ماہی پروری، مویشی پروری اور ڈیری کے مرکزی وزیر جناب پرشوتم روپالا کل کوچی کے ہوٹل لی میریڈین میں 16ویں ایگریکلچرل سائنس کانگریس (اے ایس سی) کا افتتاح کریں گے۔ معروف زرعی ماہرین اقتصادیات، سائنسدان، پالیسی ساز، ماہرین تعلیم، کسان اور کاروباری افراد 16ویں زرعی سائنس کانگریس میں شرکت کے لیے منگل (10 اکتوبر) سے چار دنوں کے لیے کوچی میں جمع ہونے والے ہیں۔

محکمہ زرعی تحقیق اور تعلیم(ڈی اے آر ای)  کے سکریٹری اور انڈین کونسل آف ایگریکلچرل ریسرچ (آئی سی اے آر)  کے ڈائریکٹر جنرل ڈاکٹر ہمانشو پاٹھک صدارتی خطاب کریں گے۔ وزیر زراعت پی پرساد، کیرالہ؛ ایم پی ہیبی ایڈن؛ پروٹیکشن آف پلانٹ ورائٹیز اینڈ فارمرز رائٹس اتھارٹی کے چیئرپرسن ڈاکٹر ترلوچن موہاپاترا  اور نابارڈ کے چیئرمین کے وی شاجی مہمان خصوصی ہوں گے۔ این اے اے ایس  کے سابق صدر پروفیسر پنجاب سنگھ ڈاکٹر اے بی جوشی میموریل لیکچر دیں گے۔

اے ایس سی کا بنیادی مقصد ہندوستان کے زرعی خوراک کے نظام کو پائیدار کاروباری اداروں میں تبدیل کرنے کے بارے میں ایک سائنسی رجحان  پیدا کرنا ہے تاکہ آنے والی نسلوں کے لیے اس کے فائدے میں آسانی ہو۔ نیشنل اکیڈمی آف ایگریکلچرل سائنسز(این اے اے ایس)  کے زیر اہتمام، ایگریکلچرل سائنس کانگریس پہلی بار کیرالہ میں منعقد کی جا رہی ہے، جس کی میزبانی آئی سی اے آر- سینٹرل میرین فشریز ریسرچ انسٹی ٹیوٹ (سی ایم ایف آر آئی)کررہی ہے۔

کانگریس 10 موضوعاتی شعبوں پر تبادلہ خیال کرے گی، جن میں زراعت اور اس سے منسلک  شعبوں سے متعلق تمام مسائل اور زمین اور پانی پر پائیداری کے مسائل، زرعی پیداواری نظام، مصنوعات، زرعی مشینری، آب و ہوا کی کارروائی، اقتصادیات، قابل تجدید یا متبادل توانائی، قطعی زراعت، متبادل کاشتکاری، ساحلی زراعت اوراگلی نسل کی ٹیکنالوجیز وغیرہ کے نظام شامل ہیں۔

عالمی بینک کے معروف ماہر معاشیات ڈاکٹر مدھر گوتم ، ڈاکٹر کرشنا ایلا، بھارت بائیوٹیک کے سی ایم ڈی؛ ڈاکٹر وجے پال شرما، زرعی لاگت اور قیمتوں کے کمیشن کے چیئرمین؛ ڈاکٹر پربھو پنگلی، ٹاٹا کارنیل انسٹی ٹیوٹ کے بانی ڈائریکٹر؛ ایف اے او سے ڈاکٹر رشی شرما؛ اور ڈاکٹر کدم بوٹ صدیق سمیت معروف ماہرین کی ایک جماعت مختلف سیشن کی قیادت کرے گی۔

مکمل مذاکرات

ایک جامع ایجنڈے کے ساتھ، 16ویں ایگریکلچرل سائنس کانگریس(اے ایس سی)  میں زراعت اور اس سے منسلک شعبوں کی ممتاز شخصیات کے پانچ مکمل لیکچرز ہوں گے۔ کانگریس تین پینل مباحثوں اور چار سمپوزیم کی میزبانی بھی کرے گی جس میں ساحلی زراعت اور ذریعہ معاش، موٹے اناج کو مرکزی دھارے میں لانا، اور نوجوانوں کو بااختیار بنانا اور صنفی مساوات جیسے مختلف موضوعات  شامل ہیں۔ 16 ویں اے ایس سی  کی ایک اہم خصوصیت کسان-سائنس دان انٹرفیس سیشن ہوگی، جو کاشتکار برادری اور سرکردہ محققین کے درمیان علم اور تجربات کے براہ راست تبادلے کی سہولت فراہم کرے گی۔

کانگریس ہندوستان اور بیرون ملک سے 1500 سے زیادہ مندوبین کے اجتماع کا مشاہدہ کرے گی۔ تقریب  کے موقع پر منعقد ہونے والی ایگری ایکسپو میں سرکاری اور نجی شعبے کے تحقیقی اداروں، یونیورسٹیوں، زرعی صنعتوں، توسیعی ایجنسیوں اور این جی اوز کی اختراعی  زرعی ٹیکنالوجیز کی نمائش کی جائے گی۔

*************

ش ح ۔ا ک ۔ ج ا

U. No. 10549