امورداخلہ اور امداد باہمی کے  مرکزی وزیر جناب امت شاہ نے آج پنجاب کے امرتسر میں شمالی زونل کونسل کی 31ویں میٹنگ کی صدارت کی۔ پنجاب، ہریانہ اور ہماچل پردیش کے وزرائے اعلیٰ، دہلی کے لیفٹیننٹ گورنر، جموں کشمیر اور لداخ، چنڈی گڑھ کے ایڈمنسٹریٹر، رکن ریاستوں کے سینئر وزراء، مرکزی داخلہ سکریٹری، سکریٹری، بین ریاستی کونسل سیکریٹریٹ، شمالی میں رکن ریاستوں کے چیف سیکریٹریز ریاستوں اور مرکز کے زیر انتظام علاقوں اور مرکزی وزارتوں اور محکموں کے زون اور دیگر سینئر افسران نے میٹنگ میں شرکت کی۔

جناب امت شاہ نے کہا کہ پچھلے 5 سالوں میں وزیر اعظم نریندر مودی کی قیادت میں زونل کونسلوں کا کردار مشاورتی نوعیت سے ایکشن پلیٹ فارم میں بدل گیا ہے۔ انہوں نے کہا کہ شمالی زونل کونسل ملک کی ترقی اور سلامتی کے نقطہ نظر سے ایک اہم مقام رکھتی ہے، ملک کی 21 فیصد اراضی اور 13 فیصد آبادی ہے، 35 فیصد سے زائد اناج شمالی علاقہ جات میں پیدا ہوتا ہے۔ جناب شاہ نے کہا کہ مرکزی مسلح  پولیس فورس (سی اے پی ایف) اور فوج میں زیادہ تر اہلکار، جو ملک کی سرحدوں کی حفاظت کرتے ہیں، شمالی زونل کونسل میں ریاستوں اور مرکز کے زیر انتظام علاقوں سے آتے ہیں۔

مرکزی وزیر داخلہ نے کہا کہ وزیر اعظم جناب نریندر مودی کی قیادت میں حکومت منشیات اور دہشت گردی کے خلاف کریک ڈاؤن کرنے میں کامیاب رہی ہے۔ انہوں نے کہا کہ مودی سرکار سرحد پر حفاظتی نظام کو مضبوط بنانے کے لیے پرعزم ہے، جلد ہی ہمارے ملک کی سرحدوں پر اینٹی ڈرون سسٹم نصب کیا جائے گا۔ وزیر داخلہ نے شمالی زونل کونسل کے تمام رکن ریاستوں سے پانی کی تقسیم سے متعلق اپنے تنازعات کو کھلے ذہن اور باہمی بات چیت سے حل کرنے کی درخواست کی۔

جناب امت شاہ نے تمام رکن ریاستوں سے کہا کہ وہ ملک میں تعاون کی تحریک، اسکول چھوڑنے والے بچوں کی شرح اور تغذیہ  کی کمی جیسے مسائل کو اجتماعی ترجیح قرار دیتے ہوئے ان پر خصوصی توجہ دیں۔ انہوں نے کہا کہ ملک میں ایک بچہ بھی نقص تغذیہ  کا شکار نہیں رہنا چاہیے، اسکول چھوڑنے کی شرح کو کم کرنا ہم سب کی ذمہ داری ہے، کوآپریٹو موومنٹ کو تحریک دینے سے ملک کے 60 کروڑ سے زائد افراد کو تعلیم حاصل کرنے اور خوشحالی کی طرف بڑھنے میں مدد ملے گی۔جناب امت شاہ نے تمام رکن ریاستوں پر زور دیا کہ وہ قدرتی اور نامیاتی کھیتی کو اپنائیں، کیونکہ یہ ملک کے کسانوں کے لیے بہت زیادہ فائدہ مند ہوگا۔

مرکزی وزیر داخلہ نے ریاست میں سیلاب کی صورتحال سے نمٹنے کے لیے ہماچل پردیش حکومت کو مرکز کی طرف سے ہر ممکن مدد کا یقین دلایا اور کہا کہ بحران کی اس گھڑی میں پورا ملک ہماچل کے ساتھ کھڑا ہے۔ مرکزی وزیر داخلہ کی اپیل پر، شمالی زونل کونسل نے چندریان-3 کی شاندار کامیابی، جی 20 سربراہی اجلاس میں بھارت کی قیادت اور عالمی فلاح و بہبود کی دنیا بھر میں تعریف اور پارلیمنٹ سے منظور شدہ تاریخی خواتین ریزرویشن بل کا خیرمقدم کیا۔

زونل کونسلز کے کردار کو سراہتے ہوئے انہوں نے کہا کہ اگرچہ زونل کونسلیں کردار کے لحاظ سے مشاورتی ہیں لیکن گزشتہ برسوں کے دوران یہ مختلف شعبوں میں باہمی افہام و تفہیم اور تعاون کے صحت مند رشتے کو فروغ دینے میں ایک اہم عنصر ثابت ہوئی ہیں۔ زونل کونسلیں ممبران کے درمیان اعلیٰ سطح پر ذاتی باہمی رابطے کا موقع فراہم کرتی ہیں اور مشکل اور پیچیدہ نوعیت کے مسائل کو دوستی اور خیر سگالی کے ماحول میں حل کرنے کے لیے ایک مفید فورم کے طور پر کام کرتی ہیں۔ بات چیت اور خیالات کے تبادلے کے ذریعے، زونل کونسلیں سماجی اور اقتصادی ترقی کے اہم مسائل پر ریاستوں کے درمیان ایک مربوط نقطہ نظر تیار کرنے میں مدد کرتی ہیں۔ زونل کونسلیں ریاستوں کے مشترکہ مفاد کے مسائل پر بھی تبادلہ خیال اور سفارشات پیش کرتی ہیں۔

مرکزی وزیر داخلہ جناب امت شاہ نے کہا کہ اب 5 زونل کونسلوں کی میٹنگیں ریاستی حکومتوں کے تعاون سے وزارت داخلہ کے انٹر اسٹیٹ کونسل سکریٹریٹ کے ذریعہ باقاعدگی سے بلائی جارہی ہیں۔ انہوں نے مشاہدہ کیا کہ زونل کونسلوں اور اس کی قائمہ کمیٹیوں کے اجلاسوں کی تعداد میں خاطر خواہ اضافہ ہوا ہے۔ جون 2014 سے لے کر، پچھلے 10 سالوں میں، زونل کونسل اور اس کی سٹینڈنگ کمیٹی کے کل 54 اجلاس ہوئے ہیں، جو 2004 سے مئی 2014 تک کے 10 سالوں کے دوران ہونے والے اجلاسوں کے مقابلے میں دوگنا سے زیادہ ہیں۔

امرتسر میں 31ویں میٹنگ میں شمالی زونل کونسل نے کل 28 مسائل پر تبادلہ خیال کیا۔ خاص طور پر رکن ریاستوں اور مجموعی طور پر ملک سے متعلق کچھ اہم مسائل تھے جن میں  'بین ریاستی دریا کے پانی کی تقسیم سے متعلق مسائل، بینک برانچوں/پوسٹل بینکنگ کی سہولیات کے ذریعے دیہات کا احاطہ، سماجی شعبے کی اسکیموں کے لیے براہ راست فائدہ کی منتقلی کا مؤثر نفاذ،' پنجاب یونیورسٹی سے متعلق مسائل، پی ایم جی ایس وائی کے تحت روڈ کنیکٹیویٹی، سائبر کرائمز کی روک تھام، جل جیون مشن، اُڑان سکیم کے تحت پروازوں کی بحالی، خواتین اور بچوں کے خلاف جنسی جرائم/زیادتی کے مقدمات کی تیز رفتار تحقیقات (ایف ٹی ایس سی) عصمت دری اور پوکسو ایکٹ کے مقدمات کو تیزی سے نمٹانے کے لیے فاسٹ ٹریک خصوصی عدالتوں کی اسکیم کا نفاذ ، بنیادی زرعی کریڈٹ سوسائٹیز (پی اے سی ایس) کی مضبوطی، زرعی زمین کی خریداری، وغیرہ   شامل تھے۔

میٹنگ میں ممبر ریاستوں/ مرکز کے زیر انتظام علاقوں کی طرف سے اپنائے گئے اچھے طریقہ کار کے بارے میں بھی تفصیلات پیش کی گئیں۔

************

ش ح۔و ا    ۔ م  ص

 (U: 10000 )