কম্মর্স অমসুং ইন্দস্ত্রি, কঞ্জুমর এফেয়ার্স, ফুদ অমসুং পব্লিক দিস্ত্রিবিউসন অমসুং তেক্সতাইলগী য়ুনিয়ন মিনিস্তর শ্রী পিয়ুস গোয়ালনা মহাক্কী য়ু.এস খোঙচৎকী হুমনি চনবা নুমিত্তা ভারত্তগী হৌখিবা সিলিকোন ভেলি ওন্ত্রেপ্রেনিউয়রশিং অমসুং ভেঞ্চর কেপিতেলিস্তশিং উনখ্রে। মালেম শীনবা থুংনা লৈরিবা ইভেস্তরশিংনা শেন থাদবা নুংঙাইনবা মফম অমা ওইনা ভারত শেমগৎনবগী মতাংদা মখোয়গী ওইবা অনৌবা ৱাখল্লোনশিং পুথোক্নবা থৌরম অদুদা শরুক য়াখিবশিংদা য়ুনিয়ন মিনিস্তরনা তকশিনখি। মিনিস্তরনা ভারতকী স্তার্দঅপকী থবকশিংগী মতাংদা পাউদমখি অমসুং আর্তিফিসিএল ইন্তিলিজেন্স য়াওনা মরুওইবা অমসুং অনৌবা তেক্নোলোজিশিংদা থবক তৌরিবা ভারতকী নহারোলশিং মতে পাংনবা ওন্ত্রেপ্রেনিউয়রশিং অমসুং ভি.সিশিংদা তকশিনখি।

তুংদা, শ্রী গোয়ালনা স্তেনফোর্দ, য়ু.সি বরকেলি, ফ্রেসনো স্তেৎ, য়ু.সি সান্ত, য়ু.সি দেবিস অমসুং সিলিকোন য়ুনিভর্সিতি অন্ধ্র য়াওনা তোঙান-তোঙানবা য়ুনিভর্সিতিশিংগী ওজাশিংগা রাউন্দতেবল খন্ন-নৈনবা অমা পাংথোকখি। ভারতনা মতৌ করম্নবা স্তেনফোর্দগুম্বা মপান লৈবাকশিংগী য়ুনিভর্সিতিশিংগা অপুনবা কেম্পসশিং লিংখৎকনি অমসুং পুন্না থবক তৌমিন্নগনি হায়বগী মতাংদা মীফম অদুদা খন্নখি।

ইন্সতিতুৎ ওফ চার্তর একাউন্তস ওফ ইন্দিয়া, সান ফ্রান্সিস্কো চেপ্তরনা শীনবা “চার্তিং নিউ হোরাইজোনস: সি.এ এস কেতালিস্ত ইন য়ু.এস-ইন্দিয়া পার্তনরশিপ” হায়বা থৌরম মিনিস্তরনা শরুক য়াখি। থৌরম অদুদা ইন্সতিতুৎ ওফ চার্তর একাউন্তস ওফ ইন্দিয়গী মেম্বরশিংগা খন্ন-নৈনবা পাংথোকখি অমসুং ভারত অমসুং য়ু.এসগী মরক্তা পুন্না থবক তৌমিন্নবদা সি.এশিংনা লৌগদবা থৌদাংগী মতাংদা মিনিস্তরনা ফোঙদোকখি।

তুংদা মিনিস্তরনা মাইক্রোন তেক্নোলোজিগী সি.ই.ও সঞ্জয় মেহরোত্রা অমসুং য়ুতুবকী সি.ই.ও নেল মোহনগা উনখি। হায়রিবা কম্পেনিশিং অসিনা ভারত্তা থবক তৌরিবা অমসুং মখোয়গী থবকশিং ভারত্তা পাকথোক-চাউথোকহন্নবগী মতাংদা মিনিস্তরগা লোয়ননা খন্নখি। মাইক্রোনগা লোয়ননা খন্নবদা, কমদৌনা ভারতকী সেমিকন্দক্তরগী থবকশিং চাউখৎহনগনি হায়বগী মতাংদা খন্নখি। ভারতকী দিজিতেলগী থবকশিং অমসুং নহা ওইরিবা লৌশিং লৈরবা মীওই কয়াগী মতাংদা মিনিস্তরনা এল মোহনগা লোয়ননা খন্নখি।

তুংদা য়ুনিয়ন মিনিস্তরনা এসিয়া পেসিফিক ইকোনোমিক কোওপরেসনগী তরাম্না ওকপগী থৌরম শরুক য়াখি অমসুং থৌরম অদু রাস্ত্রপতি জো বাইদেন অমসুং ফার্স্ত লেদি জিল বাইদেন্না শীনবনি। এসিয়া পেসিফিক ইকোনোমিক কোওপরেসনগী মেম্বরশিংগী মনুংদা অস্ত্রেলিয়া, ব্রুনৈ, জপান, কোরিয়া, মালেএসিয়া, মেক্সিকো, নিউ জিলেন্দ, পাপুৱা নিউ গিনিয়া, পেরু, ফিলিপ্পিন্স, রুসিয়া, শিঙ্গাপুর, তাইপৈ, থাইলেন্দ য়ু.এস.এ অমসুং ভিয়েতনাম য়াওরি।

****