0 2

गोंय/मुंबई, 20 नोव्‍हेंबर 2023

सर्जनशीलतेच्या भव्यतेन, सिनेमाच्या तेजस्वीपणांत आनी चलचित्रांतल्यान कथा सांगपाच्या कलेन रंगीत जाल्ल्या, आशियांतल्या प्रतिश्ठीत चित्रपट महोत्सवांतल्या ५४व्या आंतरराष्ट्रीय चित्रपट महोत्सवान गोंयच्या दर्यादेगेवेल्या स्वर्गांत मंत्रमुग्ध करपी सिनेमा प्रवास, भव्य उक्तावण सुवाळ्या वांगडा अधिकृतपणान सुरू जाला. महोत्सवाची ही आवृत्ती संवसारभरांतल्या संस्कृतायेची, नदर आनी कथनांची गिरेस्तकाय दाखोवपी चित्रपटांची एक अदभूत आनी सर्जनशील वळेरी दिता. पुरस्कार फावो जाल्लो ब्रिटीश फिल्म निर्मातो स्टुअर्ट गॅट हाच्या 'कॅचिंग डस्ट' ह्या सिनेमाच्या आंतरराष्ट्रीय प्रीमियरान णव दिसांच्या फिल्म महोत्सवाची सुरवात जाल्या.

नामनेची बॉलीवूड अभिनेत्री माधुरी दीक्षित हांका भारतीय सिनेमात मोलाचे योगदान दिल्लेखातीर,  केंद्रीय म्हायती आनी प्रसारण, युवा वेव्हार आनी खेळ मंत्री, श्री अनुराग सिंग ठाकुर हांणी भोवमानित केल्यो. म्हायती आनी प्रसारण राज्यमंत्री डॉ. एल मुरुगन, आनी गोंयचे मुख्यमंत्री प्रमोद सावंत हे उक्तावण सुवाळ्याक हाजीर आशील्ले. 

फिल्म शूटिंगाखातीर भारत सगळ्यांत चड मागणी आशिल्लें थळ  करपाचें उतर : वसुधैव कुटुंबकम हे कल्पनेंत रुजली इफ्फी - अनुराग ठाकुर

सिनेमाची शक्त अविश्वसनीय आसा आनी आपल्या पुराय इतिहासांत सिनेमान विचार, कल्पनाशक्त आनी नवनिर्माण अशी चालक शक्त तयार केल्या, अशे केंद्रीय म्हायती आनी प्रसारण मंत्री, श्री अनुराग ठाकुर हांणी उक्तावण सुवाळ्यांत दिल्ल्या उलोवपात सांगले. 

देशांत मिडिया आनी मनरिजवण क्षेत्र वाडोवपा खातीर भारत सरकारान घेतिल्ल्या जायत्या म्हत्वाच्या उपक्रमांचेर भर दितना, मानादीक प्रधानमंत्री भारताक फिल्म-शूटिंग आनी पोस्ट प्रोडक्शनाखातीर सगळ्यांत चड मागणी आशिल्लें थळ  करपाक सोदता. 2023  वर्साच्या सिनेमेटोग्राफ (दुरुस्ती) विधेयकाक लोकसभा आनी राज्यसभेची मान्यताय मेळ्ळ्या, अशेंय मंत्र्यांनी सांगलें. ''हो कायदो  कायदेशीर चौकटी रूंद करता, सेंसरशिपा भायर आपलें लक्ष कॉपीराइट संरक्षणा पुरतेच मर्यादीत दवरिना तर चित्रपट निर्मात्यांचे  कश्ट आनी समर्पण वाया वचचें न्हय, हे खातीर पायरेसी विरोधी उपायांचेर लक्ष केंद्रीत करून, पायरेसी आड खर उपाय सुरू करता' अशें तांणी सांगलें.

हालींच सोंपिल्ल्या जी-20 शिखर सभेच्या संदर्भांत केंद्रीय मंत्र्यान सांगलें, कि उदरगत, विविधताय आनी लोकशाय हांचेर आदारिल्लें भारताचें बहुआयामी आनी बहुस्तरीय उदरगत मॉडेल संवसारांन  पळयलां. तांणी फुडें सांगलें, जी-20 अध्यक्षपदाच्या काळांत भारताच्या पद्दती प्रमाण, भारताच्या ५४व्या आंतरराष्ट्रीय चित्रपट महोत्सवाची मुखेल संकल्पना आनी विशय “वसुधैव कुटुंबकम ” हे कल्पनेंत रुजल्या, जातूंत संवसार एक कुटुंब आसा, थंय शांततायेन सहअस्तित्वाचें म्हत्व मुखार दवरलां.

विदेशी चित्रपट निर्मिती खातीर प्रोत्साहन जाहीर : 

एक व्हडली घोशणा करून, केंद्रीय मंत्र्यानी  भारतांत विदेशी चित्रपट निर्मिती खातीर प्रोत्साहन दिवपाची घोशणा करीत 30 ते 40% मेरेन वाडयल्या, 2.5 कोटी रुपया वयल्यान 30 कोटी रुपया मेरेन वाडयल्ली मर्यादा, 35 लाख अमेरिकन डॉलर परस चड, आनी भारतीय संदर्भाच्या चित्रपटाखातीर अतिरिक्त 5% टक्के बोनस आसतलो, अशेय मंत्री ठाकूर  हांणी सांगलें.  ‘भारताचो आकार आनी व्हड क्षमता पळयल्यार मध्यम आनी व्हड अर्थसंकल्पीय आंतरराष्ट्रीय चित्रपट प्रकल्पांक आकर्शीत करपा खातीर चड प्रोत्साहन दिवपाची गरज आसा आनी फिल्म निर्मितीक प्रोत्साहन दिवपाची बांदीलकी भारताच्या कलेच्या वचनबद्धतेची  आनी आदाराची गवाय म्हणून काम करता’ अशेंय तांणी सांगले. 

75 क्रिएटिव्ह माइंड्स ऑफ टुमॉरो : 

पयलेच खेपे 75 क्रिएटिव्ह माइंड्स ऑफ टुमॉरो कार्यावळी खाला भरती मोहीम जातली, जाका लागून तांच्या फुलपी प्रतिभे खातीर आनी करिअराखातीर मर्यादेबगर संद मेळटली. 2021 वर्सा सुरू जाल्ली आनी आतां तिसरे आवृत्तींत आयिल्ल्या ह्या महोत्सवात 19 राज्यांतल्यान 75 तरणाटे चित्रपट निर्माते वेंचून काडल्यात, तातूंत 10 विभागातल्या सुमार 600 नामांकना  मदी  बिष्णुपूर, जगतसिंहपूर, आनी सदरपूर सारकिल्या पयसुल्ल्या वाठारांतल्यान लेगीत नामांकना आसात.

बेस्ट वेब सिरिज (ओटीटी) विभागांत नवो पुरस्कार दितले : 

ह्या महोत्सवाच्या 54व्या आवृत्तींत जायत्या ‘पयल्या’ची घोशणा करतना, श्री अनुराग ठाकुर हांणी सांगलें की, पयलेच खेपे, “बेस्ट वेब सीरीज (ओटीटी) पुरस्कार” नांवाचो पुरस्कार दितले.  निर्मात्यांची भुमिका, रोजगार आनी नवनिर्माणांत तांणी दिल्ल्या योगदानाची हांतुतल्यान तोखणाय जातली. बेस्ट वेब सिरिज (ओटीटी) पुरस्कारा खातीर, 15 ओटीटी प्लॅटफॉर्मांतल्यान 10 भाशांनी वट्ट 32 नामांकना आसात.

फिल्म बाजार आनी व्हीएफएक्स आनी टेक पॅव्हिलियन :

मंत्रीमंडळान जाहीर केल्लेप्रमाण अंदु पयलेच खेपे, इफ्फीन सिनेमा संवसारांतल्या नवनिर्माणांक आदार दिवपाखातीर बरो क्युरेट केल्लो “व्हीएफएक्स आनी टेक पॅव्हिलियन” सुरू केला. आनी बिगर आदार दिवपाक ताच्या सहनिर्मिती बाजारांत, डॉक्युमेंटरी विभाग सुरू करून फिल्म बाजाराची व्याप्ती वाडयल्या.  

सिने-मेला 

अंदूं पयलेच खेपे सिने-मेला जातलो, तातूंत प्रादेशिक चित्रपट, जेवण, संगीत, संस्कृताय आनी हेर माध्यमांतल्यान भारताच्या गिरेस्त विविधतायेचो उत्सव दाखयतले.

पुनर्स्थापित क्लासिक विभाग

भारतीय क्लासिकाच्या इबाडिल्ल्या सेल्युलोइड रीलांतल्यान राष्ट्रीय फिल्म दायज मिशनाच्या (एनएफएचएम) खाला एनएफडीसी/एनएफएआय हांणी बारीकसाणीन पुनर्स्थापित केल्ल्या उत्कृश्ट कलाकृतींचे ७ संवसारीक प्रीमियर आशिल्लो, पुनर्स्थापित क्लासिक विभागय सुरू केला.

समावेशकता आनी मनरिजवण

अंदूंच्या महोत्सवा खातीर सगळ्या सुवातींनी दिव्यांग व्यक्तींक सुविधा आसतली.  54व्या इफ्फी खातीर समावेशकता एक मार्गदर्शक तत्व आसा, अशें मंत्री अनुराग ठाकूर हांणी सांगलें. आमच्या दिव्यांगजन प्रतिनिधीं खातीर चार खाशेली प्रदर्शनां एम्बेडेड ऑडियो वर्णन आनी सांकेतिक भाशेची तरतूद, प्रधानमंत्री नरेंद्र मोदी हांच्या दृश्टीकोनाक आनीक एक आयाम जोडून 'सबका साथ, सबका विकास —‘सबका मनोरंजन’ म्हळ्यार ‘सगल्यांक मनरिजवण, ही घोषणा मुखार व्हरता. 

इफ्फींत 40 बायल फिल्म निर्मात्यांचे चित्रपट आसात. तांची प्रतिभा, सृजनशीलता आनी अद्वितीय नदर ह्या ‘विचारांचो मेळ’ वेगवेगळे मतांचो आनी कथांचो उत्सव करपाचें उतर दिता. 

तशेंच मंत्र्यांनी 2023 वर्साचो प्रतिश्ठीत सत्यजीत रे जीणे गौरव पुरस्कार जाहीर केलो - अमेरिकेचे हॉलीवूड अभिनेते-निर्माते मायकल डग्लस हांका हो पूरस्कार घोशीत जाला. समारोप सुवाळ्या वेळार ताका हो पुरस्कार दितले. फिल्म आनी दूरचित्रवाणी उद्देगांत 50 वर्सां वयर काम केल्ल्या मायकल डग्लसाक 2 ऑस्कर, 5 गोल्डन ग्लोब पुरस्कार, प्राइमटायम एमी पुरस्कार आनी हेर असंख्य भोवमान मेळ्ळ्यात.

उक्तावण सुवाळ्याक केंद्रीय म्हायती आनी वितरावणी राज्यमंत्री श्री एल. मुरुगन आनी केंद्रीय बंदरां, जहाज येरादारी आनी उदकामार्ग राज्यमंत्री, श्री श्रीपाद येसो नायक हाजीर आशिल्ले.

गोंयचें फिल्म फ्रेंडली डेस्टिनेशन म्हूण प्रचारांत इफ्फीची मुखेल भुमिका आसतली: गोंयचें मुख्यमंत्री

गोंय राज्य चित्रपट स्नेही थळ जावपाखातीर, इफ्फीची मुखेल भुमिका आसतली, अशे गोंयचे मुख्यमंत्री प्रमोद सावंत हांणी उक्तावण सुवाळ्यांत उलयतांना सांगलें. “हालींच्या वर्सांनी गोंयच्या सिनेमा उद्देगांतय वाड जाल्या आनी कोंकणी सिनेमान इफ्फींत आपली सुवात कोरून घेतल्या’’ अशें तांणी सांगलें. अंदूं इफ्फी खातीर गोंय विभागा खाला मेळिल्ल्या 20 नामांकनातल्यान जूरीन 7 सिनेमा वेंचून काडल्यात, अशें तांणी सांगलें. फिल्म निर्मिती उद्देगाच्या विस्तारा खातीर राज्यांत फिल्म सिटी स्थापन करपा खातीर एंटरटेनमेंट सोसायटी ऑफ गोंय, हांणी पावला उबारल्यात अशेय, मुख्यमंत्र्याननी सांगलें.

उक्तावण कार्यावळी वेळार जूरी वांगड्यांकय केंद्रीय मंत्री अनुराग ठाकुर हांणी भौमानीत केले. ह्यावेळार म्हायती आनी वितरावणी राज्यमंत्री श्री एल. मुरुगन आनी गोंयचे मुख्यमंत्री प्रमोद सावंत हाजीर आशिल्ले. 

फुडले ८ दीस गोंय, आशियांतल्या एका व्हडल्या फिल्म उत्सवाच्या भव्यतेन रंगतले. आकर्शक काणया सावन विचार करपा सारके म्हायतीपट आनी प्रयोगात्मक चित्रपट मेरेन, इफ्फी 2023 सिनेमाप्रेमी आनी उद्देगीक वेवसायिकांक मोहित करपाक तयार आसा. सिनेमा संवसारांतले नामनेचे चित्रपट निर्माते, प्रतिभावान कलाकार आनी दर्शक ह्या महोत्सवाची सोबीतकाय वाडयतले. 

चित्रपट मळावेल्या तारकांनी भरिल्ल्या ह्या उक्तावण सुवाळ्यांत, बॉलिवूड सुपरस्टार माधुरी दीक्षित आनी शाहिद कपूर हांची उपस्थिती आशील्ली. श्रीया सरन, नुसरत भरूचा, पंकज त्रिपाठी, शांतनु मोइत्रा, श्रेया घोशाल, सुखविंदर सिंग ह्या हेर बॉलिवूड स्टारांनीय उक्तावण सुवाळ्यांत सादरीकरण करून, प्रेक्षकांक आपल्या सादरीकरणान मोहित केले.

विविधताय आनी सृजनशीलतायेक आपणावन भारताच्या आंतरराष्ट्रीय चित्रपट महोत्सवाची 54वी आवृत्ती, चित्रपटांची एक तेजस्वी वळेरी घेवन एक अदभूत आनी सर्जनशील सिनेमा अणभव दिवपाचें उतर दिता. 

* * *

PIB Mumbai | S.Jan/M.Prabhugaonkar/D.Rane

Follow us on social media:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai