পেত্রোলিয়ম অমসুং নেচরেল গ্যাস মন্ত্রালয়
কেন্দ্র মন্ত্রী হর্দীপ এস. পুরীনা পেরা শান্নরোয়শিংগী মফমদা মখোয়না ৪শুবা এসিয়ন পেরা গেম্সতা উৎখিবা অথোইবা মওং মতৌগীদমক নুংঙাইবা ফোঙদোকখ্রে
ভারতনা মেদল ১১১ ফংদুনা পেরা এসিয়ন গেম্সতা রেকোর্দ ওইবা মেদল তেলীগা লোয়ননা মায় পাকখি
Posted On:
02 NOV 2023 4:33PM by PIB Imphal
পেরা শান্নরোয়শিংনা চাইনাদা পাঙথোকপা এসিয়ন পেরা গেম্সতা মায় পাকখিবা অসিনা ভারতকী শান্ন-খোৎনবগী লমদা পুৱারী ওইরবা মীৎকুপ অমা ওইখিবতা নত্তনা লৈবাক পুম্বদা লৈরিবা থৱায় য়াওবা শান্নরোয়শিংগী পুক্নিং থৌগৎনিংঙাই ওইবা পন্দুপ অমা ওইরে হায়না ঙসি মফমসিদা পেত্রোলিয়ম অমদি নেচরেল গ্যাস অমসুং হাউজিং অমদি অর্বান এফ্যাএর্স মন্ত্রী, শ্রী হরদীপ সিংহ পুরীনা হায়খ্রে।
মন্ত্রীনা ৱাফমসি হাংজৌ, চাইনাদা পাঙথোকখিবা ৪শুবা এসিয়ন পেরা গেম্সতা ভারতকী পেরা শান্নরোয়শিংনা চাউনা মায় পাক্লকখিববু ইকায় খুম্ননবা ইন্দিয়ন ওইলনা পাঙথোকপা থৌরম অমদা ৱা ঙাংবদা ফোঙদোকখিবনি।
পেত্রোলিয়ম অমদি নেচরেল গ্যাস অমসুং লেবর এন্দ এমপ্লোইমেন্তকী মন্ত্রী শ্রী রামেস্বর তেলী; ইন্দিয়ন ওইলগী চেয়রমেন শ্রী শ্রিকান্ত মাধব বৈদ্য; পেরালিম্পিক কম্মিতী ওফ ইন্দিয়া (PCI)গী প্রেসিদেন্ত মিস দীপা মলিক; PCI জেনেরেল সেক্রেতরী শ্রী গুরসরন সিংহ অমদি PCIগী পেত্রোন-ইন-চীফ শ্রী অভিনাস রাই খন্নাসু থৌরমদুদা শরুক য়াখি।
হন্দক্তা পাঙথোকখিবা এসিয়ন পেরা গেম্সতা ভারতকী পেরা শান্নরোয়শিংনা উৎখিবা মওং মতৌবু শিংথারদুনা, শ্রী হরদীপ সিংহ পুরিনা মখোয়গী নমথবা ঙমদবা মথৌনা, খাঙবা কনবা অমদি চাংদম্নিংঙাই লৈতবা ফিরেপ্পু থাগৎখি। মহাক্না, মখোয়গী মতিক মথৌনানা ভারতকী পেরা-স্পোর্তসকী মাঙজিল থাবা মীওইশিং ওইখিবা তোপ তোপ্পা শান্নরোয় খরগী মতাঙদসু পনখি।
মহাক্না মালেমগী অহানবা খুৎ য়াওদবা তেন কাপ্পী নুপী সীতল দেবীগী মতাঙদা ৱা ঙাংখি। মহাক্না মখোঙতনা তেন কাপ্তুনা, চহি ১৬খক্তা ঙাইরিবা হৈথোই শিংথোইরবা নুপীমচা অসিনা কম্পাউন্দ ইন্দিভিজুএল ওপন ইভেন্তা গোল, কম্পাউন্দ মিক্স তীম ইভেন্ততা রাকেস কুমারগা পাদুনা অতোপ্পা গোল্দ অমা অমদি সরিতাগা লোয়ননা নুপীগী কম্পাউন্দ দবল্সতা সিলভর অমা ফংখি।
এসিয়ন পেরা গেম্সতা অঙ্কুর ভর্মাগী মশান্নবু থাগৎলদুনা, মহাক্না নুপাগী T11 মিতর ১৫০০ অমদি মিতর ৫০০০গী লমজেল অনিমক্তা সনাগী মেদল লৌদুনা মহাক্কী হৈশিংবগী খুদম উৎখি হায়না মন্ত্রীনা হায়খি। মহাক্না এসিয়ন পেরা গেম্সকী ইদিসন অমখক্তদা সনাগী মেদল অনি ফংবা ঙম্বা অহানবা ভারতকী শান্নরোয় ওইখি হায়না শ্রী পুরিনা মখা তাখি।
মন্ত্রীনা হন্দক্তা পাঙথোকখিবা এসিয়ন পেরা গেম্সতা সুন্দর সিংহ গুরজর অমদি সুমিৎ অন্তিলগী মশান্নবুসু থাগৎখি।
ইন্দিয়ন ওইলবু ভারতকী পেরা শান্নরোয়শিংগীদমক চোংথোরকপগীদমক থাগৎলদুনা, পেত্রোলিয়ম অমদি নেচরেল গ্যাসকী মন্ত্রীনা মখোয়গী মায় পাকপগী লম্বীদা ওইল সেক্তর PSU না মমল নাইদ্রবা শক্লোন লৌখি হায়খি। ঐখোয়গী লৈবাকসিদা শান্ন-খোৎনগী মখোঙ শোম্বিগদবা ফীভম অমা শেমগৎনবগী প্রধান মন্ত্রীগী মঙলান পরিংদা, ভারত লৈঙাক্না লৈবাকসিদা শান্ন-খোৎনবা অমদি শান্নরোয়শিংগী মফমদা মপুং ফানা ঙাক্লৌ পীখিগনি হায়না মহাক্না হায়খি।
হাংজৌ, চাইনাদা পাঙথোকখিবা ৪শুবা এসিয়ন পেরা গেম্সতা ভারতকী পর্ফোর্মেন্স:
৪শুবা এসিয়ন পেরা গেম্সতা ভারতকী কন্তিঞ্জেন্তনা লম্বা লৈতনা মায় পাকপগী তাঙ্কক অমা শেমদুনা সনাগী মেদল ২৯, লুপাগী ৩১ অমদি শেঞ্জেংগী ৫১ – পুন্না মেদল ১১১ ফংদুনা চাউনা মায় পাকপা পুরকখি। নীংথিরবা তেলী অসিনা মমাঙদা ২০১৮দা মেদল ৭২ ফংখিবগী রেকোর্দ থুগাইখি। মসিগা লোয়ননা ভারতনা এসিয়ন পেরা গেম্সগী অপুনবা লীদরবোর্দতা মঙাশুবা মফম চেৎনা কনখি।
গেম্স অসিগী ২০১৪ ইদিসন্দা ইচম চম্না সনাগী মেদল অহুমখক ফংখিবদুদগী চহি অসিদা সনাগী মেদল ২৯ ফংলক্তুনা শিংথানিংঙাই ওইরবা মায় পাকপা পুরকখিবগী অঙকপনা থল্লবা পরিং অসিনা ঐখোয়গী পেরা শান্নরোয়শিংগী পুক্নিং লুপ্পা, হোৎনবা কনবা, অমদি হনবা লৈতবা থৌনাগী ৱারী লীরি। ভারতনা নুপা ১৯১ অমদু নুপী ১১২ য়াওবা শান্নরোয় ৩০৩গী কন্তিঞ্জেন্ত থাদুনা চহি অসিদা নমথবা ঙম্লোইদবা মওংদা শরুক য়াখি। মসিনা ২০১৮দা শান্নরোয় ১৯০ থারম্বদগী কন্তিনেন্তেল থৌরম অসিদা লৈবাকসিগী খ্বায়দগী মশক থোকপা দেলিগেসন থাবগী মশক ওইখি।
হাংজৌদা থাখিবা শান্নরোয়শিংগী ৩৭% ওইখিবা ভারতকী নুপী শান্নরোয়শিংনা মেদল ৪০ ফংদুনা অপুনবা মেদল মশিংগী ৩৬% ফংলকখি। মসিগী মথক্তা, ঐখোয়গী শান্নরোয়শিংনা মালেমগী রেকোর্দ অহুম, এসিয়ন রেকোর্দ ১৩ অমদি পেরা এসিয়ন গেম্স রেকোর্দ ১৫ শেমদুনা পুৱারী শেমখি।
*****
(Release ID: 1974212)
Visitor Counter : 77