இந்தியக் குடியரசுத் தலைவர் திருமதி திரௌபதி முர்மு இன்று (ஆகஸ்ட் 23, 2023) கோவாவின் போர்வோரிமில் கோவா சட்டமன்ற உறுப்பினர்களிடையே உரையாற்றினார்.

விழாவில் பேசிய குடியரசுத் தலைவர், பல்வேறு மதங்கள், நம்பிக்கைகள் மற்றும் பிரிவுகளைப் பின்பற்றினாலும் 'ஒரே கோவா' மற்றும் 'ஒரே இந்தியா' என்று நம்பும் இதுபோன்ற மக்களின் பிரதிநிதிகளிடம் உரையாற்றுவதில் மகிழ்ச்சியடைவதாகக் கூறினார். இந்தியாவுடன் ஒற்றுமை என்ற நம்பிக்கை கோவா மக்களிடையே எப்போதும் இருந்து வருகிறது என்று அவர் கூறினார். கோவாவின் விடுதலை இல்லாமல் இந்தியாவின் சுதந்திரமும் முழுமையடையாது என்றும், இந்த உணர்வால், நாடு முழுவதிலுமிருந்து மக்கள் கோவா விடுதலை இயக்கத்தில் பங்கேற்றனர் என்றும் அவர் கூறினார். கோவாவின் சுதந்திரத்திற்காக அரசியல் ஆர்வலர்கள் மற்றும் சிவில் சமூக உறுப்பினர்கள் போராடினார்கள் என்று அவர் கூறினார். கோவாவின் புரட்சியாளர்கள் கோவா விடுதலை இயக்கத்தின் போது இந்திய தேசியக் கொடியையும் 'ஜெய்ஹிந்த்' என்ற கோஷத்தையும் பயன்படுத்தியது, கோவா மக்கள் அந்நிய ஆட்சியிலிருந்து விடுவிக்கப்பட்ட பின்னர் இந்தியாவுடன் ஒருங்கிணைக்க விரும்புகிறார்கள் என்பதற்கான சான்றாகும் என்று அவர் மேலும் கூறினார்.

வளர்ச்சியின் பல அளவுருக்களில் கோவா முன்னணி மாநிலங்களில் ஒன்றாகும் என்று குடியரசுத் தலைவர் கூறினார். இந்த மாநிலத்தில் தனிநபர் மொத்த உள்நாட்டு உற்பத்தி தேசிய சராசரியை விட கிட்டத்தட்ட இரண்டரை மடங்கு அதிகம். நீர் மேலாண்மை, ஏற்றுமதி தயார்நிலை, கண்டுபிடிப்புகள், கல்வி மற்றும் சுகாதாரம் போன்ற அளவுருக்களில் கோவா நாட்டின் முன்னணி மாநிலங்களில் ஒன்றாகும். இருப்பினும், கோவா அரசாங்கமும் மக்களும் கவனம் செலுத்த வேண்டிய ஒரு பகுதி பொது வாழ்க்கை மற்றும் தொழிலாளர்களில் பெண்களின் பங்கேற்பு ஆகும். கோவாவில் பணிபுரியும் பெண்களின் விகிதம் ஒப்பீட்டளவில் குறைவாக உள்ளது என்று அவர் குறிப்பிட்டார். கோவா போன்ற ஒரு தாராளவாத சமூகத்திற்கு இது சரியான சூழ்நிலை அல்ல என்றும், இந்த நிலையை மாற்றுவதற்கான முயற்சிகள் மேற்கொள்ளப்பட வேண்டும் என்றும் அவர் வலியுறுத்தினார்.

நாடாளுமன்றம் மற்றும் மாநில சட்டமன்றங்கள் மக்களின் இறையாண்மையை பிரதிநிதித்துவப்படுத்தும் புனிதமான நிறுவனங்கள் என்று குடியரசு தலைவர்  கூறினார். மக்கள் பிரதிநிதிகள் இந்த புனித தலங்களில் மக்கள் நலன் குறித்து விவாதித்து முடிவுகளை எடுப்பார்கள். எனவே, நடவடிக்கைகளில் உறுப்பினர்களின் அர்த்தமுள்ள மற்றும் பயனுள்ள பங்கேற்பு முக்கியம். கடந்த பல ஆண்டுகளாக, கோவா சட்டமன்ற நடவடிக்கைகள் நேரடி ஒளிபரப்பு செய்யப்பட்டு வருவதாக அவர் குறிப்பிட்டார். இந்த ஒளிபரப்பின் மூலம், சாமானிய மக்கள் தங்கள் பிரதிநிதிகள் எவ்வாறு செயல்படுகிறார்கள் மற்றும் தங்கள் பிரச்சினைகளை சபையில் எழுப்புகிறார்கள் என்பதைப் பார்க்கிறார்கள் என்று அவர் கூறினார். இந்த நேரடி ஒளிபரப்பு மக்களுடனான மக்கள் பிரதிநிதிகளின் உறவை வலுப்படுத்துகிறது, ஆனால் மக்கள் பிரதிநிதிகள் மீது கூடுதல் பொறுப்பை வைக்கிறது. சபையில் அவர்களின் நடத்தை கண்ணியமாக இருக்கும் என்று எதிர்பார்க்கப்படுகிறது. ஆரம்பத்திலிருந்தே, கோவா சட்டமன்றத்தில் விவாதம்-உரையாடல் என்ற ஆரோக்கியமான பாரம்பரியம் இருப்பதைக் கண்டு அவர் மகிழ்ச்சியடைந்தார் . கோவா மக்களின் நம்பிக்கைகள் மற்றும் அபிலாஷைகளை வெளிப்படுத்துவதற்கும் மொழிபெயர்ப்பதற்கும் கோவா சட்டமன்ற உறுப்பினர்கள் தொடர்ந்து நல்ல முன்னுதாரணங்களை உருவாக்குவார்கள் என்று அவர் நம்பிக்கை தெரிவித்தார்.

இன்று இந்தியா மீதான உலக நாடுகளின் அணுகுமுறை மாறியுள்ளது என்று குடியரசுத் தலைவர் கூறினார். நாம் உலகின் ஐந்தாவது பெரிய பொருளாதாரமாக மாறியுள்ளோம், மூன்றாவது பெரிய பொருளாதாரமாக மாற தயாராக உள்ளோம். 'ஒரே பூமி, ஒரே குடும்பம், ஒரே எதிர்காலம்' என்ற தாரக மந்திரத்துடன், இந்தியா, ஜி -20 நாடுகளுடன் இணைந்து, தற்போதைய உலகளாவிய சவால்களுக்கு கூட்டு தீர்வுகளைக் காண முயற்சிக்கிறது. இந்தியாவின் திறனையும் கலாச்சாரத்தையும் வெளிப்படுத்த நமக்கு சரியான வாய்ப்பு உள்ளது என்றும், இந்த வாய்ப்பை நாம் முழுமையாகப் பயன்படுத்திக் கொள்ள வேண்டும் என்றும் அவர் வலியுறுத்தினார். இந்த முக்கியமான காலகட்டத்தில், கோவாவை வளர்ச்சியின் முன்மாதிரியாக நிறுவ கோவா அரசு மற்றும் மக்களின் முயற்சியாக இருக்க வேண்டும், இது மற்ற மாநிலங்களும் பின்பற்றக்கூடியது என்று அவர் கூறினார். இது அமிர்த  காலத்தில் நாட்டிற்கு கோவாவின் முக்கிய பங்களிப்பாக இருக்கும் என்று குடியரசு தலைவர் கூறினார். 

https://pib.gov.in/PressReleasePage.aspx?PRID=1951495

*****  

ANU/AP/PKV/KRS