নিউ দিল্লিদা ওক্তোবর ১৬ তগী ওক্তোবর ২০,২০২৩ ফাওবা আর্মি কমান্দরস কনফরেন্স পাংথোক্লগনি। অৱাংবা থাক্কী চহি অনি খুদিংগী পাংথোকপা থৌরম অসি, ভারত লান্মীগী মরুওইবা থৌশিলশিং খন্ন-নৈনবা ইন্সতিতুসনগী মফম অমনি।

চহি অসিদগী চৎনবা হৌগদবা অনৌবা মওং অমদা, আর্মি কমান্দরস কনফরেন্স অসি হায়ব্রিদকী মওংদা পাংথোক্কনি অমসুং অতোপ্পা সেনিয়র ওফিসারশিংনা অহানবা নুমিত্তা ভর্চুএল ওইনা উনগনি অমসুং মতুং তারকপা খন্ন-নৈনবশিং হকথেংননা শরুক য়াগনি।

মীফম অসিদা ওক্তোবর ১৮,২০২৩দা দিফেন্স মিনিস্তর শ্রী রাজনাথ সিংহ শরুক য়াগনি। চীফ ওফ দিফেন্স স্তাফ জেনেরেল অনিল চৌহান, চীফ ওফ  আর্মি স্তাফ জেনেরেল মনোজ পান্দে, চীফ ওফ এয়র স্তাফ এয়র চীফ মার্সেল ভি.আর চৌধুরিনা মীফম অসিদা ৱা ঙাংগনি। ভারত সরকারগী প্রিন্সিপাল সাইন্তিফিক এদভাইজর দোক্তর অজয় কুমারনা “নেসনেল সেকুরিতিদা তেক্নোলোজি শীজিন্নবা” হায়বা হীরমদা ৱা ঙাংগনি।

অৱাংবা থাক্কী লুচিংবশিংনা ভারতনা লান্মীগী ওপরেসনগী শেম-শারিবশিং অসি হন্না য়েংশিনবগী মথক্তা হৌজিক ওইরক্লিবা ঙাক-শেনগী ফিবমশিংগী মতাংদা খন্ন-নৈনগনি। হৌজিক পায়খৎলিবা অহোংবা পুরক্নবা থবকশিং, ত্রেনিংগী ৱাফমশিং, হুমেন রিছোস মেনেজমেন্তগী ৱাফমশিং অমসুং থবক তৌরিবা অমসুং পোথারবা লান্মীশিংগী ওইবা ৱাফমশিং য়াওনা মরুওইবা হিরমশিংদা মখোয়না কুপ্না খন্নগনি। আর্মি কমান্দরস কনফরেন্স অসিনা ভারত লান্মী খুমাঙ চাউশিনবা, তুংগী মীৎয়েং থম্বা, চুশিন্নবা অমসুং তুংগী থৌরাং তৌদুনা লৈবা ঙম্নবা পান্দম থম্লি।

.*****