গনেশ পুজা হায়বসি লাই নীংবগী মতৌখক্কী মহুৎ শিনবদগী হেন্দোক্লগা, ভারত্তা য়াম্না হরাও নুংঙাইনা লৌনবা কুহ্মৈ অমনি। স্পিরিচুরলগী ওইবা মতৌগী মথক্তা, গনেশ পুজানা হরাও কুহ্মৈশিংবু সস্তেনেবল ওইনা পাংথোকপা, ইকো-ফ্রেনলী ওইবা থবকশিংগী মথৌ তাবদা মিৎয়েং চঙবগী খুদম অমসু ওইরি। হরাও তয়াম্বা ফোংদোকপগী মরকসিদা প্লাস্তিক শিজিন্নবনা অকোয়বগী ফিভমদা চৈথেং পীরিবশিংবু মুত্থৎনবগীদমক্তা রাজ্য কয়া অমনা হৌজিক্তি সস্তেনেবল ওইবা থৌওং কয়া শিজিন্নবা হৌরে। ইকো-কন্সিয়স ওইবগী মসিগুম্বা থৌওংগা মরী লৈননা, অসম্না গনেশ পুজাবু ৱানা শাবা পন্দলগা লোয়ননা পাংথোকপগী ৱারেপ লৌখি। থৌওং অসিনা চৎনবীগা লোয়ননা অকোয়বগী ফিভমগা মরী লৈননা লৈরিবা ঐখোয়গী থৌদাংশিংদা মিৎয়েং চঙবগী মতৌ উৎলি।

হৌজিক চত্থরিবা স্বচ্ছতা পখ্বারা অসিদা, দিগবোই ম্যুনিসিপাল বোর্দনা ইন্দিয়ন ওইল কোর্পোরেসনগা খুৎশম্নদুনা সেপ্তেম্বর 19-21, 2023দা প্লাস্তিক য়াওদনা গনেশ পুজা পাংথোকপগী মশক থোকপা থৌওং অমা পাংথোকখি। IOC রোদকী মাইকৈদা লৈবা দাক্কা লাইনগী নীংথিরবা মফমদা পাংথোকপা থৌদোক অসিদা অসমগী নাৎকী মমিৎ তাবগা লোয়ননা স্বচ্ছতাদা অহেনবা মিৎয়েং চঙবগী মতৌসু উবা ফংখি। কুহ্মৈগী থৌরম অসিদা প্লাস্তিক অমত্তা য়াওহন্দবা হায়বগী পান্দম থম্বনা মরম ওইরগা, থৌরম শিন-লাঙবা মীওইশিংনা সস্তেনেবল অমসুং লমদমসিগী পোত্থোক ওইজরিবা ৱা অসিবু শিজিন্নবগী ৱারেপ লৌখি। থৌরম অসিদা, মুর্তী কয়া শারিবা, চঙফম থোঙ শারিবা অমসুং নাৎকী ওইবা অকুপ্পা অমসুং ফজরবা লৈতেং কয়া শারিবা, মইং ওইনা পল্লবদা, আইকোনিক ওইরবা জাপি কোকখুম অমসুং খোরাহী পোলাংশিং অসিদা ৱানা মপুং ওইনা শিজিন্নখি। ৱাবু অসুক য়াম্না নীংথিনা শিজিন্নবগী মওং-মতৌ অসিনা পোৎলম অসিগী কান্নবা অমসুং মওং-মতৌবু মীয়ামদা উৎপদা নত্তনা সস্তেনেবল ওইবগী ইথিলসু শাগোন্নখি।

থৌরম অসিদা নুমিৎ খুদিংগী মীওই চাউরাক্না 200মুক লাকখি, অমসুং নুমিৎ হুম্নিগী থৌরম অসিদা পুন্না মীওই 600মুক লাক্নখি। থৌরম অসিগী মপুং ওইবা পান্দমদি মীয়াম্বু স্পিরিচুএল ওইবা মওংদা নুংঙাইহনবা অমসুং স্বচ্ছতাগী থৌওংবু য়াহন্নবা পুক্নিং থৌগৎপনি।

থৌরম অসিদা উবা ফংখিবা খ্বাইদগী মশক নাইবা অহোংবা অমদি, ‘গমোচা’ হায়না খঙনবা অসমগী নাৎকী ফিনা প্লাস্তিক্না শাবা লৈ পরেংগী মহুৎ শিনখিবা অদুনি। ফিনা মসিগুম্না লৈতেং শেম্লিবা অসিনা ওথেন্তিক ওইবা ৱাখল্লোন অমা ফাওহনবতা নত্তনা সস্তেনেবল ক্লোথিংগী মাইকৈদা খোঙদাবা হৌরকপগী থৌওংবুসু উৎলি। পন্দলবু কুপ্লিবশিংসু ফি অমসুং লৈ কয়ানা মহুৎ শিনখি, মসিনা থৌরম মফম্বুসু লৈনম চেলহনখি, অমসুং প্লাস্তিক্না শাবা কয়া মমাংদা শিজিন্নরম্বা খুদিংমক অমত্তা শিজিন্নখিদে।

লু-নানবা অমসুং ফত্ত-হৌদিবু নীংথিনা শেন্নবগী থৌওং হেন্না নীংথিজনা পাংথোকহন্নবগীদমক্তা, দস্তবিন কয়া অমসু মান্দপকী তোঙানবা মফম কয়াদা থমখি। ফত্ত-হৌদি মফম চানা লংথোকপগী থৌওংবু বিনশিংনা অসিনা শেন্নখি অমসুং ইশাগী থৌদাং খঙনা ফত্ত-হৌদি হুন্দোকপগী ৱাখল্লোন অমসু মীয়ামদা লৈহনখি। থৌরম অসিদা উবা ফংখিবা খ্বাইদগী মশক নাইবা অহোংবা অদুদি থৌরমদা শরুক য়ারিবা মীপুম খুদিং অমসুং অশিন-অরাংশিংনা সিঙ্গল-য়ুজ প্লাস্তিক শিজিন্নবদা ইফোঙ-ফোংনা অথিংবা থমখিবা অদুনি। মসিগুম্বা অহকপা খোঙথাং অসিনা প্লাস্তিক য়াওদনা নুংঙাইবা ফোংদোকপগী অমত্তা ওইবা পান্দমগী মরু ওইবা তাকখি।

প্লাস্তিক য়াওদবা গনেশ পুজা অমা দিগবোইদা পাংথোকখিবা অসিনা তাউন অসিগী কলচরগী হেরিতেজপু নৌহৌননা শক্তাকপগা লোয়ননা থৌদাং খঙনা থৌরম শিন-লাঙবগী তোপ-তোপ্পা খুদম অমসু থমখি। অমত্তা ওইনা নুংশি চাননা লৈমিন্ননবগীদমক্তা নাৎ অমসুং লু-নানবদা থৱাই হকচাং কত্থোকপগী ইথিল অমসু থৌওং অসিনা উৎখি। থৌরম অসি লোইশিনখিবদা, মসিদা শরুক য়াবা মীয়ামগী হরাও নুংঙাইবনা থল্লবা মাইথোং অমসুং নীংথিরবা মফম অসিনা মতম কুইনা নীংশিংহৌরগদবা শক্তম অমা থম্লমখি, মসিনা অথাপ্পা খুন্নাই কয়াদা সস্তেনেবল ওইবা মওংদা নুংঙাইবা ফোংদোকপগী ইথিল অমা পীখি। স্বচ্ছতা পখ্বারাগী ইথিল অসিনা লৈবাক মীয়াম খুদিংগী পুক্নিং চীংশিল্লি অমসুং মীওই করোর অনি হেনবনা হৌজিক ফাওবগী ওইনা ইহৌ অসিদা শরুক য়াখ্রে।

*****