Ka India bad ka Saudi Arabia ki la iasoi ia ka Memorandum of Understanding ha Riyadh mynta ka sngi ha ki kam kiba iadei bad ka jingpyniasoh ia ki kam bording, ka green hydrogen bad ka hydrogen ba khuid bad ruh ki lad pynbiang mar. Ia ka MoU la soi hapdeng u Myntri Sorkar Pdeng ba dei khmih ia ki tnat Kam Bording bad Ka Bording ba Thymmai bad kaba lah ban Pynthymmai, jong ka Sorkar India, u R.K. Singh bad u Myntri ka Sorkar Saudi Arabia uba dei khmih ia ka tnat Kam Bording, u Abdulaziz bin Salman Al-Saud ha ka jaka ba pynlong ia ka MENA Climate Week ha Riyadh mynta ka sngi.

Kane ka MoU ka thmu ban tei ia ki rukom iatreilang hapdeng ki ar tylli ki ri ha ki kam kiba iadei bad ka jingpyniasoh ha ki kam bording, ka jingiasam ia ka bording ha ka por ba donkam bha bad ki jingjia ba kynsan; ka jingtei lang ia ki projek; ka jingpynmih lang ia ka green hydrogen bad ka hydrogen ba khuid bad ka bording na ki tyllong ba lah ban pynthymmai; bad ruh ki lad pynbiang mar kiba pyndonkam ha ki kam green hydrogen bad ka hydrogen ba khuid bad ki kam bording na ki tyllong ba lah ban pynthymmai.

Kine ki Myntri ki la rai ban pynlong ia ki B2B Business Summit bad ki jingiakren B2B hapdeng ki ar tylli ki ri ban tei ia ki lad pynbiang bad pynbha ia ki mar ha kine ki kam halor.

Hashuwa kane, ka kynhun na ka ri ba la ialam da u Myntri ki tnat Kam Bording bad Ka Bording ba Thymmai, u R.K. Singh ka la iashim bynta ha ka High-Level Segment jong ka Middle East and North Africa (MENA) Climate Week 2023, kaba long ha Riyadh, Saudi Arabia naduh ka 8 haduh 12 tarik u Risaw, 2023. Ka MENA Climate Week 2023 ka iakren shaphang ki jingpynbeit ha ki kam kiba iadei bad ka jingkylla ka suinbneng shuwa ka COP28 bad ka dei kaba pynlong da ka Sorkar jong ka Hima Saudi Arabia. Kane ka dei ka prokram kaba donkam kaba wanrah lang ia ki briew bapher bapher kiba iadon bynta ha ki kam bapher bapher kum ka Global Stocktake, bad ki bynta kiba iadei bad ka jingshngain ha ka ioh ka kot bad ka bording ha kaba iadei bad ka Paris Agreement. Kane ka plié lad ban iasam ia ki jingshem bad ki rukom treikam ba biang tam bad ruh ban saindur ia ki rukom pynbeit ia ki jingkylla ka suinbneng ha kine ki snem ban wan.

Ha ka jingkren ha ka bynta “Global Stocktake of the Paris Agreement (GST) Regional Dialogue: Highlighting enablers and technologies for ambition and just and inclusive transitions” ha ka sngi kaba nyngkong jong ka MENA Climate Week ha Riyadh mynta ka sngi, u Myntri ki tnat Kam Bording bad Ka Bording ba Thymmai u la ong ba ka MENA Climate Week ka long kaba donkam bha ha ka jingwad bad ka jingiasam ia ki lad ban tei ia ka lawei jong ka kam pynmih bording, ka jingpyndonkam ia ka bad ka jingiaineh ha kylleng ka pyrthei. U la ong ba ka jingialang ha ka MENA CW ka long kaba kongsan ia ka thain MENA bad ba ka don ki lad kiba bun ban wanrah ia ka jingkylla ha ka lawei jong ka rukom pyndonkam ia ka bording.

U Myntri u la ong ba ka India mynta ka dei ka sur kaba donkam bha ha ki kam bording bad ba ka la kylla sha ka nongialam ha ki jingkylla ha ki kam bording. “Ka India ka don jan 17% ki briew ha kane ka pyrthei bad lyngba ka jingdon ka ioh ka kot kaba ha ka kyrdan kaba san, ka la shim ia ki sienjam ban pynduna ia ki jaboh na ka GDP da 45% shuwa u snem 2030 bad kot sha ka thong Net Zero shuwa u snem 2070.” U la ong ba ki kam bording ha India ki la iaid lyngba ki jingkylla kiba thmu ban pynbiang ia ka bording kaba ryntih, kaba jem dor bad kaba iaineh ia ki briew jong ka ri. “Ka ri ka la iaid shaphrang ha ka jingkyntiew ia ka bor pynmih bording na ki tyllong non-fossil, ka la tei ia ka unified national grid bad ka la pynkhlain ia ki lad pynbiang bording, ka jingkyntiew ia ka bording kaba lah ban pynthymmai, ka jingplie lad shuh shuh ban ioh ia ka bording bad ka jingai bording ia baroh ki longiing ha ka ri, bad ruh ka jingpyntreikam ia ki polisi ba saindur thymmai.”

U Singh u la ong ba ka green hydrogen ka don lad ban pynstet ia ka jingkylla ha ki kam bording ha India. “Nga kmen ban iathuh ia phi ba ka Sorkar India ka la sdang ia ka National Green Hydrogen Mission ban pyndonkam ia ka bording hydrogen bad ka la ai jingmynjur ia ka jingbei tyngka haduh US $ 2.3 billion na ka bynta kane ka Mission.”

U Myntri u la kyntu ia ki ri MENA ba kin iasoh bad ka Global Biofuel Alliance khnang ban rah shakhmat ia ka jingiatreilang ki ri na ka bynta ki biofuel kiba iaineh bad ruh ban kot sha ka thong jong ka Alliance. U la ong ba ka Alliance ka thmu ban wanrah ka jingiatreilang ban pynkhlain ia ka jingpynmih bad jingpyndonkam ia ki biofuel ba iaineh, ban plié lad ia ka jingkhaii ia ki biofuel bad ruh kiwei kiwei ki kam ha ka jingiatreilang bad ki kynhun na ki ri bapher bapher ba trei ha ki kam biofuel.

U myntri u la ong ba ka India ka ngeit skhem ba baroh ki ri ki dei ban sngewthuh ba ki jingkylla ha ki kam bording kin wanrah ia ki lad bad ki jingeh ia ki ri ba dang kiew shaphrang bad ia ka thain shathie jong ka pyrthei. “Kumta, ka long kaba donkam bha ia ngi ban iatrei lang ban kyrshan iwei ia iwei ha kane ka jingkylla.” U Singh u la ong ha ka MENA Climate Week ba ki sienjam shimet bad ki rai ban im ha ka rukom kaba iaineh ki long kiba donkam bha ban kot sha ka thong ban wanrah jingkylla ha ki kam bording ha ka rukom kaba iaineh. “Ha kaba iadei bad kane, nga kyntu ia ka thain MENA ba kan iasoh bad ka sienjam Lifestyle for Environment (LiFE) jong ka India”, la ong u Myntri.

Lah ban peit ia ka jingsdang jong ka MENA Climate Week hangne.

Global Stocktake jong ka Paris Agreement

Ka GST (Global Stocktake jong ka Paris Agreement) regional dialogue ha ka Middle-East and North Africa (MENA) Climate Week kan wanrah lang ia ki nongshna polisi bad kito kiba iatreilang ha ki kam ba kin iakren shaphang ki mat ba kongsan na ka thain da ka jingthmu ban saindur ia ka jingmih na ka GST. Ka jingiakren kan long ka rynsan ban iakren shaphang ki jingeh, ki jingthut, ki jingpynbeit bad ki lad ban kyntiew ia ki kam ban tehlakam ia ka jingkylla ka suinbneng bad ka jingkyrshan ia kine ha kaba iadei bad ka MENA bad ruh ban kyntiew ia ka jingiatreilang hapdeng ki ri.

Ka GST ka plié lad ia ki ri ba kin peit ia ka jingpyntreikam ia ka Paris Agreement ban peit ia ka jingiaid shaphrang ha ka jingpynurlong ia ka jingthmu jong ka Agreement bad ki thong kiba heh jong ka. Ia kane la leh ha ka rukom kaba pura bad kaba plié lad ha kaba la peit ia ki lad pynduna, ki jingkylla bad ki lad ban pyntreikam bad ki jingkyrshan katkum ka jingryntih bad ka jingstad science kaba don. Ka GST kaba nyngkong ka la long ha Glasgow ha u snem 2021 bad kan kut ha ka Climate Change Conference ha Dubai, UAE (ha ka COP 28). Ki jingmih na ka GST kan ai jingmut ia kito kiba don bynta ha kane ka kam ba kin pynthymmai bad pynkhlain, ha ka rukom kaba la jied da ka ri, ia ki sienjam bad ka jingkyrshan, ha ryngkat ka jingkyntiew ia ka jingiatreilang hapdeng ki ri ban tehlakam ia ka jingkylla ka suinbneng.

Ka jingkut jong ka global stocktake kaba nyngkong ka dei ka por kaba kongsan ha ki kam sain pyrthei ban pyni ia ka jingiaid lang shaphrang ha kylleng ka pyrthei ban pynurlong ia ki kyndon bad ki jingthmu jong ka Paris Agreement. Ka dei ka por kaba kongsan ban pyni ia ki jingeh bad ruh ia ki lad kiba bun ban pynstet ia ki kam ban tehlakam ia ka jingkylla ka suinbneng bad ki kam kiba kongsan ha ki thain bapher bapher. Ka long ruh kaba donkam bha ha ka jingpyni ia ka khubor kaba bha jong ka jingiatylli bad ka jingiatreilang.

***