गोंय/मुंबई, 28 नोव्‍हेंबर 2023

आयज गोंयांत जाल्ल्या 54व्या भारतीय आंतरराष्ट्रीय चित्रपट महोत्सवांच्या समारोप सुवाळ्यात, हॉलीवूडचे नामनेचे अभिनेते आनी निर्माते मायकल डग्लस हांका   सिनेमांतल्या योगदानाखातीर प्रतिश्ठीत सत्यजीत रे जीणेगौरव पुरस्कारान दिवन भौमानीत केले.

डग्लस हांका तांची जोडीदार, बाफ्टा पुरस्कार विजेती नामनेची अभिनेत्री कॅथरीन झीटा जोन्स आनी तांचो पूत आनी अभिनेतो डायलन डग्लस हांच्या हाजेरेत 54व्या इफ्फीच्या भव्य समारोप सुवाळ्यांत, प्रेक्षकांनी उबे रावून उमेदीन ताळयो मारतना, हो पुरस्कार भेटयलो.

युगाची व्याख्या करपी भुमिका, समर्पीत भौशीक सेवा रेकॉर्ड आनी टिकपी सांस्कृतीक परिणामा खातीर नामनेचे मायकल डग्लस हाणी हो पुरस्कार मेळ्ळ्या उपरांत उपकार उक्तायतना सांगले, कि  “हो पुरस्कार मेळप म्हळ्यार एक व्हड भोवमान, अ करिअर लाईफ अचिव्हमेन्ट. ह्या पुरस्काराची खबर आयकून म्हजें कुटुंब आनी हांव उमेदी जाल्लें.”

सांस्कृतीक कला अभिव्यक्ती वरवीं लोकांक एकठांय हाडपाची आनी बदलपाची तांक सिनेमांत आसा, अशें डग्लस हाणी  सांगलें. सिनेमाची जागतीक भास पयलीं परस संवसारीक आसा, हाचेर भर दितना दोन फावटीं ऑस्कर विजेत्या अभिनेत्यान सांगलें की, भारतीय आंतरराष्ट्रीय चित्रपट महोत्सव (इफ्फी) हो सांस्कृतीक कला अभिव्यक्ती, काळ, भास आनी शिमो हांकां पार करून सिनेमा तयार करपाच्या जादूची याद करून दिता. 

डग्लस हाणी  भारतीय सिनेमांची तोखणाय करतना आरआरआर, ओम शांति ओम आनी लंच बॉक्स हे ताचे कांय आवडीचे भारतीय चित्रपट आसात, अशे सांगले. 

मायकल डग्लस हाची बायल आनी नामनेची अभिनेत्री कॅथरीन झीटा जोन्स हिचोय भोवमान केलो. भारतांत तांकां मेळिल्ली उदारताय आनी आतिथ्य पळोवन खूब बरे दिसले, अशें कॅथरीन हांणी सांगलें. 

फिल्म आनी टीव्हीत 50 वर्सां परस चड काळ चलपी दायज आशिल्ले मायकल डग्लस हांका 2 ऑस्कर, 5 गोल्डन ग्लोब पुरस्कार, प्राइमटायम एमी पुरस्कार आनी हेर जायते भोवमान, अशे प्रभावी पुरस्कारान भौमानीत केल्यात. वॉल स्ट्रीटांतल्या 'गॉर्डन गेक्को' ह्या नांवान ताच्या अकादमी पुरस्कार फावो जाल्ल्या चित्रणापसून ते फॅटल एट्रॅक्शन, द अमेरिकन प्रेसिडेंट, बेसिक इंस्टिंक्ट, ट्रॅफिक, रोमान्सिंग द स्टोन अश्या साबार सिनेमांतल्या आकर्शक अभिनयामेरेन, डग्लस हांचो सिनेमाचेर खोलायेन परिणाम ह्या प्रतिकात्मक भुमिकेंतल्यान दिसून येता. 

चित्रपट उद्देगांतलो एक दिग्गज मायकल डग्लस हाणें, आपल्या अतुलनीय प्रतिभेन आनी आपल्या कामाचेर आशिल्ल्या वचनबद्धतेन संवसारीक पांवड्यार प्रेक्षकांक मोहित केल्यात. ताच्या अभिनय पराक्रमापरस डग्लसा हांचो प्रभाव निर्मितीमेरेन पावता, जे वन फ्लू ओव्हर द ककूज नेस्ट, द चायना सिंड्रोम, द गेम ह्या उल्लेखनीय कृतींनी दिसता. संयुक्त राष्ट्र संघटनेचो शांतिकायेचो दूत म्हण, संवसारीक प्रस्नांचेर तांच्या वचनबद्धतेंत निशस्त्रीकरण, अणुकेंद्रीय अप्रसार, बेकायदेशीर शस्त्रांचो वेपार थांबोवप, हांचो आस्पाव जाता.

हाचे आदीं मार्टीन स्कॉर्सेझ, बर्नार्डो बेर्तोलुची, दिलीप कुमार, कार्लोस सौरा, क्रीस्टॉफ झानुसी, वोंग कार-वाई ह्या दिग्गजांक भेटयल्लो सत्यजीत रे जीणेगौरव पुरस्कार, हो ज्या व्यक्तींच्या अतुलनीय योगदानान, सिनेमाचें क्षेत्र समृध्द जालां, तांचो उत्सव मनयता. पांच दशकां वयर अपवादात्मक प्रतिभेन आनी आपल्या कामाचेर अखंड वचनबद्धतेन, संवसारभर प्रेक्षकांक मोहित केल्ल्या मायकल डग्लस हांका, तांच्या कामाची गौरवशाली वळख आनी साक्ष हो पुरस्कार दिता. 

* * *

PIB Mumbai | S.Jan/M.Prabhugaonkar/D.Rane