ত্রাইবেল এফিয়র্সকী কেন্দ্রগী মন্ত্রালয়গী মখাদা লৈবা নেস্নেল এজুকেসন সোসাইতী ফোর ত্রাইবেল স্তুদেন্ত (NESTS)না আন্ধ্র প্রদেশ, গুজরাত, মধ্য প্রদেশ, ওরিশা, রাজস্থান অমসুং তেলঙ্গানা শিনবা থুংবদা লৈরিবা এক্লাব্যা মোদেল রেসিদেন্সিএল স্কুল (EMRS) 54দা ‘এমাজোন ফ্যুচর ইঞ্জিনিয়র প্রোগ্রাম’গী ফেজ-II হৌদোকখ্রে। অনিশুবা ফেজ অসিদা এদভান্স ব্লোক প্রোগ্রাম্মিং অমসুং আর্তিফিসিএল ইন্তেল্লিজেন্স করিকলম য়াওগনি। সেক্রেতরী (ত্রাইবেল এফিয়র্স), শ্রী অনিল কুমার ঝানা নুমিৎ হুম্নিগী ইন-পর্সন্স তীচর্স ত্রেনিং ৱর্কশোপকা লোয়ননা মমাংগী একাদমিক চহিগী মনুংদা EMRSকী মাইকৈদগী লাকখিবা তোপ 20 কোদিং প্রোজেক্তকী একজিবিসন ওইরিবা EMRS কোদর্স এক্সপোসু ঙসি নই দিল্লীদা হৌদোকখ্রে।

মমাংগী চহিদা থবক ওইনা পাংথোকখিবদা ফংখিবা মায় পাকপশিংদা য়ুম্ফম ওইদুনা নৌনা শেমদোক্লবা মোদ্যুল অসিদা CBSE স্কিল এজুকেসনগা চুননবা নৌনা শেমদোক্লবা কোদিং অমসুং আর্তিফিসিএল ইন্তেল্লিজেন্স (AI) করিকলম অমা হৌদোক্কনি। হায়রিবা অসি, কোদিং, লোজিকেল সিক্বেন্সিং, লর্নিং লুপ অমসুং ব্লোক প্রোগ্রাম্মিংগী হৌজিক লৈরিবা কোর্সকী মথক্তা হাপচিনবনি। পুং 20গী মোদ্যুল অসি হৌজিক্কী মতমদা ত্রাইবেল মহৈরোইশিংদা তাক্লিবা কম্প্যুতর সাইন্স অমসুং কোদিংগী থাকশিং খন্ন-নৈনদুনা শেম্বনি। তরুকশুবা ক্লাসকী মহৈরোইশিংদা কম্প্যুতর সাইন্সকী ফন্দামেন্তেল; তরেৎশুবা ক্লাস্তা ভিজুএল প্রোগ্রাম্মিংগী অৱাংবা থাক্কী ৱাখল্লোন; নিপানশুবা ক্লাস্তা AI করিনো হায়বা শক্তাকপগী সেসন; অমসুং মাপনশুবা ক্লাস্তনা AIগী ফন্দামেন্তেল তাকপীগনি। 10শুবা ক্লাসকী ওইনদি, একাদমিক চহি 2024-25তা CBSE স্কিল করিকলমগা চুনবা AI মোদ্যুল তাক্কনি।

প্রোগ্রাম অসিগী পাইলোত ফেজ হৌদোকখিবা ত্রাইবেল এফিয়র্সকী কেন্দ্র মন্ত্রী, শ্রী অর্জুন মুন্দানা মহাক্কী ৱারোল অমদা অসুম্না হায়খি, “এমাজোন ফ্যুচর ইঞ্জিনিয়র প্রোগ্রাম ইনিসিএতিব অসিদি মথংদা হৌরক্কদৌরিবা ত্রাইবেলগী চারোন শুরোনশিংনা দিজিতেলগী খুদোংচাবশিং শোইদনা লৌবা ঙমহন্নবা মপুং ফাবা লৌশিং লৈহন্নবা অচৌবা খোঙথাং অমনি। এমাজোন ফ্যুচর ইঞ্জিনিয়র প্রোগ্রাম অমসুং NESTSকী মরক্কী খুৎশম্নবা অসিদা ত্রাইবেল খুন্নাইশিংগা মরক্তা লৈরিবা একাদমিক্কী অহাঙবশিংগী মেনশিনবা ঙম্বগী মতিক লৈবগা লোয়ননা ইমর্জিং তেক্নোলোজীশিংদা মায় পাকপা কেরিয়ম শেম্বা ঙমহনগনি”।

ত্রাইবেল এফিয়র্স সেক্রেতরী, শ্রী অনিল কুমার ঝানা থৌরম অসিদা ৱা ঙাঙবদা ভারত্তা ত্রাইবেলগী অপুনবা মীশিং মীওই করোর 10 হেন্না লৈ, মখোয়শিং অসিনা মোদর্ন এজুকেসন ফংবগী মতাংদা লোল অমসুং কলচরগী অপনবা কয়া অয়াম্বা মতমদা মাইয়োক্নরি হায়না পনখি। তাকপী তম্বীবা মতমদা মসিগুম্বা অহাঙবা মেনশিনবনা ত্রাইবেল মহৈরোইশিংগী আউতকম ফগৎহনবদা চাউনা মতেং পাংগনি। ওজাশিংবু, অখন্ননা ভারতকী ত্রাইবেল খুন্নাইগী ওজাশিংবু মখোয়গী লোলদা কেপাসিতী বিলদিং তৌবনা করিকলমশিংবু হেন্না নীংথিজনা তাকপা ঙমহনগনি অমসুং ত্রাইবেল মহৈরোইশিংবু থাক ৱাংবা তেক্নোলোজীগী মালেমসিদা অতোপ্পশিংগা চাংয়েংনবা ঙম্বা নীংথিনা শেম শাবীবসু ঙমগনি, মহাক্না হায়খি। শ্রী ঝানা EMRS ওজাশিংনা মখোয়গী মহৈরোইশিংনা প্রোগ্রাম অসি থৱাই য়াওনা শরুক য়াহন্নীংনবা অমসুং কোদিং অমদি AIগী বেসিক তম্নবা পুক্নিং থৌগৎপীয়ু হায়খি। মহাক্না থৌরম মনুংদা খ্বাইদগী মকোক থোংবা ওজা অমসি মহৈরোই অহুম্বু মনা পীদুনা ইকায় খুম্নখি।

এমাজোন ইন্দিয়া অমসুং লর্নিং লিঙ্ক ফাউন্দেসন (LLF)গা খুৎশম্নদুনা মমাংগী চহিদা হৌদোকখিবা অহানবা ফেজনা ক্লাস তরুক্তগী নিপান ফাওবগী মহৈরোই 7000 হেনববু কম্প্যুতর সাইন্সকী ফন্দামেন্তেল অমসুং ব্লোক প্রোগ্রাম্মিং মোদ্যুলগী মতাংদা তাকপী তম্বীখি। লেপ্তনা পাকথোক চাউথোরক্লিবা তেক্নোলোজীগী মালেম অসিগীদমক্তা ত্রাইবেল মহৈরোইশিংবু শেম-শাদুনা লৈহনবা হায়বসিদা মখোয়বু তাকপী তম্বীরিবশিংদা অচুম্বা লৌশিং অমসুং রিসোর্স মতিক চানা লৈবা হায়বসি খ্বাইদগী মরু ওইবা অমসুং তঙাই ফদবনি। ফেজ Iগী মনুংদা ওজা 50 হেনববু নুমিৎ 2গী কেপাসিতী বিলদিং প্রোগ্রামগী মখাদা ত্রেনিং পীখি অমসুং মসিগী মতুংদা মতম-মতমগী ওইবা ভর্চুএল সেসন কয়ানা মতুং ইনখি। (ফেজ-I হৌদোকখিবাঃ https://pib.gov.in/PressReleasePage.aspx?PRID=1887065)

থৌরম অসিদা এমাজোন ইন্দিয়াগী পব্লিক পোলিসী (কস্তমর ত্রস্ত)কী মকোক, শ্রী নিতিন সলুজা অমদি লর্নিং লিঙ্ক ফাউন্দেসনগী মেনেজিং পার্ত্নর, শুকুমারী নুরিয়া অন্সারীসু অতোপ্পা মীথুংলেন কয়াগা লোয়ননা শরুক য়াখি।

***