ঙাকশেল মন্ত্রী শ্রী রাজনাথ সিংহনা অতোপ্পা ওফিসরগা মান্ননা আর্মদ ফোর্সেস্তা লৈরিবা নুপী লান্মী, হীরোই অমসুং নোংথক্কী লান্মীশিংগীদমক মেতর্নিতী, চাইল্দ কিয়র অমসুং চাইল্দ এদোপ্সন লীবকী কাংলোনশিং শাংদোক্নবগী প্রপোজেল অয়াবা পীখ্রে। কাংলোনশিং অসি থোকখিবগা লোয়ননা মিলিতরীদা লৈবা নুপী পম্নমক, ওফিসর নত্ত্রগা অতোপ্পা রেঙ্ক ওইরবসু হায়রিবা ছুতি অসি চপ মান্ননা চৎনরগনি।

ৱারেপ অসি রেঙ্কশিংগী খেন্নবা লৈতনা আর্মদ ফোর্সেসতা নুপী পুম্নমক্কীদমক ইনক্লুসিন পার্তিসিপেসনগী ঙাকশেল মন্ত্রীগী বিজনগী পরিং মখাদা লৌখিবনি। ছুতিগী কাংলোনশিং শাংদোকপা অসিনা আর্মদ ফোর্সেস্তা লৈরিবা নুপীশিংগী ইমুং মনুং অমসুং খুন্নাইগী ওইবা সমস্যাশিং অসি থেংনবদা চাউনা কান্নরগনি। খোঙথাং অসিনা মিলিতরীদা লৈবা নুপীশিংগী থবক তৌবগী কন্দিসনশিং ফগৎহল্লগনি আমসুং হেন্না ফবা মওং অমদা শিনফম অমসুং ইমুংগী ওইবা থবক-থৌরমদা বেলেন্স তৌবদা মতেং ওইরগনি।

মখা তানা প্রধান মন্ত্রী শ্রী নরেন্দ্র মোদীনা লুচিংবা সরকারগী নারী শক্তি শীজিন্নবগী ফিরেপ অদু মাংদা চংশিনহনবা ওইনা সর্ভিসেস অহুমনা নুপীশিংবু লান্মী, হীরোয় অমসুং নোংথক্কী লান্মী ওইনা য়াওহনবগা লোয়ননা অচৌবা অহোংবা পুরকপদা মাংজিল থারি। নুপী অগনিবীরশিং লৌবগা লোয়ননা আর্মদ ফোর্সেস অসিদা লৈবাক্কী কংফাল, ঈশিং অমসুং নোংথক্কী ফ্রন্তিয়রশিং ঙাকশেন্নবা নুপী লান্মী, হীরোয় অমসুং নোংথক্কী লান্মীশিংগী থৌনা, কত্থোকপা অমসুং লৈবাকনীংবনা শক্তি পীরগনি।

খ্বাইদগী ৱাংবা লানফম, সিয়াচেনদা ওপরেস্নেল ওইনা দিপ্লোই তৌবদগী হৌরগা ৱারশিপশিংদা পোস্তিং পীবা লোয়ননা অতিয়াবু খুদুম চনবা ঙমদুনা ভারতকী নুপীশিংনা আর্মদ ফোর্সেসকী লম খুদিংমক্তা পল কয়া থুগাইখি। 2019দা মিলিতরী পুলিসকী কোর্প্সতা লান্মী ওইনা ইন্দিয়ন আর্মীদা নুপীশিং লৌদুনা অচৌবা মাইলস্তন অমা ফংবা ঙমখি। ঙাকশেল মন্ত্রী শ্রী রাজনাথ সিংহনা নুপীশিংনা লম খুদিংমক্তা মখোয়গী নুপা কাউন্তরপার্তশিংগা থাক মান্ননা মতম চুপ্পদা য়েংদুনা লাকখি।

*****