Ka sienjam POSHAN Abhiyaan jong ka Sorkar Pdeng ka la don ka bynta kaba khraw ha kaba iadei bad ka bam kaba tei na ka bynta ki longkmie ba dang pun khun, ki longkmie kiba dang rit khun, ki khynnah kynthei samla bad ki khynnah rit kiba dang hapoh hynriew snem. La sdang ia kane ka POSHAN (Prime Minister’s Overarching Scheme for Holistic Nutrition) Abhiyaan da u Myntri Rangbah Duh bad ka treikam ha ka rukom mission mode ban ialeh pyrshah ia ka jingeh jong ka jingbym ioh ia ka bam kaba tei. Ha ka samoi jong ka Financial Commission kaba 15, ka Poshan Abhiyaan, ka Skhim Anganwadi Services bad ka Skhim na ka bynta ki khynnah Kynthei ki dei kiba la pyniatrei lang hapoh ka Mission Saksham Anganwadi bad Poshan 2. Ban sdang ia ka prokram ai jingkyrshan na ka bynta ka jingioh ia ka bam kaba tei kaba thmu ban pynkhlain ia ki kam. Ka jingpeit bniah ka don ha ka jingwanrah ia ki rukom im rukom treikam kiba kyntiew ia ka koit ka khiah, ka bha ka miat bad ka jingiada na ki jingpang bad ka jingduna ha ka jingioh ia ki bam ba tei.

Ka tnat Women and Child Development kan rakhe ia ka Rashtriya Poshan Maah kaba 6 baroh shi bnai ha u Nailur 2023. Mynta u snem, ka thong ka dei ban pynduh ia ka jingbym ioh ia ka bam kaba tei lyngba ka rukom im, ka mat ba kongsan jong ka Mission Poshan 2.0. Kaba long nongrim ha kane ka rukom treikam, ka mat ba kongsan jong ka Poshan Maah 2023 ka dei ban wanrah ia ka jingsngewthuh shapahng ki por ba kongsan ha ka jingim, ka por ba pun khun, ka bor ba dang khyllung, ka por ba dang long khynnah rit bad ka por ba dang khie samla. Ka thong ka dei ban wanrah ia ka jingsngewthuh ha kylleng ka India lyngba ka phang kaba don nongrim ha ka "Suposhit Bharat, Sakshar Bharat, Sashakt Bharat" (Ka India kaba riewspah ha ka jingtei met, ka India kaba nang ba stad, Ka India kaba la pynkupbor).

Kane ka prokram kaba baroh shi bnai kan don ki seinjam ha kylleng ka ri ban kyntiew ia ka jingtip lyngba ki prokram kiba peit bniah ia ki phang ba kongsan halor ka Jingai Dud Kmie bad ka Jingai ia Kiwei Kiwei ki Bam. Ki kam kum ka Swasth Balak Spardha (Ka jingiakop halor ka jingkoit jingkhiah ki khynnah) ki thmu ban wanrah ia ka jingiakhun na ka bynta ka jingai ia ki bam ba tei bad ka bha ka miat. Kiwei kiwei ki sienjam kin kynthup ia ka Poshan Bhi Padhai Bhi (Ka bam kaba tei bad ka jingnang jingstad), Ka jingkyntiew ia ka jingioh bam ba tei lyngba ka Mission LiFE (Lifestyle for Environment), Ka jingai jingtip shaphang ka bam kaba tei ia ki riewlum bad ka jingpynbeit ia ki jingeh ba iadei bad ka Anemia lyngba ka ‘Test, Treat, Talk’. Shuh shuh ka sienjam Jan Andolan hapoh ka Poshan Maah kan long kum ka rynsan na ka bynta ka jingrakhe lang hapoh ka prokram 'Meri Mati Mera Desh', kaba rakhe ia ka jingiaid lynti ka ri sha ka jinglaitluid bad ka jingkiew shaphrang.

Yn don ki prokram ai jingtip, ki prokram wad ia ki briew, ki camp bad ki jingleit sha ki iing briew ha ki shnong, block bad distrik ha kaba ki dkhot jong ka imlang sahlang kin ai jingtip shaphang ka bam kaba tei. Ka jingpynshlur ia ka rukom im kaba niewkor ia ki bam kiba tei met da ki briew bad ka imlang sahlang ka long ka bynta kaba kongsan ban pynurlong ia ki thong jong ka Abhiyaan. Ngi dang buddien ia kane ka thong lyngba ka Mission Saksham Anganwadi bad Poshan 2.0.

Ban pynurlong ia kane ka thong, yn rakhe ia ka Rashtriya Poshan Maah ha ka jingiatreilang bad baroh kiba iadon bynta ha kane ka kam naduh ka 1 tarik haduh ka 30 tarik u Nailur. Naduh ba la sdang ia ka Abhiyaan, la pynlong san tylli ki prokram Poshan Maah kiba jop ha kylleng ka ri ha kaba la don ka jingiashim bynta ba shitrhem na ki Jylla/UT bad ruh ki tnat Sorkar. Ha ka Poshan Maah kaba la dep ha u 2022, la don 170 million tylli ki prokram ai jingtip ha ki phang kiba kongsan. Haduh mynta, la pynlong palat 600 million tylli ki prokram kum shi bynta ka Jan Andolan hapoh ki Poshan Pakhwada (Lber) bad ki Poshan Maah (Nailur) man u snem.

Lyngba ki prokram bapher bapher, ka Poshan Maah 2023 ka thmu ban kyntiew ia ka jingiashim bynta ka imlang sahlang ha ka rukom kaba heh bha, da kaba pyndonkam ia ki lad kiba don lyngba ki Panchayat bad ki kynhun ha ki jaka sor ban pynurlong ia ka jingthmu u Myntri Rangbah Duh ban don ka Suposhit Bharat ha ka Amrit Kaal.

****