गोंय/मुंबई, 26 नोव्‍हेंबर 2023

इफ्फीचो भागीदार युनिसेफाच्या जोड पालवान सादर केल्ल्या पांच बेसबऱ्या चित्रपटांचो संग्रह 54व्या भारतीय आंतरराष्ट्रीय चित्रपट महोत्सवांत वेगवेगळ्या महोत्सवाच्या सुवातींनी दाखयतात. भुरगेपणाक आकार दिवपी गतिशील शक्तींचो  आनी ताच्या समाजीक-अर्थीक संदर्भांची तपासणी आनी विचार ह्या 
चित्रपटांत जाता. 

अंदूं युनिसेफ आनी नॅशनल फिल्म डेव्हलपमेंट कॉर्पोरेशन (एनएफडीसी) हांणी भागीदारी करून फिल्म उद्देगाचें आनी प्रेक्षकांचें लक्ष भुरग्यांच्या हक्कांचेर केंद्रीत केलां.  ही भागीदारी चित्रपटांतल्यान भुरगी, किशोरवयीन आनी बायलां आड जावपी हिंसाचाराचे चित्रणाचेर लक्ष ओडटा.  नागरी समाजाचेर परिणाम करपी संबंदीत प्रस्नांचेर लक्ष केंद्रीत करपाच्या यत्नांचो ही भागीदारी म्हणजे, एक भाग आसा.

“इफ्फीत दुसरे वर्सा एनएफडीसीचो  भागीदार जाल्ल्यान युनिसेफ खोशी आसा. लोकप्रिय चित्रपटांत भुरग्यांच्या हक्कांक मान्यताय दिवपाचेर सकारात्मक विचार मुखार येतले, अशें हे चित्रपटांचें क्युरेट केल्लें पॅकेज आसा", अशें युनिसेफ इंडियाचे संचारण मुखेली, अडव्होकसी आनी भागीदार, जफ्रीन चौधरी हांणी सांगले. भुरग्यांचेर आनी भुरग्यां विशीं केंद्रीत आशिल्ल्या आदर्श चित्रपटांचो प्रचार आनी ह्या फिल्माचो आस्पाव करपाक म्हायती आनी प्रसारण मंत्रालयान घेतील्ल्या फुडारपणा खातीर, तिणें तोखणाय केली. तिणें मुखार सांगलें, की इफ्फी हें युनिसेफाक, फिल्म निर्मात्यांक, कला आनी संस्कृतायेंतल्या लोकांक, समीक्षकांक आनी प्रेक्षकां मेरेन, मोट्या प्रमाणांत भुरग्यांच्या हक्कां विशीं पावपाक एक सक्षम मंच आसा. तेच बरोबर भुरग्यांचेर आनी तरणाट्यांचेर भिरांकूळ परिणाम जावचो न्हय, म्हूण हिंसाचाराक समाजीक नदरेन विरोध करपाचेर लक्ष केंद्रीत करता.

खासा क्युरेट केल्ल्या विभागांत ह्या चित्रपटांचो आस्पाव केला:

दामू: राजा सेन हांणी दिग्दर्शीत केल्लो हो राष्ट्रीय पुरस्कार फावो जाल्लो बंगाली चित्रपट एका अनाथ भुरग्याचेर आदारीत आसा, जाका एका दयाळू मनशान आलाशिरो दिला आनी वाडयला.  त्या मनशाची नात रुंकू हिचे कडेन तो इश्टागत करता आनी एक फावट गांवांतल्यान हत्तीचेर भोंवपाचें उतर दिता.  तें साकार जायना तेन्ना रुंकू निराश जाता. आपलें उतर अपेशी थारले हाचि लज दिसल्यान, दामू हत्ती सोदपाक भायर सरता.  निमाणें ताका एक सर्कस मेळटा पूण मॅनेजर ताका मेळपाक न्हयकार दिता.  सर्कस लुटपाच्या कटाचेर आडखळ येता, तेन्ना दामूची निराशा जाता.  ल्हान दामू सर्कस वाचवंक शकता आनी रुंकूक दिल्लें उतर पुराय करूंक शकता?  तें जाणून घेवपाक तुमकां सिनेमा पळोवचो पडटलो.

फॉर द सेक ऑफ एवा : इराणी फिल्म निर्माते मोहसेन सेराजीचो पदार्पण करपी हो पर्शियन चित्रपट इराणी तियात्र पंगडा विशीं आसा. जेन्ना तांची मुखेल अभिनेत्री एवा हिका तिच्या मिश्र दायजाक लागून, योग्य दस्तावेजीकरणाचो उणाव जाता, तेन्ना पासपोर्टाच्या प्रस्नाक तोंड दिवचें पडटा. एवाक मजत करपाचें थारायिल्लो पंगड तिचो पासपोर्ट सुरक्षीत दवरपा खातीर आनी परदेशांतल्या प्रतिश्ठीत महोत्सवांत वांटो घेवपा खातीर लांच दिवप आनी मनीस तस्करी, सयत धोक्याचो आदार घेता.

गांधी अँड को. : गोल्डन लोटस पुरस्कार - बेस्ट चिल्ड्रन फिल्म, नॅशनल फिल्म अॅवॉर्ड्स, 2023 पुरस्कृत, मनीष सायनी हांणी दिग्दर्शीत केल्लो हो गुजराती सिनेमा दोन चल्याचेर आसा.  गांधीच्या शिकवणेक मूर्त रूप दिवपी एका जाण्ट्याकडेन चले शकतात. तातूंतलो एक चलो गांधीची नक्कल करपाचें थारायता, पूण तरी लेगीत ताच्या पद्दतीचेर यशस्वी जायना.

पिकॉक लेमेंट : टोकियो आयएफएफ 2022त बेसबरे कला योगदान पुरस्कार फावो जावन पुरस्कृत जाल्लो हो, सिंहली सिनेमा श्रीलंकेच्या अमीला ह्या तरणाट्या विशीं आसा, जाका ताच्या भयणी इनोकाचे जिवीत वाचोवपाक काळजाच्या शस्त्रक्रिययेखातीर 15,000 डॉलर एकठांय करपाचें कठीण काम आसा.  निराश जावन तो भुरग्यांचे तस्करीच्या कारवायेंत घुस्पता.  जसो जसो तणाव वाडत वता, तसो तसो अमिलाक आपल्या भयणीचो फुडार सुरक्षीत दवरपाखातीर आनी गुन्यांवकारी संवसारांतल्यान सुटपा खातीर कठीण निवड करची पडटा.

सिंगो: अलीरेझा मोहम्मदी रूजबहानी हाणें दिग्दर्शीत केल्लो, हो पर्शियन सिनेमा शफा नांवाच्या ल्हान चलयेचेर आदारीत आसा. ह्या चित्रपटांत जुंव्यावयले लोक एका नुस्तेकारान धरलेले, चार  हॉर्सशु क्रॅब विकपाक वतात अशें दिसता.  ते मोलादीक आसतात. एक ल्हान चली तांकां विकपापसून वाटावपाचें थारायता.  हाका लागून तिचे कुटुंब जुंव्यावयल्या लोकांच्या रागाचें लक्ष्य जाता: ते कुटुंबाक धांवडावपाचें थारायतात.  आतां शफा हाका आपल्या कुटुंबाचें कल्याण आनी क्रॅबचे जिवित हातूंत एक निवड करची पडटली.

1989 वर्सा संवसारांतल्या फुडाऱ्यांनी संयुक्त राश्ट्रांची भुरग्यांच्या हक्कांविशींची कबलात – भुरगेपणाचेर आंतरराश्ट्रीय कबलात – आपणावन, भुरग्यांविशी इतिहासीक वचनबद्धताय घेतली.  ही इतिहासांतली सगळ्यांत व्हड मान्यताय मेळिल्ली मानवी हक्क कबलात जाल्या आनी संवसारभर भुरग्यांच्या जिवितांत बदल घडोवन हाडपाक मजत केल्या.  पूण तरी लेगीत दर एका भुरग्याक पुराय भुरगेपणाची, मजा घेवंक मेळना.  

सगळ्या भागधारकांनी एकठांय येवन वावर करून, ही वचनबद्धताय पुराय करपाक आनी भुरग्यांच्या हक्कां खातीर कारवाय करची, अशी मागणी करप आमचे पिळगेचेर आसा, अशें युनिसेफ मानता. 54व्या भारतीय आंतरराष्ट्रीय चित्रपट महोत्सवांत एनएफडीसीन युनिसेफा वांगडा केल्ल्या भागीदारींतल्यान ह्या विशयांचेर चड जागृताय निर्माण करपाचे यत्न केल्यात. 

* * *

PIB Mumbai | S.Jan/M.Prabhugaonkar/D.Rane