गोंय/मुंबई, 23 नोव्‍हेंबर 2023

केंद्र सरकार आनी एनएफडीसीन पोन्न्या चित्रपटांची पुनर्स्थापना करपा खातीर केल्ल्या यत्नांची दिग्दर्शक केतन आनंदान तोखणाय केली. तांणी म्हणलें की, तांणी एक प्रिंट घेवन ताची पुनर्स्थापना केल्या, हें एक उल्लेखनीय तंत्रज्ञान पूण ही प्रक्रिया गुंतागुंतीची आसा, फ्रेम बाय फ्रेम रिस्टोरेशनाची गरज आसा. गोंयांत सुरु आशिल्ल्या 54व्या भारतीय आंतरराष्ट्रीय चित्रपट महोत्सवाच्या निमतान ते पत्रकारां कडेन उलयताले. 

1962  वर्साच्या चीन-भारत झुजाच्या फाटभुंयेर आशिल्ल्या ‘हकीकत’ ह्या चित्रपटाच्या पुनरुज्जीवनाचेर आनंद हाणें सांगलें, की ह्या चित्रपटांत झुज, मनीसकाय आनी सैनिकांनी सगळ्यो अडचणी कशो मात केल्यो, तें अचूकपणान दाखयलां. ताच्या कलाकृतींत घुस्पागोंदळ जावंक ना, आनी ती अखंड दवरल्या आनी ताची रंगीत आवृत्ती 54व्या इफ्फीत दाखयल्या, अशें तांणी सांगलें. काळो-धवो (ब्लॅक अँड व्हाईट) चित्रपट लागीचो दिसता पूण रंग आवृत्ती तरणाट्या पिळगे खातीर तयार केल्या, तांकां आकर्शीत करपा खातीर ही तयार केल्या, अशें आनंदान सांगलें. केतन आनंदान फुडल्या वर्सा 'हकीकत 2' अभिनेतो देव आनंदाचेर वेब मालिका जाहीर केली.

वैभव आनंदान म्हणलें, कि फावो त्या तंत्रगिन्यानाच्या उणावाक लागून आमी आदल्या काळांत जायत्या चित्रपटांचे प्रिंट गमयल्यात. ही प्रक्रिया कशी म्हत्वाची अशें सांगतना, ताणें सेल्युलोइड आवृत्त्यो सांबाळपाची गरज उक्तायली. तांणी मुखार सांगलें, "डिजिटल माध्यमांत वचप बरें", पूण डिजिटल तंत्रगिन्यानाचो फायदो घेतना 'क्लासिक' वर्गांत विचारांत घेतिल्ल्या चित्रपटांची, मूळ सेल्युलोइड आवृत्ती सांबाळप तितलेंच म्हत्वाचें. वैभव आनंदान ह्या कामा खातीर भारतीय राष्ट्रीय चित्रपट अभिलेखागारान केल्ल्या यत्नांची तोखणाय करून, चित्रपट पुनर्स्थापनेची प्रक्रिया गुंतागुंतीची आसता अशे सांगले. आनी तेखातीर जाय आशिल्ली वेवसायीक तंज्ञताय हांचोय उल्लेख केलो. 

पोन्न्या क्लासिक फिल्मां विशीं चड जागृताय निर्माण करपा खातीर इफ्फी सारके आनीक महोत्सव घडोवन हाडप गरजेचे आसा, अशें तांणी सांगलें. देशांतल्या पयसुल्ल्या वाठारांतल्या कलाकारांक, मर्यादीत साधनसुविधा आशिल्ल्या कलाकारांक आपली प्रतिभा दाखोवपाक आनी चित्रपट उद्देगांत संद मेळोवपाक माची कशी  मेळटली, हाचे विशी  तांणी सांगले. 

“माहिती आनी वितरावणी मंत्रालयान उदार मनान निधी दिल्ल्या राष्ट्रीय चित्रपट दायज मोहीमे खाला काळजीपूर्वक पुनर्स्थापित केल्ले सात क्लासिक चित्रपट दाखोवपा खातीर आमी एकठांय आयल्यात. सामुहीक यत्नाची साधना आशिल्लो हो खीण भारताच्या 54व्या आंतरराष्ट्रीय चित्रपट महोत्सवाचो खाशेलो भाग आसतलो,” अशे महोत्सव संचालक आनी म्हायती आनी प्रसारण मंत्रालयाचे संयुक्त सचीव (फिल्म) पृथुल  कुमार हांणी सांगलें.

आपल्या सिनेमा दायजाचे अमूल्य म्हत्व तिगोवन दवरपाची देशाची वचनबद्धताय हाचे राष्ट्रीय चित्रपट दायज मिशन हि एक गवाय. आमची सांस्कृतीक अस्मिताय घडोवपाक आनी काणयो सांगपाचे कले विशीं आमची कदर वाडोवपाक, आमच्या सिनेमा दायजाची भुमिका कितली म्हत्वाची आसा, हाचेर भर दिवपी हो प्रवास. एनएफडीसी-एनएफएआय फाटल्या कांय म्हयन्यां सावन क्लासिक फिल्मां सांबाळपाचेर काम करता, जंय फिल्माची दरेक फ्रेम कश्टान परतून तयार करतात. आमचो सिनेमा इतिहास आनी आयज आमी कन्टेन्ट पळयतात, तशें 4के रिझोल्यूशन सिनेमा  तिगोवन दवरप हो आमचो हेत आसा. 

* * *

PIB Mumbai | S.Jan/M.Prabhugaonkar/D.Rane

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai