য়ুনিয়ন হোম অমসুং কোওপরেশন মিনিস্তর, শ্রী অমিত শাহনা ঙসি শ্রিনাগরদা চাউরাক্না লুপা করোর ৫৮৬কী দেবেলপমেন্ত প্রোজেক্ত ৮৪ শঙ্গাখ্রে অমসুং উরেপ-উয়ুং তমখ্রে।

শ্রী অমিত শাহনা মহাক্কী ৱারোল অদুদা হায়খি মদুদি প্রধান মন্ত্রী, শ্রী নরেন্দ্র মোদীগী লুচিং মখাদা, ঙসিদি জম্মু অমসুং কাশ্মিরগী চাউখৎ-থৌরাংগী খোংচত্তা অনৌবা মাইলস্তোন অমা ফংবা ঙমখ্রে।মহাক্না হায়খি মদুদি চাউরাক্না মী লাখ ২২ রোম কান্নহনগদবা অমসুং মখোয়গী পুন্সিশিংবু হেন্না লাইহনগদবা চাউরাক্না লুপা করোর ৫৮৬ রোমগী চাউখৎ-থৌরাংগী ওইবা থবক কয়া অমগী উরেপ উয়ুং তমখ্রে অমসুং শঙ্গাখ্রে। শ্রী শাহনা হায়খি মদুদি য়ুম অমদা থক্নবা অশেংবা ঈশিং য়ৌহনবা মতমদা, অথাপ্পা মফমশিংদগী ঈশিং শোকপআ চৎলিবা নুপীশিংগী অৱাবশিং অদুবু কোকহনবদা নত্তনা ইমুং পুম্বগী হকশেলবুশু য়াম্না হেন্না ফগৎহল্লগনি। অদুগা লোইননা তমপাক্কী অঙাংশিং অদুবু মতম অসিগী ওইবা মহৈ-মশিং ফংহন্নবা স্কুল ১০০শু লৈবাক অসিগী অতোপ্পা মফমশিংগা মান্নবা মোদর্নাইজ তৌখ্রে। মহাক্না হায়খি মদুদি , প্রধান মন্ত্রী, শ্রী নরেন্দ্র মোদীনা মরু ওইনা তমপাক্তা জম্মু অমসুং কাশ্মিরগী মীয়ামদা নুংঙাইবা পুন্সি অমগী হক পীনবগীদমক্তা জম্মু অমসুং কাশ্মিরদা শিংথানিংঙাই ওইবা অহোংবশিং পুরক্নবা ফিরেপ লৌখ্রে।

শ্রী শাহনা হায়খি মদুদি প্রধান মন্ত্রী, শ্রী নরেন্দ্র মোদীনা জম্মু অমসুং কাশ্মিরগী নাগ্রিক খুদিংমক্তা লুপা লাখ ৫ ফাওবগী হকশেলগী চাদিংশিং অদুবু য়েংশিল্লগনি। মহাক্না হায়খি মদুদি মসিগী স্কীম অসি লৈবাক অসিগী মফম শিনবা থুংনা লাইরবশিংগী খক্তমক চৎনহনখি অদুবু জম্মু অমসুং কাস্মিরগীদমক্তদি, প্রধান মন্ত্রীনা এস.ই.ঐচ.এ.তি.গা লোইননা প্রধান মন্ত্রী আয়ুশমান ভারত য়োজনাগা লিঙ্ক তৌদুনা য়ু.তি.গী নাগ্রিক খুদিংমক্কী কোভর তৌখি। মহাক্না মখা তাখি  মদুদি হৌখিবা চহি ৫দা, শ্রী মোদীগী লুচিং মখাদা জম্মু অমসুং কাশ্মিরদা গ্রাসরুত লেভেলদা পীপল-ওরিয়েন্তেদ গোবর্নেন্স থমখ্রে।

জম্মু অমসুং কাশ্মিরদা হান্নগী সরকারনা পাল্লিঙৈ মতমদা দেমোক্রেসী অসি মী ৮০-৮৫ খক্তগী ওইখি অমসুং ইমুং ৩না দেমোক্রেসীবু কন্ত্রোল তৌখি, মসিগী মীশিং অসিনা পঞ্চায়তকী মীখল পাংথোকহনখিদে, পাঞ্চ-সরপঞ্চ খনবা য়াহনখিদে অমসুং তেহসিল অমসুং জিলাগী পঞ্চায়তশিং শেম্বা য়াহনখিদে।শ্রী শাহনা হায়খি মদুদি হৌজিক্তি জম্মু অমসুং কাশ্মিরদা দেমোক্রেসী লৈরে মরমদি মীখলদা খনগৎলবা মীহুৎ ৩৫,০০০না মখোয় মশামক্না মখোয়গী খুঙ্গং, তেহসিল অমসুং জিলা অসিগী তুংলমচৎ লেপ্লি। মহাক্না হায়খি মদুদি লাক্কদবা নুমিৎশিংদা, এম.পি.শিং, এম.এল.এ.শিং অমসুং মীশিং অসিদগী  অনৌবা লুচিংবশিং থোরক্লনি। মহাক্না হায়খি মদুদি পি.এম. মোদীনা লুচিংবা সরকারনা জম্মু অমসুং কাশ্মিরদা গ্রাসরুতশিংগী থাক্তা পঞ্চায়তি রাজ পুরক্তুনা দেমোক্রেসী লৈহন্নবা অমসুং দেমোক্রেসীবু হেন্না কনখৎহন্নবা থবক তৌখি। শ্রী শাহনা হায়খি মদুদি মফম অসি ইমুং অহুমনা পানবা জম্মু অমসুং কাশ্মির ওইদ্রে। শ্রী মোদীনা জম্মু অমসুং কাশ্মিরদা পঞ্চায়তি রাজ অশেংবা ওইনা হৌদোকখ্রে হায়না মহাক্না হায়খি। শ্রী মোদীনা দেমোক্রেসীবু য়াম্না লুম্না খঞ্জৈ অমসুং মহাক্না অসুম্না খনবা অসিনা জম্মু অমসুং কাশ্মিরদা অহোংবা পুরকপা ঙম্লিবনি হায়না মহাক্না হায়খি।

শ্রী শাহনা হায়খি মদুদি নুং থোম্বগী থৌদোকশিং, য়ুমলোন্নবা লৈবাকশিংনা ইনশিন্দুনা তৌহনবা বন্ধশিং অদু য়াম্না তাংনা থোকখি অমসুং অকি-তুজুংগী থৌদোকশিং অসি জম্মু অমসুং কাশ্মিরদা লাকশিনবা ঙম্লকখি। মহাক্না হায়খি মদুদি ঙসিদি মফম অসিদা স্কুলশিং, কোলেজশিং, ইন্দস্ত্রীশিং চলাইবা হৌরে, ২০২২দা জম্মু অমসুং কাশ্মিরদা তুরিস্ত করোর ১.৮৮না লাকখি, হায়রিবা অসি নিংতম্লবা মতুংদা খ্বাইদগী য়াম্বা মশিংনি। শ্রী শাহনা হায়খি মদুদি জম্মু অমসুং কাশ্মিরদা মশিং অসুক য়াম্লবা তুরিস্তশিং অসিনা লাকপনা মরম ওইরগা, লমদম অসিদা লৈবা হোতেল কাশিংগী মশিং, মরু ওইনা তমপাক্তা মথংগী চহি ৫দা শরুক অহুম থোক্না হেনগৎলগনি। মহাক্না হায়খি মদুদি অহোংবা পুরকপা পাম্বগী ফিরেপ লৈরবা মতমদতা মসিগী অহোংবশিং অসি পুরকপা ঙমগনি। কনাগুম্বা অমনা করিগুম্বা শাসন পান্নবখক্কী খল্লগা অমসুং শক্তি পাইনিংবা খক্কী লাকপা তারবদি, মহাক্না অহোংবা অমত্তা পুরকপা ঙম্লোই, করিগুম্বা ৱাখলনা মীয়ামগী নুংঙাইবা, অৱাবা অমসুং খুমাং চাউখৎপদা শরুক য়াবা মতমদতা অহোংবা পুরকপা ঙমগনি।

য়ুনিয়ন হোম অমসুং কোওপরেশন মন্ত্রীনা হায়খি মদুদি নাগ্রিক লাখ কয়া অমনা জম্মু অমসুং কাশ্মিরদা লৈরিবা অপিকপা স্কীম কয়া অমদগী কান্নবা ফংখি। মহাক্না হায়খি মদুদি প্রধান মন্ত্রী, শ্রী নরেন্দ্র মোদীনা জম্মু অমসুং কাশ্মিরগী লৌমী লাখ ১২.৪৫দা লোন লৌবগী মথৌ তাদনবা মখোয়গী বেঙ্ক একাউন্তশিংদা চহি খুদিংগী লুপা ৬,০০০ পীখি। শ্রী শাহনা হায়খি মদুদি প্রধান মন্ত্রী ফসল বিমা য়োজনাগী মখাদা, জম্মু অমসুং কাশ্মিরগী লোমীশিংনা চহি অহুমদা লুপা করোর ১০০ ফংখ্রে। জল জীৱন মিসনগী মখাদা, ইমুং লাখ ১১.৯৬ এনবদা ফ্লোরাইদ য়াওদবা তোতিগী ঈশিং পীনবা থবক তৌখি। মহাক্না হায়খি মদুদি নিংতম্লবা মতুং চহি ৭০গী মতুংদা ফাওবা মখোয়গী য়ুমশিংদা তোইলেতশিং লৈতবা ইমং লাখ ১৩.৪০গী মথক্তা লৈরম্মি, অমসুং হায়রিবা য়ুমশিং অসিদা চহি ৫ খক্কী মনুংদা তোইলেতশিং শাখি। মহাক্না হায়খি মদুদি প্রধান মন্ত্রী, শ্রী নরেন্দ্র মোদীগী লুচিং মখাদা সরকারনা জম্মু অমসুং কাশ্মিরগী মী লাখ ৬৫.৯১ হেনবদা শেল অমত্তা চংদনা লেম্না থা খুদিংগী মী খুদিংদা চেং কে.জি. ৫ পীখি। সরকারনা চাউরাক্না মী লাখ ১.৮৬তা য়ুমশিংশু পীখি। দি.বি.তি. স্কীমগী মখাদা, হৌখিবা চহি মরি অসিদা বেনিফিসরীশিংগী বেঙ্ক একাউন্তশিংদা লুপা করোর ২৩,০০০ ত্রান্সফর তৌখি। মহাক্না হায়খি মদুদি মমাংদা, শেল সেঙ্কশন তৌরম্মি অদুবু য়ৌহন্নিংবা বেনিফিসরিশিংদা কৈদৌনুংদা য়ৌখিদে। শ্রী শাহনা হায়খি মদুদি মীয়াম্না হায়রিবা মীশিং অসিদা কালেন থাদা নুমিৎ ৪৫-৬০গী কোইবা চত্তুনা নুংঙাইথোক্লিবা মপান লৈবাক্তা অচৌ-অচৌবা য়ুমশিং অদু মতৌ করম্না শারিবনো। মহাক্না হায়খি মদুদি দি.বি.তি. স্কীমগী মখাদা, বেনিফিসরীশিংগী বেঙ্ক একাউন্তশিংদা লুপা করোর ২৩,০০০ দাইরেক্ত ত্রান্সফর তৌখ্রে, মমাংদশু, শেল অসি সেঙ্কশন তৌরম্মি অদুবু করপ্সন্না মরম ওইরগা শেলশিং অদু মৎপীখি, অদুবু হৌজিক্তি মসিবু কনা অমত্তনা শোকপা ঙমদ্রে।

শ্রী শাহনা হায়খি মদুদি প্রধান মন্ত্রী, শ্রী নরেন্দ্র মোদীনা জম্মু অমসুং কাশ্মিরদা এ.আই.আই.এম.এস., আই.আই.এম.এস., আই.আই.তি.শিং অমসুং আই.আই.আই.তি.শিং পীখি। মহাক্না হায়খি মদুদি সরকার অসিনা দাল লেক অসিবু লৈবাক অসিগী খ্বাইদগী হেন্না পুক্নিং চিংশিন্নিংঙাই ওইবা তুরিস্ত সেন্তর অমা ওইহন্নবগীদমক্তা প্রেলিমিনরী বেসিস্তা লুপা করোর ৮৫গী স্কীম শেমখি। লৈবাক অসিগী মফম কয়াদগী অঙাংশিংনা লাক্কদবা মতমশিংদা দাল লেক অমসুং তেত্তু গ্রাউন্দদা চৎপা পাম্লগনি। মহাক্না হায়খি মদুদি মসিনা জম্মু অমসুং কাশ্মিরদা তুরিজম হেনগৎহনবদা মতেং পাংগনি।শ্রী শাহনা হায়খি মদুদি স্রিনাগর স্মার্ত সিতি লিমিতেদকী মখাদা, মল্তি-লেভেল পার্কিং, স্মার্ত লাইতিং, ইন্তিগ্রেতেদ কমান্দ অমসুং পার্কশিং শেমগৎপা য়াওনা প্রোজেক্ত কয়া অমা লুপা করোর ৩৪৫ চংনা পাংইখৎখি। অনৌবা মেদিকেল কোলেজশিং, দিগ্রী কোলেজশিং, নর্সিং কোলেজশিংশু হাংদোকখ্রে। মহাক্না হায়খি মদুদি হন্দক্তা স্রিনাগরদা জি.-২০ কনফরেন্স মাইপাক্না পাংথোকখ্রে অমসুং তংদু লৈতাবা জম্মু অমসুং কাশ্মির পাউজেল অসি মালেম শিনবা থুংনা য়ৌখি। মহাক্না হায়খি মদুদি মালেমগী তোঙান-তোঙানবা মফমশিংদগী তুরিস্তশিংনা জম্মু অমসুং কাশ্মিরদা লাক্লিবা অহোংবশিং অসিবু নিংথিজনা পাউ ফাওনরবা মতুংদতা লমদম অসিদা লাক্কনি অমসুং মরম অসিগীদমক্তা, জি.-২০ অসি খ্বাইদগী চাউবা প্লেতফোর্ম অমনি।

য়ুনিয়ন হোম মিনিস্তরনা হায়খি মদুদি পঞ্চায়তি রাজ সীস্তেমগী মখাদা, পঞ্চায়ত্তা ফন্দশিং দাইরেক্ত ওইনা থাজিল্লে, মসিনা মখোয়দা মখোয়গী খুঙ্গং শেমগৎ-শাগৎনবগী হক পীখি।  মহাক্না হায়খি মদুদি জম্মু অমসুং কাশ্মিরদা অহোংবা লক্লি। অহোংবা অসিদা শরুক য়ানবা জম্মু অমসুং কাশ্মিরগী নহাশিংদা আপীল তৌরদুনা, য়ুনিয়ন হোম মিনিস্তরনা হায় মদুদি খুত্তা খুৎলাইগী মহুত্তা লেপতোপ পাইদুনা জম্মু অমসুং কাশ্মির অমসুং লৈবাক অসিগী চাউখৎ-থৌরাংদা শরুক য়াবনা তুংগী লম্বি লৈ। লৈবাক অমসুং মালেম পুম্বনা লমদম অসিগী নহাশিংগী মাইকৈদা য়েংলক্লি হায়না মহাক্না হায়খি। জম্মু অমসুং কাশ্মিরগী নহাশিং, মরু ওইনা তমপাক্কী নহাশিংনা চোংথোরক্তুনা অমসুং অহোংবগী থৌওংদা লুচিংনবা অমসুং জম্মু অমসুং কাশ্মিরবু অনৌবা পান্দমশিং অমসুং অৱাংবা থাক্তা পুখৎনবগী মাইকৈদা থবক তৌগদবনি। মহাক্না তম্পাক অদুগী নহাশিংদা মখোয়গী মখুত্তা নুং অমসুং খুৎলাই পাইরিবশিং অদু ঐখোয়গী অফ-নুংঙাই খনবশিং নত্তে। মহাক্না হায়খি মদুদি সরকার অসিনা লেপতোপশিং, ইলেক্ত্রিসিতীশিং ফংহন্দুনা, লম্বি-থোংশিং শেমদুনা অমসুং তুরিজম য়োকখত্তুনা মখোয়গী তুং লমচৎশিং ফগৎহন্নবা হোৎনরি। শ্রী শাহনা হায়খি মদুদি পুংজা অসিগী খ্বাইদগী হেন্না মথৌতাবা অসি অহোংবা লাকপা অদুবুনি অমসুং তমপাক্তগী নহাশিংনা মসিদা মতেং পাংগদবনি।  মহাক্না নহাশিংদা মখোয়গীদমক্তা অহোংবনা ঙাইদুনা লৈরি হায়না হায়খি, লেবাক পুম্বনা মখোয়বু মাংলোমদা পুখৎনবা শেম-শাদুনা লৈরে, অমসুং মালেম পুম্বগী মার্কেতনা তমপাক্কী নহাশিংগীদমক্তা থোং লাওনা হাংদুনা লৈরে হায়না হায়খি। মখোয়না চোংথোরক্তুনা অমসুং অহোংবা অসিগী শরুক অমা ওইদুনা অমসুং প্রধান মন্ত্রী নরেন্দ্র মোদীগী অনৌবা কাশ্মির অমা শেম্নবগী ফিরেপ অদুবু মপুং ফাহন্নবা ৱাশক লৌগদবনি হায়না মহাক্না হায়খি। অহোংবা পামদবশিংনা নহাশিংগী য়াইফ-থৌরাংগী মায়োক্তা লৈবশিংনি হায়না মহাক্না হায়খি। মালেম অসিনা খুমাং চাউশিনখ্রে অমসুং হৌজিক্তি জম্মু অমসুং কাশ্মিরনা লৈবাক অসিগা অমসুং মালেম অসিগা লোইননা চৎমিন্নবগী মতম ওইরে।

*****