রাস্ত্রপতিগী লোইশঙ
ভারতকী রাস্ত্রপতীনা ৱর্লদ ফুদ ইন্দিয়া ২০২৩ গী ভেলিদিক্তরী সেসন্দা শরুক য়াখ্রে
ঐখোয়না অইং অশাদা অহোংবা পুরকপদা মতেং পাংলিবা চিঞ্জাকশিংদগী লাপথোক্ননবা অফবা ৱারেপশিং লৌবা তাইঃ রাস্ত্রপতী মুর্মু
Posted On:
05 NOV 2023 9:46AM by PIB Imphal
ভারতকী রাস্ত্রপতী, শ্রীমতী দ্রৌপদী মুর্মুনা ঙসি (নোভেম্বর ৫, ২০২৩) নই দিল্লীদা পাংথোক্লিবা ৱর্লদ ফুদ ইন্দিয়া ২০২৩ গী ভেলিদিক্তরী সেসন্দা শরুক য়াখ্রে।
থৌরম অদুদা ৱা ঙাংবদা, রাস্ত্রপতীনা ফুদ প্রোসেসিং ইন্দস্ত্রীগী মন্ত্রালয়বু ৱর্লদ ফুদ ইন্দিয়াগী অনিশুবা ইদিসন শীনবগীদমক্তা থাগৎপা ফোংদোকখি। মহাক্না হায়খি মদুদি WFI না ভারতকী ইনাক খুল্লবা চিঞ্জাক্কী কলচর অসিবু মালেমদা মশক খঙহন্নবা কন্না হোৎনখিগনি। মসিনা সেক্তর অসিদা লৈরিবা মাইক্রো, অপিকপা অমসুং ময়াই ওইরপ্পা ইন্তর্প্রাজশিংগীদমক্তা হেন্না চাউবা দোমেস্তিক অমসুং মালেমগী প্লেয়রশিংগা পুন্না চৎমিন্ননবগী অচৌবা ফম্বাক অমা ওইরগনি।
রাস্ত্রপতীনা WFI না ভারতপু মালেমগী চাকখুম অমা ওইহনবদা মতেং পাংনবগী পাঙ্গল লৈ হায়না হায়খি। থৌরম অসিসু ভারতপু লৌউ শিংউগী অমসুং চিঞ্জাক্কী পোথোকশিংগী হৌরকফম অমনি হায়বা উৎননবগী অখন্নবা ফম্বাক অমনি। ইনভেস্তর কাংলুপনা ঐখোয়গী ফুদ প্রোসেসিং অমসুং এলাইদ সেক্তরশিংদগী কান্নবা কয়া অমা ফংলমগনি হায়বগী থাজবা ফোংদোকখি।
চিঞ্জাক হায়বসি মীওইবা খুন্নাইগী মশক তাক্লিবা চৎনবী অমনি হায়না রাস্ত্রপতীনা হায়খি। চাননবা কোয়থি থিদুনা চৎলম্বদগী লৌউ শিংউ তৌরকপা অমসুং হিংনা চারম্বদগী থোংদুনা চাবা হৌরকপা অসি চাউখৎলকপগী অহৌবনি। চিঞ্জাক হায়বসি চৎনবী অমা হেক্তগী শোইদ্রবা হৌরকফম্নি। মসিগীসু মথক্তা, চিঞ্জাক্না শকখঙনদবশিংগী মরক্তা শকখঙনহনলকপগুম্না, পুৱারিদা খেন্ন খেন্নরবা চৎনবীশিংবু নকশিন্নহল্লকখিবা অসি চিঞ্জাক্ননি।
রাস্ত্রপতীনা হায়খি মদুদি চিঞ্জাক হায়বসি মীওইবা খুদিংমক্কী পুন্সিদা চংদবা য়াদ্রবা পোৎচঙ অমনি। মালেমগী মফম কয়াদা মীওই কয়া অমদি চাবা ফংদনা মপুক হাঙদুনা লৈরিবা অসি তশেংনমক য়াম্না নুংঙাইতবা অমনি। মসিনা মীওইবা খুন্নাইনা ফংলক্লিবা অচৌবা ইকোনোমিক অমসুং তেক্নোলোজিদা খুমাং চাউশিনবদা খুরৌ অমা থারি। য়াম্না পাক শন্না চাবা ফংদ্রিবা অসি পোথোক পুথোকপা ৱাৎপগী নত্তে, মসি য়েন্থোকপা ৱাৎপননি হায়না মহাক্না ফোংদোকখি।
ঐখোয়না চারিবশিং অসিনা অকোয়বগী ফীবমদা শোকহল্লিবশিং অসিবু খঙহল্লদুনা, রাস্ত্রপতীনা হৌজিক ঐখোয়গী মেন্যু অসি মহৌশাদা শোকহন্দনবা খনবা মতম ওইরে হায়না হায়খি। ঐখোয়না অইং অশাদা অহোংবা পুরকপদা মতেং পাংলিবা চিঞ্জাকশিংদগী লাপথোক্ননবা অফবা ৱারেপশিং লৌগদবনি অমসুং ঐখোয়গী হকচাংদা খক্তা নত্তনা ঐখোয়গী প্লানেত অসিদসু ফগদবা চিঞ্জাকশিং চারসি হায়না মহাক্না মখা তাখি।
***
(Release ID: 1975230)
Visitor Counter : 67