প্রধান মন্ত্রী শ্রী নরেন্দ্র মোদীগী #SwachhBharatকী খোল্লাওনা মরম ওইরগা, পুন্সিগী থেংখাং খুদিংগী মীয়াম্না থৱাই য়াওনা থোক্নরকখি, অমসুং স্বচ্ছ ভারত খোঙথাংবু মশাগী মথৌদাংনি খন্দুনা মরী লৈনবা থবকশিং পাংথোক্নখি। পুম্নমক অসিগী মহৈ ওইনা, লু-নানবা অমসুং হাইজিন হায়বসি ঐখোয়গী লৈবাক্কী লিচৎ-শাজৎকী মচল অমা ওইরকখি, অমসুং স্বচ্ছ ভারত মিসন অসিসু য়ুম্থোং খুদিংদা শিজিন্নবা মিং অমা ওইরকখি।

অৱাং নোংপোক লমদমগী চাউখৎ থৌরাং মন্ত্রালয় (MDoNER)না শ্রামদান অমসুং লু-নানবগী খোঙথাং কয়া স্বচ্ছতা পখ্বারাগী শরুক অমা ওইনা পাংথোকখি অমসুং মসিগী পান্দম্না ওফিসশিংগী পন্দুনা লৈবা থবকশিং লোইশিনবা অমসুং ফিল্দ অমসুং আউতস্তেসন ওফিসশিংগা লোয়ননা বিভাগশিংগা এতেচ তৌনবা অমসুং মদুগী মখাদা লৈবা ওফিসশিংদা অহেনবা মিৎয়েং চঙবগা লোয়ননা ওফিসকী মফমশিং নীংথিনা শিজিন্নবনি।  

কেম্পেন অসিগী শরুক অমা ওইনা, MDoNERগী জোইন্ত সেক্রেতরী, শুকুমারী অনুরধা এস. চাগতীনা মন্ত্রালয়গী মরু ওইবা ওফিসিএলশিংগা লোয়ননা বিজ্ঞান ভবন এনেক্সীগী মফম অমসুং মপানথংবদা লৈবা মফমশিংদা পাংথোকপা শ্রামদান্দা শরুক য়াখি। NEC, NEDFI, NEHHDC, NERAMAC অমসুং NECBDCগী ওফিসশিং য়াওনা মশক খঙদোক্লবা মফমশিংদা তরু-তনান্না থম্বগী দ্রাইব কয়া চাং নাইনা পাংথোকখ্রে। কেম্পেন অসিগী মপুং ওইবা ৱাফমদি ইমপ্লোয়ী অমসুং মীচম মীয়াম্না মসিদা পাক শন্না শরুক য়াখিবা অসিনি।

স্বচ্ছতা পখ্বারা অসি OSD, MDoNER, শ্রী চঞ্চল কুমারনা সেপ্তেম্বর 16-30, 2023গী মতমসিদা মাইকোন্নরি। পখ্বারা অসিগী মনুংদা, মন্ত্রালয়গী ওফিসর অমসুং ইমপ্লোয়ী খুদিংমক্না স্বচ্ছতাগী ৱাশক লৌনখি। তরু তনান্না লৈরে অমসুং রেকোর্দ নীংথিনা থম্লে হায়বা য়েংশিন্নবগীদমক্তা মনাক নকপদা লৈবা ওফিস প্রেমিসসশিংদা স্বচ্ছতা ইনস্পেক্সনশিং চাং নাইনা পাংথোকখি। বিজ্ঞান ভবন (এনেক্সী)গী ওফিসকী মফমশিংবু তরু তনান্না থম্নবগীদমক্তা ফত্ত-হৌদী শেংদোকপা অমসুং শ্রামদান অমসু পাংথোকখি।

***