'రూరల్ వాష్ పార్టనర్స్ ఫోరమ్' (ఆర్‌డబ్ల్యూపీఎఫ్‌) రెండు రోజుల జాతీయ సదస్సు ముగింపు సందర్భంగా, ఇవాళ, కేంద్ర జలశక్తి మంత్రి శ్రీ గజేంద్ర సింగ్ షెకావత్ 75 ODF ప్లస్ ఉత్తమ విధానాల సంకలనాన్ని ఆవిష్కరించారు. 'స్వచ్ఛత క్రానికల్స్: ట్రాన్స్‌ఫార్మేటివ్ టేల్స్ ఫ్రమ్ ఇండియా' పేరుతో ఈ సంకలనాన్ని రూపొందించారు. ఎస్‌బీఎం-జి రెండో దశ లక్ష్యాలను చేరుకోవడానికి వివిధ ODF ప్లస్ కార్యకలాపాల కోసం రాష్ట్రాలు/యూటీలు చేసిన ప్రయత్నాలు, అడ్డంకులను అధిగమించడానికి & ప్రజల్లో అవగాహన పెంచడానికి తీసుకొచ్చిన ఆవిష్కరణలు, ప్రత్యేక ప్రచారాలను ఈ సంకలనం వివరిస్తుంది.

"ODF ప్లస్‌ను సాధించడానికి కృషి చేస్తున్న రాష్ట్రాలు, వర్గాలకు ఈ సంకలనం విలువైన వనరు"గా  కేంద్ర మంత్రి శ్రీ షెకావత్ అభివర్ణించారు. "దేశవ్యాప్తంగా అమలైన ఉత్తమ విధానాలను ఇది వివరిస్తుంది, ఆ విజయాలను అనుసరించేలా ఇతరులకు స్ఫూర్తిని అందిస్తుంది" అన్నారు.

స్వచ్ఛ భారత్ మిషన్ గ్రామీణ ఐఈసీ బృందం ఈ సంకలనాన్ని రూపొందించింది. ఎస్‌బీఎంజీ రెండో దశ నేపథ్యాంశాల అమలుకు సంబంధించిన కథనాలు ఇందులో ఉంటాయి. ఈ కింది కీలక ప్రమాణాల ఆధారారంగా కథనాలను ఎంపిక చేశారు:

ఆవిష్కరణలు: ODF ప్లస్‌ను సాధించడానికి అనుసరించిన వినూత్న విధానాలను ఈ విభాగం వివరిస్తుంది. ఉదాహరణకు, ఒడిశా రాష్ట్రంలో, బ్లాక్ స్థాయిలో సామాజిక భాగస్వామ్యం & నాయకత్వం వల్ల ఖోర్ధా జిల్లాలోని జితికర్ సువాన్‌లో గ్రామం ఎలా ODF ప్లస్ నమూనా గ్రామం హోదాను సాధించిందో ఈ సంకలనం వివరిస్తుంది. ODF ప్లస్ ఆస్తుల ప్రత్యక్ష నమూనాలను ప్రదర్శించడం (ఘన, ద్రవ వ్యర్థాలను సమర్థవంతంగా నిర్వహించడం) ద్వారా ఉత్తరప్రదేశ్‌లోని శ్రావస్తి జిల్లా ODF ప్లస్ స్థితిని ఎలా సాధించిందో వెల్లడిస్తుంది.

అడ్డంకులను అధిగమించడం: ODF ప్లస్‌ను సాధించడంలో ఎదురైన సవాళ్లు, వాటిని ఎలా అధిగమించింది అనే విషయాలను ఈ విభాగం చర్చిస్తుంది. ఉదాహరణకు, తమిళనాడు రాష్ట్రంలో నమ్మ ఊరు సూపరు ప్రచారంలో భాగంగా, ఘన వ్యర్థాల నిర్వహణ కోసం వినూత్నంగా చేపట్టిన కార్యక్రమం వల్ల మదురై జిల్లాలోని పెరి-అర్బన్ పంచాయతీల్లో చాలా సవాళ్లు ఎదురయ్యాయి.

అవగాహన పెంచడం: పారిశుద్ధ్యం గురించి అవగాహన పెంచడానికి తీసుకున్న చర్యలను ఈ విభాగం చాటి చెబుతుంది. ఉదాహరణకు, ఉత్తరప్రదేశ్‌లోని ఫతేపూర్ జిల్లాలోని ప్రభుత్వ పాఠశాలల పిల్లలు, 'వాష్ వాణి' అనే పత్రిక నిర్వహిస్తున్నారు. గ్రామీణ ప్రాంతాల్లో శుభ్రత అలవాట్లను ప్రోత్సహించేలా తమ సృజనాత్మక శక్తిని ఉపయోగిస్తున్నారు.

ప్రత్యేక ప్రచారాలు: ODF ప్లస్‌ సాధించడానికి ప్రారంభించిన ప్రత్యేక కార్యక్రమాలను ఈ విభాగం వివరిస్తుంది. ఉదాహరణకు, 'స్వచ్ఛ్ సాగర్', 'సురక్షిత్ సాగర్' ‍‌(పరిశుభ్ర సముద్రం, సురక్షిత సముద్రం) కార్యక్రమాలు తీసుకొచ్చిన గుజరాత్ ప్రభుత్వం, రాష్ట్రంలోని సముద్ర తీరాలను శుభ్రంగా ఉంచడానికి, తద్వారా పర్యావరణాన్ని పరిరక్షించేందుకు చర్యలు చేపట్టింది.

‘స్వచ్ఛత క్రానికల్స్: ట్రాన్స్‌ఫార్మేటివ్ టేల్స్ ఫ్రమ్ ఇండియా’ చదవడానికి ఇక్కడ క్లిక్ చేయండి

*****