ঙসি সাইন্স অমসুং তেক্নোলোজিগী রাজ্য মন্ত্রী(মনিংতম্বা); পি.এম.ও, পর্সোনেল, পব্লিক গ্রিভান্সেস, পেসন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা হায়খি ভারতনা নিংতম্বা ফংবগী চহি ১০০শুবা থৌরম পাংথোকপা মতম ২০৪৭ দা অনৌবা য়ুমশারোলশিংনা ভারতকী ফজরবা য়ুমগী মওং লেপকনি।

নিউ দিল্লিদা পাংথোকপা সি.এস.আই.আর-সি.বি.আর.আই তেক্নোলোজি ত্রান্সফর মেলাদা ৱা ঙাংবদা দোক্তর জিতেন্দ্র সিংহনা হায়খি সেন্ত্রেল বিল্দিং রিছার্স ইন্সতিতুৎ(সি বি আর আই)না মালেম থাক্কী অমসুং খ্বাইদগী নৌবা য়ুমশারোলশিং পুথোক্লে, মসিনা অইং-অশা অমসুং ইকং মায়োক্নবা ঙম্বদা নত্তনা মালেমগী মহৌশাগী অকোয়গি ফিবমগী নিয়মশিংসু ঙাক্না চৎকনি।

দোক্তর জিতেন্দ্র সিংহনা হায়খি ৱান-ৱিক ৱান লেব প্রোগ্রাম থবক ওইনা পাংথোক্লে অমসুং লৈবাক শীনবা থুংনা লৈরিবা সি.এস.আই.আর লেব ৩৭গী অখন্নবা তেক্নোলোজিশিং উৎনবা হৌখিবা চহিদা মহাক্না হৌদোকখ্রে অমসুং মসিগী ফল ওইনা সি.এস.আই.আর-সি.বি.আর.আইআ মফম অমদা য়ুম শানবগী তেক্নোলোজি ৭৫ উৎলে অমসুং মখোয় ইন্দস্ত্রিদা শীন্নখ্রে। অশোই-অঙাম লৈতবা, তুংকোইনা চৎনবা য়াবা অমসুং মমল হোংবা য়ুম শানবা অসিগুম্বা তেক্নোলোজি ১০৮ নুমিৎ খরনিদা ইন্দস্ত্রিদা ফংহল্লগনি।

প্রধান মন্ত্রী নরেন্দ্র মোদীনা খ্বাইদগী চাউনা থাজবা থম্লিবা অমসুং খ্বাইদগী মরুওইনা লৌরিবা স্কিম প্রধান মন্ত্রী অৱাস য়োজনা(পি এম এ ৱাই) দা তেক্নোলোজি পীবগীদমক মিনিস্তরনা সি.বি.আর.আই থাগৎপা ফোঙদোকখি। থৌরম অদুদা তিনখিবা মীয়ামদা মিনিস্তরনা হায়খি শ্রী মোদীনা প্রধান মন্ত্রী ওইরবা মতুংদা ভারতমচা অমতা নাতৈ চাদবা য়ুমদা লৈহল্লোই অমসুং খুদোংচাবা ফংবা য়ারবা মীওই খুদিংমক তোইলেতশিং অমসুং মৈ থানবগী খুদোংচাবশিং য়াওরবা পাক্কাগী য়ুমশিং ফংহনগনি হায়না ৱাশকখি। লায়রবা মীওইশিং পি.এম.এ.ৱাইগী য়ুমশিংদা মাইথোং মোমোন নোক্না লৈবা উবদা মীয়ামগী মীহুৎ অমা ওইনা মহাক হরাওই।

নোংজু-নুংশা অমসুং মৈ ঙাকথোকপা ঙমবা থুপচিনবা য়াবা সোল্ত সেল্তরশিং শাবগীদমক দোক্তর জিতেন্দ্র সিংহনা সি.বি.আই.আই থাগৎপা ফোঙদোকখি অমসুং মসিনা খুন্নাইদা চাউনা কান্নবা পীরে হায়খি। মহাক্না হায়খি প্রধান মন্ত্রী নরেন্দ্র মোদীগী অওনবশিং অমসুং অনৌবশিং অমসুং থবকশিংনা খুন্নাইগী য়ুম্ফমশিং থোল্লে অমসুং মীচম মীয়াম হিংবদা লাইহন্নবা পান্দম থম্লি।

দোক্তর জিতেন্দ্র সিংহনা হায়খি মসিগী অচৌবা মাইপাকপা অসি সি.এস.আই.আর-সি.বি.আর.আই, রুরকীগী সাইন্তিস্তশিং অমসুং রিছর্স তৌরিবশিংগী কৎথোকপা অমসুং হৈথোই-শিংথোইবগী খুদম অমনি অমসুং অনৌবা য়ুমশারোলশিংনা লনাই মীওইশিং অমসুং মীয়াগী পুন্সিদা অহোংবা কয়া পুরকপদা মরুওইবা থৌদাং অমা লৌরে। মীওইবগী হিংবগী ফিবমশিংদা অওনবা পুরকপা, তুংকোইনা চৎনবা য়াবা হেনগৎহনবদা অমসুং হিরম খুদিংমক্তা মীয়াম নুংঙাই-য়াইফবা হেনগৎহনবদা হায়রিবা তেক্নোলোজিশিং অসিগী শক্তি লৈরে। রিছার্স ইন্সতিতুসনশিং অমসুং ইন্দস্ত্রিশিংগী মরক্তা লৈরিবা অহোবা অদু মেনখৎতুনা, মীওই খুদিংমক্না মমল হোংবা, তুংকোইনা চৎনবা য়াবা অমসুং অনৌবা য়ুম ফংহন্নবা পান্দম থবক ওইনা পাংথোক্নবা সি.এস.আই.আর-সি.বি.আর.আই, রুরকীনা অচৌবা থবক অমা পায়খৎলে।

দোক্তর জিতেন্দ্র সিংহনা হায়খি ঙসি ঐখোয়না য়ুম শাবগী হিরমদা থেংনরিবা খুদোংচাদবা অসি মাইথোং য়াম্মী, মসি মমলদগী হৌরগা অমাং-অতাং থেংনবা ঙম্বা অমসুং ইনর্জি ফজনা শীজিন্নবা ফাওবা য়াওরে। অদুবু ঙসি ঐখোয়গী লৈরিবা লৌশিং অসিনা চহিচা অসিদা থেংনরিবা খুদোংচাদবা খুদিংমক কোকহনবা ঙমগনি মীওই খুদিংমক অশোই-অঙাম লৈতবা অমসুং নুংঙাইবা য়ুম অমা তুংদা ফংহনগনি হায়না ঐনা থাজৈ। লৈবাক অসিদা অফবা অহোংবা অমা পুরক্নবা হায়রিবা তেক্নোলোজিশিং অসি শীজিন্ননবা উদোগকী লুচিংবশিং অমসুং মীহুৎশিংদা দোক্তর জিতেন্দ্রনা তকশিনখি। মহাক্না হায়খি খুমাংচাউশিনবশিং অসি খ্বাইদগী ফবা থবকশিংদা শীজিন্নদুনা, কনাগুম্বা অমনা চাংদম্নবা ঙম্নবা খুদোংচাবা লৌবা খক নত্তনা, খুন্নাইগী য়াইফনবা থবকশিংদসু চাউনা মতেং পাংগদবনি।

সেক্রেতরি দি.এস.আই.আর অমসুং দি.জি সি.এস.আই.আর, দোক্তর এন. কালাইসেলভিনা হায়খি হৌখিবা চহি ৭৭ লেপ্তনা থিজিন্দুনা লাকপদগী, সি.এস.আই.আর-সি.বি.আর.আই, রুরকী য়ুমশারোলগী মতাংদা মাংজিল থাবা ইন্সতিতুৎ অমা ওইরে। অনৌবা তেক্নোলোজিশিং অসিনা য়ুম শাবগী উদোগতা অওনবা পুরকপা খক নত্তনা মশিং থিঙমদ্রবা লনাই মীওই কয়াগী পুন্সিদা অচৌবা অহোংবা কয়া পুরকখ্রে। শিংথাবা য়াবা তেক্নোলোজিশিংগী মনুংদা অন্দর-রিম পাইলস, অমোৎপদগী কান্নবা পোৎলমশিং শাবা, প্রিফেব্রিকেতেদ য়ুম, মৈ ঙাকথোকপা, পাম্বীশিং য়াওদবা উ, প্রোতেক্তিব কোতিংশিং য়াওরি।

সি.বি.আর.আইগী দিরেক্তর শ্রী প্রদিপ কুমারনা হায়খি ভারত সরকারগী পি.এম.এ.ৱাই-জিগী “মীওই খুদিংমক য়ুম ফংহনবা” পান্দম ফংনবা অমসুং খুন্নাইগী কান্নবা প্রোজেকশিংদা সি.এস.আই.আর-সি.বি.আর.আই, রুরকীনা মীৎয়েং থম্বা অসি অচৌবা নুংঙাইবা অমনি। খুঙ্গংগী য়ুমশিং য়ানবা ইন্সতিতুৎ অসিনা খুঙ্গংগী য়ুম শানবা তাইপোলোজি কম্পেন্দিয়ম “পাহাল” ইন্সতিতুৎ অসিনা পুথোক্লে।

য়ুম শানবগী সাইন্স অমসুং তেক্নোলোজিগী লমদা অৱাংবা থাক্কী তেক্নোলোজিশিং য়াওরবা ভোলুম অনিগী তুংকোইনা চৎনবা য়ারবা অমসুং মমল হোংবা তেক্নোলোজিশিংগী লমদা লমজিংনবা তেক্নোলোজি কম্পেন্দিয়ম অমা দোক্তর জিতেন্দ্র সিংহনা ফোঙখি।

***