مشہور ہالی ووڈ اداکار اور فلم پروڈیوسر مائیکل ڈگلس نے آج گوا میں آئی ایف ایف آئی 54 میں میڈیا کے ساتھ بات چیت میں کہا کہ وزیر اعظم جناب نریندر مودی اور مرکزی وزیر برائے اطلاعات و نشریات جناب انوراگ سنگھ ٹھاکر کی قیادت میں ہندوستان پچھلے کچھ سالوں میں فلم بنانے میں زیادہ پیسہ لگا رہا ہے۔ مائیکل ڈگلس کو کل 54ویں آئی ایف ایف آئی کی اختتامی تقریب میں باوقار ستیہ جیت رے لائف ٹائم اچیومنٹ ایوارڈ سے نوازا جائے گا۔

مشہور اداکار نے مزید کہا کہ یہ ہندوستانی سنیما انڈسٹری کے لیے بہترین وقت ہے، اور 54ویں آئی ایف ایف آئی میں 78 سے زائد بیرونی ممالک کی نمائندگی اس کی طاقت کی عکاس ہے۔ انہوں نے مزید کہا، ’’ہندوستانی فلمیں پوری دنیا میں مشہور ہیں اور دنیا کے مختلف کونوں میں زیادہ سے زیادہ سفر کر رہی ہیں۔ اسٹریمنگ پلیٹ فارم اس ترقی میں اہم کردار ادا کر رہے ہیں۔‘‘

دنیا کو متحد کرنے میں فلموں کے کردار پر روشنی ڈالتے ہوئے، ڈگلس نے کہا کہ فلمیں ایک ہی زبان کا اشتراک کرتی ہیں اور ہمیں ایک دوسرے کے قریب لاتی ہیں۔ انہوں نے کہا، ’’دنیا بھر کے ناظرین سمجھ سکتے ہیں کہ فلموں میں کیا ہو رہا ہے۔ فلمیں اس طرح کا بین الاقوامی رابطہ پیدا کرتی ہیں۔ یہ اس صنعت کا جادو، اس کی خوبصورتی اور دلکشی ہے اور اسی وجہ سے مجھے یہ کاروبار بہت پسند ہے۔‘‘

ستیہ جیت رے لائف ٹائم اچیومنٹ ایوارڈ سے نوازے جانے پر اپنی خوشی کا اظہار کرتے ہوئے، اکیڈمی ایوارڈ دو بار جیتنے والے ڈگلس نے کہا کہ یہ باوقار ایوارڈ حاصل کرنا ایک بہت بڑا اعزاز ہے۔ اپنے کالج کے دنوں کو یاد کرتے ہوئے انہوں نے بتایا کہ انہوں نے اپنے فلموں کے کورس میں پاتھر پنچالی اور چارولتا جیسے ستیہ جیت رے کے کاموں کا مطالعہ کیا تھا اور ان کے نام پر ایوارڈ حاصل کرنا خاص بات ہے۔ انہوں نے کہا، ’’رے کی تصویریں بہت دلچسپ تھیں اور انہوں نے حقیقت کو پیش کیا۔ رے کی عظمت یہ ہے کہ وہ صرف ایک ہدایت کار ہی نہیں، بلکہ بیک وقت مصنف، فلم ایڈیٹر اور موسیقار بھی تھے۔‘‘

آسکرز میں ہندوستانی فلم ’آر آر آر‘ کی کامیابی کی تعریف کرتے ہوئے، مائیکل ڈگلس نے کہا کہ یہ ہندوستان کے لیے ایک شاندار کامیابی ہے اور اس سے اعتماد بڑھے گا اور انڈسٹری کو ایسی بہت سی بڑی فلمیں بنانے کی ترغیب ملے گی۔

پانچ بار گولڈن گلوب ایوارڈ جیتنے والے معروف امریکی اداکار اور فلم ساز اپنے والد کرک ڈگلس کے بارے میں بات کرتے ہوئے کہا کہ اپنے والد کے سائے سے نکلنے میں بہت وقت لگا۔ انہوں نے کھل کر کہا، ’’اپنے کیریئر کے ابتدائی حصے کے دوران، میں نرم قسم کے کردار ادا کر رہا تھا۔ لوگ میرا موازنہ میرے والد سے کرتے تھے۔ فلم وال اسٹریٹ کے لیے اکیڈمی ایوارڈ نامزدگی جیتنا ایک زبردست لمحہ تھا۔ یہ میرے ساتھیوں کی طرف سے موصول ہونے والی توثیق تھی۔‘‘

بجٹ سے زیادہ مواد کے لیے اپنی پسند کو تقویت دیتے ہوئے، مائیکل ڈگلس نے واضح کیا کہ فلم کا انتخاب کرتے وقت ان کے لیے مواد سب سے اہم ہوتا ہے۔ انہوں نے کہا، ’’میں کسی ایسی چیز کو ترجیح دوں گا جو مجھے جذباتی طور پر متحرک کرے۔ میں بری فلم میں بڑا کردار ادا کرنے کے بجائے اچھی فلم میں چھوٹا کردار ادا کرنا پسند کروں گا۔‘‘ ہندوستانی فلم میں کام کرنے کے اپنے منصوبوں پر، ڈگلس نے تبصرہ کیا کہ پروڈیوسر شیلیندر سنگھ اسکرپٹ کے خاکہ پر کام کر رہے ہیں جس میں وہ دلچسپی رکھتے ہیں۔

مائیکل ڈگلس کی اہلیہ اور ملٹی ایوارڈ یافتہ اداکارہ کیتھرین زیٹا جونز نے بھی میڈیا سے بات چیت میں کہا کہ ہندوستان ان کے دل اور خاندان سے بہت پیارا ہے۔ ہندوستان کے ساتھ ذاتی تعلق کا ذکر کرتے ہوئے کیتھرین نے ایک ہندوستانی ڈاکٹر کی کہانی شیئر کی جس نے ان کی جان تب بچائی تھی جب وہ 18 مہینے کی تھیں۔

بافٹا ایوارڈ یافتہ اداکارہ نے ہندوستانی فلموں سے اپنی محبت کا بھی اظہار کیا اور بالی ووڈ فلموں کا حصہ بننے میں دلچسپی ظاہر کی۔ ہندوستانی فلموں کے بارے میں بات کرتے ہوئے انہوں نے کہا، ’’دی لنچ باکس‘ میری پسندیدہ ہندوستانی فلموں میں سے ایک ہے۔ میں نے اسے بیک ٹو بیک دیکھا۔ فلم نے واقعی مجھے کافی متاثر کیا۔‘‘ انہوں نے بالی ووڈ فلم ’اوم شانتی اوم‘ کے لیے بھی اپنی پسندیدگی کا اشتراک کیا جسے وہ اپنے خاندان اور دوستوں کے ساتھ کئی بار دیکھ چکی ہیں۔

اس موقع پر نیشنل ایوارڈ یافتہ پروڈیوسر اور پرسیپٹ لمیٹڈ کے بانی شیلیندر سنگھ بھی موجود تھے۔ انہوں نے فلمی کاروبار میں اپنے 25 سال کے طویل سفر کے بارے میں بتاتے ہوئے کہا کہ ’’زندگی سینما کے بغیر ادھوری ہے۔‘‘

پریس کانفرنس دیکھنے کے لیے ملاحظہ کریں:

*****

ش ح – ق ت – م ر

U: 1469