ಗೋವಾ, 23 ನವೆಂಬರ್ 2023

54ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದ ಅಂಗವಾಗಿ ಗೋವಾದ ಕಲಾ ಅಕಾಡೆಮಿಯಲ್ಲಿ ಕಾರ್ತಿಕಿ ಗೊನ್ಜಾಲ್ವೆಸ್, ಆರ್.ವಿ.ರಮಣಿ, ಮಿರಿಯಮ್ ಚಾಂಡಿ ಮೆನಾಚೇರಿ, ಸಾಯಿ ಅಭಿಷೇಕ್ ಮತ್ತು ನಿಲೋತ್ಪಾಲ್ ಮಜುಂದಾರ್  ಅವರಿಂದ ವಿಶ್ವ ವೇದಿಕೆಯಲ್ಲಿ ಭಾರತೀಯ ಸಾಕ್ಷ್ಯಚಿತ್ರದ ಮಾಸ್ಟರ್ ಕ್ಲಾಸ್ ವಿಚಾರ ಸಂಕಿರಣ ನಡೆಯಿತು.

ಚರ್ಚಾ ನಿರ್ವಾಹಕರಾದ ಅನ್ಶುಲ್ ಚತುರ್ವೇದಿ ಅವರೊಂದಿಗೆ ಸಾಕ್ಷ್ಯಚಿತ್ರಗಳ ಕುರಿತ ಆಕರ್ಷಕ ಸಂವಾದದರಲ್ಲಿ, ಸಾಕ್ಷ್ಯಚಿತ್ರ ತಯಾರಕರು ಸಾಕ್ಷ್ಯಚಿತ್ರ ನಿರ್ಮಾಣದ ಸಾರ ಮತ್ತು ಸವಾಲುಗಳ ಬಗ್ಗೆ ಹೊಸ ಹಾಗೂ ಮೌಲ್ಯಯುತ ದೃಷ್ಟಿಕೋನಗಳನ್ನು ಹಂಚಿಕೊಂಡರು. ಭಾರತೀಯ ಸಾಕ್ಷ್ಯಚಿತ್ರಗಳು ಜಾಗತಿಕ ಮನ್ನಣೆಯನ್ನು ಗಳಿಸಿವೆ, ಪ್ರತಿಷ್ಠಿತ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿ ನಾಮನಿರ್ದೇಶನಗಳು ಮತ್ತು ಪ್ರಶಂಸೆಗಳನ್ನು ಗಳಿಸಿವೆ.

ಪ್ರೇರಕ ಶೈಲಿಯಲ್ಲಿ ಕಥೆ ಹೇಳುವಿಕೆ ಮತ್ತು ವೈವಿಧ್ಯಮಯ ಸಾಂಸ್ಕೃತಿಕ ಭೂದೃಶ್ಯಗಳ ಅನ್ವೇಷಣೆಗಾಗಿ ಪ್ರಸಿದ್ಧರಾದ ಪ್ರಸಿದ್ಧ ಸಾಕ್ಷ್ಯಚಿತ್ರ ನಿರ್ಮಾಪಕ ಕಾರ್ತಿಕಾ ಗೊನ್ಸಾಲ್ವಿಸ್ ಅವರು, ವಾಸ್ತವಿಕ ನೆಲೆಗಟ್ಟಿನ ಕಥೆಗಳು ನೈಜವಾಗಿ ತಮ್ಮ ಸತ್ಯವನ್ನು ಕಂಡುಕೊಳ್ಳುತ್ತವೆ, ಕಲಿಕೆ ಮತ್ತು ಪರಿವರ್ತನೆಯ ಸಮೃದ್ಧ ಪ್ರಯಾಣವನ್ನು ಬೆಳೆಸುತ್ತವೆ ಎಂದು ಹೇಳಿದರು. "ಸಾಕ್ಷ್ಯಚಿತ್ರಗಳಿಗೆ ಬೆಂಬಲಿತ ಪರಿಸರ ವ್ಯವಸ್ಥೆಯನ್ನು ಪೋಷಿಸುವಲ್ಲಿ ಸಹಯೋಗವು ಪ್ರಮುಖವಾಗಿದೆ," ಎಂದು ಅವರು ಹೇಳಿದರು.

ಸಿನಿಮಾ ರಂಗದ ಕೆಲಸಗಳಲ್ಲಿ ಕಲಾತ್ಮಕ ಆಳ ಮತ್ತು ಸಾಮಾಜಿಕ ಪ್ರಸ್ತುತತೆಗೆ ಹೆಸರುವಾಸಿಯಾದ ಹಿರಿಯ ಚಲನಚಿತ್ರ ನಿರ್ಮಾಪಕ ಆರ್.ವಿ.ರಮಣಿ, "ಸಾಕ್ಷ್ಯಚಿತ್ರ ನಿರ್ಮಾಣದ ಪ್ರಾಥಮಿಕ ಸಾರವು ವಾಸ್ತವಿಕ ನಿರೂಪಣೆಗಳನ್ನು ಅಧಿಕೃತವಾಗಿ ಚಿತ್ರಿಸುವುದರಲ್ಲಿದೆ, ಆದಾಯಕ್ಕೆ ಅಲ್ಲಿ ದ್ವಿತೀಯ ಸ್ಥಾನ," ಎಂದು ಹೇಳಿದರು.

ಅತ್ಯುತ್ತಮ ಸಾಕ್ಷ್ಯಚಿತ್ರಗಳ ಮೂಲಕ ಇದುವರೆಗೂ ಹೇಳಲಾಗದ ಕಥಾನಕಗಳನ್ನು ತೆರೆಯ ಮೇಲೆ ತರುವಲ್ಲಿ ಹೆಸರುವಾಸಿಯಾಗಿರುವ ಖ್ಯಾತ ನಿರ್ದೇಶಕಿ ಮತ್ತು ನಿರ್ಮಾಪಕಿ ಮಿರಿಯಮ್ ಚಾಂಡಿ ಮೆನಾಚೆರಿ ಅವರು, ತಮ್ಮ ಸಿನಿ ಪ್ರಯಾಣವನ್ನು ವಿವರಿಸಿದರು. "ಉತ್ಸಾಹವು ಸಾಕ್ಷ್ಯಚಿತ್ರ ಕಥೆಗಾರರನ್ನು ಪ್ರೇರೇಪಿಸುತ್ತದೆ; ಆದರೂ, ಮುಖ್ಯವಾಹಿನಿಯ ಮಾಧ್ಯಮಗಳಿಗೆ ಹೋಲುವ ಧನಸಹಾಯ ಮತ್ತು ಹೆಚ್ಚಿನ ಪ್ರೇಕ್ಷಕರ ಬೆಂಬಲವು ಮಹತ್ವಾಕಾಂಕ್ಷೆಯ ಸಾಕ್ಷ್ಯಚಿತ್ರ ನಿರ್ಮಾಪಕರಿಗೆ ನಿರ್ಣಾಯಕವಾಗಿವೆ,ʼʼ ಎಂದರು.

ಪರಿಣಾಮಕಾರಿ ಸಿನಿಮೀಯ ನಿರೂಪಣೆಗಳ ಮೂಲಕ ಸಂಸ್ಕೃತಿಗಳು ಮತ್ತು ಸಮುದಾಯಗಳನ್ನು ಒಂದುಗೂಡಿಸುವ ಸಾಕ್ಷ್ಯಚಿತ್ರ ರಂಗದಲ್ಲಿ ರೂವಾರಿಗಳಾಗಿರುವ ಸಾಯಿ ಅಭಿಷೇಕ್, ಭಾರತದ ಆಶಾವಾದಿ ಸಾಕ್ಷ್ಯಚಿತ್ರ ಭೂದೃಶ್ಯದ ಮೇಲೆ ಬೆಳಕು ಚೆಲ್ಲಿದರು. "ಭಾವೋದ್ರಿಕ್ತ ಪ್ರೇಕ್ಷಕರು ಇದ್ದಾರೆ, ಆದರೆ ಮುಖ್ಯವಾಹಿನಿಯ ಸಿನೆಮಾಕ್ಕೆ ಹೋಲಿಸಬಹುದಾದ ಬಲವಾದ ಪರಿಸರ ವ್ಯವಸ್ಥೆಯ ಕೊರತೆಯಿದೆ. ಫಿಲ್ಮ್ ಕ್ಲಬ್‌ಗಳು ಮತ್ತು ವಿತರಣಾ ಚಾನೆಲ್‌ಗಳಂತಹ ಬೆಂಬಲ ವ್ಯವಸ್ಥೆಗಳು ನಿರ್ಣಾಯಕವಾಗಿವೆ,ʼʼ ಎಂದು ಅವರು ಒತ್ತಿ ಹೇಳಿದರು.

ಸಾಮಾಜಿಕ ಸೂಕ್ಷ್ಮತೆಗಳು ಮತ್ತು ಮಾನವ ಅನುಭವಗಳ ಮಾರ್ಮಿಕ ಚಿತ್ರಣಗಳಿಗೆ ಹೆಸರುವಾಸಿಯಾದ ಸಾಕ್ಷ್ಯಚಿತ್ರ ನಿರ್ಮಾಪಕ ನಿಲೋತ್ಪಾಲ್ ಮಜುಂದಾರ್ ಅವರು, "ಸಾಕ್ಷ್ಯಚಿತ್ರ ನಿರ್ಮಾಣವು ಕಥೆ ಹೇಳುವಿಕೆಯನ್ನು ಕಾಲ್ಪನಿಕತೆಯಿಂದ ಮುಕ್ತಗೊಳಿಸುತ್ತದೆ, ಜೀವನದೊಂದಿಗೆ ಸಂವಾದವನ್ನು ಬೆಳೆಸುತ್ತದೆ ಮತ್ತು ಇದು ಪರಸ್ಪರ ಹಂಚಿಕೊಂಡ ಮಾನವ ಅನುಭವಗಳ ಮೂಲಕ ಸಂಪರ್ಕ ಸಾಧಿಸುವ ಬಗೆಯಾಗಿದೆ," ಎಂದು ಹೇಳಿದರು.

ಈ ಸಂದರ್ಭದಲ್ಲಿ, ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ ನಿರ್ದೇಶಕ (ಚಲನಚಿತ್ರಗಳು) ಶ್ರೀ ಆರ್ಮ್ ಸ್ಟ್ರಾಂಗ್ ಪಾಮೆ ಅವರು,  ಮಾಹಿತಿ ಮತ್ತು ಪ್ರಸಾರ ಸಚಿವಾಲಯವು ಕೋಲ್ಕತ್ತಾದ ಸತ್ಯಜಿತ್ ರೇ ಫಿಲ್ಮ್ ಆಂಡ್‌ ಟೆಲಿವಿಷನ್ ಇನ್ಸ್‌ಟಿಟ್ಯೂಟ್ (ಎಸ್‌.ಆರ್‌.ಎಫ್‌.ಟಿ.ಐ) ಮತ್ತು ಪುಣೆಯ ʻಫಿಲ್ಮ್ ಅಂಡ್ ಟೆಕ್ನಾಲಜಿ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾʼದಲ್ಲಿ ಸಾಕ್ಷ್ಯಚಿತ್ರ ನಿರ್ಮಾಣದಲ್ಲಿ ಅಲ್ಪಾವಧಿಯ ಕೋರ್ಸ್ ಅನ್ನು ಪ್ರಾರಂಭಿಸಲಿದೆ ಎಂದು ಪ್ರಕಟಿಸಿದರು. ರಾಷ್ಟ್ರೀಯ ಪ್ರಶಸ್ತಿ ವಿಜೇತ ಕೃತಿಗಳಿಂದ ಪ್ರಾರಂಭಿಸಿ ಸಾಕ್ಷ್ಯಚಿತ್ರಗಳನ್ನು ಪ್ರದರ್ಶಿಸಲು ದೂರದರ್ಶನದಲ್ಲಿ ಸಮಯವನ್ನು ನಿಗದಿಪಡಿಸುವುದಾಗಿ ಅವರು ಘೋಷಿಸಿದರು. ಚಲನಚಿತ್ರ ನಿರ್ಮಾಣ ಮತ್ತು ಸಹ-ನಿರ್ಮಾಣಕ್ಕಾಗಿ ʻಎನ್ಎಫ್‌ಡಿಸಿʼ ಮೂಲಕ ʻಐಎಫ್ಎಫ್ಐ ಫಿಲ್ಮ್ ಬಜಾರ್‌ʼನಲ್ಲಿ ಈ ವರ್ಷದಿಂದ 20 ಕೋಟಿ ರೂ.ಗಳ ನಿಧಿಯನ್ನು ಒದಗಿಸಲಾಗಿದೆ ಎಂದು ಶ್ರೀ ಪಾಮೆ ಮಾಹಿತಿ ನೀಡಿದರು.

* * *