হকশেল অমসুং য়াইফ-য়ুম্বাল মন্ত্রালয়
স্বাস্থ্য চিন্তন সিভিরনা হকশেলগী লমদা লাস্ত মাইল কন্নেক্তিবিতীগী ৱাখল্লোন্দা হেন্না নকশিলহনবদা মতেঙ পাংগনি: দেহরাদুন্দা পাঙথোকপা হকশেল মন্ত্রালয়গী স্বাস্থ্য চিন্তন সিভিরগী নিনি চনবা নুমিত্তা দোক্তর মনসুখ মন্দাবিয়ানা হায়খ্রে
"প্রধান মন্ত্রী তি.বি. মুক্ত ভারত অভিয়ান্দা মীয়াম্না শরুক য়াশিনবনা তি.বি. লৈতবা ভারত ওইহনবদা চাউনা মতেঙ ওইগনি; ঐনা স্তেতশিংগী মফমদা মীয়ামদা থোরক্তুনা নি-ক্ষে মিত্র ওইনবা ৱাফম থম্বিয়ু হায়জরি"
"ইলিজিবল ওইবা বেনিফিসরী অমত্তা চিত্থহৌদনবগীদমক হকশেলগী স্কীম পুম্নমক মপুং ফানা অমদি শিনবা থুংনা কোনশিন্নবা হোৎনবা মথৌ তাই"
Posted On:
15 JUL 2023 2:18PM by PIB Imphal
“স্বাস্থ্য চিন্তন সিভিরনা হকশেলগী লমদা লাস্ত মাইল কন্নেক্তিবিতী পুরকপগী ৱাখল্লোন্দা হেন্না নকশিলহনবদা মতেঙ পাংগনি। হৌখিবা নুমিৎ নিনিসিদা, ঙসি ভারত্তা হকশেলগী সেক্তরদা লৈরিবা মচা খায়বা ফীভম অমদি য়ুনিভর্সেল হেল্থ কভরেজ ফংহন্নবগী লমদা ঐখোয়না চঙশিনগদবা মায়কৈ ঐখোয়না উখ্রে।” ৱাফম অসি কেন্দ্রগী হকশেল মন্ত্রী দোক্তর মনসুখ মন্দাবিয়ানা, উত্তরাখন্দগী মুখ্য মন্ত্রী শ্রী পুস্কর সিংহ ধমী, সিক্কিমগী মুখ্য মন্ত্রী শ্রী প্রেম সিংহ তমাং, অমদি হকশেল অমসুং য়াইফ-য়ুম্বালগী কেন্দ্রগী রাজ্য মন্ত্রী প্রোফেসর এস.পি. সিংহ বঘেলসু শরুক য়াখিবা স্বাস্থ্য চিন্তন সিভিরদা থৌরম মপু ওইনা শরুক য়ারদুনা ফোঙদোকখিবনি। শ্রী ধন সিংহ রাৱত (উত্তরাখন্দ), শ্রীমতী রাজিনি বিদাদলা (অন্ধ্র প্রদেশ), শ্রী অলো লিবাং (অরুনাচল প্রদেশ), শ্রী কেসব মহন্ত (অসাম), শ্রী রুসিকেস পতেল (গুজরাত), শ্রী বন্না গুপ্তা (ঝার্খন্দ), শ্রী দিনেস গুন্দু রাও (কর্নাতকা), শ্রী সাপম রঞ্জন সিংহ (মনিপুর), দোক্তর আর. লালথ্যাংলিয়ানা (মিজোরম), শ্রি থিরু মা. সুব্রমনিয়ম (তানিল নাদু) য়াওনা হকশেল মন্ত্রী কয়াসু ব্রেনস্তোর্মিং কনক্লেবতুদা শরুক য়াখি। শ্রী তি.এস. সিংহ দিও (উপ মুখ্য মন্ত্রী অমদি হকশেল মন্ত্রী, ছত্তিসগর), শ্রী ব্রজেস পাথক (উপ মুখ্য মন্ত্রী, অমদি হকশেল মন্ত্রী, উত্তর প্রদেশ), শ্রী বি.এস. পন্ত (তুরিজম অমদি সিভিল এভিএসন মন্ত্রী, সিক্কিম), শ্রী বিস্বাস সারং (স্তেত মেদিকেল এজুকেসন মন্ত্রী, মধ্য প্রদেশ), শ্রী কে. লক্সমী নারায়নন (পব্লিক ৱর্ক্স মন্ত্রী, পুদুচেরী)সু থৌরমদুদা শরুক য়াখি।
![https://static.pib.gov.in/WriteReadData/userfiles/image/image0025698.jpg](https://static.pib.gov.in/WriteReadData/userfiles/image/image0025698.jpg)
প্রধান মন্ত্রী তি.বি. মুক্ত ভারত অভিয়ানগী মতাঙদা, “লৈবাকসিদগী তি.বি.গী পোৎলুম থাংথনবগীদমক মীয়াম্না শরুক য়াশিনবা য়াম্না মরুওই। তি.বি. মুত্থৎপগী লমদা ঐখোয়না চঙশিল্লিবা অসিনা ভারতবু তি.বি. লৈতবা মফম ওইহনবদা চাউনা কান্নগনি,” হায়না দোক্তর মন্দাবিয়ানা হায়খি। মহাক্না স্তেতশিংদা তি.বি. মুত্থৎপদা মরুওইবা মীৎয়েঙ থম্নবা অমদি মসিদা মখা তানা খোঙজেল হাপ্নবা ৱাফম থমখি। মহাক্না স্তেতশিংগী মফমদা লৈবাকসিগী দিসএবিলিতী সর্ভিফিকেৎ পীবদা হেন্না লায়থোকহন্দুনা দিব্যং মীয়ামদা ঙাক্লৌ পীননবা ৱাফমসু থমখি।
দোক্তর মন্দাবিয়ানা ইলিজিবল ওইবা বেনিফিসরী অমত্তা চিত্থহৌদনবা হকশেলগী স্কীম পুম্নমক মপুং ফানা অমদি শিনবা থুংনা কভরেজ তৌহনবা মথৌ তাই হায়বা ৱাফম থম্বগা লোয়ননা চিন্তন সিভির অসিনা হৌজিক লৈরিবা হেল্থকেয়র ফষসিলিতীশিং কমদৌনা ফীভম ফগৎহনগনি, লোয়ননা লৈবাক শিনবা থুংনা মথৌ তারিবা অনৌবা ইন্তরভেন্সনশিংগী মতাঙদা সজেসন পীবা ঙমগনি হায়বগী থাজবা ফোঙদোকখি।
“মফমসিদা শরুক য়ারিবা পুম্নমক্তগী ফংখিবা ইনপুৎশিংদগী হৌখিবা নুমিৎ নিনিসিদা হেল্থকেয়রগী লমদা মপুং ফাবা পেরাদাইম অমা শেম্লে, অমদি ঙসি ঐখোয়না পাস তৌরিবা ৱারেপ অসি, পান্দমশিং অসি মথঙগী চহি ফাওবদা ফংবা ঙম্নবগীদমক, থবক ওইনা পাঙথোকপা মথৌ তাই,” হায়না স্বাস্থ্য চিন্তন সিভির অদুদা নিতি আয়োগকী মেম্বর (হকশেল) দোক্তর ভি.কে. পোলনা ফোঙদোকখি।
![https://static.pib.gov.in/WriteReadData/userfiles/image/image003PDRG.jpg](https://static.pib.gov.in/WriteReadData/userfiles/image/image003PDRG.jpg)
নুমিৎ নিনিগী ওইবা থৌরমদুগী অরোয়বা নুমিত্তা, অয়ুস্মান ভব, নেস্নেল ত্যুবরকুলোসিস ইলিমিনেসন প্রোগ্রাম, ইলিমিনেসন ওফ মীজল্স এন্দ রুবেলা অমদি পি.সি.পি.এন.দি.তি. এক্ত য়াওনা ভারত্তা ঙসি ওইরিবা হেল্থকেয়রগী তোঙান তোঙানবা মায়ওনশিংগী মতাঙদা সেসনশিং পাঙথোকখি।
হকশেল অমদি য়াইফ-য়ুম্বাল মন্ত্রালয়গী সেক্রেতরী শ্রী রাজেস ভুসন, হকশেল অমদি য়াইফ-য়ুম্বাল মন্ত্রালয়গী ওফিসর ওন স্পিসিএল দ্যুতী শ্রী সুধান্স পন্ত, অয়ুসকী সেক্রেতরী শ্রী ভৈদ্য রাজেস কোতেচা, দিপার্তমেন্ত ওফ হেল্থ রীছর্চ সেক্রেতরী দোক্তর রাজিব বাহল, হকশেল অমদি য়াইফ-য়ুম্বাল মন্ত্রালয় অমদি স্তেতশিংগী মকোক থোংবা ওফিসিএলশিং, লোয়ননা ইন্দস্ত্রী বোদীশিংগী লুচিংবশিংসু থৌরমদুদা শরুক য়াখি।
****
(Release ID: 1939750)
Visitor Counter : 107