गोंय/मुंबई, 22 नोव्‍हेंबर 2023

भारतीय आंतरराष्ट्रीय चित्रपट महोत्सवाची 54वी आवृत्ती फकत संवसारीक सिनेमा उत्कृश्टतायेचे दर्शन न्हय; तर आमच्या राष्ट्राच्या साबार कोनशांतल्यान भायर सरपी प्रादेशिक चित्रपटांच्या गिरेस्त विविधतायेचो तो उत्सव. प्रादेशिक सिनेमाचो भोवमान करपाच्या मोगाळ परंपरेक पाळो दिवन, इफ्फीन भारतांतल्या वेगवेगळ्या भाशांतल्या चित्रपटांचें प्रदर्शना खातीर खासा दीस बारीकसाणेन थारायल्यात.

आयच्यान सुरू जावन, भारतीय पॅनोरमा विभागांन उदेंत भारतांतल्या चित्रपटांनी ओड लायली. बंगाली, ओडिया, आसामी, मणिपुरी आनी वेगवेगळ्या ईशान्य बोलींनी ह्या विभागाक बाळगे दिले. उत्पल बोरपुजारी हाणें दिग्दर्शीत केल्लो बरुआर क्षोंगक्सर (असमिया चित्रपट), शिल्पिका बोर्दोलोई दिग्दर्शीत केल्लो ‘द स्पिरिट ड्रीम्स ऑफ चेराव’ (मिझो चित्रपट), हिमांशु सेखर खटुआ हाणें दिग्दर्शीत केल्लो ‘द सी अँड सेव्हन व्हिलेज’ (ओडिया फिल्म), कौशिक गांगुली हाणें दिग्दर्शीत केल्लो अर्धांगिनी (बंगाली चित्रपट) हे कांय प्रादेशिक चित्रपट इफ्फीच्या वेगवेगळ्या सुवातींनी दाखयले.

फुडले वेळापत्रक अशे आसा:

23 नोव्हेंबर: दक्षिण 1: तमिळ आनी मल्याळम

24 नोव्हेंबर : उत्तर : पंजाबी, डोगरी, भोजपुरी, राजस्थानी, उर्दू, छत्तीसगढ़ी

25 नोव्हेंबर : अस्तंत : कोंकणी, मराठी, गुजराती

26 नोव्हेंबर: दक्षिण 2 : कन्नड आनी तेलुगू

नामनेचे  दिग्दर्शक मणि रत्नम हाणें दिग्दर्शीत केल्लो तमिळ चित्रपट 'पोन्नीयन सेल्वान-2' आनी पुरस्कार फावो जाल्लो दिग्दर्शक जेओ बेबी हाणें दिग्दर्शीत केल्लो मल्याळम चित्रपट 'काथल-द कोर' 23.11.2023 दाखयतले. कल्की कृष्णमूर्तीचे ह्याच नांवाचे कादंबरीचेर आदारिल्ले पोन्नीयिन सेल्वान, चोल वंशाचो राजकुंवर आदित्य कारिकलन आनी एक गरीब अनाथ देवदासी चली, नंदिनी हांची दुख्खद मोगाची कथा सांगता. तांचो भुरगेपणांतलो मोग राजघराण्यान विरोध करून सोपोवन उडयलो. नंदिनीक करिकलाना पासून पयस दवरपा खातीर जमनींतल्यान धांवडावन घाले, म्हणून राजकुंवर कारिकलन तेन्ना सावन पिसो जालो. उपरांत, कथानकांत नंदिनी, राजकुंवर आनी सम्राट सुंदरा चोझर हांचेआड पांड्य राजा वीरपंडियन हाचो वध करपाचो सूड घेवपाचो कट रचता. चोल खजिनदार पेरिया पाझुवेत्तरायर हाचेकडेन लग्न जावन, ती चोलांत येता आनी मॅकियाव्हॅलीयन येवजण तयार करता. उपरांत जें जाता ती उत्तराधिकार, सत्ता संघर्श,  सूड, मोग आनी चोल राजवंशाच्या जिविताची इतिहासीक-राजकी-काणी.

'काथल-द कोर' ह्या सिनेमांत मल्याळम अभिनेतो मॅमूटी हांणी अभिनय केला. हो सिनेमा समलिंगी लोकां विशीं समाजाच्या मानसिकतेचो अभ्यास करता. ह्या सिनेमांतलो मुखेल नायक जॉर्ज देवासी हो एक अधिकारी, जो हालींच सहकारी बँकेंतल्यान निवृत्त जाला आनी ताची घरकान्न ओमाना, ताची धूव फेमी आनी जॉर्जचो बापूय देवासी हांचे वांगडा रावता. एका आयतारा सकाळीं इगर्जेचे विधी सोंपतकच जॉर्ज, येवपी पंचायत वेंचणुक लडोवापाचें थारायता आनी आपलो  उमेदवारी अर्ज  भरता. पूण सगळ्यांक धक्को बसता, दोन दिसांनी ताची घरकान्न ओमाना त्याच गांवांत ड्रायव्हिंग शाळा चलोवपी ताचो इश्ट, थॅंकन हाचे कडेन जॉर्जचे फाटल्या कांय वर्सां सावन समलिंगी संबंदांत आसा, अशें सांगून कुटुंब न्यायालयांत घटस्फोटाचो अर्ज दाखल करता. ह्या आरोपाक लागून कुटुंबांत, समाजांत घडपी घडणुकांची ही काणी आसा.

अश्याच आशयाचे चित्रपट अणभवपाक इफ्फी 2023 फिल्म मोगींक आपयता.

अदिक तपशीलां खातीर: https://iffigoa.org/

* * *

PIB Mumbai | S.Jan/M.Prabhugaonkar/D.Rane

सोशल मिडियावर आम्हाला फॉलो करा:@PIBPanaji    /PIBPanaji    /pib_goa   pibgoa[at]gmail[dot]com  /PIBGoa