সাইন্স অমসুং তেক্নোলোজিগী রাজ্য মন্ত্রী(মনিংতম্বা); পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা ঙসি হায়খি ভারত্তা নোংথক্তা চৎথোক-চৎশিন তৌবা অসি মখা তানা ইনাকখুনবশিংগী ওইদ্রে।

এরোনাউতিকেল সোসাইতি ওফ ইন্দিয়া( AeSI) চহি ৭৫ মপুংফারকপগী থৌরমদা দোক্তর জিতেন্দ্র সিংহনা হায়খি, প্রধান মন্ত্রী শ্রী নরেন্দ্র মোদীগী স্কিম উরান(উরে দেস কা আম নাগরিক)গী খুৎথাংদা মথক্তা চৎথোক-চৎশিন তৌবা হায়বসি মীচম মীয়ামগী চৎথোক-চৎশিনগী পাম্বৈ অমা ওইরে, এয়রপোর্তশিংগী মশিং শরুক অনিদা হেনগৎলে, ভারাগী মমল হোঙলে। হৌজিক এয়রপোর্তশিংদা “হৱাই” চপ্পল তোংবা মীওই কয়া “হৱাই-জহাজ” তোংবা উরে।

য়ুনিয়ন মিনিস্তরনা হায়খি মসি ভারা মমল হোংবা খক্তনা ওইহনবা নত্তে, ২০১৪দা এয়রপোর্ত মশিং ৭৫ লৈরম্বদগী হৌখিবা চহি ৯দা মশিং শরুক অনিদা হেনগৎতুনা হৌজিক এয়রপোর্ত ১৫০ হেন্না লৈরে। এরোনাউতিকেল অমসুং স্পেস সেক্তরগী মরমদা দোক্তর জিতেন্দ্র সিংহনা হায়খি ২০২৫দা ভারতকী মপুংফানা মশানা শেম-শাজবা অহানবা মীওইবা য়াওবা মিসন গাগানয়ান থাগৎলবা মতুংদা, ২০৩৫দা ভারতনা মশাগী স্পেস স্তেসন লৈরগনি অমসুং ২০৪০দা ভারতমচা অমা থাদা চৎলগনি। ঐখোয়গী লৈবাক অসিদা এরোস্পেস চাউখৎনবা অমসুং মতেং পীন্নবা এরোনাউতিকেল সোসাইতি ওফ ইন্দিয়া( AeSI) অসি য়াম্না মরুওইবা মফম অমনি।

দোক্তর জিতেন্দ্র সিংহনা হায়খি প্রধান মন্ত্রী নরেন্দ্র মোদীগী লমজিং মখাদা, হৌখিবা চহি ৯-১০দা সাইন্স অমসুং তেক্নোলোজিগী লমদা মরুওইনা এভিএসন অমসুং এরোস্পেসতা ভারতনা চাউখৎলকপা অসি ঐখোয়গী পাংথোকপা ঙম্বা থবকশিংগী ঙমখৈশিং পাংথোক-চাউথোরকপগী খুদম অমনি। ২০২০দা স্পেস সেক্তর হাংদোক্লবা মতুংদা, ২০১৪দা শুপ্নগী সেক্তর অসিদা স্তার্দঅপ ৪-৫ খক লৈরম্বদগী হৌজিক স্তার্দঅপ ১৫০ য়ৌরে।

দোক্তর জিতেন্দ্র সিংহনা হায়খি ঐখোয়না তুংলমচত্তা য়েংবদা, দরকার ওইবা মচাক-মথুমশিং পীদুনা সরকারনা খোঙজেল য়ানা সাইন্তিফিক কম্মুনিতি শৌগৎতুনা এরোস্পেস তেক্নোলোজি হান্নদগী হেন্না ফগৎনবা ভারতনা থৌরাং তৌরে। লৈবাক অসিনা মশাগী ওইনা পুথোকচবা অমসুং অনৌবা থবক পায়খৎপা হেনগৎহন্দুনা, হন্দক হৌদোকখিবা “মেক ইন ইন্দিয়া” থৌরাংনা ঐখোয়গী এরোস্পেসকী থবকশিং অওনবা পুরকপা হৌরে।

দোক্তর জিতেন্দ্র সিংহনা হায়খি ভারতকী এরোস্পেস সেক্তর শিংথাবা য়ানা অওনবা লৈরে অমসুং মমাঙদা অমুক্তা উখিদ্রিবা মাইপাকপশিং ঐখোয়না উবা ফংলে। চন্দ্রয়ান-৩ মার্স ওর্বিতর মিসন, অদিত্য এল-১ মাইপাকখিবা অমসুং তুংগী ইসরোগী মিসনশিং হায়বদি গাগানয়ান, লৈবাক অসিনা মশানা শেমগৎজবা লাইত কম্বেত এয়রক্রাফ তেজাস, দি.আর.দি.ওগী অনৌবা মিসাইল সিস্তেমশিং অমসুং সরকার/লনাই কম্পেনিশিং অমসুং স্তার্দঅপশিংগী অতোপ্পা তেক্নোলোজিশিংগী মাইপাকপা উরে অমসুং মালেমগী থাক্তা ঐখোয়গী সাইন্তিস্তশিং অমসুং ইঞ্জিনিয়ারশিংনা ভারতকী তৌবা ঙম্বা উৎলে। মথক্কী মালেম থাক্কী মিসনশিং অসি “হোল ওফ সাইন্স” , “হোল ওফ গভর্নমেন্ত” অমসুং “হোল ওফ সোসাইতি”গী থৌরাংগী খুদমশিংনি।

দোক্তর জিতেন্দ্র সিংহনা হায়খি “এরোস্পেস অমসুং এভিএসন, ২০৪৭”গী মালেমগী কনফরেন্স অমসুং একজিবিসন অসি লৌশিং পীথোক-পীশিন অমসুং মতেং পাংনবগী লমদা ঐখোয়গী কৎথোকপগী খুদম অমনি। ঐখোয়না এরোনাউতিকেল সোসাইতি ওফ ইন্দিয়াগী থবকশিং হরাও-তয়াম্বা ফোঙদোকপগা লোয়ননা, সাইন্স অমসুং তেক্নোলোজিদা মাঙজিল থানবা ঐখোয় ইশামক অমুক হন্না কৎথোক্লসি অমসুং এরোস্পেস তেক্নোলোজিদা ভারত লুচিংবা অমা ওইনবা ঐখোয় মখা তানা অচৌবা মঙলান মঙলসি, অনৌবা থবক পাংথোক্লসি অমসুং পুন্না থবক তৌমিন্নরসি।

মহাক্কী ৱারো লোইশিল্লকপদা, মখা তানা এরোনাউতিকেল সোসাইতি ওফ ইন্দিয়া মাইপাক্নবা অমসুং মীফম অসি মাইপাক্নবা দোক্তর জিতেন্দ্র সিংনা মহাক্কী য়াইফ-পাউজেল পীখি। ঐখোয় অনৌবা থাকশিং য়ৌবা ঙম্বা ওইরসনু, খোঙদাদ্রিবা মফমশিং থিদোকপা ঙম্বা অমসুং  ঐখোয়গী লৈবাক্কী সাইন্সকী থবকশিংদা মতেং পাংলসি হায়না মিনিস্তরনা মখা তাখি।

****