गोंय/मुंबई, 27 नोव्‍हेंबर 2023

भारत फाटल्या कांय वर्सांत प्रधानमंत्री, श्री. नरेंद्र मोदी आनी केंद्रीय म्हायती आनी वितरावणी मंत्री, श्री. अनुराग सिंग ठाकुर हांच्या फुडारपणाखाला सिनेमा निर्मितींत चड पयशे गुंतयता, अशें हॉलीवूडचे संवसारीक नामनां फावो जाल्ले अभिनेते आनी चित्रपट निर्माते मायकल डग्लस हाणी आयज गोंयांत 54व्या इफफीत माध्यमांकडेन संवाद सादतना सांगलें.  फाल्यां 54व्या इफफीच्या समारोप सुवाळ्यांत मायकल डग्लस हांका प्रतिश्ठीत सत्यजीत रे जिणेगौरव पुरस्कारान भौमानीत करतले. 

भारतीय सिनेमा उद्देगा खातीर हो सगळ्यांत बरो वेळ, अशें अभिनेत्यान मुखार सांगलें, आनी 54व्या इफ्फीत 78 परस चड भायल्या देशांचें प्रतिनिधित्व ताच्या बळग्याची गवाय दिता. “भारतीय चित्रपट संवसारभर नामनेक पावल्यात आनी संवसारांतल्या वेगवेगळ्या कोनशांनी चडांत चड पळायले वतात.  ह्या वाडींत स्ट्रीमिंग प्लॅटफॉर्मांचो म्हत्वाचो वांटो आसा”, अशें तांणी सांगलें.

संवसाराक एकठांय हाडपाक सिनेमाची भुमिका उजवाडाक हाडटना डग्लस हाणी सांगलें, की सिनेमांची एकूच भास आसता आनी तो आमकां लागीं हाडटा. “संवसारभरांतल्या प्रेक्षकांक सिनेमांत कितें चल्लां तें समजता.  सिनेमा हो आंतरराष्ट्रीय संबंद तयार करता.  हीच ह्या उद्देगाची जादू, सोबीतकाय आनी खोस आसा आनी ताकाच लागून म्हाका ह्या वेवसायाचेर खूब मोग आसा, अशें तांणी सांगलें.

सत्यजीत रे जिणेगौरव पुरस्कार फावो जाल्ल्याची खोस उक्तायतना दोन फावट अकादमी पुरस्कार फावो जाल्ले डग्लस हाणी सांगले, की हो प्रतिश्ठीत पुरस्कार मेळप, म्हणजे एक व्हड भोवमान. कॉलेजीच्या काळांतलो उगडास करून ताणें आपल्या फिल्म अभ्यासक्रमांत पाथेर पांचाली आनी चारुलता सारकिल्या सत्यजीत रे हांच्या कृतींचो अभ्यास केला आनी ताच्या नांवान पुरस्कार मेळप हें खाशेलें आसा, अशें तांणी सांगलें.  “रे हांची चित्रां मनोरंजक आशिल्लीं आनी तातूंत वास्तवाचें चित्रण केल्लें.  रे हांचें व्हडपण म्हणल्यार, ते फकत दिग्दर्शक न्हय, तर लेखक, फिल्म संपादक, संगीतकार, सगळें एकाच वेळार आशिल्लें,” अशे ताणें मुखार सांगले.

भारतीय फिल्म आरआरआरच्या ऑस्करांतल्या यशाची तोखणाय करतना मायकल डग्लस हाणी सांगलें की, भारताखातीर ही एक अदभूत कामगिरी, जाका लागून आत्मविस्वास वाडटलो आनी ह्या उद्देगाक अशे आनीक जायते व्हड चित्रपट तयार करपाक प्रोत्साहन मेळटलें.

In last few years, Under Prime Minister @narendramodi and Union Minister for I&B @ianuragthakur more money has been put into production & financing of the films

The beauty of this festival is that more than 78 foreign countries are represented and it's a reflection of strength… pic.twitter.com/lCGh4NHyku

— PIB India (@PIB_India) November 27, 2023

अमेरीकी अभिनेते आनी फिल्म निर्माते पांच फावट गोल्डन ग्लोब पुरस्कार विजेते, आपल्या बापाय विशीं उलयतना, आपल्या बापायच्या सावळेंतल्यान भायर सरपाक खूब वेळ लागलो, अशें सांगलें.  “म्हज्या करिअराच्या आदल्या काळांत हांव साध्या प्रकारच्यो भुमिका करतालो.  लोक म्हजी तुळा बापाय कडेन  करताले. वॉल स्ट्रीट ह्या सिनेमा खातीर अकादमी पुरस्कार मेळप, हो एक प्रचंड व्हड खीण आशिल्लो.  म्हज्या वांगड्या कडल्यान मेळिल्लें ते प्रमाणीकरण आशिल्लें”, अशें तांणी सांगलें.

बजेट परस कंटेंटची आवड चड आसा, अशे मायकल डग्लस हाणी स्पश्ट केलें. तशेच फिल्म वेंचतना ताचे खातीर मटेरियल सगळ्यांत म्हत्वाचें, अशे तांणी सांगले. भावनीक रितीन म्हाका मुखार व्हरता, अशें कितें तरी हाव पसंत करतलों.  वायट सिनेमांत व्हडलो वांटो घेवचे परस, बऱ्या सिनेमांत ल्हानसो वांटो घेवप म्हाका बरें दिसता”, अशें तांणी सांगलें.  भारतीय चित्रपटांत येवपाचे येवजणे विशीं डग्लसान टिप्पणी केली, की निर्मातो शैलेंद्र सिंग ज्या पटकथेची रुपरेखा तयार करता, तातूंत ताका आवड आसा.

मायकल डग्लस हांची घरकान्न आनी जायते पुरस्कार विजेती अभिनेत्री कॅथरीन झीटा जोन्स हांणी लेगीत मिडिया संवादांत वांटो घेतिल्लो. भारत आपल्या काळजाक आनी कुटुंबाक खूब प्रिय आसा, अशें सांगलें.  भारताकडेन आशिल्लो वैयक्तीक संबंद सांगून, कॅथरीनान आपुण 18 म्हयन्यांची आसतना एक भारतीय दोतोरान आपलो जीव वाटायलो, अशे सांगले. 

बाफ्टा पुरस्कार विजेत्या अभिनेत्रीन भारतीय चित्रपटांचेर आपलो मोग उक्तायलो आनी बॉलिवूड फिल्मांचो भाग जावपाची इत्सा उक्तायली.  भारतीय सिनेमा विशीं उलयतना, “द लंचबॉक्स" हो म्हजो एक आवडीचो भारतीय सिनेमा. आपणे तो फाटो फाट दोन फावटीं पळयला.  ह्या सिनेमान म्हज्या काळजाक खरोच स्पर्श केलो”.  तशेंच तिणें आपल्या कुटुंबा वांगडा आनी इश्टां वांगडा जायते फावटीं पळयल्ल्या 'ओम शांति ओम' ह्या बॉलिवूड सिनेमाची आवड व्यक्त केली.

राष्ट्रीय पुरस्कार विजेतो निर्मातो आनी पर्सेप्ट लिमिटेड कंपनीचो संस्थापक शैलेंद्र सिंगूय ह्या वेळार हाजीर आशिल्लो. ताणें “सिनेमा बगर आपले जिवीत अपूर्ण” अशें टिप्पणी केली, फिल्म वेवसायांतल्या 25 वर्सांच्या लांब प्रवासाचेर तांणी विचार उक्तायले.

Watch the Press conference, visit: 

* * *

PIB Mumbai | S.Jan/M.Prabhugaonkar/D.Rane