U Dr. V. Anantha Nageswaran, Chief Economic Adviser (CEA), ka tnat Kam Pla Tyngka u la ong ba ha ka 7.8% na u snem sha u snem, ka roi ka par jong ka India ka kham heh ban ia ka roi ka par jong kiwei kiwei ki ri ba la biang ka ioh ka kot. Ka jingkiew ka roi ka par jong ka India ka la bteng ia ka jingkhlain ba la iohi ha ka quarter ba khatduh jong u snem mang tyngka 2023, u la bynrap.

U CEA u dang ai jingkren sha ki lad pathai khubor hadien ka jingpyllait paidbah ia ki jingantad jong ka Gross Domestic Product (GDP) na ka bynta ka quarter (q1) naduh u Iaiong haduh Jylliew jong u snem 2023-24, ha ki dor ryntih (2011-12) bad ki dor mynta, ba la pynmih da ka National Statistical Office (NSO) hapoh ka tnat Statistics and Programme Implementation ha New Delhi mynta ka janmiet.

U Dr. Nageswaran u la ong ba ka jingskhem bad ki lad ka jingkiew jong ka India ki dei ki jingkhlain jong ka bad ba ka jingshem na ka quarter ba nyngkong ha kaba iadei bad ka GDP ka la pynskhem shuh shuh ia kine ki ar bynta ba kongsan jong ka rukom pyniaid ia ki kam pisa da ka Sorkar, khamtam ha ki snem jong ka khlam COVID. Ka jingkiew jong ka ioh ka kot jong ka India ha ka Q1 ka la long kaba sted tam ha ka shi snem namar ka jingpynlut pisa ka Sorkar Pdeng bad ki Sorkar Jylla, ha ryngkat ka jingdawa mar kaba kham khlain, khamtam ha ki jaka nongkyndong, bad ka jingkiew jong ka rukom treikam ha ki kam ai jingshakri, u la ong.

Kaba bha tam ia ka ioh ka kot jong ka India ka dei ba ka jingpynmih pisa na ki kam shimet ka la iaid shaphrang. Kane ka wanrah ia ka jingbha na ka bynta ka jingioh kam nangne shakhmat bad ka jingkiew ka ioh ka kot jong ki longiing ka India, la ong u CEA. U la ong ruh ba ki projek bei tyngka ba thymmai ba la pynbna da ki kam shimet ki long kiba heh tam ha ka Q1 jong u snem mang tyngka 2023-24 ha ki 14 snem.

U Dr. Nageswaran u la ong ba ka jingdawa ha ki jaka nongkyndong ia ki FMCG ka la kiew khamtam na ka bynta ki mar kiba shongdor. Kane ka paw ruh ha ki nongbah ka ri bad kane ka don bynta ha kane ka jingkiew, u la ong.

U CEA u la ong ba watla ka la don ka jingsuki ha ka pyrthei, ki kam ai jingshakri sha kiwei kiwei ki ri ki la iaid bha. Ki kam shna tiar bad ki kam ai jingshakri ki dang kham iar bad ka jingkiew ka ioh ka kot ka paw bha ha ka jingkhie im biang ka jingdawa mar ha ki jaka nongkyndong, la ong u Dr. Nageswaran.

U CEA u la ong ba ki kam die jaka kin kyntiew ia ki kam kiba iadei bad ki mar shna iing.

U Dr. Nageswaran u la ong ba ka jingpeit bniah jong ka Sorkar Pdeng ia ka jingpynlut pisa ha kine ki snem ka la rung sha ki kam shimet bad ka la rung ruh ha ki Sorkar Jylla. U CEA u la ong ba ka jingkiewdor ki mar ka dei kaba dang tehlakam hynrei ka long kaba donkam ban peit bha ia kane.

Ha ka jingpynkut, u Dr. Nageswaran u la ong:

• Ka jingbei tyngka bad ka jingkiew ka jingpyndonkam ia ki mar kan pynkhlain ia ka jingkiew shaphrang ha une u snem ban wan
• Ki kam shimet ki don ha ka khep ban wanrah ia ka jingkiew ka jingbei tyngka hadien ka jingpynkhlain ia ki balance sheet jong ki kompani bad ki bank ba kyrshan da ka jingpynkhlain ka Sorkar ia ka Capex.
• Ka jingkiewdor ki mar bam kan sa kham suki lyngba ka jingpoi jong ki mar ba thymmai ha ki iew bad ki sienjam jong ka Sorkar.
• Ka jingpyniar ia ki rynsan digital ia ki paidbah bad ki sienjam kum ka GatiShakti, ka National Logistics Policy, bad ki skhim Production-Linked Incentive kin kyntiew ia ka jingpynmih mar.

Shon hangne ban ioh ia ka jingkren u CEA

Shon hangne ban ioh ia u kyrwoh na ka MOSPI

****