আয়ুশ মন্ত্রালয়না আয়ুর্বেদগী তাশিন-চুংশিল্লবা ইকো সীস্তেম অমা এজুকেসন, রিসর্চ, পোত্থোক অমসুং সেবাশিংগী খুত্থাংদা মালেমগী থাক্তা হৌজিক শেমগৎলি। হরিয়ানাগী পঞ্চকুলাদা পাংথোক্লিবা নিপানশুবা আয়ুর্বেদ নুমিৎ মহাপর্ভাগা মরী লৈননা পাংথোক্লিবা কনফরেন্স অসিদা কেন্দ্রগী আয়ুশ মন্ত্রী, শ্রী সর্বানন্দ সোনোৱালনা ৱাফম অসি হায়খিবনি। আয়ুর্বেদগী হিদাক হায়বসিদি চহি লিশিং ফারবা চৎনবী অমগী শরুক অমনি অমসুং থাইনগী মতমদগী হৌনা মসিনা ভারতকী খুন্নাই, মহৈ-মশিং তম্বা, সেবা অমসুং পুন্সি মহিংগী শরুক ওইদুনা লাক্লিবনি।

হন্দক্তা পাংথোকখিবা G20 মীফমদা, ভারতনা মেম্বর লৈবাকশিংগী মফমদা ‘বাসুদৈবা কুতুম্বাকম’গী পাউজেল পীখি অমসুং মসিবু মীয়াম্না য়ানখি অমসুং G20 দিক্লারেসনগী খুত্থাংদা মমাংদা অমুক্তা ফংখিদ্রিবা মায় পাকপা অমসু ফংখি হায়না শ্রী সোনোৱালনা হায়খি। অনৌবা চাংয়েংগা লোয়ননা তুংলমচৎকী মাইকৈদা লেপ্তনা চঙশিনবগী ইথিল, মসিগী মনুংদা আয়ুশপু চাউখৎহনবা হায়বসিসু মনুং চল্লিবনি, অসিনা ভারতপু চাউখৎলক্লিবা লৈবাক্তগী মালেমগী খ্বাইদগী মঙাশুবা চাউবা শেন্মিৎলোন ওইহনখিবনি।

নহা অমসুং মীচম মীয়াম্না লৌউ-শিংউ, হোর্তিকলচর অমসুং শা-ঙাগী হিদাক লাংথক্কা মরী লৈনবা আয়ুর্বেদগী পোত্থোক কয়া কম্মর্সিএল ওইবা মওংদা পুথোক্তুনা মায় পাক্লবা স্তার্তঅপ শেম্বা ঙমগনি। মসিগুম্বা স্তার্তঅপ কয়া শেমদুনা চাউখৎলকপদগী, ভারৎকী শেন্মিৎলোন্না মরোমদোম লেপচবা ঙম্বা শেন্মিৎলোন ওইদুনা মপাঙ্গল হেন্না কনখৎলক্কনি।

‘আয়ুর্বেদ নুমিৎ’কা মরী লৈননা পাংথোক্লিবা কনফরেন্স অসিবু হৌদোকপগী থৌরমদা আয়ুশকী কেন্দ্রগী রাজ্য মন্ত্রী, শ্রী মুঞ্জপারা মহেন্দ্রভাইসু অখন্নবা মীথুংলেন অমা ওইনা শরুক য়াখি। ‘হেল্থ সেক্তর’ চাউখৎহনবা হায়বসিদি সরকারগী থৌদাংনি অদুগা আয়ুর্বেদগী অখন্নবা মতৌদি মসিনা হকশেল ফনবগীদমক্তা মীয়াম্না শরুক য়াবগী মতৌদা অহেনবা মিৎয়েং চঙবসিনি হায়না শ্রী মুঞ্জপারানা হায়খি। আয়ুর্বেদবু পুন্সি মহিংগী শরুক অমা ওইহন্দুনা, হকশেলগী সেক্তরদা সেবা তৌবগী থৌওংবু মপাঙ্গল হেন্না কনখৎহনবা য়াগনি ।

থৌরম অসিগী অখন্নবা মীথুংলেন অমা ওইরিবা, আয়ুশ মন্ত্রালয়গী সেক্রেতরী, পদ্মশ্রী বৈদ্যা রাজেশ কোতেচানা আয়ুর্বেদ হায়বসিদি লোইবা নাইররোইদ্রবা লৌশিংগী লন্নি, অমসুং মসিনা মতম অমসুং চৎনবীগা লোয়ননা তুংলমচত্তা লেপ্তনা চঙশিল্লি হায়খি। ঙসিদি, পব্লিক হেল্থকী ওইবা মালেমগী ৱাখল্লোনগা লোয়ননা, আয়ুর্বেদগী চৎনবী অসিবু তুংলমচত্তা ঐখোয়না মতম করম্না পুবা য়াগদগে হায়না য়েংবগী অমত্তা ঙাইরবা পান্দমগা লোয়ননা ঐখোয়না মফমসিদা অমত্তা ওইনা পুল্লি।

আয়ুশ মন্ত্রালয়না ‘আয়ুর্বেদ ফোর ৱান হেল্থ’ হায়বা পাউজেলগা লোয়ননা থা অমা চুপ্না চত্থরকপা কেম্পেন অসি ঙসি লোইশিনখ্রে। মালেমগী মফম কয়াগী মীওই করোর কয়ানা কেম্পেন অসিদা শরুক য়াখি, অমসুং মীওইবা, শা-ঙা, অকোয়বগী শক্তম অমসুং পাম্বীশিংনা আয়ুর্বেদগী খুত্থাংদা হকশেল ফনা মতৌ করম্না লৈগদগে অমসুং আয়ুর্বেদগী তোপ-তোপ্পা পথাপ অমা শেমগদগে হায়বা ৱাফম মখোয়না খঙখ্রে।

কনফরেন্স অসিগা লোয়ননা, ‘আয়ুর্বেদ মহাপর্বা’ এক্সপো অমসুং রাজ্য নিপানগী ওইবা নেস্নেল আয়ুশ মিসন (NAM)গী রিভিয়ু মীফম অমসু পাংথোকখি। লৈবাক শিনবা থুংবগী আয়ুর্বেদগী পোত্থোক শাবশিং, স্তার্তঅপ অমসুং আয়ুর্বেদ প্রোফেস্নেল কয়ানা মখোয়গী পোত্থোকশিং লান্থোক্নখি। নেস্নেল আয়ুশ মিসনগী মীফমদা, রাজ্য নিপান্মক্কী থবক থৌরমশিংবু হঙ্গৎনা য়েংশিনখি অমসুং আয়ুশ মন্ত্রালয়না রাজ্যশিংগী মীহুৎশিংদা নেস্নেল আয়ুশ মিসনবু মায় পাকহন্নবা ৱাফম থমখি। আয়ুশ মন্ত্রালয়গী জোইন্ত সেক্রেতরী, শ্রীমতি কবিতা গার্গনা রাজ্য নিপান অসিদা ফংখিবা আয়ুশ মিসনগী মায় পাকপা অমসুং থবক কয়াগী মতাংদা হঙ্গৎনা য়েংবগী প্রজেন্তেসন অমসু লান্থোকখি। আয়ুশ মন্ত্রালয়গী আয়ুর্বেদগী এদভাইজর, বৈদ্যা মনোজ নেসারীনা কনফরেন্স অসিগী পান্দম অমসুং মনুং চনবা থবক থৌরমশিংগী মতাংদা পাউদম থমখি। হয়েং, নবেম্বর 10 অসিদা নিপানশুবা আয়ুর্বেদ নুমিৎকী মরু ওইবা থৌরম অসি ধনবন্তরী নুমিৎকী য়াইফরবা মতমসিদা পঞ্চকুলাগী ইন্দ্রধনুশ ওদিতোরিয়মদা পাংথোক্লগনি।

***