‘স্পেস-ফাইনাল ফ্রন্তিয়র ফোর চাইনা ইন ইতস ক্বেস্ত ফোর গ্লোবেল লিদর্সপ’ হায়বা হিরমদা সেন্তর ফোরে কন্তেমপোররি চাইনা স্তদিজ, এক্সতর্নেল এফেয়ার্স মিনিস্ত্রিনা শীন্দুনা নিউ দিল্লিগী সু্স্মা স্বরাজ ভাবন্দা ঙসি নুমিৎ নিনিগী মীফম অমা হৌদোকপদা সাইন্স অমসুং তেক্নোলোজিগী রাজ্য মন্ত্রী(মনিংতম্বা); পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা মরুওইবা ৱারোল পীখ্রে। মহাক্না হায়খি মীওইবা খুন্নাইগী কান্নবা পুরক্নবা মালেমগী ওইনা স্পেসকী মতেং পাংননবা ভারতনা লেপ্লি। শান্তি ওইবা থবকশিংগীদমক সুন্দ্রং শীজিন্নগদবনি অমসুং মুক্নবা লৈহল্লোইবদনি হায়বসি ঐখোয়গী অচেৎপা ফিরেপ্নি।

মিনিস্তরনা হায়খি শান্তি ওইনা সুন্দ্রং শীজিন্নবা, অরোন-অথুপ লৈহন্দবা অমসুং মরম চানা থবক তৌবা হায়বা ফিদমশিং অসিদা ঐখোয়না চেৎনা লেপ্লি। মরম অদুনা চাইনা য়াওনা লৈবাক খুদিংমক অমগা অমগা ফোঙনা ৱারি শাননবা ঐখোয়না তকশিল্লি অমসুং মসিনা অরোনবা নত্ত্রগা চিংনবা লৈতনা ঐখোয়না অমনা অমগী মিসনশিং, খোঙচৎশিং পীথোক-পীশিন তৌনগনি অমসুং ঐখোয়না অশোই-অঙাম থোক্তবা অমসুং তুংদু-লৈতাবা ফিবম অমা লৈহনবা ঙমগনি।

ভারতকী স্পেসকী থবক অসি মালেমগী ওইনা চাংদম্নবা খক নত্তনা মসি খ্বাইদগী ফবা ওইরে। ভারতকী সুন্দ্রংগী থবক-থৌরমশিং অসি শান্তি ওইবা থবকশিং খক্তগীনি অমসুং মীচম মীয়ামগী পুন্সি হিংবদা লাইহন্নবা মালেমগী মাঙজিল থারিবা স্পেস এজেন্সিশিংগা ইসরোগা পুন্না থবক তৌমিন্নরি হায়না দোক্তর জিতেন্দ্রনা ফোঙদোকখি।

মহাক্না হায়খি য়ু.এস.এ অমসুং মতম অমগী সোভিয়েত য়ুনিয়ন্না ঐখোয়দগী য়াম্না ঙন্না মখোয়গী সুন্দ্রংগী খোঙচৎ হৌখ্রবশু অমসুং ১৯৬৯দা অমেরিকানা থাদা মীওইবা খোঙদাখ্রবশু, ঐখোয়গী চন্দ্রয়ান্না থাগী লৈমায়দা ঈশিং ফংবগী খুদম পীখি। চহি অসিদা প্রধান মন্ত্রী মোদীনা য়ু.এস.এদা চৎলুবদা ইন্তরনসেনেল স্পেস স্তেসন্দা অপুনবা স্পেস মিসন অমা পাংথোক্নবা নাসানা খঙহল্লকখি।

দোক্তর জিতেন্দ্রনা হায়খি ভারতকী স্পেস মিসনশিং অসি শেন য়াম্না চঙদনবা, মীওইবগী লৈজবশিং অমসুং লৌশিংদা শেমগৎপনি। মাইপাকখিদ্রবা রুসিয়াগী থাগী মিসন অদু লুপা করোর ১৬,০০০ চঙখি অমসুং ঐখোয়গী চন্দ্রয়ান-৩ মিসন শুপ্নগী লুপা করোর ৬০০ চঙখি। স্পেস তেক্নোলোজিশিং শ্বামিতবা, পি.এম গাতি শক্তি, রেলৱেজ, হায়ৱেজ, স্মার্দ সিতিশিং, লৌউ-শিংউ, ঈশিং থিবা, তেলিমেদিসিন অমসুং রোবোতিক সর্জরি য়াওনা তোঙান-তোঙানবা হিরমশিংদা শীজিন্নরে। থৌরাং অসিনা লৈবাক অসিগী মীচম মীয়ামগী পুন্সি হিংবদা লাইহল্লে।

দোক্তর জিতেন্দ্রনা হায়খি ভারতকী সুনদ্রংগী লমদা থবক কয়া পায়খৎতুনা ভারতকী সুন্দ্রংগী মপা হায়না খঙনরিবা বিক্রম সরাভাইগী  মঙলানা মঙফাওন্নবা ভারতকী স্পেস সাইন্তিস্তশিংগী তৌবা ঙম্বশিং প্রধান মন্ত্রী মোদীনা থাগৎপা ফোঙদোকখি। চহিচা অসিদা ভারতকী হৈথোই-শিংথোইবা উৎথোক্নবা মফম অমা ফংলে অমসুং মালেমগী অতৈ লৈবাকশিংদা লৈবাক অসিমক খুদম অমা ওইরে। প্রধান মন্ত্রী মোদীনা মমাঙঙৈগী অমনবা চৎনবীশিং লৌথোক্লে অমসুং প্রাইভেৎ সেক্তরদা স্পেস সেক্তর শীন্নরে; ২০১৪দা স্পেস স্তার্দঅপ শুপ্নগী মরি লৈরম্বদগী, চহি ৩-৪গী মনুংদা ঐখোয়গী স্তার্দঅপ ১৫০ হেন্না লৈরে।

মিনিস্তরনা হায়খি সাইন্তিফিক ওইবা থিজিনবগীদমক “অনুসন্ধান নেসনেল রিছার্স ফাউন্দেসন”না পি.পি.পি মোদেলনা লম্বী অমা শেম্লগনি। এন.আর.এফনা অনৌবা থিজিনবগী লমদা চাউখৎলবা লৈবাকশিংগী মরক্তা ঐখোয় য়াওহনবা ঙম্লগনি।

দোক্তর জিতেন্দ্রনা হায়খি ইসরোনা মপান লৈবাকশিংগী সেতেল্লাইত ৩৮০ হেন্না থাগৎতুনা য়ুরো মিল্লিয়ন ২২০ হেন্না তাল্লে অমসুং অমেরিকাগী সেতেল্লাইতশিং থাগৎতুনা য়ু.এস দোল্লর মিল্লিয়ন ১৭০ হেন্না তানবা ঙম্লে। ঙসিদি ভারতকী স্পেস ইকোনোমি দোল্লর বিল্লিয়ন ৮ য়ৌরে অমসুং মসি ২০৪০দা দোল্লর বিল্লিয়ন ৪০ য়ৌগনি হায়না ঐখোয়না থাজবা থম্লি। চয়োল খরগী মমাঙদা ফোঙখিবা এ.দি.এল রিপোর্তকী মতুংইন্না ২০৪০ ফাওবদা ঐখোয়না দোল্লর বিল্লিয়ন ১০০ য়ৌবা ঙমগনি হায়না পল্লি।

****