উপ রাস্ত্রপতী, শ্রী জগদীপ ধনখরনা ঙসি নুপা নুপী থোং মান্নবা হায়বসি থোং মান্নবা ফীভম অমা হেক্তদা তঙায় ফদে অমদি নুপা নুপী থোং মান্নদ্রবদি খুন্নাইদা থোং মান্নবা ফীভম লৈরোই হায়বা ৱাফম থমখ্রে‍। নুপা নুপী থোং মান্নবা হায়বসি মচত্তা ওইগদবনি, মওংদা ওইগদবা নত্তে; অমদি মসি ফোঙদোকপনা অচুম্বা অশেঙবা ফীভম ওইহনগদবনি হায়বা ৱাফমসু মহাক্না থমখি‍।

উপ রাস্ত্রপতীনা ৱাফম অসি “ইন্দিয়ন পার্লিয়ামেন্ততা নুপীশিংগী থৌদাং” হায়বা হীরমদা মিরান্দা হাউসকী প্লাতিনম জুবিলী ৱারোল পীবদা ফোঙদোকখিবনি‍। মহাক্কী ৱারোলদা, শ্রী ধনখরনা, “পার্লিয়ামেন্ততা নুপীশিংগী থৌদাং য়াম্না চাউই, অমদি মখোয়না শরুক য়াবসিমক্নসু লেজিসলেচরদা অফবা ফীভম অমা পুরক্লিবনি” হায়খি‍।

নুপীশিংনা মখোয়গী পুন্সিদা থেংনরকপশিং থৌদোকশিং অমদি মখোয়না মায়োক্নরিবা শিংনবশিং খন্ন-নৈননবা পুখৎলকপা ঙমগনি হায়রদুনা, “মসিনা লৈঙাক্লোন্দা অওনবা খুজিল থৌরাং পুরকপদা তশেংনা মতেঙ ওইহন্দুনা হেন্না চাউবা ৱাফমশিংগী ৱারোইশিন পুরকপা ঙমহনগনি” হায়না শ্রী ধনখরনা হায়খি‍।

নারী শক্তি বন্দন অধিনিয়ম পাস তৌখিববু পুৱারীগী অচৌবা খুমাঙ চাওশিনবা অমনি হায়রদুনা, মসি Bharat@2047 গী পান্দম ফংহন্দুনা, লৈবাকসিনা নীংতম্বা চহি চাম্মা মপুং ফারকপগী থৌরম পাঙথোকপা মতমদা মতোল লোম্বা ঙমহনগনি”, হায়না উপ রাস্ত্রপতীনা হায়খি‍। রাজ্য সভানা ৱুমেন রিজর্বেসন বিল খন্নরকপা মতমদা মহাক্না অপ্পর হাউসপু চিংদুনা পুননবা নুপী পার্লিয়ামেন্তরিয়ন ১৭ খনখি হায়বা ৱাফম থম্লদুনা, উপ রাস্ত্রপতীনা নুপীমচা মহৈরোয়শিংগী মফমদা মখোয় মশাবু কৈদৌঙৈদসু মনিং পরেংদা নৎত্রগা খুদুং হন্দুনা লৈহন্দনবা হোৎনগদবনি হায়খি‍। “মালেম অসি নখোয়গীনি; মালেম অসি নখোয়না শেমগদৌরিবনি‍। ঙসি ভারতকী নুপীশিংনা মালেমগী ইন্সতিত্যুসনশিংদা মতিক লৈবা ফম পায়দুনা, ঐখোয় পুম্নমকপু চাউথোকচবা পোকহল্লি,” হায়না মহাক্না মখা তাখি‍।

২০১৮ জেনেরেল ইলেক্সন্দা লোগ সভাদা নুপী পার্লিয়ামেন্তরিয়ন মশিং খ্বায়দগী ৱাংনা মীখল মায় পাক্লকখিবগী মতাঙদা পল্লদুনা, শ্রী ধনখরনা মায় পাক্লিবা অসিবু হৌখিবা চহিশিংদা প্রধান মন্ত্রী নুপীগী মপাঙ্গল হাপ্ননবা পায়খৎখিবা থৌরাংশিংননি হায়বা ৱাফম থমখি‍। ‘সর্পঞ্চ পতী’ গী চৎনবী অয়াম্বনা মাঙখ্রে হায়রদুনা, হৌজিক্তি নুপী মীহুৎ অমগী খাক্লবা ফমবু কনাগুম্বা অমত্তনা লৌবা ঙম্লরোই হায়না মহাক্না ফোঙদোকখি‍।

ইমুং মনুংগী, খুন্নাইগী, অঙাংশিংগী অমদি অহলশিংগীদমক য়াম্না কত্থোক্লিবা অসি নুপীশিংনি হায়বা ৱাফম থম্লদুনা, “অদোমগী জেন্দরদা অচুম্বা ৱায়েল ফংহনবনা ঐগী জেন্দরদসু অচুম্বা ৱায়েল ফংগদৌরিবনি” হায়না উপ রাস্ত্রপতীনা হায়খি‍। “মসিগী মরমদি অদোমগী জেন্দরনা হৈ-শিংবা, মীনুংসি চাউবা অমদি থৌগলগী মশক তাক্লি‍। তাইবঙ মপুনা অদোমদা অতৈগী মতেঙ পাঙনবগী তাঞ্জা পীবা মতিং হাপ্পীরি,” হায়না মহাক্না মখা তাখি‍।

“ভারতকী নুপীশিংনা মীয়ামগী পুন্সিদা শরুক য়ারদ্রিবমখৈ, লৈবাকসি মপুং ফাবা ঙমখিরোই,” হায়বা মহাত্মা গান্ধীগী ৱাফম পল্লদুনা, উপ রাস্ত্রপতীনা ঙসিদি বাপুগী মঙলানশিং মঙফাওনরক্লি হায়খি‍।

হৌখিবা চহিশিংদা নুপীশিংগী মপাঙ্গল হাপ্নবগীদমক লৈঙাক্না লৌখৎখিবা তোঙান তোঙানবা থৌরাংশিং পল্লদুনা, “নুপীশিং ঙাকশেল লান্মীদা লান্থেংনবগী ফম পায়রি‍। নুপীমচাশিং হৌজিক্তী সাইনিক স্কুলদা মিং চনবা ফংলি‍। নখোয়না অহোংবনি, নখোয়না অহোংবা পুরক্লিবনিও” হায়না শ্রী ধনখরনা হায়খি‍।

স্বছ্চ ভারত মিসনগী মতাঙদা ৱা ঙাংলদুনা, প্রধান মন্ত্রীনা য়ুমথোঙ খুদিংদা খোঙহাম খুৎহাম্ফম লৈহন্নবা ৱাফম থমখিবা মতমদা য়েংখিবা মরুওইবা মীৎয়েংদি নুপীশিংদনি, মখোয়গী ইকায়খুম্নববুনি‍। মতৌ অসুম্না, মথৌ তাবা য়ুমথোঙশিংদা গ্যাস কন্নেক্সন পীবা মতমদা, কান্নবা ফংলিবসি নুপীশিংনি মরমদি মখোয় অসিনি চাকখুম পান্নরিবা অমদি মৈখুনা মীত্তগী মপি তাহল্লিবা হায়না মহাক্না হায়খি‍। মহাক্না নুপীশিং মপাঙ্গল হাপ্পদা চাউনা মতেঙ ওইরিবা হর ঘর জল অমদি মুদ্রা স্কীমগী মতাঙদসু পনখি‍। “ঐখোয়গী অমৃৎ কাল অসি, ঐখোয়গী প্রধান মন্ত্রীগী মঙলান, অপাম্বা অমদি মিসনগী মতাঙদা য়েংলগদি ঐখোয়গী গৌরব কাল ওইরে” হায়না মহাক্না মখা তাখি‍।

ভারতনা মালেমগী মঙাশুবা খ্বায়দগী চাউবা শেন্মিৎলোন ওইরকপদা নুংঙাইবা ফোঙদোক্লদুনা, ভারতকী শেন্মিৎলোন চাওখৎলক্লিবা অসি মরুওইনা নুপীশিংনা থৌদুনা পুবনি হায়না উপ রাস্ত্রপতীনা হায়খি‍। ভারত কাখৎলক্লি অমদি কাখৎলক্লিবা অসি থিংবা ঙম্লোই হায়না মহাক্না ফোঙদোকখি‍।

কনাগুম্বা মীওই খরদি ভারতকী চাওখৎলকপগী ৱারী অসি খাঙবা ঙমদে হায়রদুনা উপ রাস্ত্রপতীনা মহৈরোয়শিংগী মফমদা অসিগুম্বশিংগী পাউখুম পীননবা ৱাফম থমখি‍। নখোয়না তুমিন্না লৈবনা লৈবাক্কী অপাম্বা ওইরোই হায়না হায়রদুনা মহাক্না মখোয়গী মফমদা “ভারতকী চাউথোকচবা পোকপা মীওই ওইননবা অমদি ভারত মচা ওইবগীদমক চাউথোকচৌ” হায়খি‍। প্রধান মন্ত্রীগী ‘ভোকেল ফোর লোকেল’গী খোল্লাউবু অমুক হন্না লাউরদুনা, উপ রাস্ত্রপতীনা লৈবাক চাওখৎহনবদা শেন্মিৎলোনগী লমদা মরৈবাক নীংবগী মরুওইবা ৱাফমশিং থমখি অমদি থাউমৈ, কেন্দল, তেলঙ্গা, শান্নপোৎ অমদি পর্দানচিংবা পোৎলমশিং মপান্দগী পুশিনহল্লক্লোইদবনি হায়খি‍।

য়ুনিভর্সিতী ওফ দিল্লীগী ভাইস চাঞ্ছেলর প্রোফেসর য়োগেস সিংহ, য়ুনিভর্সিতী ওফ দিল্লীগী দীন ওফ কলেজ প্রোফেসর বলরাম পানী, য়ুনিভর্সিতী ওফ দিল্লীগী প্রোক্তর অমদি মিরান্দা হাউসকী গভর্নিং বোদীগী চেয়রপর্সন প্রোফেসর রজনি অব্বি, মিরান্দা হাউসকী প্রিন্সিপাল প্রোফেসর বিজয়লক্সমী নন্দা, ফেকল্তী মেম্বরশিং, মহৈরোয়শিং অমদি অতৈ মীথুংশিংনা থৌরমদুদা শরুক য়াখি‍।

*****