U Ashwini Vaishnaw, Myntri Sorkar Pdeng ba dei khmih ia ki tnat Kam Rel, Communications, Electronics bad Information Technology ha ryngkat u Manoj Sinha, Lieutenant Governor, Jammu & Kashmir, u Himanta Biswa Sarma, Myntri Rangbah ka jylla Assam, Prof. (Dr.) Manik Saha, Myntri Rangbah ka jylla Tripura ki la pyllait paidbah ia ka rel No. 15617/15618 Dullabcherra – Guwahati kaba iaid lai sien shi taiew, ka rel No. 07688/07687 Agartala- Sabroom DEMU, ka jingpyniar ia ka jingiaid ka rel no. 12514/12515 Guwahati-Secunderabad Express haduh Silchar (Assam), ka jingpyniar ia ka jingiaid ka rel No 12519/12520 Kamakhya-Lokmanya Tilak Express haduh Agartala (Tripura) lyngba ka video conferencing mynta ka sngi. La pyllait paidbah ruh ia ka Vistadome coach kaba thymmai ha ka rel Budgam-Banihal ha Jammu and Kashmir. Ha kane ka jingpyllait paidbah la iadon bynta lang ki kynrem ki lyndan lyngba ka video conferencing.

Ha ka jingai jingkren jong u, u Ashwini Vaishnaw u la ong, “Ha kine ki khyndai snem ba la dep, ki jylla ka thain shatei lammihngi bad ka Jammu Kashmir ki la kylla bha bad ngi lah ban iohi shai ia kine ki jingkylla. U Myntri Rangbah Duh u la wan jngoh ia ka thain shatei lammihngi palat 60 sien kaba kham bun ia ka jingwan ki Myntri Rangbah Duh ba rim jong ka India shuwa jong u. Hadien ka jingweng ia ka Article 370, ka roi ka par ha Jammu and Kashmir ka dei kaba iaid stet. Dang shen, ki la don ki jingialang G20 ha ka jylla Jammu and Kashmir. Ha ki kam rel ruh, ki don ki projek na ka bynta ka roi ka par kiba la pyntreikam ha kine ki thain. Ka Tnat Kam Rel ka la mang tyngka kumba T. 10,269 klur ha ka shi snem na ka bynta ka thain shatei lammihngi katba kane mynshuwa ka long kumba T 2122 klur. Ki projek jong ka Tnat Kam Rel ki dang iaid shaphrang ha ka thain shatei lammihngi. La pynkhreh ruh ban wanrah ar tylli ki rel Vande Bharat sha ka thain shatei lammihngi. Ha Jammu & Kashmir, la pyndep ia ka kam ha ka jingkieng Chenab, jingkieng Anji, la pyndep ia ki tunnel lait noh katto katne ki bynta ba dang sah. Ka Tnat Kam Rel ka dang trei na ka bynta ka jingkylla ha ki jylla ka thain shatei lammihngi.”

Ha ka jingai jingkren jong u, u Manoj Sinha, Lieutenant Governor, Jammu and Kashmir u la ong, “Ka Vistadome coach hapdeng ka Banihal bad Budgam ka dei ka sienjam kaba heh da ka Tnat Kam Rel ha ka roi ka par jong ka Union territory. Kane ka Vistadome kaba katkum ka juk mynta kan khring shuh shuh ia ki nongjngoh kai.” U la ong ba ka kam jngoh kai ka la kiew bha ha kine ki por ba la leit bad kane ka coach kaba thymmai kan kyntiew shuh shuh ia ka roi ka par jong kane ka jaka.

U Prof. (Dr) Manik Saha, Myntri Rangbah ka Tripura u la ong, “Ngi sngewnguh ia u Myntri Rangbah Duh bad u Myntri ba dei khmih ia ka Tnat Kam Rel kiba la kyntiew ia ka jingiasoh lyngba ki rel ha ka jylla. Kane kan kyntiew ia ki lad ka leit ka wan sha ki jaka ba jynjar ban poi bad kan kyntiew ruh ia ka khaii pateng bad ka kam jngoh kai ha ka jylla.”

Ha ka jingai jingkren jong u, u Himanta Biswa Sarma, Myntri Rangbah ka Assam u la ong, “U Myntri Rangbah Duh u la ban jur halor ka roi ka par ha Jammu and Kashmir bad ki jylla ka thain shatei lammihngi naduh ba u la shimti ia ka kam. Kane ka long ka sngi kaba kongsan namar ba ka Assam ka la ioh ia ka jingpyniar jong ka jingiaid kawei ka rel sha them Barak, kawei ka rel ka dei kaba la pyniar ka jingiaid lynti shaduh Agartala, kawei ka rel ka la wan ka ban iaid sha ka Dullabcherra kaba long ka jaka kaba jynjar ban poi. Nga ai jingsngewnguh ia u Myntri Rangbah Duh bad u Myntri Tnat Kam Rel kiba la shim ia kane ka sienjam.”

Ka jingpyniar ia ka jingiaid ka rel No. 12514/12515 Guwahati- Secunderabad Express (shisien shi taiew) haduh Silchar (Assam) kan pynbiang shuh shuh ia ka lad ka leit ka wan hapdeng ka Barak Valley (Silchar) bad Secunderabad. Kan ai jingmyntoi ia ki briew na ka thain lower Assam bad ki jaka kiba khappud bad ka them Barak. Ka jingiaid lynti jong kane ka rel kan sdang naduh ka 21.10.2023 (Sngi Saitjain) ex- Secunderabad.

Ka jingwanrah ia ka rel No. 15617/15618 Dullabcherra-Guwahati kaba iaid lai sien shi taiew (ex- Guwahati – Mon, Wed, Sat & ex- Dullabcherra- Tuesday, Thursday & Sunday) kan pynbiang ia ka lad ka leit ka wan hapdeng ka thain Dullabcherra kaba jynjar ban poi bad ka Guwahati ka ban iarap ia ki khynnah pule, ki nongkhaii pateng jong ka Dullabcherra.

Ka jingpyniar jong ka jingiaid ka rel No. 12519/12520 Kamakhya- Lokmanya Tilak Express (shisien shi taiew) haduh Agartala (Tripura) kan pynbiang ia ka lad lyngba ka rel hapdeng ka nongbah jong ka Tripura bad Mumbai. Kan ai jingmyntoi ia baroh ki briew na ka thain, ki nongkhaii pateng bad kito kiba leit sumar ialade kiba na Tripura kiba leit sha Mumbai. Ka jingiaid jong kane ka rel haduh Agartala kan sdang naduh ka 22.10.2023 (Sngi U Blei) ex- Lokmanya Tilak Terminus.

Ka jingwanrah ia ka rel No. 07688/07687 Agartala- Sabroom DEMU kan ai jingmyntoi ia ki briew na ki jaka ba jynjar ban poi jong ka jylla bad kan kyntiew ia ki lad ka leit ka wan sha ka nongbah jong ka jylla kaba long ka Agartala. Kan kyntiew ruh ia ki kam jngoh kai ha ka jylla.

Ka jingwanrah ia ka Vistadome coach ha ka rel No 04688/04687 Budgam- Banihal kan kyntiew ia ki kam jngoh kai ha ka jylla bad kan plié lad ia ki nongjngoh kai ba kin iohi kham bha ia ka jylla.

***