بھارت دنیا کی فارمیسی بن گیا ہے، اب وقت آگیا ہے کہ بھارت دنیا کی فیکٹری بنے۔ یہ بات ڈاکٹر منسکھ منڈاویا نے ’’بھارت میں گلوبل کیمیکلز اینڈ پیٹروکیمیکل مینوفیکچرنگ ہبز‘‘ (جی سی پی ایم ایچ 3)  کے موضوع پر سمٹ کے تیسرے ایڈیشن کے اختتامی سیشن میں اختتامی خطاب کرتے ہوئے کہی۔ فیڈریشن آف انڈین چیمبرز آف کامرس اینڈ انڈسٹری (ایف آئی سی سی آئی) کے زیر اہتمام جی سی پی ایم ایچ 2023 سمٹ میں مختلف شعبوں اور اسٹیک ہولڈروں نے پرجوش شرکت کی۔

وزیر موصوف نے اس بات پر زور دیا کہ کسی بھی ملک کی معیشت اور خود کفیلی کے لیے ایک متحرک صنعت ضروری ہے۔ اس سلسلے میں انھوں نے صنعت کی مدد کے لیے حکومت کے کردار پر روشنی ڈالی۔ ایک حکومت کے طور پر ہم علامتی طور پر نہیں بلکہ مجموعی طور پر سوچتے ہیں۔ ہم زیادہ سے زیادہ گورننس اور بڑے پیمانے پر صنعت کے لیے کم سے کم حکومت کو یقینی بنانے کے لیے ایک جامع ماحولیاتی نظام کی تعمیر کرنا چاہتے ہیں۔ ڈاکٹر منڈاویا نے مزید تجاویز طلب کیں جو اس شعبے میں مثبت تبدیلی اور ترقی کے لیے جدید اور پائیدار حل کو آگے بڑھائیں گی۔

کیمیکلز اور فرٹیلائزرز کی مرکزی وزارت کے کیمیکلز اور پیٹرو کیمیکلز ڈپارٹمنٹ کے سکریٹری جناب ارون بروکا نے دو روزہ تقریب کا احاطہ کرتے ہوئے کہا، ’’اس سمٹ نے مرکزی اور ریاستی حکومتوں کے ساتھ ساتھ صنعت کے درمیان بات چیت کے لیے ایک مشترکہ پلیٹ فارم کے طور پر کام کیا ہے۔ ‘‘ انھوں نے کیمیکلز اور پیٹرو کیمیکلز کی صنعت کے بعض ضروری حصوں جیسے فنڈنگ کے ساتھ ساتھ ماحولیاتی کلیئرنس پر بھی توجہ مرکوز کی جو اس ایونٹ کے موضوع سے ہم آہنگ تھے۔

اس تقریب میں متعدد صنعتی رہنماؤں نے شرکت کی جن کی شمولیت نے صنعت کی پائیدار ترقی کو آگے بڑھانے میں اہم کردار ادا کیا ہے۔

***

(ش ح – ع ا – ع ر)

U. No. 7688