙা ফাবা ঙমহন্নবগীদমক্তা মখোয়গী হিশিংবু মতমগা চুনহন্নবা মখোয়দা তেংবাংসু পীরি।

মরুপশিং,

মসিগী কোঙ্কানীগী মফম অসিদি লোইনাইদ্রবা খুদোংচাবা কয়াগী মফম্নি। ঐখোয়গী সরকারনা সেক্তর অসিগী চাউখৎ থৌরাংগীদমক্তা খোঙফম চেৎনা থবক তৌরি। সিন্ধুদুর্গ, রত্নাগিরী, অলিবাগ, পর্ভনী অমসুং ধারাশিবদা মেদিকেল কোলেজ হাংদোক্লি। চিপী এয়রপোর্তসু হৌদোকখ্রে। দিল্লী-মুম্বাই ইন্দস্ত্রীএল কোরিদোরনা মানগাও ফাওবা শম্নরগনি।

মফমসিগী কাজু লৌমীশিংগী ওইনসু অখন্নবা স্কিম কয়া শেম্লি। ঐখোয়গী প্রাইওরিতীদি সমুদ্র তোর্বান্দা লৈরিবা মী তাবা মফমশিংবু ঙাক শেনবনি। মসিগীদমক্তা, মেংগ্রুবনা কোনবা মফম পাকথোক চাউথোকহন্নবা ঐখোয়না কন্না হোৎনরি। কেন্দ্র সরকারনা মসিগীদমক্তা ওইনসু অখন্নবা স্কিম অমা শেমখ্রে। মসিদা মালৱান, অচরা রত্নাগিরী, দেবগর-বিজয়দুর্গ য়াওনা মহারাস্ত্রগী তোঙান-তোঙানবা মফমশিংবু মেংগ্রুব মেনেজমেন্তকীদমক্তা খনগৎখ্রবনি।

মরুপশিং,

হেরিতেজসু কনগনি, চাউখৎপসু পুরক্কনি, মসিমক চাউখৎপা ভারতকী লম্বীনি। মরম অদুনা, লমদম অসিদা লৈরিবা ঐখোয়গী নীংথিরবা হেরিতেজপু ঙাক-শেন্নবা ঐখোয়না কন্না হোৎনরি। ছত্রপতি বীর শিবাজী মহারাজকী মতমদা দুর্গকুম্বা লানবন শাখিবশিং অসিবু ঙাক-শেন্নবগীদমক্তা কেন্দ্র অমসুং রাজ্য সরকারনা পুন্না হোৎনরি। কোঙ্কন য়াওনা, অপুনবা মহারাস্ত্রগী মসিগুম্বা হেরিতেজ ঙাক শেন্নবা লুপা করোর কয়া চাদিং তৌরি। লৈবাক পুম্বগী মীয়াম্না মসিগুম্বা চাউথোকচনীংঙাই ওইরবা ঐখোয়গী হেরিতেজ য়েংবা লাকহনবা ঐখোয়না পাম্মি। মসিদগী মফম অসিগী তুরিজমসু হেনগৎলক্কনি, থবক পীবসু হৌরক্কনি।

মরুপশিং,

ঐখোয়না মতাং অসিদগী হৌনা, বিকশিৎ ভারতকী খোঙচৎকী খোঙজেল য়াঙখৎহনগদবনি। লৈবাক্না তেক্ত কায়দবা, পাঙ্গল লৈবা অমসুং তৌবা ঙম্বগী মতিক চাউনা লৈবা চাউখৎপা ভারত অমা ওইহনগদবনি। অদুগা মরুপশিং, আর্মী নুমিৎ, এয়রফোর্স নুমিৎ অমসুং নেভী নুমিৎ অসি অয়াম্বা মতমদা দিল্লীদা পাংথোকপনি। অদুগা, দিল্লীগী অনকপদা লৈবা মীয়াম্না মসিদা শরুক য়াবনি, মখোয়গী মফমশিংদা অয়াম্বা থৌদোকশিং পাংথোকপনি। ঐহাক্না চৎনবী অসি হোংদোক্লে। হায়রিবা নুমিৎশিং লৈবাক্কী তোঙান-তোঙানবা মফমশিংদা পাংথোকহন্নবা ঐহাক্না হোৎনরি। থৌরাং অসিগী মখাদা, শেংলবা মফম অসিদা ঙসিগী নেভীগী নুমিৎ অসি পাংথোক্লিবনি।

মমাংগী চয়োলদগী হৌনা মীওই লিশিং কয়ানা মফমসিদা লাক্নরি হায়না ঐহাক্কী ইফমদা পাউদমখ্রে। লমম অসিবু লৈবাক্কী মীয়াম্না পাম্বা হেল্লগনি হায়বগী থাজবসু হৌজিক্তি ঐহাক্কী ইফমদা লৈরে। সিন্ধু দুর্গবু লাইনীংফম অমা ওইনা খনবগী মতৌসু লৈরক্লগনি। ঐখোয়গী শিবাজী মহারাজনা লানফমদা অচৌবা থৌদাং য়াখি। ঐখোয়না ঙসি চাউথোকচরিবা নেভীগী চৎনবী অসি মহাক্কী মরমদগী হৌদোকখিবনি। মসিগীদমক্তা লৈবাক মীয়াম্না চাউথোকচবা ফাওনগনি।

মরম অদুনা, ঐহাক্কী নেভীগী মরুপশিং, ঐখোয়গী ঙাক-শেল মন্ত্রীজী, ঙসিগী থৌরম অসিগীদমক্তা মফম অসিবু খনবগীদমক্তা ঐহাক্না থম্মোই শেংনা থাগৎচরি। ঙসি শীন লাঙলিবশিং অসি য়াম্না লুবা থবক্নি হায়বা ঐহাক খঙই, অদুবু, মসিনা লমদম অসিদা কান্নহনগনি, মীচম মীয়াম কয়ানা থৌরমসিদা শরুক য়ারি, মীরম লৈবাক্কী মীওই কয়াসু ঙসি ঐখোয়গী মরক্তা তিল্লরি। নেভীগী ৱাখল্লোন অসি ছত্রপতি শিবাজী মহারাজনা চহি চা কয়াগী মমাংদগী হৌদোক্লম্বনি হায়বা ৱাফম অসি মখোয়দা য়াম্না অনৌবা ওইনা থোক্কনি।

ভারত্তা খ্বাইদগী চাউবা গনতন্ত্রা চৎনবতা নত্তনা ভারতনা মদর ওফ দিমোক্রেসী ওই হায়বা ৱাফমসি G-20দগী মালেম্না খঙলে হায়বা ঐহাক চেৎনা থাজৈ। মান্নবা মতৌ ওইনা, ভারতনা নেভীগী ৱাখল্লোন হৌদোকখিবনি, পাঙ্গল হাপখিবনি অমসুং ঙসিদি মালেম্না ৱাফম অসিবুসু য়ারবনি। অদুনা, ঙসিগী থৌরম অসিদি মালেমগী থাক্তা অনৌবা ৱাখল্লোন অমা থোকপগী ফম্বাকসু ওইরবনি।

ঐহাক্না নেভীগী নুমিৎ অসিদা জৱান খুদিংমক, মখোয়গী ইমুং-মনুং অমসুং লৈবাক মীয়াম্বু হন্না হন্না থাগৎচবগা লোয়ননা য়াইফ পাউজেলসু পীজরি। ঐহাক্কা লোয়ননা অমুক্তা লাউমিন্নসি –

ভারত ইমানা – য়াইফরে!

ভারত ইমানা – য়াইফরে!

ভারত ইমানা – য়াইফরে!

ভারত ইমানা – য়াইফরে!

হন্না হন্না থাগৎচরি।

***