தியோகரில் உள்ள எய்ம்ஸ் மருத்துவமனையில் 10,000-வது மக்கள் மருந்தகத்தை பிரதமர் திரு. நரேந்திர மோடி இன்று திறந்து வைத்தார். நாட்டில் உள்ள மக்கள் மருந்தகங்களின் எண்ணிக்கையை 10,000-லிருந்து 25,000 ஆக உயர்த்தும் திட்டத்தையும் பிரதமர் தொடங்கி வைத்தார். இந்த சந்தர்ப்பத்தில், பிரதமரின் வேளாண் மகளிர் ட்ரோன் மையத்தையும் பிரதமர் தொடங்கி வைத்தார். வளர்ச்சியடைந்த இந்தியா சபத யாத்திரையின் பயனாளிகளுடன் பிரதமர் காணொலிக் காட்சி மூலம் கலந்துரையாடினார்.

மத்திய ரசாயனம் மற்றும் உரத்துறை அமைச்சர் டாக்டர் மன்சுக் மாண்டவியாவும், தியோகரின் எய்ம்ஸில் இருந்து இந்த நிகழ்வில் கலந்து கொண்டார். அங்கு 10,000-வது  மக்கள் மருந்தகம் நாட்டுக்கு அர்ப்பணிக்கப்பட்டுள்ளது. டாக்டர் மன்சுக் மாண்டவியாவும், பயனாளிகளுடன் கலந்துரையாடினார். டாக்டர் மாண்டவியா தியோகரில் உள்ள ராமால்டிஹ் கிராமத்திற்கும் சென்று வயலில் ட்ரோன் மூலம் இப்கோவின் நானோ யூரியா தெளிக்கப்படுவதை பார்வையிட்டார்.

சுகாதாரத்தை மலிவு விலையிலும் எளிதில் அணுகக்கூடியதாகவும் மாற்றுவது ஆரோக்கியமான இந்தியாவுக்கான பிரதமரின் தொலைநோக்குப் பார்வையின் அடித்தளமாகும். மலிவு விலையில் மருந்துகள் கிடைக்க மக்கள் மருந்தகங்களை நிறுவியது இந்த திசையில் ஒரு முக்கிய முன்முயற்சியாகும்.

பிரதமர் திரு. நரேந்திர மோடியின் தலைமையின் கீழ், நாடு முழுவதும் பிரதமரின் மக்கள் மருந்தகங்களை திறக்க 2000 தொடக்க வேளாண்மைக் கடன் சங்கங்களை  அனுமதிக்க மத்திய அரசு முடிவு செய்தது. நாட்டின் ஒவ்வொரு மூலையையும் சென்றடைவதற்கான வாக்குறுதியை நிறைவேற்றும் வகையில், தொடக்க வேளாண்மை கடன் சங்கங்கள் மற்றும் தனிநபர் மக்கள் மருந்தகங்கள்  ஆகியவை பின்வரும் நான்கு இடங்களில் திறக்கப்பட்டன:-

அகில இந்திய மருத்துவ அறிவியல் நிறுவனம், தியோகர், ராம்பூர், ஜார்க்கண்ட்

வத்சவாய் பி.ஏ.சி.எஸ், கிராம வத்சவாய் பிரதான சாலை, மாவட்டம் என்.டி.ஆர், ஆந்திரா

மக்கள் மருந்தகம், 1 நிர்மலா பிளாசா, ஒரு பிளாக், 1 ஏ வன பூங்கா, புவனேஸ்வர், ஒடிசா

மகாராஷ்டிராவின் கோலாப்பூர் மாவட்டம், பல்ஹானா வட்டத்தில் உள்ள பால் பீமில் உள்ள மக்கள் மருந்தகம்

காணொலிக் காட்சி மூலம் நடைபெற்ற கலந்துரையாடலின் போது, மக்கள் மருந்தகத்தின் உரிமையாளரான திருமதி ருச்சி குமாரி மற்றும் மக்கள் மருந்தகத்தின் வாடிக்கையாளரான திரு சோனா சந்த் மிஸ்ரா ஆகிய இரண்டு பயனாளிகளுடன் பிரதமர் நேருக்கு நேர் கலந்துரையாடினார். இரண்டு பயனாளிகளும் தங்கள் கருத்துக்களையும் நன்மைகளையும் பகிர்ந்து கொண்டனர், குறிப்பாக மக்கள் மருந்தகத்தின் மருந்துகள் காரணமாக பொதுமக்களுக்கு செலவு குறைவதாக கூறினர்.

2024 மார்ச் மாதத்திற்குள் மக்கள் மருந்தகங்களின் எண்ணிக்கையை 10,000 ஆக உயர்த்த மத்திய அரசு இலக்கு நிர்ணயித்திருந்தது. இருப்பினும், 10,000 மக்கள் மருந்தகங்களை திறக்கும் இலக்கு முன்னதாகவே அடையப்பட்டுள்ளது. 2014 ஆம் ஆண்டில் 80 ஆக இருந்த மக்கள் மருந்தகங்களின் எண்ணிக்கை கடந்த 9 ஆண்டுகளில் 100 மடங்கு அதிகரித்துள்ளது.

இப்போது நாட்டின் கிட்டத்தட்ட அனைத்து மாவட்டங்களையும் உள்ளடக்கிய  10000 மக்கள் மருந்தகங்களாக அதிகரித்துள்ளது.  பிரதமர் தனது சுதந்திர தின உரையில், நாடு முழுவதும் 25,000 பிரதமரின் மக்கள் மருந்தகங்கள்  திறக்கப்படும் என்று அறிவித்தார். இப்போது, இந்த வசதியை அதிகரிக்கவும், இந்தியா முழுவதும் சென்றடையவும், 25,000 மக்கள் மருந்தகங்களை 2026 மார்ச் 31  க்குள் நாடு முழுவதும் திறக்க உத்தேசிக்கப்பட்டுள்ளது.

சுகாதார அணுகல் மற்றும் விவசாய செழிப்பு இரண்டையும் மேம்படுத்துவதை நோக்கமாகக் கொண்ட ஒரு முக்கிய ஒத்துழைப்பில், தொடக்க வேளாண்மை கூட்டுறவு சங்கங்கள் மற்றும் மக்கள் மருந்தகங்கள்  இணைந்து சமூக நல்வாழ்வுக்கான ஒரு முழுமையான அணுகுமுறையை உருவாக்குகின்றன. இந்த ஒத்துழைப்பின் ஒரு பகுதியாக, வளர்ச்சியடைந்த இந்தியா சபத யாத்திரையின் கொண்டாட்டத்தின் போது சுகாதார அணுகலை மேம்படுத்துவதில் மக்கள் மருந்தகங்கள்  முக்கியப் பங்கு வகிக்கும்.

தரமான ஜெனரிக் மருந்துகள் அனைவருக்கும் மலிவு விலையில் கிடைக்க வேண்டும் என்ற நோக்கத்தில், இந்த மக்கள் மருந்தகங்கள், ரசாயனம் மற்றும் உரங்கள் அமைச்சகத்தின் மருந்துத் துறையால் தொடங்கப்பட்டது. இந்தத் திட்டத்தின் கீழ், நாடு முழுவதும் ஏற்கனவே 9900-க்கும் மேற்பட்ட மக்கள் மருந்தகங்கள்  செயல்பட்டு வருகின்றன. மக்கள் மருந்தகங்கள் 1963 மருந்துகள் மற்றும் அனைத்து முக்கிய சிகிச்சைகளுக்கான மருந்துகளை உள்ளடக்கியதாகவும், 293 அறுவை சிகிச்சை சாதனங்களையும் கொண்டிருக்கிறது.

***

(Release ID: 1981190)

ANU/AD/BS/AG/KRS