دو روزہ وزیٹر کانفرنس آج نئی دہلی میں اختتام پذیر ہوئی۔ صدر جمہوریہ ہند، محترمہ دروپدی مرمو نے آج (11 جولائی 2023) راشٹرپتی بھون میں وزیٹر کانفرنس 2023 کی اختتامی تقریب سے خطاب کیا۔ تعلیم اور ہنرمندی کے فروغ اور صنعت کاری کے مرکزی وزیر جناب دھرمیندر پردھان، وزیر مملکت برائے تعلیم جناب سبھاس سرکار، وزارت تعلیم کے سینئر افسران اور آئی آئی ٹی، این آئی ٹی، آئی آئی ایس ای آر، این آئی پی ای آر،  سنٹرل یونیورسٹیوں وغیرہ جیسے 150 سے زیادہ اعلیٰ تعلیمی اداروں کے سربراہان نے وزیٹر کانفرنس میں شرکت کی۔

کانفرنس میں دوسرے دن ’’پائیدار ترقی کے لیے تعلیم: ایک بہتر دنیا کی تعمیر‘‘ کے تھیم  پر بات ہوئی۔ پانچ الگ الگ گروپوں نے  ذیلی موضوعات جیسے قومی تعلیمی پالیسی -2020 کو پورا کرنے کے لیے تعاون؛ بین الاقوامی کوششیں اور جی-20؛ تحقیقی شراکت اور پہچان؛ تنوع، مساوات، شمولیت اور تندرستی؛ امرت کال کے لیے منصوبے اور کارروائی پر تفصیلی روشنی ڈالی۔ بات چیت کے نتائج صدر جمہوریہ کے سامنے پیش کیے گئے۔

اپنے اختتامی کلمات میں صدر مرمو نے کہا کہ اس کانفرنس کا تھیم اور ذیلی موضوعات ہمارے ملک کے ساتھ ساتھ پوری دنیا کے لیے انتہائی اہم تھے۔ انہوں نے کہا کہ کانفرنس میں پیش کیے گئے خیالات جامع اور قابل عمل ہیں۔

صدر جمہوریہ نے کہا کہ پالیسی کی اہمیت اسے عملی جامہ پہنانے سے ہی ثابت ہوتی ہے۔ نتائج ثابت کرتے ہیں کہ پالیسی کو مؤثر طریقے سے نافذ کیا گیا ہے۔ مثال کے طور پر، ’ڈیجیٹل انڈیا‘ پہل کے ذریعے، ہندوستانی سماج کو ڈیجیٹل طور پر بااختیار بنانے اور ملک کی معیشت میں تبدیلی لانے کا ہدف مقرر کیا گیا ہے۔ اس اقدام کے نتائج بہت متاثر کن رہے ہیں۔ مؤثر نفاذ اور عوام کی شرکت سے بہت کم وقت میں انقلابی تبدیلی ممکن ہوئی ہے۔ انہوں نے اس یقین کا اظہار کیا کہ اعلیٰ تعلیم کے میدان میں بھی ایسے ہی تبدیلی اور جامع نتائج حاصل کیے جائیں گے۔

’تحقیقی شراکت اور پہچان‘ کے ذیلی تھیم کے بارے میں بات کرتے ہوئے صدر جمہوریہ نے کہا کہ اختراعات اور جدید تحقیق و ترقی کسی قوم کی معاشی اور سماجی ترقی کے اہم محرکات میں سے ہیں۔ دنیا کی معروف یونیورسٹیوں اور ٹیکنالوجی کے اداروں نے جدت پر توجہ مرکوز کی ہے۔ وہ ایک ماحولیاتی نظام فراہم کرتے ہیں جو تحقیق اور ترقی کی حمایت کرتا ہے، جس کا اطلاق صنعتی اور تجارتی شعبوں میں کیا جا سکتا ہے۔ انہوں نے کہا کہ ہمارے ملک کے اعلیٰ تعلیمی ادارے تحقیق اور اختراعات کا پاور ہاؤس بننے کی صلاحیت رکھتے ہیں۔ انہیں یہ جان کر خوشی ہوئی کہ ہندوستان میں اعلیٰ تعلیمی ادارے بنیادی تحقیق کی روایت کو برقرار رکھتے ہوئے اسٹارٹ اپس، اپلائیڈ ریسرچ اور تجارتی اعتبار سے قابل قدر اختراعات کو فروغ دینے کی طرف منتقل ہو رہے ہیں۔ انہوں نے اس یقین کا اظہار کیا کہ اعلیٰ تعلیم کے اداروں کے سربراہان اپنے اداروں کو ان اختراعات کو فروغ دینے کی طرف لے جائیں گے جنہیں صنعتی اور تجارتی مقاصد کے لیے استعمال کیا جا سکتا ہے۔

صدر جمہوریہ نے نشاندہی کی کہ ترقی یافتہ ممالک اپنے اعلیٰ تعلیمی اداروں کے لیے بھی جانے جاتے ہیں۔ دنیا بھر کے طلباء ان ممالک کے اعلیٰ تعلیمی اداروں میں تعلیم حاصل کرنا چاہتے ہیں۔ انہوں نے کہا کہ ہندوستان کی قومی تعلیمی پالیسی - 2020 میں اس طرح کا روڈ میپ دیا گیا ہے، جس کے بعد ہمارے اعلیٰ تعلیمی ادارے بھی عالمی تعلیمی مراکز بن سکتے ہیں۔ انہوں نے اس یقین کا اظہار کیا کہ ہمارے اعلیٰ تعلیمی ادارے عالمی معیار کے علم کی تخلیق کے مراکز بن جائیں گے۔

صدر جمہوریہ کی تقریر ملاحظہ کرنے کے لیے براہ کرم لنک پر جائیں:

اپنے اختتامی کلمات میں، جناب دھرمیندر پردھان نے اس بات پر زور دیا کہ تعلیمی برادری اساتذہ اور تعلیمی اداروں کی صلاحیت کو بڑھانے، ٹیکنالوجی کو اپنانے کے ساتھ ساتھ امرت پیڑھی کو بااختیار بنانے، عالمی بھلائی کے لیے عالمی معیار کی تحقیق کی حوصلہ افزائی کرنے اور یہ بھی یقینی بنانے کے لیے پرعزم ہے کہ ہندوستان تعلیم کے مضبوط ستونوں پر مبنی امرت کال میں ایک بڑی چھلانگ لگائے۔ انہوں نے اس بات پر بھی روشنی ڈالی کہ قومی تعلیمی پالیسی 2020 کی جڑیں ہندوستانیت میں پیوست ہیں اور این ای پی کے تحت این سی آر ایف اور این آر ایف جیسے اقدامات دنیا، خاص طور پر جنوبی دنیا کے لیے ایک معیار بن جائیں گے۔

پانچ اجلاس کے دوران، جناب دھرمیندر پردھان نے اس بارے میں بات کی کہ کس طرح قومی تعلیمی پالیسی 2020 کے وژن کی تکمیل اجتماعی کوششوں، مشترکہ مہارت، مشترکہ چیلنجز اور مواقع اور غیر متزلزل عزم کا تقاضا کرتی ہے۔ تکشیلا اور نالندہ کو قدیم زمانے کا بین الاقوامی تعلیمی مرکز قرار دیتے ہوئے انہوں نے اس بات پر زور دیا کہ اب وقت آگیا ہے کہ اس وراثت کو زندہ کیا جائے۔ انہوں نے عالمی سطح پر اثر پیدا کرنے کے لیے ایک نئے ہندوستان اور اس کے اداروں کی تعمیر کے بارے میں بات کی۔ انہوں نے اس بارے میں تفصیلی بات چیت کی کہ کس طرح ادارے قومی تعلیمی پالیسی 2020 کے روڈ میپ کے مطابق معاشرے کی ترقی اور قومی ترقی کے لیے مزید اسٹریٹجک شعبوں میں تحقیق کو مربوط کرنے کی خاطر حدود کو آگے بڑھا سکتے ہیں۔ جناب پردھان نے اس بات کو نمایاں کیا کہ کیسے ذہنی اور جذباتی تندرستی طلباء کے تحرک، فوکس اور لچکداری پر مثبت اثر ڈالتی ہے اور طلباء کے درمیان اور فلاح و بہبود کو فروغ دے کر، ادارے طلباء کو کیمپس اور زندگی میں ترقی کے لیے اوزار اور وسائل فراہم کر سکتے ہیں۔ انہوں نے اس بات پر بھی زور دیا کہ اعلیٰ معیار کی تعلیم کو صرف اعلیٰ معیار کی تعلیم سے ہی یقینی بنایا جا سکتا ہے جو تبھی ممکن ہو گا جب ادارے ایک دوسرے کا ہاتھ تھامیں اور اجتماعی کوششوں کے ذریعے ایک دوسرے کی رہنمائی کریں۔

یونیورسٹی گرانٹس کمیشن (یو جی سی) کے چیئرمین، پروفیسر ممدالا جگدیش کمار نے ’این ای پی-2020 کی تکمیل میں شراکت‘ پر پینل بحث کی سربراہی کی۔ اس سیشن میں، وزارت تعلیم کی طرف سے کی گئی تمام کوششوں کا خلاصہ پیش کیا گیا جس کے بعد مختلف اداروں کی جانب سے اس کے کامیاب/جاری نفاذ کی کیس اسٹڈیز پیش کی گئیں۔ اس میں پروفیسر ابھے کرانڈیکر، ڈائرکٹر، آئی آئی ٹی، کانپور اور پروفیسر ٹی وی کٹی منی، وائس چانسلر، سینٹرل ٹرائبل یونیورسٹی آف آندھرا پردیش کی پریزنٹیشنز تھیں۔ سیشن کا مشاہدہ اور نظامت پروفیسر شانتی شری دھولیپوڈی پنڈت، وائس چانسلر، جے این یو نے کی۔ اس بات پر تبادلہ خیال کیا گیا کہ اعلیٰ تعلیمی اداروں کو ٹیکنالوجی کے انضمام پر زیادہ سے زیادہ زور دینے کی ضرورت ہے۔ قومی ڈیجیٹل یونیورسٹی (ای-وشو ودیالیہ) سے امید کی جاتی ہے کہ وہ معیاری تعلیم کو ہمارے ملک کے ایک بڑے طبقے تک قابل رسائی بنائے گی۔ ویسے تو بہت سے اداروں نے بین الاقوامیت کی طرف قدم اٹھایا ہے، تاہم دنیا کی اعلیٰ یونیورسٹیوں کے ساتھ تعلیمی تعاون بڑھانے اور غیر ملکی طلباء کو ہندوستان میں تعلیم حاصل کرنے کی طرف راغب کرنے کی ضرورت ہے۔ ہمارے اداروں کو ہماری تحقیقی صلاحیتوں کو مزید بڑھانے اور اختراعات اور انکیوبیشن کا ایک متحرک ماحولیاتی نظام بنانے کی ضرورت ہے جو خود کفیل ملک کے لیے اپنا کردار ادا کرے۔

دوسرا اجلاس ’بین الاقوامیت کی کوششیں اور جی 20‘ پر تھا اور اس پینل کی صدارت پروفیسر سدھیر کے جین، وائس چانسلر، بنارس ہندو یونیورسٹی کر رہے تھے۔ اجلاس میں دو پریزنٹیشنز پیش کی گئیں۔ آئی آئی ٹی دہلی کے ڈائریکٹر پروفیسر رنگن بنرجی نے بین الاقوامیت کی کوششوں، کامیابیوں، چیلنجوں اور آگے بڑھنے کے راستے پر پریزنٹیشن دی۔  این آئی ٹی راؤرکیلا کے ڈائرکٹر، پروفیسر کے اما مہیشور راؤ نے مواقع، چیلنجز، اور بین الاقوامیت کے لیے آگے کے راستے پر زور دیتے ہوئے، اسٹڈی ان انڈیا پروگرام کے بارے میں قیمتی بصیرت فراہم کی۔ اس اجلاس کا مشاہدہ اور نظامت آئی آئی ٹی (بی ایچ یو، وارانسی) کے ڈائریکٹر، پروفیسر پرمود کے جین نے کی۔ اجلاس میں ہمارے اداروں کے سامنے موجود مواقع اور چیلنجز پر تبادلہ خیال کیا گیا کیونکہ وہ اپنی عالمی مصروفیات کو بڑھانے کے لیے کام کر رہے ہیں۔ بین الاقوامی طلباء اور فیکلٹی کی دو طرفہ نقل و حرکت کو فروغ دینے، تحقیقی تعاون کو بڑھانے، ہمارے اداروں کی بین الاقوامی شبیہ بنانے اور ہندوستان کو عالمی تعلیمی ماحولیاتی نظام میں سب سے آگے رکھنے کی ہماری کوششوں کو حکمت عملی بنانے کے طریقوں پر قابل قدر تجاویز دی گئیں۔

تیسرا اجلاس ’تحقیقی تعاون اور پہچان‘ پر تھا۔ پروفیسر کے رادھا کرشنن، سابق چیئرمین، خلائی کمیشن/ سکریٹری، خلائی محکمہ اور چیئرمین، اسرو نے پینل کی سربراہی کی۔ اس اجلاس میں تعلیمی سال 23-2022 کے دوران فیکلٹی اور طلباء کی کچھ نمایاں تحقیقی شراکتوں کی وضاحت پیش کی گئی۔ اس اجلاس میں ان افراد اور گروپوں کی تفصیلات بھی فراہم کی گئیں جنہیں ان کی شراکت کے لیے نوازا گیا اور ان کی شراکت کی مختصر تفصیلات بھی فراہم کی گئیں۔ اس میں اس بات پر بھی روشنی ڈالی گئی کہ بہت سے اداروں کو تسلیم کیا گیا اور انہیں مہارت والے اداروں کا درجہ دیا گیا اور خاطر خواہ فنڈنگ فراہم کی گئی جس کے نتیجے میں مثبت تبدیلیاں آئیں۔ پروفیسر گووندن رنگراجن، ڈائرکٹر آئی آئی ایس سی بنگلور اور پروفیسر بسوتکر جے راؤ، وائس چانسلر، حیدرآباد یونیورسٹی نے قابل ذکر پریزنٹیشن پیش کیں۔ اس پینل کی نظامت جامعہ ملیہ اسلامیہ کی وائس چانسلر پروفیسر نجمہ اختر نے کی۔ سائنس اور ٹیکنالوجی میں ترقی کی تیز رفتار کو ’رکاوٹ پیدا کرنے والی ٹیکنالوجیز‘ اور ’چوتھے صنعتی انقلاب‘ 4 آئی آر کے تصورات سے اجاگر کیا گیا اور مثال دی گئی جو گزشتہ دہائی میں وضع کیے گئے تھے، جیسا کہ زیر بحث آیا۔ پائیدار ترقی کے اہداف، ایس ڈی جی 2030 کے لیے اجتماعی عالمی مہم کا بھی ذکر کیا گیا، جس میں ماحولیاتی تبدیلیوں اور آنے والے قدرتی خطرات کے بارے میں بڑھتی ہوئی عالمی تشویش پر زور دیا گیا۔ تحقیق میں فضیلت اور مطابقت کو یقینی بنانا ہمارے تعلیمی اور آر اینڈ ڈی برادری میں ایک لازمی قومی ضرورت اور ایک درست مطالبہ کے طور پر نشان زد کیا گیا۔

چوتھا اجلاس ’تنوع، مساوات، شمولیت اور فلاح و بہبود‘ پر تھا اور پینل کی سربراہی پروفیسر وی کام کوٹی، ڈائریکٹر، آئی آئی ٹی مدراس کر رہے تھے۔ اس اجلاس میں ڈی ای آئی اور فلاح و بہبود کی کوششوں پر اداروں کی طرف سے کی جانے والی تمام کوششوں پر تبادلہ خیال کیا گیا۔ ڈی ای آئی کی کوششوں میں صنفی تعصب کو کم کرنا، قائدانہ کرداروں میں خواتین کی شرکت کو بہتر بنانے کے لیے جسمانی طور پر معذور افراد کے لیے زندگی کی آسانی کو یقینی بنانا شامل تھا۔ آئی آئی ایس ای آر تروپتی کے ڈائریکٹر پروفیسر شانتنو بھٹاچاریہ اور این آئی ٹی کالی کٹ کے ڈائریکٹر پروفیسر پرساد کرشن نے اجلاس کے موضوع پر بصیرت انگیز پریزنٹیشنز دیں۔ اجلاس کی نظامت پروفیسر پربھا شنکر شکلا، وائس چانسلر، این ای ایچ یو نے کی۔ بحث و مباحثہ نے اپنے طلباء اور اساتذہ کی خوشی، فلاح اور ترقی کو یقینی بنانے کے بارے میں وسیع پیمانے پر تجاویز پیش کیں۔ بحث کے محور میں قومی تعلیمی پالیسی کے مطابق داخلے کے مجموعی تناسب کو بہتر بنانے اور ڈراپ آؤٹ کی شرح کو کم کرنے میں اعلیٰ تعلیمی اداروں کا کردار بھی شامل تھا۔

پانچواں اجلاس ’’امرت کال کے لیے منصوبہ بندی اور کارروائی‘‘ پر تھا اور پینل کی صدارت جناب ٹی جی سیتارام، چیئرمین، اے آئی سی ٹی ای کر رہے تھے۔ اس اجلاس میں اداروں کے اسٹریٹجک منصوبوں پر توجہ مرکوز کی گئی جس میں صنعت کاری اور اختراع پر زور دیا گیا۔ مرکزی خیال ’’2047 میں ایک ٹیکنالوجی سپر پاور کے طور پر ہندوستان‘‘ تھا۔ اجلاس میں پبلک پالیسی ورکشاپ، اسٹارٹ اپس کی کامیابی کی کہانیاں اور قومی مشن بشمول سپر کمپیوٹنگ، سائبر فزیکل سسٹم، سیمی کنڈکٹر وغیرہ اور تعلیمی اداروں کے کردار کے بارے میں بات کی گئی۔ پروفیسر رجت مونا، ڈائرکٹر، آئی آئی ٹی گاندھی نگر اور دہلی یونیورسٹی کے وائس چانسلر پروفیسر یوگیش سنگھ نے اگلے 25 سالوں کے لیے اعلیٰ معیار کی تعلیم اور قیادت کو یقینی بنانے کے لیے کیے گئے اقدامات پر تبادلہ خیال کیا۔ انہوں نے آئی آئی ٹی اور ڈی یو کے بہترین طور طریقوں کا بھی اشتراک کیا۔ اس اجلاس کا مشاہدہ اور نگرانی پروفیسر راجیو آہوجہ، ڈائریکٹر، آئی آئی ٹی روپڑ نے کی۔ اس اجلاس میں، بات چیت اس بات پر مرکوز تھی کہ کس طرح ہندوستان کا تعلیمی نظام زبردست ترقی کے لیے تیار ہے جو کہ قومی تعلیمی پالیسی 2020 کے ذریعے موزوں ہے۔ اعلیٰ تعلیم کے ادارے ایک مناسب تعصب سے پاک منظوری اور جائزہ کے نظام، ڈیٹا کی توثیق کے لیے ’’پیئر سورسنگ‘‘ کے ساتھ ساتھ شفاف درجہ بندی کا نظام ہندوستانی تعلیمی نظام کے معیار کو مزید بہتر بنائے گا۔

صدر جمہوریہ ہند نے 10 جولائی 2023 کو راشٹرپتی بھون میں وزیٹر کانفرنس 2023 کا افتتاح کیا۔ اپنے افتتاحی خطاب میں صدر جمہوریہ نے کہا کہ تعلیم فرد، سماج اور ملک کی ترقی کے لیے بہت ضروری ہے۔ انہوں نے یہ بھی کہا کہ سماجی اور معاشی طور پر پسماندہ گروہوں سے آنے والے نوجوانوں کو یکساں اور جامع اعلیٰ تعلیم فراہم کرنا قومی تعلیمی پالیسی 2020 کی ترجیحات میں شامل ہیں۔ انہوں نے وزیٹر کانفرنس 2023 کے موقع پر تعلیمی اداروں کے سربراہوں سے ملاقات کی۔

وزیٹر کانفرنس 2023 کے حاشیہ پر کل شام راشٹرپتی بھون میں ممتاز سابق طلباء/مفاد کاروں کے ایک گروپ نے بھی صدر جمہوریہ سے ملاقات کی۔ بات چیت کے دوران، صدر جمہوریہ نے تعلیم اور سماج کے کاز میں تعاون کے لیے ان کی تعریف کی۔ مرکزی وزیر جناب دھرمیندر پردھان بھی اس موقع پر موجود تھے۔ جناب راکیش گنگوال، انڈیگو ایئر لائنز کے شریک بانی؛ جناب مکتیش پنت، یم چین کے سابق سی ای او؛ جناب سبروتو باگچی، مائنڈ ٹری کے شریک بانی؛ پرشانت پرکاش، شریک بانی اور پارٹنر، ایکسل انڈیا؛ ڈاکٹر شریدھر شکلا، شریک بانی، چیئرمین، کے پوائنٹ ٹیکنالوجیز؛ سٹیئس ٹیک کے شریک بانی اور سی ای او رضوان کوئیٹا؛ جناب وکرم گپتا، بانی اور منیجنگ پارٹنر، آئیوی کیپ ونچرز ایڈوائزرس پرائیویٹ لمیٹڈ؛ جناب ٹی ٹی جگن ناتھن، ٹی ٹی کے پریسٹیج کے چیئرمین؛ جناب نیمش شاہ، ای نام کے شریک بانی اور فلیم یونیورسٹی کے بورڈ آف گورنر؛ ایچ سی ایل ٹیکنالوجیز کی چیئرپرسن اور شیو نادر یونیورسٹی کی ٹرسٹی محترمہ روشنی نادر؛ اور پیرامل گروپ کے چیئرمین جناب اجے پیرامل نے اپنی شریک حیات کے ساتھ بات چیت میں شرکت کی۔

صدر جمہوریہ نے کل شام افتتاحی تقریب میں وزیٹر ایوارڈز 2021 بھی تقسیم کیا۔ سلیکان فائبر شیٹ کا استعمال کرتے ہوئے مزاحمتی پلیٹ چیمبر ڈیٹیکٹر کے لیے دیسی چارج پک اپ پینلز تیار کرنے سے متعلق ’انوویشن‘ کے لیے وزیٹر ایوارڈ اسکول آف فزیکل اینڈ کیمیکل سائنسز، سینٹرل یونیورسٹی آف ساؤتھ بہار کے پروفیسر وینکٹیش سنگھ کو دیا گیا۔ ’فزیکل سائنسز میں تحقیق‘ کے لیے وزیٹر ایوارڈ اسکول آف فزکس، حیدرآباد یونیورسٹی کے پروفیسر سراجیت دھارا کو نرم مادے اور مائع کرسٹل میں ان کے کام کے لیے پیش کیا گیا۔ ڈاکٹر ہری سنگھ گور وشو ودیالیہ، ساگر سے پروفیسر محمد لطیف خان کو مشرقی ہمالیہ اور وسطی ہندوستان میں جنگلات کی حیاتیاتی تنوع کو سمجھنے، آر ای ٹی (نایاب، خطرے سے دوچار اور زوال آمادہ) پودوں کی انواع کی تخلیق نو اور جنگلات کی خطرے کی حالت کے جائزے میں ان کے تعاون کے لیے ’حیاتیاتی سائنس میں تحقیق‘ کے لیے وزیٹر ایوارڈ ملا۔ ’ٹیکنالوجی ڈیولپمنٹ‘ کے لیے وزیٹر ایوارڈ اسکول آف فزکس، حیدرآباد یونیورسٹی کے پروفیسر کے سی جیمز راجو کو فیرو الیکٹرک پتلی فلموں کا استعمال کرتے ہوئے فریکوئنسی ٹیون ایبل مائیکرو ویو آلات میں ان کی شراکت کے لیے دیا گیا۔ صدر جمہوریہ نے وزیٹر ایوارڈ، 2020 برائے فزیکل سائنسز کی تحقیق کے لیے پروفیسر انونے سامنتا، اسکول آف کیمسٹری، حیدرآباد یونیورسٹی کو ان کی قلیل المدتی کیمیکل انواع کی تصویر کشی پر تشکیل کردہ سالماتی نظام اور مادہ میں تحقیقی شراکت کے لیےدیا۔

*****

ش ح – ق ت – ت ع

U: 6935