’’وزارت آیوش کے ذریعہ تعلیم ، تحقیق ، مصنوعات اور خدمات کے ذریعہ عالمی سطح پر ایک منظم آیوروید ایکو سسٹم تعمیر کیا جارہا ہے۔ ‘‘مرکزی آیوش وزیر جناب سربانند سونووال نے ہریانہ کے پنچکولہ میں آٹھویں آیوروید ڈے مہاپروا کے تناظر میں منعقدہ کانفرنس کے افتتاحی اجلاس میں یہ بات کہی۔ ’’آیورویدک طب ہزاروں سال پرانی ثقافت کا حصہ ہے اور قدیم زمانے سے بھارت کے معاشرے ، تعلیم ، خدمت اور طرز زندگی میں موجود ہے۔‘‘

جناب سونووال نے کہا کہ جی 20 کے حالیہ اجلاس میں بھارت نے رکن ممالک کے سامنے ’وسودھیو کٹمبکم‘ کا پیغام پیش کیا جس پر سب کی رضامندی حاصل ہوئی اور جی 20 اعلامیے کے ذریعے بے مثال کامیابی حاصل ہوئی۔ نئے تجربات کے ساتھ مسلسل آگے بڑھنے کے جذبے، جس میں آیوش کی ترقی ایک ہے، نے بھارت کو ایک ترقی پذیر ملک سے دنیا کی پانچویں سب سے بڑی معیشت میں تبدیل کر دیا ہے۔

نوجوان اور عام لوگ زراعت، باغبانی اور ویٹرنری میڈیسن سے متعلق آیورویدک مصنوعات کو تجارتی طور پر تیار کرکے کامیاب اسٹارٹ اپ تشکیل دے سکتے ہیں۔ اس طرح کے اسٹارٹ اپس کی تشکیل اور ترقی کے ساتھ ، بھارت کی معیشت خود کفیل معیشت بن کر مضبوط ہوگی۔

آیوش کے مرکزی وزیر مملکت جناب منجپارہ مہندر بھائی بھی ’آیوروید دن‘ کے تناظر میں منعقدہ کانفرنس کے افتتاح کے موقع پر بطور مہمان خصوصی موجود تھے۔ جناب منجپارہ نے کہا کہ صحت  خدمات کی ترقی حکومت کی ذمہ داری ہے اور آیوروید ادویات کے بارے میں خاص بات یہ ہے کہ یہ صحت مند رہنے کے لیے عوامی شراکت داری پر زور دیتی ہے۔ آیوروید کو طرز زندگی کا حصہ بنا کر صحت کے شعبے میں خدمات کی فراہمی کو مزید مستحکم کیا جاسکتا ہے۔

تقریب کے مہمان خصوصی آیوش کی وزارت کے سکریٹری پدم شری ویدیا راجیش کوٹیچا نے کہا کہ آیوروید علم کا کبھی نہ ختم ہونے والا خزانہ ہے جو وقت اور ثقافت کے مطابق آگے بڑھتا رہتا ہے۔ آج ہم یہاں صرف اس مقصد کے ساتھ آئے ہیں کہ ہم آیوروید کی اس ثقافت کو صحت عامہ کی عالمی سوچ کے ساتھ کس طرح آگے لے جا سکیں۔

وزارت آیوش کی جانب سے ’ون ہیلتھ کے لیے آیوروید‘کے پیغام کے ساتھ ایک ماہ تک جاری رہنے والی عالمی مہم آج اختتام پذیر ہوئی۔ دنیا بھر سے کروڑوں لوگ اس مہم میں شامل ہوئے اور یہ سمجھا کہ کس طرح انسان، جانور، ماحول اور پودے آیوروید کے ذریعے صحت مند رہ سکتے ہیں اور ایک انوکھا آیوروید نظام تشکیل دے سکتے ہیں۔

کانفرنس کے ساتھ آٹھ ریاستوں کے قومی آیوش مشن (این اے ایم) کی ’آیوروید مہاپروا‘ ایکسپو اور جائزہ اجلاس کا بھی انعقاد کیا گیا۔ ملک بھر سے آیوروید پروڈکٹ مینوفیکچررز، اسٹارٹ اپس اور آیوروید پروفیشنلز نے اپنی مصنوعات پیش کیں۔ قومی آیوش مشن (این اے ایم) کے اجلاس میں تمام آٹھ ریاستوں کے کام اور سرگرمیوں کا جائزہ لیا گیا اور آیوش کی وزارت نے تمام ریاستوں کے نمائندوں پر زور دیا کہ وہ قومی آیوش مشن کو کامیاب بنائیں اور افتتاحی تقریب کے دوران  آیوش کی وزارت کی جوائنٹ سکریٹری محترمہ کویتا گرگ نے مختلف سرگرمیوں اور آٹھ ریاستوں میں آیوش مشن کی پیش رفت پر ایک جائزہ پریزنٹیشن دی۔ آیوش کی وزارت کے آیوروید ایڈوائزر ویدیا منوج نیساری نے کانفرنس کے مقصد اور دائرہ کار پر تعارفی تبصرہ کیا۔ کل 10 نومبر کو آٹھویں آیوروید ڈے کی مرکزی تقریب دھنونتری ڈے کے موقع پر پنچکولہ کے اندردھنش آڈیٹوریم میں ہوگی۔

***

(ش ح – ع ا – ع ر)

U. No. 870