সেপ্তেম্বর ১৪,২০২৩ দা প্রধান মন্ত্রী শ্রী নরেন্দ্র মোদী মধ্য প্রদেস অমসুং ছতিসগরদা চৎকনি। অয়ুক পুং ১১:১৫ রোম তাবদা প্রধান মন্ত্রী মধ্য প্রদেসকী বিনাদা থুংগনি অমসুং মফম অদুদা মহাক্না বিনা রিফাইনরিদা পেত্রোকেমিকেল কমপ্লেক্স য়াওনা লুপা করোর ৫০,৭০০ হেনবগী প্রোজেকশিং অমসুং রাজ্য শীনবা থুংনা অনৌবা ইন্দস্ত্রিএল প্রোজেক ১০ উরেপ-উয়ুং তমগনি। নুংথিল পুং ৩:১৫ রোম তাবদা প্রধান মন্ত্রী ছতিসগরগী রাইপুরদা থুংগনি অমসুং মফম অদুদা মহাক্না মরুওইবা রেল সেক্তর প্রোজেকশিং মীয়ামদা কৎথোক্কনি। থৌরম মনুংদা প্রধান মন্ত্রীনা ছতিসগরগী জিলা ৯দা ‘ক্রিতিকেল কিয়ার ব্লোকশিং’ উরেপ-উয়ুং তমগনি অমসুং সিকল সেল কাউন্সেল্লিং কার্দ লাখ ১ য়েন্থোক্কনি।  

মধ্য প্রদেসতা প্রধান মন্ত্রী

রাজ্য অসিদা ইন্দস্ত্রি চাউখৎনবা ইনোৎ অমা পীনবা খোঙথাং অমদা বি.পি.সি.এলগী বিনা রিফাইনরিদা প্রধান মন্ত্রীনা পেত্রোকেমিকেল কমপ্লেক্স উরেপ-উয়ুং তমগনি। অনৌবা রিফাইনরি অসি লুপা করোর ৪৯,০০০ চঙনা শেমগৎকদবনি অমসুং তেক্সতাইল, পেক্কেজিং, ফার্মা অমসুং অতোপ্পগী মরুওইবা মচাক অমা ওইরিবা ইথিলিন অমসুং প্রোপাইলিন ১২০০ কে.তি.পি.এ মসিনা চহি অমদা পুথোকপা ঙমগনি।

মসিনা প্রধান মন্ত্রীগী অত্মানির্ভর ভারতগী মঙলান মঙফাওনবা ঙম্নবা মাইকৈদা থাংজিনবা খোঙথাং অমা ওইগনি অমসুং লৈবাক অসিদা মপান্দগী পুশিল্লকপগী মখা পোনবা হন্থহনগনি। অচৌবা প্রোজেক অসিনা থবক কয়া ফংহনগনি অমসুং পেত্রোলিয়ম সেক্তরদা দাউনস্ত্রিম ইন্দস্ত্রিশিং চাউখৎহনগনি।

থৌরম মনুংদা প্রধান মন্ত্রীনা নারমাদাপুরম জিলাদা ‘পৱার অমসুং রিনিউএবল ইনর্জি মেনুফেকচরিং জোনগী প্রোজেক ১০; ইন্দোরদা আই.তি পাক অনি; রাতলামদা মেগা ইন্দস্ত্রিএল পার্ক অমা অমসুং মধ্য প্রদেসা অনৌবা ইন্দস্ত্রিএল এরিয়া ৬ উরেপ-উয়ুং তমগনি।

লমদম অসিদা শেন-থুম চাউখৎনবা অমসুং থবক পীনবা নারমাদাপুরম জিলাদা ‘পৱার অমসুং রিনিউএবল ইনর্জি মেনুফেকচরিং জোন’ শেমগৎকদবনি। ইন্দোরদা আই.তি পার্ক ৩ অমসুং ৪ লুপা করোর ৫৫০ রোম চঙনা পায়খৎকদবনি অমসুং মসিনা নহারোলশিংদা অনৌবা থবক ফংনবা খুদোংচাবশিং পীগনি।

রাতলমগী মেগা ইন্দস্ত্রিএল পার্ক লুপা করোর ৪৬০ রোম চঙনা পায়খৎকদবনি অমসুং মসিনা তেক্সতাইল, ওতোমোবাইল, ফার্মা সেক্তরশিংগী মরুওইবা মফম অমা ওইরক্কনি। পার্কশিং অসিনা দিল্লি-মুম্বাই এক্সপ্রেসৱেগা শম্নগনি অমসুং লমদম অসিগী শেন-থুম চাউখৎহনগনি অমসুং নহারোলশিংদা হকথেংননা অমসুং নাকোইননা থবক কয়া পীগনি।

লুপা করোর ৩১০ রোম চঙনা সাজাপুর, গুনা, মৌগঞ্জ, অগর মালৱা, নারমাদাপুরম অমসুং মাকসিদা শেমগৎকদৌরিবা অনৌবা ইন্দস্ত্রিএল এরিয়া ৬ অসিনা রাজ্য অসিদা থোং মাননা থবক পীগনি অমসুং লমদম অসি চাউখৎহনগনি।

ছতিসগরদা প্রধান মন্ত্রী

রাইপুরদা পাংথোকপা থৌরম অমদা প্রধান মন্ত্রীনা লুপা করোর ৬,৩৫০ রোমগী মরুওইবা রেল সেক্তর প্রোজেকশিং মীয়ামদা কৎথোক্কনি। প্রোজেকশিংগী মনুংদা ছতিসগর ইস্ত রেল প্রোজেক ফেজ-১, চম্পা অমসুং জামগাগী মরক্তা ৩শুবা রেল লাইন, পেন্দ্র রোদ অমসুং অনপুরগী মরক্তা ৩শুবা রেল লাইন অমসুং তালাইপাল্লি কোএল মাইনদগী এন.তি.পি.সি লারা সুপর থর্মেল পৱার স্তেসন য়ৌবা এম.জি.আর য়াওরি। রেল প্রোজেকশিংনা লমদম অসিদা পেসেঞ্জরশিংদা খুদোংচাবা পীদুনা শেন-থুমগী ফিবম ফগৎহনগনি।

পি.এম-গাতিশক্তি-নেসনেল মাস্তর প্লানগী মখাদা ছতিসগর ইস্ত রেল প্রোজেক ফেজ-১ পায়খৎপনি অমসুং খারসিয়াদগী ধর্মাজয়গর ফাওবগী কিমি ১২৪.৮গী রেল লাইন অমা য়াওরি, ছাল, বারাউদ, দুরগাপুর অমসুং অতোপ্পা কোএল মাইনশিং শম্নবা ফিদর লাইন ৩ য়াওরি। লুপা করোর ৩,০৫৫ রোম চঙনা শেমগৎপা রেল লাইন অসিদা মৈ ফংলবা ব্রোদগেজ লেভেল ক্রোসিংশিং অমসুং ফ্রি পার্ত দবল লাইনশিং য়াওরি।মসিনা মন্দ-রাইগর কোয়লা ফিল্দশিংদগী কোয়লা পুথোকপা ঙমহনগনি।

পেন্দ্রা রোদতগী অনুপুর ফাওবগী অহুমশুবা রেল লাইন অসি  কিমি ৫০ শাংবনি অমসুং মসি লুপা  করোর ৫১৬ চঙনা শেমগৎপনি। কিমি ৯৮ শাংবা চম্পা অমসুং জামগা মরক্কী ৩শুবা রেল লাইন অসি লুপা করোর ৭৯৬ চঙনা শেমগৎপনি। অনৌবা রেল লাইনশিংনা লমদম অসিদা তুরিজম চাউখৎহনগনি অমসুং থবক ফংবা হেনগৎহনগনি।

কিমি ৬৫ শাংবা মৈ ফংলবা এম.জি.আর সিস্তেম অসিনা তালাইপালি কোয়লা খনিদগী অফবা মখলগী কোয়লা মেগাৱাত ১৬০০গী এন.তি.পি.সি লারা সুপর থর্মেল পৱার স্তেসন্দা ফংহনগনি। মসিনা এন.তি.পি.সি লারাদগী মমল হোঙবা অমসুং অফবা মৈ পুথোকপা হেনগৎহনগনি। এম.জি.আর সিস্তেম অসি লুপা করোর ২০৭০ হেন্না চঙনা শেমগৎপনি।

থৌরম মনুংদা প্রধান মন্ত্রীনা ছতিসগরগী জিলা ৯দা ‘ক্রিতিকেল কিয়ার ব্লোকশিং’ উরেপ-উয়ুং তমগনি। ‘ক্রিতিকেল কিয়ার ব্লোকশিং অদু প্রধান মন্ত্রী-অয়ুস্মান ভারত হেল্থ ইনফ্রাস্ত্রকচর মিসনগী মখাদা দুর্গ, কোন্দাগাউন, রাজনন্দাগাউন, গারিয়াবন্দ, জাসপুর, সুরাজপুর, সুরগুজা, বাস্তার অমসুং রাইগর জিলাশিংদা লুপা করোর ২১০ চঙনা পায়খৎপনি।

থৌরম অদুদা প্রধান মন্ত্রীনা সিকল সেল কাউন্সেল্লিং কার্দ লাখ ১ য়েন্থোক্কনি।  প্রধান মন্ত্রীনা জুলাই ২০২৩দা মধ্য প্রদেসকী সাহদোলদা হৌদোকখিবা নেসনেল সিকল সেল এনেমিয়া ইলিমিনেসন মিসনগী মখাদা সিকল সেল কাউন্সেল্লিং কার্দশিং য়েন্থোক্কদবনি।

*****